នគរបាលខេត្តបន្ទាយមានជ័យ បានរៀបចំនីតិវិធីបញ្ជូនជនជាតិថៃចំនួន ៧នាក់ ដែលសង្ស័យថាជាមេខ្លោងជាប់ពាក់ព័ន្ធនឹងការប្រព្រឹត្តបទល្មើសតាមប្រព័ន្ធអនឡាញខុសច្បាប់ទៅកាន់តុលាការខេត្ត បន្ទាប់បានឃាត់ខ្លួនកាលពីថ្ងៃទី២២ ខែមីនា ក្នុងក្រុងប៉ោយប៉ែត ខេត្តបន្ទាយមានជ័យ។ លោក សិទ្ធិ ឡោះ ស្នងការនគរបាលខេត្តបន្ទាយមានជ័យបានបញ្ជាក់នៅថ្ងៃទី២៦ ខែមីនា។
នគរបាលខេត្តបន្ទាយមានជ័យ បានឆ្មក់ចូលបង្ក្រាបពីរទីតាំងដែលជាប់ពាក់ព័ន្ធនឹងបទល្មើសតាមប្រព័ន្ធអនឡាញខុសច្បាប់ ក្នុងក្រុងប៉ោយប៉ែត ខេត្តបន្ទាយមានជ័យ និងបានរកឃើញជនជាតិថៃចំនួន ៦៣នាក់ ក្នុងនោះមានស្ត្រី ៣០នាក់ និងមានកុមារ ២នាក់ នៅថ្ងៃទី២២ ខែមីនា ឆ្នាំ២០២៥។
លោក សិទ្ធិ ឡោះ បានថ្លែងនៅថ្ងៃទី២៦ ខែមីនា ថា ចំពោះជនជាតិថៃចំនួន ៥៦នាក់ សមត្ថកិច្ចបានសុំគោលការណ៍ថ្នាក់លើ និងសហការជាមួយសមត្ថកិច្ចថៃ បណ្តេញទៅកាន់ប្រទេសថៃវិញ ហើយ ៧នាក់ដែលសង្ស័យថាប្រព្រឹត្តបទល្មើសតាមប្រព័ន្ធអនឡាញ សមត្ថកិច្ចកំពុងរៀបចំនីតិវិធីបញ្ជូនទៅកាន់តុលាការ។
លោក សិទ្ធិ ឡោះ បន្ថែមថា៖ «យើងបានរៀបចំនីតិវិធីបញ្ជូន[៧នាក់ទៅកាន់តុលាការ]ហើយ»។
យោងសេចក្តីប្រកាសព័ត៌មានចុះថ្ងៃទី២៥ ខែមីនា នគរបាលខេត្តបន្ទាយមានជ័យ បានចុះបង្រ្កាបទីតាំងចំនួនពីរ ដែលលួចលាក់ប្រព្រឹត្តបទល្មើសតាមប្រព័ន្ធអនឡាញ ក្រោមការគ្រប់គ្រងរបស់ឧក្រិដ្ឋជនជនជាតិថៃប្រមាណ ៧ នាក់ នៅក្នុងប៉ោយប៉ែត ខេត្តបន្ទាយមានជ័យ បន្ទាប់ពីស៊ើបអង្កេតស្រាវជ្រាវ និងឃ្លាំមើលសកម្មភាពសង្ស័យនៅទីតាំងខាងលើមួយរយៈកន្លងមក។
ក្នុងចំណោមជនជាតិថៃទាំង ៦៣នាក់ សមត្ថកិច្ចរកឃើញ ១០នាក់ កំពុងធ្វើសកម្មភាពរៀបចំសម្ភារៈមធ្យោបាយដើម្បីប្រព្រឹត្តបទល្មើសតាមប្រព័ន្ធអនឡាញខុសច្បាប់ដោយស្ម័គ្រចិត្ត និង ៤៦នាក់ កំពុងរស់នៅក្នុងស្ថានភាពដោយបិទសិទ្ធិសេរីភាពដើរហើរ ប៉ុន្តែមិនមានសញ្ញាណរងគ្រោះដោយអំពើហិង្សា ឬអំពើជួញដូរមនុស្សនោះឡើយ។
ក្នុងសេចក្តីប្រកាសព័ត៌មានបញ្ជាក់ថា៖ «សមត្ថកិច្ចបានកំណត់ជនជាតិថៃចំនួន ៧នាក់ (ស្រី ១នាក់) ជាមេខ្លោងជាប់ពាក់ព័ន្ធនឹងសកម្មភាពល្មើសខាងលើ»។
ជនជាតិថៃចំនួន ៥៦នាក់ នគរបាលជាតិកម្ពុជា នឹងស្នើសុំកិច្ចសហការជាមួយនគរបាលភូមិន្ទថៃ ដើម្បីសម្របសម្រួលរៀមចំបែបបទបណ្តេញចេញពីប្រទេសកម្ពុជា ផ្អែកតាមសំណូមពរពីអ្នកទាំងនោះ ដោយឡែកចំពោះជនសង្ស័យ ៧នាក់ផ្សេងទៀត កំពុងបន្តនីតិវិធីនៅស្នងការដ្ឋាននគរបាលខេត្តបន្ទាយមានជ័យ។
ក្នុងអំឡុងខែកុម្ភៈ ឆ្នាំ២០២៥ នគរបាលជាតិកម្ពុជាបានឆ្មក់ចូលឆែកឆេរពីរទីតាំងក្នុងក្រុងប៉ោយប៉ែត ខេត្តបន្ទាយមានជ័យ និងបានរកឃើញជនបរទេសចំនួន ២៣០ នាក់ ក្នុងនោះមានស្ត្រី ៦៨ នាក់ ដែលជាប់ពាក់ព័ន្ធនឹងប្រតិបត្តិការឆបោកតាមអនឡាញ។
ការបង្រ្កាបរយៈពេលពីរថ្ងៃគឺថ្ងៃទី២២ និង២៣ ខែកុម្ភៈ ឆ្នាំ២០២៥ បានធ្វើឡើងបន្ទាប់ពីការស៊ើបអង្កេតអស់រយៈពេលជាង៣ខែ និងបានរកឃើញជនបរទេសដែលក្នុងនោះ ១២៣នាក់ជាជនជាតិថៃ។
ប៉ូលិសបាននិយាយបញ្ជាក់ថា៖ «ជនបរទេសទាំងនោះកំពុងសំងំលាក់ខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន» ប៉ូលិសបន្តថា អ្នកបោកប្រាស់ត្រូវបានគេចោទប្រកាន់ថារស់នៅ «រស់នៅធម្មតា» និង«ស្ម័គ្រចិត្ត» ទទួលយកការងារខុសច្បាប់៕
