សមាគមសម្ព័ន្ធអ្នកសារព័ត៌មានកម្ពុជា

បញ្ហា​នីតិរដ្ឋ និងអំពើពុករលួយធ្វើឲ្យវិនិយោគិនអាមេរិកស្ទាក់ស្ទើរ​ចូលមកកម្ពុជា

លោកស្រី Melissa A. Brown ឧបការីរងរដ្ឋមន្ត្រីការបរទេសអាមេរិកថ្លែងក្នុងសន្និសីទសារព័ត៌មាននៅថ្ងៃទី១៥ ខែធ្នូ ឆ្នាំ២០២៣។ (ខេមបូចា/ព្រីង សំរាំង)
លោកស្រី Melissa A. Brown ឧបការីរងរដ្ឋមន្ត្រីការបរទេសអាមេរិកថ្លែងក្នុងសន្និសីទសារព័ត៌មាននៅថ្ងៃទី១៥ ខែធ្នូ ឆ្នាំ២០២៣។ (ខេមបូចា/ព្រីង សំរាំង)

ទោះបីជា​សហរដ្ឋអាមេរិកមានបំណងចង់ឃើញការកើនឡើងនៃការវិនិយោគរបស់អាមេរិក​នៅក្នុងប្រទេសកម្ពុជាក៏ដោយ ក៏បញ្ហានីតិរដ្ឋ និងអំពើពុករលួយបង្កើតជាឧបសគ្គដល់ការទាក់ទាញការវិនិយោគពីក្រុមហ៊ុនអាមេរិកមកកម្ពុជា នេះបើយោងតាមលោកស្រី មេលីសា ប្រោន (Melissa A Brown) ឧបការីរងរដ្ឋ​មន្ត្រីការបរទេសសហរដ្ឋអាមេរិក​ទទួល​បន្ទុក​​​ការិយាល័យកិច្ចការអាស៊ី​បូព៌ា និងប៉ាស៊ីហ្វិក។

លោក​ស្រី ប្រោន បានថ្លែងនៅក្នុងសន្និសីទសារព័ត៌មាននៅថ្ងៃទី១៥ខែធ្នូ ថា៖ «នៅពេលយើងក្រឡេកមើលថា តើទីផ្សារសហរដ្ឋអាមេរិក​មាន​​សារៈសំខាន់ប៉ុណ្ណាសម្រាប់ទំនិញកម្ពុជា យើងក៏កំពុងសម្លឹងមើលមធ្យោបាយ ដើម្បីបង្កើនការវិនិយោគរបស់អាមេរិកនៅក្នុងប្រទេសកម្ពុជាផងដែរ … ដែលវាគឺ​ជាផ្នែកមួយនៃការសន្ទនាប្រកបដោយផ្លែផ្ការបស់ខ្ញុំជាមួយរដ្ឋាភិបាលកម្ពុជា»។

លោកស្រីបានបន្តថា៖ «ខ្ញុំគិតថា ដើម្បីសម្រេច​​បាន​នូវ​សក្តានុពលរបស់យើង យើងត្រូវធ្វើការយ៉ាងជិតស្និទ្ធជាមួយរដ្ឋាភិបាលកម្ពុជា ដើម្បីធានាថា នីតិរដ្ឋត្រូវបានគោរព មានភាពប្រាកដប្រជា និងអាចព្យាករណ៍បាន។ យើងក៏គួរតែធ្វើការរួមគ្នា ដើម្បីប្រយុទ្ធប្រឆាំងនឹងអំពើពុករលួយផងដែរ ពីព្រោះវាជាកិច្ចការ​ដែលអាចផ្តល់ហេតុផល​ឱ្យក្រុមហ៊ុនអាមេរិកបង្កើន​ការវិនិយោគរបស់​ពួកគេ​នៅទីនេះ»។

លោកស្រី ប្រោន​ បានមាន​ប្រ​សា​សន៍​ថា សហរដ្ឋអាមេរិក គឺជាទីផ្សារដ៏សំខាន់បំផុតសម្រាប់ការនាំចេញរបស់កម្ពុជា ដោយ​ការនាំចេញទៅកាន់សហរដ្ឋអាមេរិកមានតម្លៃជាង១២ពាន់លានដុល្លារក្នុងឆ្នាំ២០២២។

