ក្រោមអធិបតីភាពលោកប្រធានាធិបតី លី ចែម្ញុង រដ្ឋាភិបាលកូរ៉េខាងត្បូងបានប្រកាសបង្ហាញអំពីគម្រោងវិនិយោគដ៏ធំមហាសាល ក្នុងវិស័យបច្ចេកវិទ្យាបញ្ញាសិប្បនិម្មិត។ ក្នុងរយៈពេល១០ឆ្នាំទៅមុខ កូរ៉េខាងត្បូងគ្រោងវិនិយោគ ទឹកប្រាក់ចំនួន ១៨០០លាន ពាន់លានវ៉ុន ដែលស្មើនឹងប្រមាណ១០០ម៉ឺនលានអឺរ៉ូ។ ទំហំវិនិយោគនេះ មានទឹកប្រាក់ស្មើនឹង ២ភាគ៣ នៃចំណូលដុលក្នុងស្រុករបស់កូរ៉េខាងត្បូង ក្នុងឆ្នាំ២០២៥។
យោងតាមលោក Kim Jung-Kwan រដ្ឋមន្ត្រីក្រសួងឧស្សាហកម្មកូរ៉េខាងត្បូង គំរោងទីមួយមានទឹកប្រាក់វិនិយោគ ៨សែនពាន់លានវ៉ុន ឬ ៤៥៥ពាន់លានអឺរ៉ូ នឹងសាងសង់រោងចក្រចំនួន៤ ដើម្បីផលិតឧបករណ៍សឺមីកុងឌុកទ័រ ២របស់ក្រុមហ៊ុន Samsung Electronics និង២ទៀត របស់ក្រុមហ៊ុន SK Hynix។ ចំណែកគំរោងធំមួយទៀត មានទឹកប្រាក់ ១ពាន់លានពាន់លានវ៉ុន ស្មើនឹង៥៦៨ពាន់លានអឺរ៉ូ នឹងវិនិយោគសាងសង់ទីតាំងស្តុកទិន្នន័យ ឬ Data Center ច្រើនទីតាំង។ ទីតាំងស្តុកនិន្នន័យថ្មីៗទាំងនេះ នឹងមានកម្លាំងចរន្ត ដល់ទៅ១០ជីហ្កាវ៉ាត់ស៍។ ពោលគឺកូរ៉េខាងត្បូងនឹងមានកម្លាំងស្តុកទិន្នន័យសរុប ចំនួន ១៨,៤ជីហ្កាវ៉ាត់ស៍ នៅរវាងឆ្នាំ២០៣៥។ នេះបើផ្អែកតាមការបញ្ជាក់ របស់លោក Bae Kyung-Hoon រដ្ឋមន្ត្រីក្រសួងវិទ្យាសាស្ត្រកូរ៉េខាងត្បូង។
គួរកត់សំគាល់ថា នេះជាការប្រកាសគម្រោងវិនិយោគដ៏ធំទី៣ហើយ ក្នុងវិស័យAI ក្នុងរយៈពេលមិនដល់១ឆ្នាំផង។ តែលើកនេះទំហំទឹកប្រាក់ ច្រើនខ្លាំងលើគំរោង២មុនៗ ដែលកូរ៉េខាងត្បូងបានប្រកាសកាលពីចុងឆ្នាំ២០២៥ គឺគម្រោងរបស់ Sumsung ទឹកប្រាក់ ៤៥ម៉ឺនពាន់លានវ៉ុន និងគម្រោងរបស់ Hyundai Motor ក្នុងទឹកប្រាក់ ១២៥០០០ពាន់លានវ៉ុន។ លោករដ្ឋមន្ត្រីឧស្សាហកម្មកូរ៉េខាងត្បូង បានអះអាងថា តាមរយៈគម្រោងធំៗទាំងនេះ គឺកូរ៉េខាងត្បូងនឹងបន្តឈរជើងជាប្រទេសនាំមុខគេ នៅលើទីផ្សារបច្ចេកវិទ្យាទំនើប។ ការវិនិយោគទាំងនេះ គឺជាយុទ្ធសាស្ត្រ ដើម្បីនាំមុខឧស្សាហកម្មផលិតសឺមីកុងឌុកទ័រ ដែលពិភពលោកត្រូវការកាន់តែខ្លាំង។ ក្រៅពីឧបករណ៍សឺមីកុងឌុកទ័រ ឧស្សាហកម្មកូរ៉េខាងត្បូងមានមហិច្ឆតានាំមុខគេ ក្នុងវិស័យផលិតបន្ទះមេម៉ូរីជំនាន់ថ្មី ដែលមានកម្លាំងខ្លាំង លឿនរហ័សនិងស៊ីភ្លើងតិច។
