សមាគមសម្ព័ន្ធអ្នកសារព័ត៌មានកម្ពុជា

លោក ជា ប៉ូច មេដឹកនាំជាន់ខ្ពស់បក្សប្រឆាំង សុំការអភ័យទោសពី​រដ្ឋាភិបាល ហើយចង់វិលត្រឡប់មកកម្ពុជាវិញ

លោក ជា ប៉ូច អតីតតំណាងរាស្ត្រគណបក្សសង្គ្រោះជាតិ ថ្លែងអំឡុងបទសម្ភាសន៍ជាមួយខេមបូចានៅភ្នំពេញ។ រូបភាពថតនៅថ្ងៃទី២៩ ខែវិច្ឆិកា ឆ្នាំ ២០២២។ (ខេមបូចា/ ព្រីង សំរាំង)
លោក ជា ប៉ូច អតីតតំណាងរាស្ត្រគណបក្សសង្គ្រោះជាតិ ថ្លែងអំឡុងបទសម្ភាសន៍ជាមួយខេមបូចានៅភ្នំពេញ។ រូបភាពថតនៅថ្ងៃទី២៩ ខែវិច្ឆិកា ឆ្នាំ ២០២២។ (ខេមបូចា/ ព្រីង សំរាំង)

លោក ហ៊ុន សែន ប្រធានព្រឹទ្ធសភា បានយល់ព្រមដក​​ពាក្យ​បណ្តឹងប្រ​ឆាំងលោក ជា ប៉ូច មេដឹកនាំជាន់ខ្ពស់​គណបក្សភ្លើងទៀន បន្ទាប់ពីលោកបានប្រ​កាសផ្តាច់ខ្លួនពីលោក សម រង្ស៊ី អតីតមេដឹកនាំគណបក្សប្រឆាំង ដែលគាំទ្រលទ្ធិប្រ​ជាធិបតេយ្យ។

លោក ហ៊ុន សែន ធ្លាប់​បាន​ព្រមាន​ថា លោក​នឹង​រំលាយ​គណបក្ស​​ភ្លើងទៀន​​ជុំវិញ​ការ​ចោទ​ប្រកាន់​ថា មាន​ទំនាក់​ទំនង​ជាមួយ​លោក សម រង្ស៊ី អតីត​មេដឹកនាំ​​គណបក្ស​សង្គ្រោះ​ជាតិ ដែល​បាន​​បង្កើត​គណបក្ស​នេះ ហើយ​ក្រោយ​មក​ប្តូរ​ឈ្មោះ​មកជា​​គណបក្ស​ភ្លើងទៀន​។

កាលពីខែមីនាឆ្នាំមុន សារព័ត៌មាន Fresh News ​បានចុះ​ផ្សាយ​​សុន្ទរកថារបស់លោក ជា ប៉ូច ដែល​ថ្លែង​អំឡុង​កិច្ចប្រជុំយុវជនគណបក្សភ្លើងទៀននៅទីក្រុងភ្នំពេញ ដែល​លោក​បាន​អះ​អាង​​ថា គោលដៅរបស់លោកគឺទម្លាក់លោក ហ៊ុន សែន។

កាលពីថ្ងៃទី២៣ ខែមេសា ឆ្នាំនេះ​ លោក ជា ប៉ូច អតីតអគ្គហិរញ្ញិក និងជាសមា​ជិក​គណៈកម្មាធិការ​នាយក​នៃគណបក្ស​ភ្លើងទៀន​ បាន​ផ្ញើលិខិតសុំការអភ័យ​ទោស​ពី​រដ្ឋាភិបាល ជាពិសេស​ពី​អតីតនាយករដ្ឋមន្ត្រី ហ៊ុន សែន ដោយសម្តែងការសោកស្តាយចំពោះ​ទង្វើ​របស់​លោកកន្លងមក។