លោកស្រី​បាន​កត់​សម្គាល់​ថា៖​ «សហរដ្ឋ​អាមេរិក​ជា​មិត្ត​ដ៏​យូរ​អង្វែង​របស់​កម្ពុជា និង​​​ដើរ​តួនាទី​យ៉ាង​សំខាន់​ក្នុង​កំណើន​សេដ្ឋកិច្ច​ដ៏​គួរ​ឲ្យ​កត់​សម្គាល់​របស់​ប្រទេស​កម្ពុជា​»  ដោយ​លោកស្រី​បាន​បន្ថែម​ថា ​លោកស្រី​ចង់​ឃើញ​ការ​វិនិយោគ​របស់​អាមេរិកច្រើន​ទៀត​​ចូល​មក​កម្ពុជា។ លោកស្រីមាន​ប្រសាសន៍ថា៖ «ការវិនិយោគរបស់អាមេរិកមកជាមួយស្តង់ដារបច្ចេកវិទ្យាខ្ពស់ ការការពារបរិស្ថាន ការងារ​ និងការបណ្តុះបណ្តាល»។

មុននេះ​មួយថ្ងៃ លោកស្រី ប្រោន​ បានជួបជាមួយលោក សុខ ចិន្តាសោភា រដ្ឋមន្ត្រីក្រសួងការបរទេស បន្ទាប់មកមានការពិភាក្សាជាមួយលោក ស៊ុន ចាន់ថុល អនុប្រធានទី១ នៃ​ក្រុមប្រឹក្សាអភិវឌ្ឍន៍កម្ពុជា ស្តីពីទំនាក់ទំនងទ្វេភាគី។ កិច្ចសន្ទនាបានផ្តោតសំខាន់លើពាណិជ្ជកម្ម ការពង្រីកការវិនិយោគ និងការចូលរួម ដែលជាមធ្យោបាយមួយ ដើម្បីកែលម្អ និងពង្រឹងកិច្ចសហប្រតិបត្តិការ និងទំនាក់​ទំនងរវាងប្រទេសទាំងពីរ។

ក្រសួងការបរទេសបានចេញសេចក្តីថ្លែងការណ៍ដោយអះអាងថា៖ «ទាំងឯកឧត្តម​ឧបនាយករដ្ឋមន្ត្រី និងលោកជំទាវ​ឧបការីរង បានបញ្ជាក់សាជាថ្មីនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការដែលមានផលប្រយោជន៍ទៅវិញទៅមកលើវិស័យផ្សេងៗ រួមទាំងពាណិជ្ជកម្ម និងការវិនិយោគ ជំនួយអភិវឌ្ឍន៍ និងការ​ផ្លាស់ប្តូររវាង​ប្រជាជន​និង​ប្រជា​ជន​​​»។

ដោយឡែក​នៅលើ​សារ​បង្ហោះ​តាមហ្វេសប៊ុក លោក ស៊ុន ចាន់ថុល បានលើក​ឡើង​ថា លោកបានស្នើសុំឱ្យសហរដ្ឋអាមេរិកពិនិត្យ​ជំរុញការវិនិយោគដោយ​ផ្ទាល់រវាងភាគីទាំងពីរ​បន្ថែមទៀត​ អំឡុងកិច្ចពិភាក្សាជាមួយលោកស្រី ប្រោន​ ដែលលោកបានចង្អុលបង្ហាញពីច្បាប់វិនិយោគថ្មីរបស់កម្ពុជា ដែលលើកទឹកចិត្តវិនិយោគិន​បរទេសឱ្យចូលរួមគ្រប់វិស័យ។

ឆ្លើយតបនឹងបញ្ហានេះ លោកស្រី ប្រោន​ បានបង្ហាញចំណាប់អារម្មណ៍ក្នុងការរួមគ្នាពិនិត្យមើលកិច្ចសហប្រតិបត្តិការរបស់ប្រទេសទាំងពីរ​លើការអភិរក្សវប្បធម៌សង្គម ការអប់រំ សុខាភិបាល និងវិស័យផ្សេងៗ​ដែលមានសក្តានុពលវិនិយោគ​នៅក្នុងប្រទេសទាំងពីរ។ លោកស្រីក៏បានជំរុញឱ្យកម្ពុជាពិចារណាកែលម្អបញ្ហាទាក់ទងនឹងតម្លាភាពពន្ធ និងប្រសិទ្ធភាពនៃបទដ្ឋាន​ច្បាប់ ដើម្បីពង្រីក​កិច្ចខិតខំប្រឹងប្រែងកន្លងមក ដើម្បីបង្កើនបរិយាកាសវិនិយោគរបស់ខ្លួន។

