ថ្លែងនៅក្នុងសន្និសីទសារព័ត៌មាន លោក អ៊ឹង ឌីប៉ូឡា ដែលជាអ្នកនាំពាក្យក្រសួងរ៉ែ និងថាមពលផងនោះ បានបញ្ជាក់ទៀតថា វិស័យរ៉ែបានបង្កើតការងារចំនួន ១ម៉ឺន២ពាន់នាក់។ ក្នុងនោះមានស្ត្រី ៧ភាគរយដែលជាចំនួនស្របតាមស្តង់ដារអន្តរជាតិ។ ក្រៅពីបញ្ហាចំណូលនេះ មន្ត្រីជាន់ខ្ពស់ក្រសួងរ៉ែ និងថាមពលបានអះអាងថា គ្រោះថ្នាក់នៅក្នុងអណ្តូងរ៉ែ ក៏មានកាន់តែតិចទៅៗដែរ។ ពោលគឺនៅក្នុងរយៈពេល ៦ខែដើមឆ្នាំនេះ មិនមានករណីស្លាប់កម្មករនៅក្នុងអណ្តូងរ៉ែនោះទេ វៀរលែងតែការធ្វើអាជីវកម្មរ៉ែអនាធិបតេយ្យ។
លោក អ៊ឹង ឌីប៉ូឡា ក៏មិនភ្លេចបញ្ជាក់ទៀតថា រដ្ឋាភិបាលក៏បានប្រមូលចំណូលបានច្រើនពីការនាំចេញខ្សាច់។ ពោលគឺក្នុងរយៈពេល ៥ឆ្នាំចុងក្រោយនេះ រដ្ឋប្រមូលចំណូលបានពីសួយសារអាករ និងអាករនាំចេញចំនួនជាង ៤៥០លានដុល្លារ។ បើគិតទាំងចំណូលពន្ធដារទៀត ចំណូលចូលរដ្ឋដែលបានពីការនាំចេញខ្សាច់ជាសរុប មានចំនួនប្រមាណ ៦០០លានដុល្លារ។
ក្រៅពីចំណូលបានពីការនាំចេញខ្សាច់ លោក អ៊ឹង ឌីប៉ូឡា ក៏បញ្ជាក់ថា រដ្ឋាភិបាលក៏ប្រមូលចំណូលសួយសារអាករពីការនាំចេញថ្មអាបានចំនួនប្រមាណជាង ១០លានដុល្លារក្នុងមួយឆ្នាំៗ។ ចំពោះរ៉ែមាសវិញ តាំងពីខែមិថុនា ឆ្នាំ២០២០ កម្ពុជាផលិតបានមាសចំនួន ២០តោនមាស។ ចំណែកដែក កម្ពុជាបាននាំចេញផលិតដែកពាក់កណ្តាលសម្រេចក្នុងមួយឆ្នាំប្រមាណ ១លានតោនផងដែរ។ នេះបើតាមលោក អ៊ឹង ឌីប៉ូឡា។
គួរជ្រាបថា ចំណូលបានពីវិស័យរ៉ែមានទំហំធំមួយសម្រាប់ជាប្រភពចំណូលចូលជាតិ។ យ៉ាងណាមិញ វិស័យថ្ម និងខ្សាច់សំណង់ក្នុងស្រុកត្រូវបានមន្ត្រីជាន់ខ្ពស់ក្រសួងរ៉ែ និងថាមពលដដែលរូបនេះមើលឃើញថាមានតម្រូវការធ្លាក់ចុះ។ ធ្លាក់ចុះ ដោយសារស្ថានភាពសេដ្ឋកិច្ចពិភពលោក និងការអភិវឌ្ឍក្នុងស្រុកមានការប្រែប្រួលតាំងពីវិបត្តិជំងឺកូវីដ ១៩មក។ គួររម្លឹកដែរថា ក្នុងឆ្នាំ២០២៥ ក្រសួងរ៉ែ និងថាមពល បានប្រកាសពីការប្រមូលចំណូលសួយសារបានប្រមាណជាង ១៣៥លានដុល្លារអាមេរិក និងនៅឆ្នាំ២០២៤ ក្រសួងប្រមូលបានចំនួនជាង ៩៤ លានដុល្លារ។ ដោយឡែកនៅឆ្នាំ២០២៣ ក្រសួងរ៉ែ និងថាមពលបានប្រមូលចំណូលពីសួយសារពីការធ្វើអាជីវកម្មរ៉ែគ្រប់ប្រភេទបានត្រឹមជាង ៦០ លានដុល្លារអាមេរិកប៉ុណ្ណោះ៕
ប្រភព៖ RFI | ដោយ៖ ហ៊ុល រស្មី
