រដ្ឋាភិបាលបានបង្កើតក្រុងបូកគោថ្មីមួយនៅឧទ្យានជាតិព្រះមុនីវង្សបូកគោ ដែលជាទីតាំងនៃគម្រោងអភិវឌ្ឍន៍ដ៏ធំរបស់ឧកញ៉ា សុខ គង់ ដែលបណ្តាលឲ្យមានការព្រួយបារម្ភពីក្រុមអ្នកបរិស្ថាន។
អនុក្រឹត្យ ដែលចុះហត្ថលេខាដោយលោកនាយករដ្ឋមន្រ្តី ហ៊ុន សែន នៅថ្ងៃទី១៦ ខែ មីនា បានសម្រេចឲ្យបង្កើតទីក្រុងថ្មីដោយកាត់យកឃុំចំនួន៣ដែលមានស្រាប់ពីស្រុកទឹកឈូគឺឃុំបឹងទូក ឃុំកោះតូច និង ឃុំព្រែកត្នោត។
លោក សុខ គង់ ជាមហាសេដ្ឋីដ៏មានឥទ្ធិពល បច្ចុប្បន្នកំពុងអភិវឌ្ឍគម្រោងលំនៅដ្ឋានដ៏ធំមួយដែលមានឈ្មោះថា គម្រោងអភិវឌ្ឍន៍ទីក្រុងបូកគោស្ថិតនៅក្នុងឧទ្យានជាតិបូកគោ។ អ្នកជំនួញរូបនេះទទួលបានដីទំហំ២០,០០០ហិកតានៅក្នុងឧទ្យានជាតិដែលមានទំហំ១៥០,០០០ហិកតា ហើយត្រូវបានគេរំពឹងថា មានតម្លៃ១ពាន់លានដុល្លារ។
ឧទ្យានជាតិបូកគោបច្ចុប្បន្នមានសណ្ឋាគារសុខា និងកាស៊ីណូ ដែលបានជួសជុលឡើងវិញពីអគារសេសសល់ពីសម័យអាណានិគមបារាំងក្នុងទសវត្សវ៍ឆ្នាំ១៩២០ ដែលក្រោយមកទៀតត្រូវអតីតព្រះមហាវីរៈក្សត្រនរោត្តម សីហនុ យកមកធ្វើជាព្រះរាជដំណាក់នៅក្នុងទសវត្សរ៍ឆ្នាំ១៩៦០។
លោក សាយ ស៊ីណុល ប្រធានមន្ទីរទេសចរណ៍ខេត្តកំពតបានគាំទ្រការបង្កើតក្រុងថ្មី នេះ ហើយមានប្រសាសន៍ថា ការអភិវឌ្ឍន៍នេះនឹងប៉ះពាល់ដល់តំបន់នេះបន្តិច ប៉ុន្តែនឹងនាំភ្ញៀវទេសចរកាន់តែច្រើនមកខេត្តនេះ។
លោកបានមានប្រសាសន៍ថា៖ «វាមានផលប៉ះពាល់ខ្លះ ប៉ុន្តែមិនធ្ងន់ធ្ងរទេ»។
ចលនាមាតាធម្មជាតិ ដែលជាក្រុមសកម្មជនតស៊ូមតិផ្នែកបរិស្ថានបានចេញវីដេអូមួយកាលពីចុងខែធ្នូ ដែលបង្ហាញពីការឈូសឆាយដីយ៉ាងធំនៅលើភ្នំបូកគោសម្រាប់សាង សង់វីឡានិងខុនដូរាប់ពាន់ ដែលទាំងអស់ត្រូវបានអភិវឌ្ឍដោយក្រុមហ៊ុនអចលន ទ្រព្យសុខារបស់លោក សុខ គង់។
ក្រុមបរិស្ថាននេះ បាននិយាយថា ការបំផ្លិចបំផ្លាញបរិស្ថាន គឺជានិមិត្តរូបនៃការកេង ប្រវ័ញ្ចធនធានធម្មជាតិនៅកម្ពុជាតាមរយៈក្រុមហ៊ុនសាជីវកម្ម។