លោកក៏បានសុំការអភ័យទោសផងដែរចំពោះការប្រើប្រាស់ពាក្យសម្តី​ដែលប៉ះពាល់​ដល់​ដំណើរ​ការនៃការអភិវឌ្ឍ សន្តិភាព និងស្ថិរភាព ស្របពេល​អំពាវនាវទៅកាន់​តុលាការ​ឱ្យ​ទម្លាក់ចោលការចោទប្រកាន់មកលើរូបលោក។

លោក ជា​ ប៉ូច បានសរសេរនៅក្នុងលិខិត​របស់​លោកថា៖ «ខ្ញុំបានសម្រេចចិត្តផ្តាច់ខ្លួនពីលោក សម រង្ស៊ី និងឈប់​ធ្វើ​សកម្មភាពនយោបាយជាមួយក្រុម​អតីតគណបក្សសង្គ្រោះជាតិ ព្រម​ទាំង​​​គណបក្សភ្លើងទៀន […] ដោយ​សារអស់ជំនឿលើ​គោល​នយោ​បាយ​បរ​ទេសនិយម​ ការ​មួលបង្កាច់ ការជេរប្រមាថ ការលាបពណ៌​ ការបំបែកបំបាក់​ដែល​មិនអាចឈាន​ទៅរកការ​បង្រួប​​បង្រួមនិងការផ្សះផ្សារជាតិ​បាន»

ជាការឆ្លើយតបចំពោះ​លោក ជា ប៉ូច លោក ហ៊ុន សែន បានយល់ព្រមដក​​ពាក្យ​បណ្ដឹងរបស់​លោក និងស្វាគមន៍អ្នកផ្សេងទៀតដែលបញ្ចប់ទំ​នាក់​ទំ​នង​ជាមួយ «ជនក្បត់ជាតិ​បីជំនាន់» ដែល​ទំនងជាសំដៅ​ដល់​លោក សម រង្ស៊ី លោក​ សម សារី ឪពុករបស់​លោក​ សម រង្ស៊ី​ និង​លោកតា សំ ញាន ជា​ជីតា​របស់​លោក សម រង្ស៊ី​។

លោក ហ៊ុន សែន បាន​បង្ហោះ​សារ​កាល​ពីល្ងាច​ថ្ងៃអង្គារថា៖ «ក្នុងស្មារតីបង្រួបបង្រួម​ជាតិ ខ្ញុំ​សូម​​ទទួលយកការសុំអភ័យ​ទោសរបស់លោក​។ ខ្ញុំ​នឹង​ឲ្យ​មេធាវី​របស់​ខ្ញុំ​ដក​ពាក្យ​បណ្ដឹង​ចេញ​ពី​តុលាការ ​ដើម្បី​បញ្ចប់​​រឿងក្តី​​នេះ​ឲ្យ​បាន​ឆាប់»

លោក ហ៊ុន សែន បាន​បន្ថែមថា៖ «យើង​មិន​អត់ឱន​ឲ្យ​ជន​ណា​ ឬ​ក្រុម​ណាក៏ដោយ​ ​ដែល​បន្ត​ធ្វើ​តាម​ជន​ក្បត់ជាតិ​​នេះ [សម រង្ស៊ី] ជាដាច់ខាត។ យើង​នឹង​បន្ត​ប្រើផ្លូវ​​ច្បាប់ ​ដើម្បី​ចាត់ការ​លើ​ក្រុម​ណា​​ ឬ​បុគ្គល​ណា ​ដែល​ជេរ​​ប្រមាថ មួល​​បង្កាច់​មកលើ​​គណបក្ស ឬមកលើ​​​ខ្ញុំតទៅទៀត​ដោយ​គ្មាន​ការ​លើក​លែង»

លោក មាស នី អ្នកវិភាគនយោបាយមានប្រសាសន៍ថា យុទ្ធសាស្ត្ររបស់គណបក្ស​ប្រជាជនកម្ពុជា គឺកាត់បន្ថយកម្លាំងមន្ត្រីគណបក្សប្រឆាំង ដែលមានទំនាក់ទំនងជាមួយលោក​ សម រង្ស៊ី។

លោក មាស នី បានថ្លែងថា៖ «ពួកគាត់​ [មេដឹកនាំគណបក្សប្រឆាំង] ប្រ​ហែល​ជាគ្មាន​ច្រក​ចេញ​ទេ ប្រសិនបើពួកគាត់​នៅតែដើរតាមមេដឹកនាំគណបក្សប្រ​ឆាំង [សម រង្ស៊ី] ពីព្រោះ​ឥឡូវ​នេះ យើងឃើញថា ស្ថានភាពនយោបាយវាដល់កន្លែងមួយទាល់ច្រក [ដោយ​សារ​] ពួកគេ​និយាយ​គ្នាលែងកើយត ហើយអ្នកខាងក្រៅ [អ្នកនយោបាយដែលបានចាកចេញ] ត្រូវតែរក​វិធី ​ដើម្បី​ត្រឡប់​ប្រទេស​​របស់​ខ្លួន​​វិញ​»

លោក សម រង្ស៊ី ដែល​កំពុង​រស់នៅ​និរទេស​ខ្លួន​នៅ​ប្រទេស​បារាំង​ចាប់​តាំង​ពី​ចុង​ឆ្នាំ​​២០១៥ បាន​គេច​ខ្លួន​ពី​ចំណាត់​ការ​ផ្លូវ​ច្បាប់​មក​​លើ​រូប​លោក។ កាលពី​ឆ្នាំ២០​២១​ មេដឹកនាំ​គណបក្ស​សង្គ្រោះជាតិ​ចំនួនប្រាំបួនរូប រួមទាំងលោក សម រង្ស៊ី ផង ត្រូវបានកាត់ទោស​កំបាំងមុខ​ឱ្យ​ជាប់​ពន្ធនាគារពី២០ ទៅ២៥ឆ្នាំជុំវិញ​ការ​ជាប់​ពាក់​ព័ន្ធនៅក្នុងផែន​ការ​រដ្ឋប្រហារឆ្នាំ២០១៩។

លោក លី សុធារ៉ាយុទ្ធ អគ្គលេខាធិការគណបក្សភ្លើងទៀន មានប្រសាសន៍ថា ការ​លាលែង​របស់លោក ជា​ ប៉ូច ពីគណបក្ស ឬអ្នកផ្សេងទៀត​ នឹងមិនប៉ះពាល់ដល់​ប្រជាប្រិយភាព​របស់​គណបក្ស​​ភ្លើងទៀន​ ឬរារាំងដល់ការអនុវត្តសកម្មភាពនយោបាយនោះទេ។

លោក​មាន​ប្រសាសន៍ថា៖ «វាជាសិទ្ធិរបស់បុគ្គលម្នាក់ៗក្នុងការបន្ត ឬបញ្ឈប់​ការជាប់​ពាក់ព័ន្ធ​ក្នុងនយោបាយ ឬផ្លាស់ទៅគណបក្សផ្សេង […] ពីព្រោះ [យើង] មានសមាជិក មន្ត្រី និង​ថ្នាក់​ដឹក​នាំ​ជាច្រើនទៀត ដែលបន្ត​នៅជាមួយគណបក្ស»

លោក សុធារ៉ាយុទ្ធ បានបន្តថា៖ «គណបក្ស​ភ្លើងទៀនមិនបារម្ភទេ ពីព្រោះ [យើង] មាន​អ្នកគាំ​ទ្រ មន្ត្រី និងថ្នាក់ដឹកនាំនៅ​ថ្នាក់ជាតិ និងថ្នាក់ក្រោមជាតិ រួមទាំងថ្នាក់មូលដ្ឋាន ដែលជាកម្លាំង​ចលករ ឫស្នូលរបស់គណបក្ស»

