ក្តាតគឺជាកន្លែងប្រមូលផ្តុំទូកនេសាទធំមួយ ដែលប្រជាជនតំបន់នេះមានមុខរបរនេសាទសមុទ្រដើម្បីចិញ្ចឹមជីវិតយ៉ាងសម្បូរសប្បាយតាំងពីយូរមកហើយ ប៉ុន្តែពីរឆ្នាំចុងក្រោយនេះ ផលនេសាទសមុទ្របានធ្លាក់ចុះធ្វើឱ្យប៉ះពាល់ជីវភាពពួកគាត់យ៉ាងខ្លាំង។ ប្រជានេសាទលើកឡើងថា ផលនេសាទធ្លាក់ចុះនេះដោយសារតែ មានទូកនេសាទខុសច្បាប់ជនជាតិវៀតណាម ជាច្រើនបានចូលមកនេសាទក្នុងដែនសមុទ្រខ្មែរដោយគ្មានខ្លាចញញើត។
វ័យ៣៧ឆ្នាំ លោក ពុទ្ធា ដែលរករបរនេសាទសមុទ្រជាង១០ឆ្នាំមកហើយក្នុងតំបន់ក្តាតបាននិយាយថា ក្នុងមួយយប់ៗមានទូកនេសាទវៀតណាមធំៗចូលមក ប្រើឧបករណ៍ខុសច្បាប់ជាច្រើនគ្រឿងក្នុងតំបន់នេះ មានបទល្មើសអូសគូរ អូសឆក់ និងអូសភ្លើងជាដើម ដោយបទល្មើសទាំងនេះបានប្រមូលផលសមុទ្រគ្រប់ប្រភេទទាំងតូចទាំងធំគ្មានសល់។
លោក ពុទ្ធា បន្ថែមថា៖ «[ជនជាតិវៀតណាម]អូសគូរ អូសឆក់ អូសភ្លើងរញ៉េរញ៉ៃពេញសមុទ្ររាល់យប់ វាអូសដល់ផែប្រេងព្រែកអំពិល និងកន្លែងទឹករាក់ៗអី អូសខ្ទេចខ្ទីរអស់ ស្ទើរមកដល់ច្រាំងយើង»។ លោកបន្តថា៖ «[ជនជាតិវៀតណាម]អត់មានខ្លាចញញើតអីបន្តិចសោះហ្មង មកអូសប្រមូលទាំងបង្គា ក្តាម ត្រីគ្រប់ប្រភេទ តាំងពីតូចដល់ធំ វាចូលទាំងកូនគីអី ព្រោះក្រឡាវាតូចៗ»។
សម្បុរស្រអែម ពាក់អាវយឺតដៃខ្លីពណ៌បៃតងអង្គុយលើទូកនេសាទ ពុទ្ធា បានលើកជើង បង្ហាញក្បាលជង្គង់ឆ្វេងរបស់ខ្លួនដែលរងរបួសហើម និងលេបថ្នាំជាប្រចាំដល់សព្វថ្ងៃ ដោយសារតែទូកវៀតណាម បានបុកពន្លិចទូករបស់គាត់កាលពីពីរឆ្នាំមុន។ ប្រជានេសាទរូបនេះបន្ថែមថា ទូកនេសាទខ្មែរតំបន់ក្តាតនេះជាច្រើនគ្រឿងត្រូវបានទូកនេសាទធំៗ វៀតណាម ដេញបុកពន្លិចបណ្តាលឱ្យប្រជានេសាទខ្មែរ ខ្លះរបួសបាក់ដៃ បាក់ជើង ហើយខ្លះក៏រងការប្រើហិង្សា ផងដែរនាពេលកន្លងមក ។
ប្រជានេសាទលោក ពុទ្ធា បន្ថែមថា៖ «តំបន់ក្តាតនេះទូកមិនតិចជាង១០គ្រឿងទេត្រូវបានទូកនេសាទយួនបុក ជួនកាលបាក់ដៃ បាក់ជើង អាខ្លះទាញបុ័ងតោដេញកាប់យើងទៀត គេកាប់យើងមិនបាន គេដេញបុកយើងហ្មង គេកាងដូចដីគេចឹង បើសមត្ថកិច្ចយើងអត់ធ្វើអីគេផងហ្នឹង គេកាងអត់ចង់ឱ្យខ្មែរយើងរកស៊ីហ្មងហ្នឹង»។ ពុទ្ធា បន្ថែមថា៖ «រាល់ថ្ងៃខ្ញុំមានការភ័យខ្លាច អត់ហ៊ានចេញអូសម្នាក់ឯងទេ ខ្លាចគេធ្វើបាបទៀត ទៅទល់មានគ្នាបានហ៊ានទៅ»។
តំបន់ក្តាត ស្ថិតនៅក្នុងភូមិព្រែកអំពិល ឃុំកោះតូច ស្រុកទឹកឈូ ដែលបច្ចុប្បន្នត្រូវបានកាត់ ទៅក្រុងបូកគោ ខេត្តកំពតនាពេលថ្មីៗនេះ។ ព្រឹទ្ធាចារ្យតំបន់នេះឱ្យដឹងថា ប្រជាជនតំបន់ក្តាត នេះ មានមុខរបរ នេសាទសមុទ្រតាំងពីសង្គមមកនឹងបន្តនេសាទតាំងពីឆ្នាំ១៩៧៩ដល់បច្ចុប្បន្ន ដែលមានទូកនេសាទកើនឡើងប្រហែល១០០គ្រឿង។
ប្រជានេសាទលោក ប៉ែន ភ័ក្រ្ត វ័យ៣៨ឆ្នាំ ដែលមានរបរនេសាទសមុទ្រជាង១០ឆ្នាំមកហើយនៅតំបន់ក្តាតបានឱ្យដឹងថាដោយសារផលនេសាទធ្លាក់ចុះ បច្ចុប្បន្ននេះមានទូកប្រហែលពាក់កណ្តាលប៉ុណ្ណោះ បានចេញទៅនេសាទចំណែកពាក់កណ្តាលទៀតចតចោល ខ្លះទៅរកការងាររោងចក្រ ខ្លះទៅធ្វើការងារ សំណង់ជាដើម ដើម្បីចិញ្ចឹមជីវិត និងដោះបំណុល។
ប្រជានេសាទខាងលើបន្ថែមថា បច្ចុប្បន្នក្នុងមួយយប់ ពួកគាត់រកចំណូលពីការនេសាទ ពេលខ្លះបាន៥ទៅ៦ម៉ឺនរៀលប៉ុណ្ណោះ ក្រោយផាត់ការចំណាយលើប្រេង និងថ្លៃកូនដៃរួច ប៉ុន្តែពេលខ្លះរកអត់បានក៍ខាតដែរ។ បើប្រៀបធៀបពីមុនពួកគាត់អាចរកចំណូលបាន១យប់សល់ជាង១០ម៉ឺនទៅជាង២០ម៉ឺនរៀល គ្រាន់ចិញ្ចឹមជីវិត និងដោះស្រាយបំណុលប្រចាំខែ។
លោក ប៉ែន ភ័ក្រ្ត បន្ថែមថា៖ «យើងចេញទៅ១យប់ អស់ប្រេងពីរកាន(៦០លីត្រ) កូនដៃ៦ម៉ឺន បើ១យប់បាន៣០ម៉ឺនជាងអី មានសល់អី បងប្រៀបធៀបមើល បើពីមុនបាន៤០ម៉ឺនទៅ៥០ម៉ឺន ១យប់ សល់ជាង១០ម៉ឺនអីដែរ»។ លោកបន្តថា៖ «អ្នកនេសាទ៥០ភាគរយទុកទូកចោល! រកលែងបាន ហើយម៉ាស៊ីនខូចអត់មានលុយធ្វើ យូរទៅពិបាកទៅៗ អត់លុយបង់ធនាគារព្រោះទូកសុទ្ធតែខ្ចីបុលអង្គការមកទិញ»។
លោក ប៉ែន ភ័ក្រ្ត លើកឡើងដូចគ្នាទៅនឹងអ្នកនេសាទផ្សេងទៀតថា មូលហេតុធ្លាក់ចុះផលនេសាទនេះដោយសារតែទូកវៀតណាមចូលមកនេសាទប្រើឧបករណ៍ខុសច្បាប់ច្រើនពេកនៅលើផ្ទៃសមុទ្រ។ លោកសម្តែងក្តីព្រួយបារម្ភបើមិនមានការទប់ស្កាត់នោះទេ ធនធានសមុទ្រខ្មែរនឹងរលាយហិនហោចអស់ជាមិនខាន។
លោក ប៉ែន ភ័ក្រ្ត បន្តថា៖ «[ទូកវៀតណាម]ចូលជាង១០គូរ មួយយប់ៗ យើងគេចតែទូកគេសមុទ្រក្តាតយើងត្រឹមកោះសេះ មកមុខកំពត ត្រឹមកោះខ្ទះមកយើងហ្នឹង! គេចូលអូសពេញទាំងអស់ អូសមួយយប់ៗគេចតែគេ ថ្ងៃមុននេះ [ទូកជនជាតិវៀតណាម] បុកដាច់ខ្សែង៉ាងទូកខ្ញុំខ្ទេច គេអត់ខ្លាចញញើតយើងទេ ទូកគេធំៗ គេម៉េចខ្លាចយើង ម៉ោង៥ល្ងាចអី ទូកគេចេញមកហើយអូសគូរ អូសឆក់ និងអូសភ្លើង»។
ប្រជានេសាទខាងលើបានបញ្ជាក់ថាកន្លងទៅ ធ្លាប់ឃើញមន្រ្តីជលផល ចុះមកសាកសួរពួកគាត់ពីបញ្ហាបទល្មើសនេសាទនេះដែរ ប៉ុន្តែក្រោយសាកសួរហើយ ស្ងាត់ឈឹងទូកវៀតណាមនៅតែចូលនេសាទប្រើឧបករណ៍ខុសច្បាប់ដដែល។ លោកបន្ថែមថា ប្រជានេសាទក៏ធ្លាប់ទូរសព្ទសុំអន្តារគមន៍តាមលេខដែលមន្រ្តីនគបាលការពារព្រំដែនទឹកបានដាក់ផ្លាកក្បែរចំណតទូកនេសាទតំបន់ក្តាតនេះដែរ តែមិនមានការឆ្លើយតបទេ។
លោក ប៉ែន ភ័ក្រ្ត បន្ថែមថា៖ «ទៅមុខទៀតប្រជាជននៅក្តាតមិនដឹងរកស៊ីអីទេ រត់ចោលទូកអស់ហើយ ឥឡូវចោលបណ្តើរៗហើយ មានណាគេចេញរកទៀត សូមឱ្យរដ្ឋាភិបាលជួយទប់ស្កាត់ការអូសគូរ អូសឆក់ អូសភ្លើង ឱ្យអស់ផង បើមិនចឹងបងប្អូននេសាទវេទនាងាប់ហើយ រកអត់បានសោះចឹងពិបាកណាស់!»។
ប្រជានេសាទម្នាក់ទៀត លោក យឹម លាង អាយុ៣៣ឆ្នាំ ប្រឡូកក្នុងរបរនេសាទជិត២០ឆ្នាំមកហើយ គាត់នេសាទតាំងពីធ្វើកូនដៃគេ រហូតដល់ធ្វើតៃកុងខ្លួនឯងក្រោយខ្ចីលុយធនាគារ១ម៉ឺនដុល្លារទិញទូក១ គ្រឿងចេញរកស៊ីបាន៣ឆ្នាំហើយ បន្ទាប់ពីរៀបការរួចនឹងមានកូនបីនាក់ក្នុងបន្ទុក។
លោក យឹម លាង ឱ្យដឹងថា ក្នុងមួយជើងរកចំណូលបានតែ៥ទៅ៦ម៉ឺនរៀលប៉ុណ្ណោះ ប៉ុន្តែគាត់មិនបានចេញ ទូករាល់ថ្ងៃនោះទេ គឺ៤ទៅ៥ថ្ងៃចេញម្តង ដោយសារពេលខ្លះខ្សល់ខ្លាំង មានព្យុះ ហើយអ្នកនេសាទដូចគ្នាត្រឡប់មកវិញថារកអត់បាន ខ្លួនក៏មិនចេញទៅនេសាទដែរ ព្រោះខ្លាចខាតថ្លៃប្រេងនិងថ្លៃកូនដៃ។
លោកថាដោយសារមិនចេះអក្សរ មិនដឹងឡើងគោករកស៊ីអី មានតែទ្រាំរករបរនេសាទនេះ ដើម្បីចិញ្ចឹមគ្រួសារ និងដោះបំណុលធនាគារ។
អ្នកនេសាទខាងលើបន្ថែមថា នៅតំបន់ដែលពួកគាត់ទៅនេសាទសមុទ្រនេះឃើញទូកនេសាទវៀតណាមធំៗចេញមកអូសប្រើឧបករណ៍នេសាទខុសច្បាប់ជាច្រើនគ្រឿងពេញផ្ទៃសមុទ្រ ប៉ុន្តែលោកមិនដឹងថា ត្រឹមណាដីយើង ត្រឹមណាដីគេទេ គឺទាំងខ្មែរទាំងវៀតណាមនេសាទជាមួយគ្នា ព្រោះមិនឃើញមានបង្គោល បោះបញ្ជាក់ច្បាស់លាស់។
លោកបញ្ជាក់ថា កន្លងទៅធ្លាប់លឺតៃកុងទូកនេសាទវៀតណាមដែលមិត្តភ័ក្រ្តរបស់ខ្លួនប្រាប់ថាបានជាពួកគេហ៊ានចូលមកនេសាទប្រើឧបករណ៍ខុសច្បាប់ដូច្នេះដោយសារបានបង់លុយឱ្យមន្រ្តីអស់ហើយទើបហ៊ាន។
លោក យឹម លាង ៖ «តៃកុងទូក[ជនជាតិវៀតណាម]យើងធ្លាប់ស្គាល់ ដោយសារនេសាទយូរទៅស្គាល់គ្នារហ័សនាមគេហ្នឹង ទូក១៤ ខ្ញុំសួរវាលេងអីទៅ ដោយប្រាប់វាថាកុំឱ្យវាចូលមកឆ្ងាយពេកប្រយ័ត្នខាងជើងទឹកចាប់ វាថាខ្លាចអី ! បង់លុយហើយៗ ខ្លាចអី តែវាមិនបញ្ជាក់បង់ឱ្យខាងណានោះទេ»។
ទាក់ទងករណីខាងលើនេះ លោក ឈួន ចន្ទរស្មី នាយប៉ុស្តិ៍ក្តាត នៃវរសេនាតូចលេខ២៤១ ការពារដែនសមុទ្រ ដែលឈរជើងតំបន់នោះបានឱ្យដឹងថាមួយរយៈនេះលោក អត់ឃើញ មានខាង ប្រជាជនរាយការណ៍ពីបទល្មើសនេសាទរឺបញ្ហាអ្វីនោះទេ។ បើសិនជាបានទទួលព័ត៌មាន លោកនឹងរាយការណ៍បន្តទៅថ្នាក់លើដើម្បីអន្តរាគមន៍ភ្លាម ព្រោះកន្លែង លោកឈរ ជើងពុំមាន មធ្យោបាយដូចជាទូករឺអូប័រប្រចាំការដើម្បីចុះល្បាត នោះទេ ។
លោក ឈួន ចន្ទរស្មី បន្ថែមថា៖ «តាំងពីខ្ញុំនៅមិនដែលឃើញ មានប្រជាពលរដ្ឋរាយការណ៍ មកខ្ញុំផង ព្រោះខ្ញុំបានបិទលេខទូរសព្ទនៅផែ និងតាមគោលដៅនោះទាំងអស់ ដើម្បីឱ្យប្រជានេសាទទូរសព្ទរាយការណ៍ អត់ដែលឃើញរាយការណ៍ផងពីរឆ្នាំមកនេះ ប្រហែលគាត់អត់ឃើញខាងខ្ញុំមានមធ្យោបាយអីហើយ ទើបគាត់អត់តេមកខ្ញុំតាមមើល!»។
ទោះបីយ៉ាងណាលោកបញ្ជាក់ថាតាំងពីលោកមកឈរជើងនៅតំបន់ក្តាតបីឆ្នាំមកនេះ បានទទួលសេចក្តីរាយការណ៍ពីទូកនេសាទវៀតណាមលួចចូលមកនេសាទខុសច្បាប់នៅគីឡូលេខ១២ចំនួនពីរលើកប៉ុណ្ណោះ ក្នុងអំឡុងពេលបុណ្យសមុទ្រនៅដើមខែធ្នូឆ្នាំ២០២៣ ខណៈដែលដកកម្លាំងមកចូលរួមបុណ្យសមុទ្រ។
លោក ឈួន ច័ន្ទរស្មី បន្តថា៖ «ពេលនោះខ្ញុំបានស្នើសុំមេយកអូប័រមកប្រចាំការបានជាង២០ថ្ងៃនៅប៉ុស្តិ៍ដែរ វាស្ងាត់រហូតតាំងពីថ្ងៃទី៣ទី៤ធ្នូមកវាស្ងាត់ អត់ឃើញមានបទល្មើសអីចូលមក ! ដល់ចឹងគេយកអូរប័រទៅវិញទៅ!»។
លោកមេប៉ុស្តិ៍ខាងលើបានអះអាងថា តាំងពីលោកមកឈរជើងមិនដែលបានទទួលសំណូកពីការនេសាទខុសច្បាប់សូម្បីតែ១រៀល ព្រោះលោកមិនមានមធ្យោបាយអីចេញល្បាត ហើយសូម្បីតែម្ហូបក៏លោកមិនហ៊ាន សុំប្រជានេសាទទទួលទានដែរ ដោយក្រែងចិត្តនឹងខ្លាចពួកគាត់ទើសទាល់។
លោក ឈួន ច័ន្ទរស្មី បន្ថែម៖ «ខ្ញុំអត់បានទទួលទេស្ងាត់ច្រៀប១ខែ ក៏មិនបានទទួលពីខាងហ្នឹង មួយរៀលផង! ព្រោះយើងអត់មធ្យោបាយ អត់ចេញប្រតិបត្តិការ វាមានអីត្រូវពឹងពាក់យើងទេ វាមិនខ្លាចយើងទេ! បើមានការអីខ្ញុំតេទៅមេ ដើម្បីអន្តរាគមន៍ទ្រទ្រង់សភាពការណ៍ហ្នឹងវិញ»។
ខេមបូចា មិនអាចទំនាក់ទំនងលោក សំរិទ្ធ ថាវរ៉ាន់ មេបញ្ជាការវរសេនាតូចលេខ២៤១ប្រចាំខេត្តកំពតរបស់នាយកដ្ឋាននគបាលការពារព្រំដែនទឹក តាមលេខទូរស័ព្ទដែលបិទនៅផែទូកនេសាទក្តាតបាននោះទេ ដោយទូរសព្ទចូលជាច្រើនសារមិនមាន អ្នកលើកទទួលកាលពីថ្ងៃទី៨ ខែមករា ឆ្នាំ២០២៤។
ជុំវិញការលើកឡើងបទល្មើសនេសាទខាងលើលោក ស សូរិន នាយខណ្ឌជលផលខេត្តកំពតបានឱ្យដឹងថា កន្លងទៅកម្លាំងលោកសហការជាមួយគណៈកម្មាការសហគមន៍នេសាទទាំង៩ តាមបណ្តោយឆ្នេររហូតដែរ។ លោកបញ្ជាក់ថា ក្រោយពីទទួលព័ត៌មាននេះលោកនឹងចាត់កម្លាំងចុះល្បាតបន្ថែមទៀតនៅតំបន់ខាងលើនេះ។
លោក ស សូរិន បន្ថែមថា៖ «តំបន់ហ្នឹងដែនទឹកជាប់គ្នា យើងល្បាតជាប្រចាំដែរ ពេលបានទទួលព័ត៌មាននេះ យើងនឹងឱ្យទៅល្បាតថែមទៀត ដែនសមុទ្រជាប់គ្នាគេម្ខាងយើងម្ខាង មុខក្តាតហ្នឹង! ផែប្រេងនៅចំកណ្តាល»។ លោកបន្ថែមថា៖ «ហើយកន្លែងហ្នឹងមកដល់គោកមានសហគមន៍ យើងបោះបង្គោលអភិរក្សស្មៅសមុទ្រ មានប្រអប់បេតុងសិប្បនិម្មិតយើងពេញហ្នឹងអស់ហើយ យើងនឹងល្បាតទៀត នៅខាងក្រៅហ្នឹង! យើងនៅបន្តល្បាតជាមួយគណៈកម្មការ សហគមន៍ទាំង៩របស់យើង»។
លោក ស សូរិន បញ្ជាក់ថា ទិន្នផលនេសាទវាមានការប្រែប្រួលទៅតាមរដូវកាល គឺនៅពេលរដូវប្រាំង ទិន្នផលធ្លាក់ចុះបន្តិចហើយ។
លោកបន្ថែមថា បើតាមស្ថិតិរបាយការណ៍ប្រចាំឆ្នាំ ចាប់ពីខែមករាដល់មេសា ផលនេសាទធ្លាក់ចុះបន្តិច ចាប់ពីខែឧសភាដល់ខែធ្នូ ទិន្នផលសមុទ្រមានវិញ ដោយសារវាទាក់ទងចរន្តទឹក និងបម្រួលបម្រួលអាកាសធាតុផង។
លោក សូរិន បន្តថា៖ «ខែវស្សាវាសម្បូរខែប្រាំង ទឹករាងក្តៅចរន្តទឹកអត់សូវហូរអីទៅ ជារៀងរាល់ឆ្នាំគឺចឹង ខែប្រាំងមិនសូវសម្បូរដូចខែវស្សាទេ»។
ទោះបីយ៉ាងណាប្រជានេសាទ លោក យឹម លាង ដែលរករបរនេសាទជិត២០ឆ្នាំបាននិយាយ ថា ផលនេសាទបានធ្លាក់ចុះខ្លាំងរយៈពេលពីរឆ្នាំមកហើយ មិនថាខែប្រាំង រឺខែវស្សានោះទេ គឺអូសអត់បានតែម្តង ដោយសារតែទូកនេសាទវៀតណាមប្រើឧបករណ៍នេសាទខុសច្បាប់យ៉ាងច្រើនលើផ្ទៃសមុទ្រ។
ប្រជានេសាទខាងលើបានកត់សម្គាល់ថា នៅពេលដែលមន្រ្តីជំនាញចុះល្បាតម្តងៗ ក្រុមទូក នេសាទវៀតណាមហាក់ដឹងព័ត៌មានមុន គឺមិនចូលមកនោះទេ ហើយក្រោយពីមន្រ្តីដកត្រឡប់ទៅវិញទូកគេចូលនេសាទខុសច្បាប់ដដែល ប្រហែលជាមានអ្នកផ្តល់ព័ត៌មានឱ្យគេមុនក៏មិនដឹង។
បើតាមលោក ស៊ឹម ហ៊ីម ប្រធានសហគមន៍នេសាទ ត្រពាំងសង្កែ បានឱ្យដឹងថា លោកក៏ទទួលព័ត៌មានថា ពិតជាមានទូកវៀតណាមចូលមកនេសាទខុសច្បាប់នៅតំបន់ខាងលើមែន ចំណែកក្នុងសហគមន៍ លោកគ្រប់គ្រង គឺមិនមាននោះទេបច្ចុប្បន្ន។
ទោះបីយ៉ាងណាលោកសម្តែងក្តីព្រួយបារម្ភថា ធនធានសមុទ្រនឹងថយចុះដោយសារកក្តាពីរ ទីមួយ ដោយសារកក្តាប្រើប្រាស់បទល្មើសនេសាទខុសច្បាប់ ទីពីរ ការចាក់ដីរំលោភយកដីព្រៃកោងកាងធ្វើជាកម្មសិទ្ធ។
លោក ស៊ឹម ហ៊ីម បន្ថែមថា៖ «សហគមន៍យើងកំពុងការពារដីទាំងនោះដោយ ចាប់ផ្តើមស្តារ ដីព្រៃកោងកាងឡើងវិញដើម្បីថែរក្សាជីវៈចម្រុះ ប៉ុន្តែទោះបីយើងស្តារប៉ុន្មានក៏ដោយ បើតំបន់ខាងក្រៅសហគមន៍មានបទល្មើសនេសាទច្រើនហ្នឹង អ្នកនេសាទគាត់អត់ទៅណារួចទេ គាត់ងាកមកប្រព្រឹត្តបទល្មើសនេសាទក្នុងសហគមន៍យើងហ្នឹង គឺហិនហោចទាំងអស់តែម្តង!»។
លោក ស៊ឹម ហ៊ីម បានសំណូមពរដល់រាជរដ្ឋាភិបាលបង្កើនការយកចិត្តទុកដាក់បន្ថែមទៀតជុំវិញការបង្រ្កាបបទល្មើសនេសាទដែលកំពុងកើតឡើងច្រើនលើផ្ទៃសមុទ្រ និងគួរពង្រឹងការ អនុវត្តច្បាប់ឱ្យបានស្មើភាពគ្នា។
ខេមបូចា មិនអាចសុំការឆ្លើយតបពីមន្ត្រីស្ថានទូតវៀតណាមប្រចាំនៅកម្ពុជាបានទេតាំងពីថ្ងៃទី១១ ខែមករាដល់វេលាម៉ោង២រសៀលថ្ងៃទី១២ ខែមករា ឆ្នាំ២០២៤៕
