សមាគមសម្ព័ន្ធអ្នកសារព័ត៌មានកម្ពុជា

គណបក្សកាន់អំណាចទទួលបានមេឃុំមកវិញទាំងអស់ក្នុងស្រុកកងមាស បន្ទាប់ពីចាញ់បក្សសង្គ្រោះជាតិក្នុងឆ្នាំ២០១៧

មន្ត្រីគណៈកម្មាធិការជាតិរៀបចំការបោះឆ្នោតចាប់ផ្តើមរាប់សន្លឹកឆ្នោតនៅមណ្ឌលសាលាបឋមសិក្សាស្តៅលើ ឃុំស្តៅ ស្រុកកងមាស ខេត្តកំពង់ចាម រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ឃួន ណារីម
មន្ត្រីគណៈកម្មាធិការជាតិរៀបចំការបោះឆ្នោតចាប់ផ្តើមរាប់សន្លឹកឆ្នោតនៅមណ្ឌលសាលាបឋមសិក្សាស្តៅលើ ឃុំស្តៅ ស្រុកកងមាស ខេត្តកំពង់ចាម រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ឃួន ណារីម

ស្រុកកងមាស នៃខេត្តកំពង់ចាម៖​​​ អតីតគណបក្សសង្គ្រោះជាតិដែលធ្លាប់ដណ្តើមអាសនៈជាមេឃុំច្រើនជាងគេបំផុតក្នុងស្រុកកងមាស បច្ចុប្បន្នត្រូវបានគណបក្សកាន់អំណាចដណ្តើមបានសំទ្បេងលើសលប់ ខណៈដែលសកម្មជននយោបាយ​ លោក គង់ រ៉ៃយ៉ា ជាបេក្ខភាពបក្សភ្លើងទៀតក៏ចាញ់ក្នុងការប្រកួតប្រជែងយកតំណែងជាមេឃុំ។

លទ្ធផលបឋមរបស់គណៈកម្មាធិការជាតិរៀបចំការបោះឆ្នោតបង្ហាញថា គណកប្សប្រជាជនកម្ពុជាទទួលសំទ្បេងគាំទ្រនាំមុខគណបក្សនយោបាយនានានិងដណ្តើមតំណែងមេឃុំទាំង១១ ក្នុងស្រុកកងមាស ខណៈដែលគណកបក្សនេះធា្លប់បាត់បង់អាសនៈជាមេឃុំចំនួន៧ ក្នុងការបោះឃុំ-សង្កាត់ឆ្នាំ២០១៧។ ពេលនោះ គណបក្សសង្គ្រោះជាតិ បានឈ្នះមេឃុំចំនួន៧ ក្នុងចំណោម១១។

នៅម៉ោង៧ ព្រឹកថ្ងៃអាទិត្យ​​ ការិយាល័យបោះឆ្នោតចាប់ផ្តើមបើកដំណើរការបោះឆ្នោតដើម្បីជ្រើសរើសក្រុមប្រឹក្សាឃុំ-សង្កាត់នៅទូទាំងប្រទេសសរុបចំនួន ១.៦៥២ ឃុំ-សង្កាត់។

នៅ​ក្នុង​​ឃុំ​​ស្តៅ ​មាន​​គណបក្ស​​នយោបាយ​​ចំនួន​​បី​​ចូល​រួម​​ប្រកួត​ប្រជែង​​ក្នុង​​ការ​​បោះ​ឆ្នោត​។ ​គណបក្ស​ទាំង​នេះ​រួម​មាន គណបក្ស​ប្រជាជន​កម្ពុជា​ដែល​កំពុង​កាន់​អំណាច ឈរ​នៅ​លេខ​រៀង​ទី​១លើ​សន្លឹក​ឆ្នោត ខណៈគណបក្ស​ភ្លើង​ទៀន នៅ​លេខ​២ និង​ចុង​ក្រោយ គឺ​គណបក្ស​ខ្មែរ​ស្រលាញ់​ជាតិ​។​

សម្រាប់លទ្ធផលបឋមការបោះឆ្នោតនៅឆ្នាំ២០២២ក្នុងឃុំស្តៅ គណបក្សប្រជាជនកម្ពុជាទទួលបាន១៩៣៧ សំទ្បេង ខណៈគណបក្សភ្លើងទៀនទទួលបាន៧៥៥​ សំទ្បេង នេះបើយោងតាមការបញ្ជាក់របស់គណបក្សប្រជាជនកម្ពុជា លោក ទ្បាយ សេងហុង ដែលនឹងបន្តតំណែងមេឃុំស្តៅ​ សម្រាប់ឆ្នាំ២០២២-២០២៧។

លោក សេងហុង​ ប្រាប់ខេមបូចា គណបក្សប្រជាជន​កម្ពុជានិងបន្តដឹកនាំភូមិ ឃុំសម្រាប់អាណត្តិទី៥នេះដោយបានសំទ្បេងឆ្នោតនាំមុខគេទាំងអស់។

លោកមានប្រសាសន៍ថា៖ «យើងបានឈ្នះកៅអីមេឃុំវិញ ហើយយើងសប្បាយចិត្ត ឈ្នះកៅអីច្រើនក្នុងឃុំ-សង្កាត់នេះ ហើយអរគុណចំពោះសមាជិកសមាជិការដែលបានគាំទ្រ»

តាមលទ្ធផលបឋមនៅឃុំស្តៅមានអាសនៈទាំង៥ ហើយភ្លើងទៀនបានមួយអសនៈជាជំទប់ទី២។

ការ​បោះ​ឆ្នោត​ឃុំ​សង្កាត់​ឆ្នាំ ២០១៧ នៅ​ឃុំ​ស្តៅ គណបក្ស​ប្រជាជន​កម្ពុជា​ទទួល​បាន ១,១១២ សំឡេង ​ខណៈ​គណ​បក្ស​សង្គ្រោះ​ជាតិ ទទួល​បាន ១,៦៧៦ សំឡេង។

ប្រជាពលរដ្ឋឈរមើលការរាប់សន្លឹកឆ្នោតនៅមណ្ឌលសាលាបឋមសិក្សាស្តៅលើ ឃុំស្តៅ ស្រុកកងមាស ខេត្តកពង់ចាម។ រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ឃួន ណារីម

លោក​គង់ រ៉ៃយ៉ា បាន​ឈរ​ឈ្មោះ​ដើម្បី​ប្រកួត​ប្រជែង​នឹង​មេ​ឃុំ​ដែល​កំពុង​កាន់​អំណាច លោក​ ឡាយ សេងហុង អតីត​សមាជិក​គណបក្ស​សង្គ្រោះ​ជាតិ ដែល​បាន​ប្តូរ​មក​គាំទ្រ​គណបក្ស​ប្រជាជនកម្ពុជា បន្ទាប់​ពី​បក្ស​ប្រឆាំង​ត្រូវ​បាន​រំលាយ​នៅឆ្នាំ ២០១៧។

លោក រៃយ៉ា មានប្រសាសន៍ថា លោកមិនពេញចិត្តនិងលទ្ធផលការបោះឆ្នោតឃុំ-សង្កាត់អាណត្តិទី៥នេះទេ ពីព្រោះវាមានភាពមិនប្រក្រតីច្រើនដែលអាជ្ញាធរមូលដ្ឋានរបស់គណបក្សកាន់អំណាចនៅក្បែរនិងមណ្ឌលបោះឆ្នោះ និងកត់ស្រង់ឈ្មោះអ្នកបោះឆ្នោត។

លោកនិយាយថា៖ «ខ្ញុំយល់ថាដូចជាដាក់សម្ពាធទៅកាន់អ្នកបោះឆ្នោតមែនទែន ជាពិសេសអនុវិទ្យាល័យស្តៅមានកម្លាំងឯកសណ្ឋានច្រើន មានប្រជាការពារ ប៉ូលិសផង ខ្ញុំយល់ថាអត់មានមូលហេតុដាក់កម្លាំងច្រើនចឹងទេ»

លោកបានបន្តថា លោកកំពុងរង់ចាំយោលបល់ពីថ្នាក់ដឹកនាំរបស់គណបក្សសម្រាប់សកម្មភាព ក៏ដូចជាឈរជាបេក្ខភាពមេឃុំស្តៅនៅអាណត្តិបន្តទៀត។

លោកថា៖ «រឿងនិងវាអាស្រ័យលើថ្នាក់ដឹកនាំ»