លោកបន្ថែមថា គណបក្សភ្លើងទៀន និងគណបក្សឆន្ទៈខ្មែរ បាននិងកំពុងពង្រឹង និងពង្រីករចនាសម្ព័ន្ធគណបក្សទូទាំងប្រទេស។

លោក សុខ ឥសាន អ្នកនាំពាក្យគណបក្សកាន់អំណាច មានប្រសាសន៍ថា គណបក្ស​ប្រជាជន​ស្វាគមន៍អតីតសមាជិកគណបក្សប្រឆាំង ដែលបានផ្តាច់​ខ្លួន​ចេញពី «ក្រុមឧទ្ទាម» ទោះបីជា​កន្លង​មក ពួកគេបានរិះគន់គណបក្សកាន់អំណាចក៏ដោយ​។

លោក​បានថ្លែងថា៖​ «កន្លង​មក មនុស្ស​រាប់​រយ​នាក់ ជា​ពិសេស​សកម្មជន​របស់​គណបក្ស​​ភ្លើងទៀន​ និង​អតីត​គណបក្ស​សង្គ្រោះ​ជាតិ បាន​វិល​មក​រួម​រស់​ក្នុង​សង្គម​វិញ។ នេះជា​លទ្ធផល​នៃគោលនយោបាយបង្រួបបង្រួមជាតិរបស់គណបក្ស​ប្រជា​ជន​កម្ពុជា​ ដែល​មាន​សម្តេចតេជោ ហ៊ុន សែន ជាប្រធាន»

លោកបាន​​គូស​បញ្ជាក់​ថា ថ្មីៗនេះ អតីត​តំណាងរាស្ត្រ​គណបក្ស​សង្គ្រោះ​ជាតិ លោក គង់ សភា ក៏​បាន​អំពាវ​នាវ​ទៅ​លោក​នាយក​រដ្ឋមន្ត្រី ហ៊ុន ម៉ាណែត ឲ្យ​ជួយ​អន្តរាគមន៍​លើ​ករណី​របស់​​លោក ដើម្បី​​ទទួល​បាន​ការ​​លើក​លែង​ទោស​ពី​ព្រះមហាក្សត្រដែរ។

យោងតាមព្រះរាជក្រឹត្យចុះថ្ងៃទី២៤ ខែមេសា ឆ្នាំ២០២៤ ព្រះមហាក្សត្របានត្រាស់បង្គាប់​ឱ្យលើកលែងទោសលើ លោក គង់ សភា ដែលសាលាដំបូងរាជធានីភ្នំពេញ​ផ្តន្ទាទោសឱ្យ​ជាប់ពន្ធនាគារ៨ឆ្នាំកាលពីថ្ងៃទី១៤ ខែមិថុនា ឆ្នាំ២០២២ ពីបទ«រួមគំនិតក្បត់»

លោក គី តិច មេធាវី​រដ្ឋាភិបាល​បដិសេធ​មិន​ធ្វើ​អត្ថាធិប្បាយ​ទេ ខណៈ​​លោក ប្លង់ សុផល អ្នក​នាំពាក្យ​​សាលា​ដំបូង​រាជធានី​ភ្នំពេញ មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ​។

ទន្ទឹម​នឹង​នេះ លោក សម រង្ស៊ី មិន​បាន​ឆ្លើយ​តប​នឹង​សំណួរ​តាម​អ៊ីម៉ែល​ទេ ចំណែក​លោក គីមសួរ ភិ​រិទ្ធ អ្នក​នាំ​ពាក្យ​គណបក្ស​ប្រឆាំង​ក៏​មិន​អាច​ទាក់​ទង​សុំ​ការ​អត្ថាធិប្បាយ​​បាន​ដែរ៕

ប្រែសម្រួលពីអត្ថបទភាសាអង់គ្លេស៖ Senior Opposition Leader Chea Poch Says Sorry To Government, Wants To Come Home

803 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម