សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋភូមិដាច់ស្រយាលក្នុងឃុំមោង សំណូមពរដល់រាជរដ្ឋាភិបាល និងសប្បុរសជនជួយកសាងផ្លូវជាង ១០គីឡូម៉ែត្រ

: ផ្លូវចូលភូមិមួយខ្សែនៅក្នុងភូមិរលួស ជាភូមិដាច់ស្រយាល ក្នុងឃុំមោង ស្រុកមោងឬស្សី ខេត្ដបាត់ដំបង ដែលពលរដ្ឋស្នើរសូមដល់រាជរដ្ឋាភិបាលជួយកសាងដើម្បីបង្ករភាពងាយស្រួលក្នុងការធ្វើដំណើរ។ រូបថត បាន ធារ៉ា
: ផ្លូវចូលភូមិមួយខ្សែនៅក្នុងភូមិរលួស ជាភូមិដាច់ស្រយាល ក្នុងឃុំមោង ស្រុកមោងឬស្សី ខេត្ដបាត់ដំបង ដែលពលរដ្ឋស្នើរសូមដល់រាជរដ្ឋាភិបាលជួយកសាងដើម្បីបង្ករភាពងាយស្រួលក្នុងការធ្វើដំណើរ។ រូបថត បាន ធារ៉ា
Share on facebook
Share on twitter
Share on linkedin
Share on telegram
Share on whatsapp

បាត់ដំបង៖ ប្រជាពលរដ្ឋជាង ២០០គ្រួសាររស់នៅភូមិរលួស ជាភូមិដាច់ស្រយាល ក្នុងឃុំមោង ស្រុកមោងឬស្សី ខេត្ដបាត់ដំបង សំណូមពរដល់រាជរដ្ឋាភិបាល ក៏ដូចជាសប្បុរសជន ជួយកសាងផ្លូវចូលភូមិមួយខ្សែមានប្រវែង ៧ ០០០ម៉ែត្រ និងមួយខ្សែទៀតចុះពីផ្លូវជាតិលេខ៥ មានប្រវែងប្រមាណ ៣ ០០០ម៉ែត្រដើម្បីសម្រួលដល់ការធ្វើដំណើរពេលឈឺថ្កាត់ និងសិស្សានុសិស្សបានធ្វើដំណើរទៅសិក្សាទាន់ពេលវេលា។

លោក ស៊ាន ហ៊ុន ពលរដ្ឋរស់នៅក្នុងភូមិរលួស ឃុំមោង បានថ្លែងថាផ្លូវក្នុងភូមិរលួស មានភាពលំបាក រលាក់ មានក្រឡុកតូចធំ បើនិយាយពីខែវស្សាផងមានចំនុចខ្លះបែកផុក និងលិចទឹកពិបាកធ្វើដំណើរខ្លាំងណាស់ ។ លោកថា៖ «បើសិនជាមានអ្នកជំងឺឈឺថ្កាត់ធ្ងន់ធ្ងរយប់ព្រលប់វិញមិនថារដូវប្រាំង ឬរដូវវស្សាទេ ពេលចង់ដឹកចេញទៅរកពេទ្យស្រុកមោងគឺពិបាកណាស់ ហើយអាចនឹងបាត់បង់ជីវិតតាមផ្លូវក៏ថាបាន»។

លោក ស៊ុន ណយ អនុភូមិរលួសបានលើកឡើងថាផ្លូវក្នុងភូមិបានខូចខាតដាច់ក្រឡុក ជាច្រើន កាលពីរដូវវស្សាកន្លងទៅដោយសារទឹកលិចហូរកាត់ផ្លូវ។ លោកអនុភូមិបន្តថា៖ «សំរាប់រដូវប្រាំងយើងអាចធ្វើដំណើរបានធម្មតាតែពុំសូវមានភាពងាយស្រួលនោះទេ តែបើរដូវវស្សាវិញមានត្រង់ចំនុចមួយចំនួនទឹកលិចបានបិទមិនឱ្យធ្វើដំណើរនោះទេ»។

លោក សាំង ពុត នាយកសាលាបឋមសិក្សារលួស បានថ្លែងឱ្យដឹងផងដែរថាដោយសារភូមិមួយនេះដាច់ស្រយាលពិបាកធ្វើដំណើរ បានបណ្ដាលឱ្យសិស្សកំរិតអនុវិទ្យាល័យ និងវិទ្យាល័យមួយចំនួនខកខានទៅសិក្សាដោយសាររដូវរស្សាផ្លូវស្អិត រអិល និងរដូវប្រាំងផ្លូវក្រឡុក រលាក់បណ្ដាលឱ្យបែកកង់ម៉ូតូជាដើម។ លោកនាយកបន្ថែមថា៖ «ពុំមែនតែសិស្សធំៗនោះទេសូម្បីតែកុមារតូចៗដែលសិក្សានៅសាលាបឋមផ្ទាល់ក៏ត្រូវលំបាកនៅរដូវវស្សា ដោយសារខ្លះដើរដួលប្រលាក់សម្លៀកបំពាក់ក៏ត្រលប់ទៅផ្ទះខានរៀនសូត្រក៏មាន»។

ផ្លូវចូលភូមិមួយខ្សែនៅក្នុងភូមិរលួស ជាភូមិដាច់ស្រយាល ក្នុងឃុំមោង ស្រុកមោងឬស្សី ខេត្ដបាត់ដំបង ដែល​ពលរដ្ឋស្នើរសូមដល់រាជរដ្ឋាភិបាលជួយកសាងដើម្បីបង្ករភាពងាយស្រួលក្នុងការធ្វើ​ដំណើរ។ រូបថត បាន ធារ៉ា
ផ្លូវចូលភូមិមួយខ្សែនៅក្នុងភូមិរលួស ជាភូមិដាច់ស្រយាល ក្នុងឃុំមោង ស្រុកមោងឬស្សី ខេត្ដបាត់ដំបង ដែល​ពលរដ្ឋស្នើរសូមដល់រាជរដ្ឋាភិបាលជួយកសាងដើម្បីបង្ករភាពងាយស្រួលក្នុងការធ្វើ​ដំណើរ។ រូបថត បាន ធារ៉ា

ទាក់ទងនឹងបញ្ហាផ្លូវពិបាកនេះលោក ស៊ួស សឿត មេភូមិរលួសបានថ្លែងឱ្យដឹងថា ភូមិរលួសមានផ្លូវ ២ខ្សែដែលធ្វើដំណើរចូលមកក្នុងភូមិដោយមួយខ្សែមានប្រវែង ៣ ០០០ម៉ែត្រចុះមកពីផ្លូវជាតិលេខ៥ និងមួយខ្សែរទៀតមានប្រវែង ៧ ០០០ម៉ែត្រដែលចេញមកពីសាលាអនុវិទ្យាល័យមោងឬស្សី។

លោកបញ្ជាក់ថា៖ «ផ្លូវទាំង ២ខ្សែត្រូវបានរងការខូចខាតធ្ងន់ធ្ងរនារយៈពេល ២ឆ្នាំចុងក្រោយនេះដោយសារលិចទឹក ហើយកាលពីឆ្នាំ ២០២០បានរងការខូចខាតដាច់ក្រឡុកជាកំណាត់ៗយ៉ាងដំណំ»។

លោកមេភូមិបន្ថែមថា ប្រជាពលរដ្ឋក្នុងភូមិរលួសក៏បានសហការគ្នាចូលរួមជាថវិកាដើម្បីជួសជុលផ្លូវបានល្មមនឹងប្រើប្រាស់កាលពីកន្លងទៅ តែពុំបានជាប់ល្អនោះទេ ខណៈលោកបានដាក់សំណើរទៅកាន់រដ្ឋបាលឃុំហើយផងដែរ តែឃុំពុំទាន់មានថវិកាកសាងផ្លូវនេះនៅឡើយទេ។ យ៉ាងណាមិញលោកមេភូមិ ក៏ដូចជាប្រជាពលរដ្ឋជាង ២០០គ្រួសារសំណូមពរទៅកាន់រាជរដ្ឋាភិបាល ក៏ដូចជាសប្បុរសជន សូមជួយសាងសង់ផ្លូវទាំង ២ខ្សែរដែលមានប្រវែងសរុប ជាង ១០ ០០០ម៉ែត្រដើម្បីសម្រួលដល់ការធ្វើដំណើររបស់ពលរដ្ឋស្រួលចេញចូលពីភូមិទៅផ្សារទិញឥវ៉ាន់ ក៏ដូចជាស្រួលដឹកអ្នកជំងឺឈឺថ្កាត់ទៅកាន់មន្ទីរពេទ្យ និងជួយសម្រួលឱ្យសិស្សក្នុងភូមិដាច់ស្រយាលមួយនេះបានទៅសិក្សាទាន់ពេលវេលា ពុំបាច់ខកខានដូចកាលកន្លងទៅ។

ពាក់ព័ន្ធនឹងបញ្ហាផ្លូវនេះលោក ជា សុវណ្ណ មេឃុំមោង បានឱ្យដឹងថា ដោយសារថវិកាមូលនិធិឃុំឆ្នាំ២០២១ នេះត្រូវបានកសាងផ្លូវប៉េតុងមួយខ្សែនៅភូមិរ៉ា មានប្រវែង ៩៨៦ម៉ែត្រចំនាយថវិកា ២៣៤ ០០០ ០០០រៀលទើបក្នុងភូមិរលួសបានត្រឹមគ្រោងទុកពុំទាន់បានជួសជុល ឬសាងសង់ផ្លូវថ្មីនៅឡើយនោះទេ។

លោកមេឃុំបញ្ជាក់ថា៖ «ចំពោះផ្លូវមួយខ្សែដែលមានប្រវែង ៧ ០០០ម៉ែត្រចេញពីសាលាអនុវិទ្យាល័យមោង ឆ្ពោះទៅកាន់ភូមិរលួសគឺរដ្ឋបាលឃុំគ្រោងនឹងស្នើរសុំក្រុមការងាររាជរដ្ឋាភិបាលនៅក្នុងកិច្ចប្រជុំមួយនាថ្ងៃទី១៧ ថ្ងៃទី១៨ ខែធ្នូខាងមុខនេះហើយ»

លោកមេឃុំបន្ថែមថា ផ្លូវដែលចុះពីផ្លូវជាតិលេខ៥ មកកាន់ភូមិរលួសដែលមានប្រវែង ៣ ០០០ម៉ែត្រ រដ្ឋបាលឃុំពុំទាន់មានគម្រោងសាងសង់ថ្មីនៅឡើយទេដោយសារគិតថាបើ កសាងផ្លូវប្រវែង ៧ ០០០ម៉ែត្របានគឺអាចបញ្ជៀសគ្រោះថ្នាក់ផ្សេងៗនៅពេលសិស្សជិះទៅសិក្សា។

គួរបញ្ជាក់ថា ប្រជាពលរដ្ឋក្នុងភូមិរលួស ដែលជាភូមិដាច់ស្រយាល ស្ថិតក្នុងឃុំមោង ស្រុកមោងឬស្សី មានពលរដ្ឋរស់នៅប្រមាណ ២៤៨គ្រួសារ មនុស្សរាយប្រមាណ ១ ១០០នាក់ ដែលកំពុងរងផលប៉ះពាល់ផ្សេងៗអំពីផ្លូវលំបាកទាំង ២ខ្សែដែលឆ្ពោះមកកាន់ភូមិនេះ ខណៈផ្លូវមួយខ្សែរមានប្រវែង ៣ ០០០ម៉ែត្រ ចុះពីផ្លូវជាតិលេខ៥ និងផ្លូវមួយខ្សែរទៀតមានប្រវែង ៧ ០០០ម៉ែត្រដែលឆ្លងកាត់ភូមិចំនួន៦ គឺ ភូមិកោះចារ ភូមិអូក្រប៉ៅ ភូមិរលួស ភូមិប្រឡាយ ភូមិតាតុ២ និងភូមិកន្សៃបន្ទាយ៕

ដោយពលរដ្ឋសារព័ត៌មាន បាន ធារ៉ា

34 views
Share on facebook
Share on twitter
Share on linkedin
Share on telegram
Share on whatsapp
កំណត់សម្គាល់៖ អត្ថបទនេះត្រូវបានផលិត និងកែសម្រួលដោយក្រុមការងាររបស់ Internews។ ខេមបូចា ពុំទទួលខុសត្រូវចំពោះអត្ថន័យ និងខ្លឹមសារ ក្នុងអត្ថបទដែលផលិតដោយពលរដ្ឋសារព័ត៌មាននោះទេ។
ព័ត៌មានទាក់ទង