សកម្មជនសហជីពនៅសណ្ឋាគារឡឺ ម៉េរីឌានអង្គរ បានទទួលប្រាក់សំណង ក្រោយការតស៊ូប្រាំពីរខែ

ក្រុមបុគ្គលិកតវ៉ានៅខាងមុខសណ្ឋាគារឡឺ ម៉េរីឌាន អង្គរ ក្នុងខេត្តសៀមរាប កាលពីខែកញ្ញា បន្ទាប់ពីខាងសណ្ឋាគារបញ្ឈប់សហជីពបីនាក់កាលពីខែកក្កដា។ បញ្ញា ឆព័ណ្ណ
ក្រុមបុគ្គលិកតវ៉ានៅខាងមុខសណ្ឋាគារឡឺ ម៉េរីឌាន អង្គរ ក្នុងខេត្តសៀមរាប កាលពីខែកញ្ញា បន្ទាប់ពីខាងសណ្ឋាគារបញ្ឈប់សហជីពបីនាក់កាលពីខែកក្កដា។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

សមាជិក​សហជីព​បី​នាក់​ដែល​ត្រូវ​បញ្ឈប់ពី​ការងារ ដោយ​សណ្ឋាគារ ឡឺ ម៉េរីឌាន អង្គរ​ (Le Meridien Angkor )​ ដែល​ទើប​បិទ​ទ្វារ​ បានទទួល​សំណង​ហើយ​ក្រោយ​ពី​បានធ្វើ​ការ​តវ៉ា និង​ចរចា​អស់ពេល​ប្រាំពីរ​ខែ។

ខាង​សណ្ឋាគារ​បាន​បញ្ឈប់​ការងារ​​សកម្មជន​សហជីព​ចំនួន​បី​នាក់ រួមមាន​កញ្ញា ឌឿម ឆៃយ៉ា អ្នកនាង​ សុខ ណារ៉ែន និង​អ្នក​នាង ខាំ ស្រីភ័ក្រ បន្ទាប់ពី​អ្នក​ទាំង​បី​បាន​​ប្រមូល​ស្នាម​មេដៃពី​បុគ្គលិក​ ដែល​សណ្ឋាគារ​លំដាប់អន្តរជាតិនេះ​បាន​កាត់​ប្រាក់ខែ​មួយ​ចំនួន ដោយ​សារ​វិបត្តិកូវីដ​១៩។ ក្រោយ​មក​សណ្ឋាគារ ក៏​បាន​បិទ​ទ្វារ​នៅចុង​ខែ​វិច្ឆិកា ឆ្នាំ​២០២០។​

អ្នក​នាង ខាំ ស្រីភ័ក្រ ជា​បុគ្គ​លិក​ម្នាក់​ក្នុង​ចំណោម​បី​នាក់ដែល​​​ត្រូវ​បញ្ឈប់​ពីការងារ​​បាន​បញ្ជាក់​ថា​ពួក​គាត់​បាន​ទទួល​ប្រាក់​សំណង​ពី​សណ្ឋាគារ​រួច​ហើយ ប៉ុន្តែ​ថា​ពួកគាត់​បាន​យល់​ព្រម​ជាមួយ​ខាង​សណ្ឋាគារ រក្សាការសម្ងាត់អំពីចំនួនទឹកប្រាក់សំណង។

ស្រីភ័ក្រ បន្ថែម​ថា៖ «ខ្ញុំ​សុំទោស​ផង​ ខ្ញុំ​មិន​អាច​បញ្ជាក់​លម្អិត​ទេ ព្រោះ​ខ្ញុំ​បាន​យល់​ព្រមជាមួយ​ពួកគេ​ហើយ​»។​

ប្រធាន​សហព័ន្ធ​សហជីពកម្មករ​និយោជិត​វិស័យ​ទេសចរណ៍​កម្ពុជា (CTUWF​) លោក ទូច កុសល ដែល​ជា​អ្នក​ចូល​រួម​សម្រប​សម្រួល​ការ​ចរចា​នេះ បាន​បញ្ជាក់​ថា​ពិត​ជាមាន​ដំណោះស្រាយ​មែន ប៉ុន្តែ​មិន​ទម្លាយ​ទួលេខ​ជាក់លាក់​នៃសំណង​ដែល​ផ្ដល់​ឲ្យ​នេះ​ទេ​។

លោក​ថា​ចំនួន​ដែល​បាន​គឺ​តិច​ជាង​អ្វី​ដែល​ពួកគេ​ត្រូវ​បាន​ស្របតាម​ច្បាប់ ប៉ុន្តែ​ថា​អ្នក​ទាំង​នោះ​យល់ព្រម​ទទួល​យក​សំណងនេះ។​

លោក​បន្ត​ថា៖ «​យ៉ាងណា ខ្ញុំ​សោក​ស្ដាយ​ដែល​សណ្ឋាគារ​ប្រើ​ពេល​យូរ​ក្នុង​ការ​ផ្ដល់​ដំណោះស្រាយ ដែល​ស៊ីពេល​អស់ជាង​ប្រាំពីរ​ខែ»

មេដឹក​នាំ​សហជីព​រូបនេះ​បាន​បន្ថែម​ថាជម្លោះ​នេះ​បាន​បង្ហាញ​ពី​ដំណោះ​ស្រាយ​របស់​សមាជិកសហជីព និង​បុគ្គលិក​​ដែល​បាន​បន្ត «ការ​តស៊ូ»​ នៅចំពោះមុខការលំបាក។

លោក កុសល មាន​ប្រ​សាសន៍ទៀតថា៖ «ការ​សាមគ្គីគ្នា ធ្វើ​ឲ្យ​មានជោគជ័យ។ ដូចនេះ វា​ជា​គំរូល្អមួយសម្រាប់​អ្នក​ផ្សេង​ទៀត យើង​មិន​បោះបង់ចោលការ​តស៊ូទេ»។​

លោក លី តៃ​សេង មេធាវី តំណាង​ឲ្យ​សណ្ឋាគារ មិន​ចង់ធ្វើ​អត្ថាធិប្បាយ​លើ​ដំណោះ​ស្រាយ​នេះទេ​។

លោក លី លីន​ដា ប្រ​ធាន​សហជីព​ក្នុង​សណ្ឋាគារ ​ឡឺ ម៉េរីឌាន អង្គរ ​ដែល​ត្រូវ​រំលាយ​កាលពី​ខែ​ធ្នូ មាន​ប្រ​សាសន៍ថា ​សហជីពទាំង​បី​រូប​ត្រូវ​ការ​សំណង ព្រោះ​ពួកគេ​ត្រូវ​សង​បំណុល​គេ​ដែរ​។

លោក ក៏​មិន​យល់​ស្រប​ដែល​ខាង​សណ្ឋា​គារ​ដាក់​លក្ខខណ្ឌ​​លើ​ការ​ផ្ដល់​សំណង ហើយ​ត្រូវ​រក្សា​ការ​សម្ងាត់​លើ​សំណង​នេះ​ដែរ​។

លោកថា៖ «​ខ្ញុំ​គិត​ថា​សណ្ឋា​គារ​មិន​មាន​សិទ្ធិ​ហា​ម​អ្នក​ទាំង​នោះ​មិន​ឲ្យ​និយាយ​ជាមួយ​អ្នកសារព័ត៌មាន​ពី​រឿង​សំណង​ទេ»

សណ្ឋាគារ ​ឡឺ ម៉េរីឌាន អង្គរ​ ក្នុង​ខេត្ត​សៀម​រាប ត្រូវ​​បិទ​ជា​បណ្ដោះ​អាសន្ន​អស់ពេល​យ៉ាង​តិច​រយៈ​ពេល​មួយ​ឆ្នាំ ដោយ​គិត​ពី​ថ្ងៃទី​២៥ ខែ​វិច្ឆិកា​ នេះ​បើតាម​តំណាង​របស់​សណ្ឋាគារ។ សណ្ឋាគារ​បាន​បិទ​ ទោះ​បីជាមាន​បុគ្គលិកបន្ត​តវ៉ាទាក់ទង​នឹង​ការបញ្ឈប់​បុគ្គលិក​បី​នាក់​។​

សណ្ឋាគារ​ មួយ​នេះ គឺ​ជា​សណ្ឋាគារ​លំដាប់​អន្តរជាតិដំបូង​ដែល​បាន​បិទនៅ​កម្ពុជា​ ដោយ​សារ​តែ​ជួប​បញ្ហាវិបត្តិ​កូវីដ១៩ ហើយបញ្ហាជំងឺនេះបានធ្វើ​ឲ្យ​ប៉ះពាល់​ដល់​ការ​ធ្វើ​ដំណើរជា​សកល និង​ទីក្រុង​ពឹង​លើ​វិស័យ​ទេសចរណ៍ ដូចជាសៀមរាប​ ជាដើម​។

លោកស្រី Sabreena Jacob អ្នកចាត់ការ​ទូទៅ​របស់​សណ្ឋាគារ ​ឡឺ ម៉េរីឌាន អង្គរ មិន​អាច​ទាក់​ទងសុំ​ការ​អត្ថាធិប្បាយ​បានទេ។ សណ្ឋាគារ​បាន​ចាប់​ផ្ដើម​គោលការណ៍​ផ្ដល់​សំណង​ដល់​​បុគ្គលិក ប៉ុន្តែ​មិន​ដែលបាន​ប្រកាស​ទេថា​ដំណើរ​ការ​នេះបាន​បញ្ចប់​ហើយ​ឬយ៉ាងណា​។

លោក ខៀវ សាវុធ មន្ត្រី​ដោះស្រាយ​វិវាទ​ ក្រសួងការងារ​មាន​ប្រ​សាសន៍ថា​នាយកដ្ឋាន​របស់​លោក​មិន​បាន​ជាប់​ពាក់ព័ន្ធ​នឹង​ការ​ចរចា​រក​ដំណោះស្រាយ​នេះទេ បន្ទាប់ពី​ខាង​បុគ្គលិក​យល់ព្រម​ទទួល​សំណង លើក​លែង​តែ​សកម្មជន​សហជីពទាំង​បី។

លោក​ថា៖ «កាលពី​មុន យើងបាន​សម្រប​សម្រួល​រវាង​សណ្ឋាគារ និង​ពួកគេ ប៉ុន្តែភាគីទាំងពីរ​មិន​ឯកភាពគ្នា»​

លោក ឃុន ​ថារ៉ូ ប្រធាន​គ្រប់​គ្រងកម្មវិធី​សិទ្ធិការងារ​ អង្គការ​សង់ត្រាល់​ មាន​ប្រ​សាសន៍ថា​ ក្រុម​ហ៊ុន​បារម្ភពី​ពីការ​ការពារមុខ​មាត់ ជាជាង​ការ​ផ្ដល់​តម្លាភាព ដល់​អ្នក​ទាំង​បី ជាមួយ​សំណង​ត្រឹម​ត្រូវ។

លោក​ បន្ថែមថា៖ «ខ្ញុំ​គិត​ថា​ក្រុម​ហ៊ុន​បារម្ភពី​មុខ​មាត់ ជាជាង​បញ្ហាផ្សេង​ទៀត»

ប្រែសម្រួលពីអត្ថបទភាសាអង់គ្លេស៖ Seven months on, Le Meridien Angkor unionists receive compensation

Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »