ទីប្រឹក្សាជាន់ខ្ពស់គណបក្ស កម្លាំងជាតិ លោក រ៉ុង ឈុន បានចូលសវនាការ នៅព្រឹកថ្ងៃទី២៣ ខែមេសា ឆ្នាំ២០២៥ តាមការកោះហៅរបស់សាលាដំបូងរាជធានីភ្នំពេញ ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ។ ទន្ទឹមនឹងនេះ មួយថ្ងៃបន្ទាប់ពីសវនាការ លោក រ៉ុង ឈុន បានទទួលដីកាបង្គាប់ ពីសាលាដំបូងរាជធានីភ្នំពេញ ក្នុងករណីដាច់ដោយឡែកមួយទៀត ដោយបង្ខំ ឱ្យលោកលក់ផ្ទះ ដើម្បីសងសំណងចំនួន ១០លានរៀល ជូនរដ្ឋលេខាធិការដ្ឋានកិច្ចការព្រំដែន ។ នៅចំពោះមុខក្រុមអ្នកសារព័ត៌មាន និងអមដោយអ្នកគាំទ្ររាប់សិបនាក់ បន្ទាប់ពីសវនាការ នៅព្រឹកថ្ងៃទី២៣ ខែមេសា លោក រ៉ុង ឈុន រៀបរាប់អំពីដំណើរការនៃអង្គសវនាការ គឺការសួរដេញដោលពីសំណាក់ចៅក្រម និងចម្លើយរបស់លោក ។ ក្នុងសវនាការ លោក រ៉ុង ឈុន ក៏បានរក្សាសិទ្ធិមិនឆ្លើយនូវសំណួរដែលលោកមិនចង់ឆ្លើយដែរ ។ អ្នកគាំទ្រ លោក រ៉ុង ឈុន ថ្លែងថា រាល់ទង្វើរបស់ លោក រ៉ុង ឈុន គឺជាការលះបង់ដើម្បីសង្គមជាតិ ដែលមិនគួរត្រូវទទួលទណ្ឌកម្ម ឬរងការចោទប្រកាន់យ៉ាងនេះទេ ។ ប្រធានអង្គការសិទ្ធិមនុស្ស អាដហុក ( ADHOC ) លោក នី សុខា ដែលបានចូលតាមដានសវនាការ បញ្ជាក់ថា ករណីនេះជារឿងនយោបាយច្រើនជាងរឿងពាក់ព័ន្ធនឹងច្បាប់ ។ លោក រ៉ុង ឈុន ជាអតីតសកម្មជនសិទ្ធិការងារនិងសង្គមអស់រយៈពេលច្រើនឆ្នាំ គឺលោកជាប្រធានសមាគមគ្រូបង្រៀនកម្ពុជាឯករាជ្យ ( CITA ) ចាប់តពីឆ្នាំ២០០០ ជាតំណាងក្រុមប្រឹក្សាឃ្លាំមើលកម្ពុជា ជាប្រធានសហភាពសហជីពកម្ពុជា និងជាសមាជិក គ.ជ.ប ។ លោក រ៉ុង ឈុន បានក្លាយជាអនុប្រធានគណបក្សភ្លើងទៀន កាលពីខែកុម្ភៈ ឆ្នាំ២០២៣ ហើយក្រោយមក លោកត្រូវបានជ្រើសតាំងជាទីប្រឹក្សានៃគណបក្ស កម្លាំងជាតិ ។ តាំងពីនៅជាសកម្មជនសិទ្ធិការងារនិងសង្គម រហូតមកដល់តួនាទីចុងក្រោយ លោក រ៉ុង ឈុន បានរងបណ្ដឹងចំនួនបី ហើយត្រូវបានចាប់ខ្លួនចំនួន ៣ដង ជាប់ពន្ធនាគារ ២ដង ។ ដោយឡែកករណីបណ្ដឹងសំណុំរឿងទី៣ គឺបទមិនរាងចាលក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម ប្រព្រឹត្តនៅប្រទេសកម្ពុជា ក្នុងឆ្នាំ២០២៤ ទាក់ទិននឹងវីដេអូឃ្លីបអំពីការដែលលោកថ្លែងកាលពីខែកក្កដា ឆ្នាំ២០២៤ ទៅកាន់សមាជិកគណបក្ស កម្លាំងជាតិ នៅស្រុកកោះធំ ខេត្តកណ្ដាល ថា រដ្ឋាភិបាលមិនបានយកចិត្តទុកដាក់លើបញ្ហាសិទ្ធិមនុស្ស និងប្រជាធិបតេយ្យ ។ ក្នុងវីដេអូឃ្លីបនោះដែរ លោកបានប្រាប់អ្នកចូលរួមថា កម្ពុជា “ ជាប់ចំណាត់ថ្នាក់លេខមួយខាងឆបោក ឧក្រិដ្ឋជន បទល្មើសអនឡាញ និងចាប់ជំរិត ” ។ តុលាការនឹងប្រកាសសាលក្រមនៃសំណុំរឿងនេះ នៅម៉ោង ៨ព្រឹក ថ្ងៃទី៥ ខែឧសភា ឆ្នាំ២០២៥ ៕