លោក ស៊ីណុល មិនយល់ស្របនឹងការវាយតម្លៃរបស់អង្គការមាតាធម្មជាតិអំពីផលប៉ះ ពាល់បរិស្ថាន ដែលបង្កឡើងដោយគម្រោងនេះមកលើឧទ្យានជាតិនោះទេ ដោយអះ អាងថា រដ្ឋាភិបាលបានសិក្សាពីផលប៉ះពាល់ ដែលអាចមានរួចហើយ។
ដោយសំដៅលើអង្គការមាតាធម្មជាតិ លោក ស៊ីណុល បានមានប្រសាសន៍ថា៖ «វាគឺ ជារឿងរបស់ពួកគេ ដូច្នេះខ្ញុំមិនចង់ធ្វើអត្ថាធិប្បាយនោះទេ»។
លោក Alex Gonzalez-Davidson នាយកអង្គការមាតាធម្មជាតិបានមានប្រសាសន៍ថាគម្រោងក្រុងបូកគោមើលទៅហាក់ដូចជា «គម្រោងមិនល្អរបស់រដ្ឋាភិបាល» មួយទៀត ដែលបិទបាំងនៅក្រោម «ការអភិវឌ្ឍ» ។
លោកបានមានប្រសាសន៍ថា៖ «គោលបំណងសំខាន់ គឺធ្វើឯកជនភាវូបនីយកម្មផ្នែកខ្លះនៃឧទ្យានជាតិបូកគោ»។
លោកបានមានប្រសាសន៍ថា គម្រោងនេះ នឹងផ្តល់អត្ថប្រយោជន៍ផ្នែកសេដ្ឋកិច្ចដល់ «បុគ្គលមួយចំនួនតូច ដែលមានខ្នងក្រាស់» ខណៈបង្កគ្រោះថ្នាក់ដល់ប្រព័ន្ធអេកូឡូស៊ីរបស់ប្រទេសកម្ពុជា។
លោកបានឲ្យដឹងរយៈបណ្តាញសង្គមតេឡេក្រាមថា៖ «ប៉ុន្តែការវិនិច្ឆ័យតាមរយៈអ្វី ដែលយើងបានឃើញម្តងហើយម្តងទៀត ម៉្យាងទៀត វានឹងក្លាយជាគម្រោងទុច្ចរិតទាំងស្រុង នៅពេលគម្រោង ដែលគេបានដឹងតិចតួចតាមរយៈផែនការមេ ដែលបង្ហាញដោយរដ្ឋាភិបាលនិងក្រុមហ៊ុនឯកជនលេចចេញជាផ្លែផ្កានោះ»។
អង្គការមាតាធម្មជាតិមិនបានចុះបញ្ជីជាអង្គការក្រៅរដ្ឋាភិបាលតាំពីឆ្នាំ២០១៧ហើយឥឡូវនេះ ក្លាយជាចលនានៃសកម្មជនបរិស្ថាន។ សកម្មជនរបស់ចលនានេះកាន់តែក្លាយ ជាគោលដៅរបស់រដ្ឋាភិបាល។ សមាជិកបីនាក់ត្រូវបានជំនុំជម្រះនៅសាលាដំបូងរាជធានីភ្នំពេញកាលពីថ្ងៃពុធពីបទញុះញង់។
លោក វិត វឌ្ឍនា នាយករដ្ឋបាលសាលាខេត្តកំពតបានច្រានចោលការចោទប្រកាន់របស់អង្គការមាតាធម្មជាតិ និងមានប្រសាសន៍ថា ក្រុងថ្មីនេះនឹងបម្រើដល់សាធារណ ជននិងធ្វើឱ្យប្រសើរឡើងនូវទស្សនវិស័យអភិវឌ្ឍនិងសេដ្ឋកិច្ចនៅតំបន់នោះ។
លោក វឌ្ឍនា បានថ្លែងថា៖ «វាមិនមានផលប៉ះពាល់ដល់បរិស្ថានទេ ពីព្រោះយើងទើប តែបានធ្វើកំណែទម្រង់ការគ្រប់គ្រងរដ្ឋបាល»។
លោកបានបន្ថែមថា៖ «មាតាធម្មជាតិគ្រាន់តែបានលើកឡើងនូវទស្សនៈរបស់ពួកគេដែលគ្មានមូលដ្ឋាននិងគ្មានភស្តុតាង»។
លោក ស៊ុយ ធា ប្រធានមន្ទីរបរិស្ថានខេត្តមិនអាចទាក់ទងសុំការអត្ថាធិប្បាយបានទេ ។
លោក នេត្រ ភក្ត្រា អ្នកនាំពាក្យក្រសួងបរិស្ថានមានប្រសាសន៍ថា រដ្ឋាភិបាលបានពិ ចារណាយ៉ាងហ្មត់ចត់នូវផលប៉ះពាល់លើបរិស្ថាននិងការអភិរក្សធនធានធម្មជាតិនៅឧទ្យានជាតិបូកគោ។
លោកបានមានប្រសាសន៍ថា៖ «សូមកុំភាន់ច្រឡំដោយសារមតិយោបល់របស់មនុស្សអវិជ្ជា ជុំវិញការបង្កើតទីក្រុងបូកគោ»។
លោក យុន ផល្លី អ្នកសម្របសម្រួលប្រចាំខេត្តកំពតនៃអង្គការសិទ្ធិមនុស្សអាដហុកបានមានប្រសាសន៍ថា រដ្ឋាភិបាលគួរតែធ្វើការសិក្សាឱ្យបានហ្មត់ចត់អំពីផលប៉ះពាល់សង្គមនិងបរិស្ថានដោយសារគម្រោងនេះ ជាពិសេសលើគម្របព្រៃឈើនៅក្នុងឧទ្យានជាតិបូកគោនិងធនធាននេសាទក្នុងតំបន់។
លោកបានបន្ថែមថា៖ «ផលប៉ះពាល់ចម្បងគឺគម្របព្រៃឈើ និងប៉ះពាល់ការនេសាទលក្ខណ:គ្រួសារ បន្ទាប់ពីមានការចាក់ដីចូលសមទ្រ»។
នៅលើវិបសាយក្រុមហ៊ុនអចលនទ្រព្យ របស់លោក សុខ គង់ Sokha Real Estate បានបង្ហាញពីគម្រោងអភិវឌ្ឍន៍ ដែលស្ថិតនៅក្រោមអាជីវកម្មរបស់លោក សុខ គង់ មួយផ្សេងទៀត គឺក្រុមហ៊ុន Sokha Hotel Group ។ គម្រោងដែលត្រូវអភិវឌ្ឍន៍ដំបូងមានឈ្មោះថាបុរីអម្រឹតឋានសួគ៌ មានផ្ទះល្វែងកម្ពស់បីជាន់ជាង៤ ២០០ល្វែង។ គម្រោងអភិវឌ្ឍន៍ទីពីរមានឈ្មោះថាបុរីមរកតឋានសួគ៌ តែមិនបានបញ្ជាក់ច្បាស់ពីចំនួនវីឡាដែលត្រូវសាងសង់នោះទេ។ សម្រាប់គម្រោងទីបី Crown Estates គឺធ្វើឡើងលើផ្ទៃដី៦០០ហិកតា រួមបញ្ចូលដោយ «វីឡាប្រណិតៗចំនួន៥ ៥៨៥ខ្នង ផ្ទះល្វែងចំនួន១៥ ៩៥២ល្វែង និងដីជាច្រើនប្លង់ទៀតទុកសម្រាប់សង់វីឡា និងអាផាតមិនផ្សេងៗទៀត»។
ប្រែសម្រួលពីអត្ថបទភាសាអង់គ្លេស៖ Rights groups worried about Bokor city demarcation, land clearings