លោកគង់ រ៉ៃយ៉ា ដែលធ្លាប់ជាប់ពន្ធនាគារចំនួន២ដងទាក់ទងនឹងបញ្ហានយោបាយ លោក​​ត្រូវ​​បាន​​ចាប់​​ខ្លួន​​ជា​​លើក​​ដំបូង​​ក្នុង​​ឆ្នាំ ២០១៥​ នៅ​​ពេល​​លោក​​នៅ​​​​ជា​​និស្សិត​​សាកល​​វិទ្យាល័យ​​នៅ​​ឡើយ​​ជុំវិញ​​ការ​​បង្ហោះ​​តាម​បណ្តាញ​​សង្គម​ហ្វេសប៊ុក ដោយពេលនោះលោក​​បាន​​អំពាវ​នាវ​​ឱ្យ​​មាន «បដិវត្តន៍​​ពណ៌»។ ចំពោះ​​រឿង​​នោះ លោក​​ត្រូវ​​បាន​​រកឃើញថាមានទោស​​នៅ​​ឆ្នាំ ២០១៦ ហើយ​​ត្រូវ​​បាន​​កាត់​ទោស​​ឱ្យ​​ជាប់​​ពន្ធនាគារ​​រយៈពេល ១៨ ខែ​​ពី​​បទ​​ញុះ​ញង់​។

លោក​​ត្រូវ​​បាន​​តុលាការ​​ផ្ដន្ទា​ទោស​​ជា​​លើក​​ទី​​២​​នៅ​​ខែ​​មិថុនា ឆ្នាំ​​២០២០ ហើយ​​ត្រូវ​​បាន​​តុលាការ​​សម្រេច​​ផ្ដន្ទា​ទោស​​រយៈពេល ២​​ឆ្នាំ ក្រោម​​ការ​​ចោទ​​ប្រកាន់​​ពី​​បទ​​ញុះញង់​​ចំពោះ​ការ​លក់​​អាវ​យឺត​​ដែល​​មាន​​រូប​ភាព​​នៃ​ការ​បាញ់​សម្លាប់​​អ្នក​​វិភាគ​​នយោបាយ លោក កែម ឡី។

នៅ​ក្នុង​​ឃុំ​​ខ្ចៅ អតីត​​បមេឃុំ​​គណបក្ស​សង្គ្រោះ​ជាតិ លោក មាស សំអុល បច្ចុប្បន្ន​ បានមកឈរ​ឈ្មោះ​ជា​បេក្ខភាព​គណបក្ស​ភ្លើង​ទៀនមានប្រសាសន៍ថា គណបក្សភ្លើងទៀនក្នុងឃុំខ្ចៅទទួលបាន ១.៤៤៤​ សំទ្បេង ខណៈដែលគបក្សប្រជាជនទទួលបាន ៣.០០៧ សំទ្បេង។

លោកមានប្រសាសន៍ថា៖ «ចាញ់គេហើយ….យើងប្រហែលបានជាជំទប់ទី២ និងសមាជិកឃុំពីរទៀត»។​​ នៅឃុំខ្ចៅមានទាំងអស់ប្រាំបួនអាសនៈ ប៉ុន្តែគណបក្សប្រជាជនកម្ពុជាទទួលបានសំទ្បេងច្រើនជាងគេ។

ទោះបីជាយ៉ាងណា លោក សំអុល នៅមិនអស់ចិត្តដែលគណបក្សភ្លើងទៀងមិនទទួលបានជ័យជំនះ ដោយលោកអះអាងថាគណបក្សកាន់អំណាចនៅតែប្រើយុទ្ធសាស្ត្រទិញទឹកចិត្តពលរដ្ឋ ហើយថ្នាក់ដឹកនាំដូជាមេភូមិ មេឃុំ ក្រុមប្រឹក្សា និងថ្នាក់នាំបក្សស្រុក ឈរនៅមុខការិយាល័យបោះឆ្នោត ដោយប្រើសញ្ញា ឬដឹកដៃពលរដ្ឋទៅមើលឈ្មោះបោះឆ្នោត។

លោកមានប្រសាសន៍ថា៖ «ហាក់ដូចគេរៀបទុកទូទាំងប្រទេសមើលទៅលទ្ធផលឆ្នោត​»។​ លោកបន្ថែមថា នៅក្នុងឃុំខ្ចៅមានប្រជាជនជាង៦០០០​នាក់ ក្នុងបញ្ជីឈ្មោះបោះឆ្នោត ប៉ុន្តែចេញទៅបោះឆ្នោតជាង៤០០០​ នាក់ប៉ុណ្ណោះ។

លោកបានបន្ថែមថា៖ «យើងបាត់សំទ្បេងជា ២០០០នាក់ ដែលមិនបានចេញទៅបោះឆ្នោត បាត់ភាគច្រើនកម្លាំងគាំទ្រហ្មង ហាក់ដូចគាត់គ្មានជំនឿលើគ.ជ.ប»

មន្ត្រីគណៈកម្មាធិការជាតិរៀបចំការបោះឆ្នោតចាប់ផ្តើមរាប់សន្លឹកឆ្នោតនៅមណ្ឌលសាលាបឋមសិក្សាស្តៅលើ ឃុំស្តៅ ស្រុកកងមាស ខេត្តកំពង់ចាម រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ឃួន ណារីម

គណបក្សភ្លើងទៀន ដែលពីមុនត្រូវបានគេស្គាល់ថា ជាគណបក្សសមរង្ស៊ី ហើយក្រោយមកបានច្របាច់​បញ្ចូលគ្នាជាមួយគណបក្សសិទ្ធិមនុស្ស ដើម្បីបង្កើតជាគណបក្សសង្គ្រោះជាតិ។ គណបក្សភ្លើងទៀនបានធ្វើសមាជនៅថ្ងៃទី២៧ ខែវិច្ឆិកា ឆ្នាំ២០២១ ដើម្បីចាប់ផ្តើម​គណបក្សនេះ​ឡើងវិញ ដើម្បី​ឆ្ពោះ​ទៅ​ចូលរួមការបោះឆ្នោតឃុំសង្កាត់ នៅឆ្នាំ២០២២ និងការបោះឆ្នោតសកលនៅឆ្នាំបន្ទាប់។

កាលពីឆ្នាំ២០១៣ កន្លងទៅគណបក្សសង្គ្រោះជាតិ ធ្លាប់បានរុញច្រាលគណបក្សកាន់អំណាច​ឱ្យជិតចាញ់ការបោះឆ្នោតជាតិនាពេលនោះ ហើយជាថ្មីម្តងទៀតនៅក្នុងការបោះឆ្នោត​ឃុំ​សង្កាត់នាឆ្នាំ ២០១៧ គណបក្សសង្គ្រោះជាតិធ្វើបានយ៉ាងល្អដោយទទួលបាន​សមាជិក​ក្រុមប្រឹក្សាប្រមាណជា ៥ ០០០អាសនៈបើធៀបនឹងសមាជិកក្រុមប្រឹក្សា​គណបក្សប្រជាជនដែលមានតែជាង ៦ ០០០អាសនៈ។

គណបក្សសង្គ្រោះជាតិត្រូវបានតុលាការកំពូលរំលាយកាលពីឆ្នាំ២០១៧ បន្ទាប់ពីការចាប់ខ្លួន លោក កឹម សុខា ប្រធាន​គណបក្ស​សង្គ្រោះ​ជាតិ ​ក្រោម​ការ​ចោទ​ប្រកាន់​ពី​បទ​ក្បត់​ជាតិ ដែល​គេ​ជឿ​ថា​មាន​ហេតុផល​នយោបាយ។ ក្រោយ​ការ​រំលាយ​គណបក្ស​នេះ មន្ត្រី​បក្ស​ប្រឆាំង​ចំនួន ១១៨​នាក់ ត្រូវ​បាន​ហាម​មិន​ឲ្យ​ធ្វើ​នយោបាយ​រយៈពេល ៥​ឆ្នាំ។

លោកស្រី យឹម សុធានី ប្រធានគណៈកម្មការជាតិរៀបចំការបោះឆ្នោតខេត្តកំពង់ចាម បានបញ្ជាក់ថា ការបោះឆ្នោតសម្រាប់ខេត្តកំពង់ចាមបានប្រព្រឹត្តិទៅយ៉ាងរលូតមិនមានបញ្ហាធំដុំនោះទេ។ លោកស្រីក៏បដិសេធការគំរាមកំហែងជាការលើកទ្បើងបេក្ខភាពគណបក្សភ្លើងទៀនចំពោះវត្តមានរបស់អាជ្ញធរមូលដ្ឋាន។

លោកស្រីមានប្រសាសន៍ថា៖​ «តាមពិតវាមិនមែនជាការគំរាមកំហែងអីទេ តាមដែលខ្ញុំទទួលបានព័ត៌មានគ្រាន់ជាការជួយបំពេញកាតព្វកិច្ចក្នុងនាមអាជ្ញាធរ ដែលពិនិត្យស្ថានភាពអ្នកដែលមិនទាន់បានអញ្ជើញទៅបោះឆ្នោត លោកយកព័ត៌មាននិងទៅប្រាប់ពលរដ្ឋថាការបោះឆ្នោតកំណត់ត្រឹមម៉ោង៣»

លោកស្រីបន្ថែមថា៖ «ការទៅហ្នឹងមិនមែនទៅជិតការិយាល័យពេកទេ គាត់នៅរៀងឆ្ងាយដែរ»

មន្ត្រីគណៈកម្មាធិការជាតិរៀបចំការបោះឆ្នោតចាប់ផ្តើមរាប់សន្លឹកឆ្នោតនៅមណ្ឌលសាលាបឋមសិក្សាស្តៅលើ ឃុំស្តៅ ស្រុកកងមាស ខេត្តកំពង់ចាម រូបថតថ្ងៃទី៥ ខែមិថុនា ឆ្នាំ២០២២។ ខេមបូចា/ ឃួន ណារីម

លោកកែវ សុខចី អាយុ ៤៦ ឆ្នាំ​ បានធ្វើដំណើរពីខេត្តព្រះវិហារដើម្បីមកឆ្នោះក្នុងឃុំស្តៅ ប៉ុន្តែតែលោកខកខានមិនបានគូសសន្លឹកឆ្នោតដើម្បើរើសតំណាងរបស់នោះទេ ពីព្រោះថ្ងៃខែឆ្នាំកំណើតអត្តសញ្ញាណបណ្ណរបស់លោកខុសពីឈ្មោះក្នុងបញ្ជីបោះឆ្នោត។

លោកបាននិយាយថា៖ «ខុសថ្ងៃខែឆ្នាំកំណើត​ (អត្តសញ្ញាណបណ្ណ)​ អត់ដឹងដែរឿងដែហ្នឹងខ្ញុំសោកស្តាយដែលអត់បានបោះព្រោះមកពីឆ្ងាញនៅព្រះវិហារ» លោកបន្ថែមថា លោកបានបោះឆ្នោតឃុំ-សង្កាត់ ក្នុងឆ្នាំ២០១៧ ដោយលោកប្រើអត្តសញ្ញាណបណ្ណគំរូថ្មីដូចគ្នានេះដែរ។

រីឯលោកស្រី ស៊ន សុគីម អាយុ៤២ឆ្នាំ បានប្រាប់ខេមបូចា បន្ទាប់ពីលោកស្រីបោះឆ្នោតថា មានគណបក្សពីរដែលលេចធ្លោគឺគណបក្សប្រជាជនកម្ពុជា និងគណបក្សភ្លើងទៀននៅក្នុងការបោះឆ្នោតឃុំ-សង្កាត់ឆ្នាំ២០២២។

លោកស្រីថា៖ «ខ្ញុំឃើញគណបក្សបី (លើសន្លឹកឆ្នោត) តែមើលឃើញច្បាស់តែគណបក្សពីរ ហើយបក្សមួយទៀតមិនសូវចាប់អារម្មណ៍» ដោយអ្នកស្រីបន្ថែមថា៖ «ប្រហែលរត់មិនរួចជាមួយគណបក្សប្រជាជនទេ»។

ចំណែកប្រជាពលរដ្ឋម្នាក់ទៀតឈ្មោះ ទ្បន ទ្បាញ់​ អាយុ៣៧ ឆ្នាំ ដែលបានទៅឆ្នោតនៅឃុំខ្ចៅ នៃស្រុកកងមាស បាននិយាយថា មានប្រជាពលរដ្ឋច្រើនចេញទៅបោះឆ្នោត ក៏ដូចជាសន្តិសុខសណ្តាប់ធ្នាប់រៀបចំបានល្អ និងមិនមានបាតុភាពអ្វីកើតទ្បើងទេ។

លោកមានប្រសាសន៍ថា៖ «[ខ្ញុំ]មានអារម្មណ៍ថាសប្បាយចិត្តព្រោះបានមកជ្រើសរើស គណបក្សមួយដែលខ្លួនស្រាលាញ់ថានិងអាចជាតំណាងឲ្យប្រទេសជាតិមួយ»​

លោកបន្ថែមថាចង់ឃើញមេឃុំជាប់ឆ្នោតថ្មីយកចិត្តទុកដាក់បន្ថែមទៀតលើតម្លៃទីផ្សារដំណាំកសិផលរបស់កសិករក្នុងឃុំខ្ចៅ។

លោកបានបន្ថែមថា៖ «[ខ្ញុំ]ចង់ឲ្យក្នុងភូមិឃុំនិងដែលភាគច្រើនប្រជាពលរដ្ឋគាត់ធ្វើការ ធ្វើអ៊ីចឹងដូចខាងភូមិឃុំខ្ញុំទាក់ទងដំណាំដាំដុះគាត់ដាំបានផលគាត់ពិបាករកទីផ្សារលក់ ចឹងគាត់ខ្វះខាត អ្នកខ្លះជំពាក់អង្គការ»

551 views

ព័ត៌មានទាក់ទង

ព័ត៌មានថ្មី

អត្ថបទពេញនិយម