សូមបញ្ជាក់ថា គម្រោងវិនិយោគAI ថ្មីៗទាំងនេះ នឹងមានទីតាំងនៅតំបន់ Honam ភាគនិរតីកូរ៉េខាងត្បូង។ លោក Lee Jong-Hwan សាស្ត្រាចារ្យជំនាញវិស្វកម្មសឺមីកុងឌុកទ័រ នៅសកលវិទ្យាល័យSangmyung បានលើកឡើងថា ការជ្រើសរើសយកតំបន់ Honam ដែលជាតំបន់ជនបទមិនសូវមានហេដ្ឋារចនាសម្ព័ន្ធ អាចជាឧបសគ្គមួយដើម្បីសម្រេចគម្រោង ព្រោះថាភាគច្រើននៃបុគ្គលិកជំនាញក្នុងវិស័យបច្ចេកវិទ្យាទំនើប គឺប្រមូលផ្តុំនៅតំបន់ក្បែរៗទីក្រុងសេអ៊ូល។
គួរជំរាបជូនថា កាលពីខែឧសភាកន្លងទៅ លោក Kim Ypng-Beom ទីប្រឹក្សាគោលនយោបាយរបស់លោកប្រធានាធិបតី លី ចែម្ញុង បានលើកឡើងថា កូរ៉េខាងត្បូងកំពុងតែក្លាយជា “សេដ្ឋកិច្ចបច្ចេកវិទ្យាផ្តាច់មុខ ដែលប្រមូលផ្តុំប្រាក់ចំណេញដ៏ច្រើនសន្ធឹក បានមកពីបច្ចេកវិទ្យាសឺមីកុងឌុកទ័រ”។ លោកម្នាក់នេះ បានស្នើយកប្រាក់ពន្ធដ៏ច្រើនសន្ធឹកប្រមូលបានពីវិស័យបច្ចេកវិទ្យា យកទៅចំណាយឧបត្ថម្ភឲ្យបានច្រើន លើវិស័យសង្គមកិច្ច លើគម្រោងជួយយុវជន ជួយសិល្បៈករ និងកម្មវិធីផ្តល់ប្រាក់ចំណូលមូលដ្ឋាន ដល់សហគមន៍ប្រជាជននៅទីជនបទដាច់ស្រយាល ឬអ្នកនេសាទជាដើម។
លោក Kim Jung-nam សាស្ត្រាចារ្យនៅវិទ្យាស្ថានជាន់ខ្ពស់វិទ្យាសាស្ត្រនិងបច្ចេកវិទ្យា បានលើកឡើងថា យុគសម័យAI បានហុចអត្ថប្រយោជន៍ហិរញ្ញវត្ថុ ប្រាក់ចំណេញទៅឲ្យក្រុមមនុស្សតែមួយក្តាប់តូចប៉ុណ្ណោះ។ ប្រសិនបើកូរ៉េខាងត្បូង ចង់ក្លាយជាមហាអំណាចAI ដែលពិភពលោកទទួលស្គាល់និងគោរពកោតសរសើរ គឺកូរ៉េខាងត្បូង ត្រូវតែរៀបចំយុទ្ធសាស្ត្រគោលនយោបាយ បែងចែកប្រាក់ចំណេញបានមកវិស័យនេះ ឲ្យបានដល់ប្រជាជនគ្រប់មជ្ឈដ្ឋាន។ ចំណុចនេះ វានឹងក្លាយជាគម្រូសម្រាប់ពិភពលោក ដើម្បីរៀបចំក្របខណ្ឌបទដ្ឋានច្បាប់និងគុណធម៌នៅក្នុងវិស័យបច្ចេកវិទ្យា AI ៕
ប្រភព៖ RFI | ដោយ៖ ម៉ម ពិសី