លោក ចាន់ សុផល នាយកមជ្ឈមណ្ឌលសិក្សាគោលនយោបាយបានប្រាប់ខេមបូចាថា បញ្ហានីតិរដ្ឋ និងអំពើពុករលួយមានតាំងពីយូរយារណាស់មកហើយ។ លោក​សង្កេត​ឃើញ​ថា បើ​ទោះ​ជា​ការ​វិនិយោគ​បរទេស​នៅ​កម្ពុជា​មាន​ភាព​ចម្រុះ​ក៏​ដោយ ក៏​នៅ​មិន​ទាន់​គ្រប់​គ្រាន់​ ដើម្បី​ធ្វើ​​ឲ្យ​កម្ពុជា​​រីក​ចម្រើនដែរ។

លោក​មាន​ប្រសាសន៍​ថា៖​ «ខ្ញុំ​គិត​ថា ​វា​ប្រហែល​ជា​ដោយសារ​ប្រទេស​កម្ពុជា​មិន​មាន​ភាព​ទាក់ទាញ​ បើ​ធៀប​នឹង​ប្រទេស​វៀតណាម និងប្រទេស​ថៃ និង​ប្រទេស​ផ្សេងទៀត​ក្នុង​តំបន់​»។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានបដិសេធធ្វើអត្ថាធិប្បាយទេដោយលោកថា ​ជាប់រវល់។

ស្របពេល​ជាមួយ​គ្នា​នោះដែរ​ ភាពសកម្មនិយម​ សេរីភាពនៃការបញ្ចេញមតិ និងលទ្ធិប្រជាធិបតេយ្យ ក៏ត្រូវបានពិភាក្សាដោយលោកស្រី ប្រោន​ ផងដែរ​ អំឡុងដំណើរទស្សនកិច្ច​របស់​លោកស្រី​នៅកម្ពុជា​ ទី​ដែលសហរដ្ឋអាមេរិកគ្រោងនឹងបន្តពិភាក្សាជាមួយរដ្ឋាភិបាលកម្ពុជាទាក់ទងនឹងអំណាចរបស់ប្រជាពលរដ្ឋ​ក្នុងការអនុវត្តសិទ្ធិរបស់ពួកគេ រួមទាំងសេរីភាពនៃការបញ្ចេញមតិផងដែរ។

លោកស្រី ប្រោន​ បានបន្ថែមថា៖ «វាពិតជាអាទិភាពសម្រាប់យើងក្នុងការបន្តលើកឡើង​ពីករណី​សំខាន់ៗដូចជាកញ្ញា​ សេង ធារី លោក កឹម សុខា និងកញ្ញា​ ឈឹម ស៊ីថរ ដែលយើងចង់ឱ្យរដ្ឋាភិបាលចាត់វិធានការ និងធានាថា មេដឹកនាំគណបក្សប្រឆាំងមិនត្រូវបានឃុំខ្លួនដោយអយុត្តិធម៌។ ហើយថា ​ពួកគេ​អាច​ត្រូវ​បាន​ដោះលែង​ហើយ​អាច​សម្តែង​មតិ​របស់​ពួកគេ»​។ លោកស្រីបានបន្ថែមថា៖ «យើង​នឹង​បន្ត​មាន​ការ​ពិភាក្សា​ជាមួយ​រដ្ឋាភិបាល​កម្ពុជា​ថ្មី ​អំពី​របៀប​ដែល​យើង​អាច​ឈាន​ទៅ​រក​ចំណុច​នេះ​ប្រកប​ដោយ​​លក្ខណៈ​​វិជ្ជមាន​ជាង​មុន» ​

ប្រែសម្រួលពីអត្ថបទភាសាអង់គ្លេស៖ Rule of Law, Corruption Hesitate US Investors From Entering Cambodia

 
215 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម