សមាគមសម្ព័ន្ធអ្នកសារព័ត៌មានកម្ពុជា

តុលាការខេត្តសៀមរាបសាកសួរប្រជាពលរដ្ឋបួនរូបទាក់ទងនឹងបណ្ដឹងរបស់អាជ្ញាធរអប្សរា

ប្រជាពលរដ្ឋខេត្តសៀមរាបប្រមូលផ្ដុំនៅមុខសាលាដំបូងខេត្តសៀមរាបដើម្បីគាំទ្រប្រជាពលរដ្ឋបួនរូបដែលត្រូវតុលាការហៅមកសាកសួរកាលពីថ្ងៃទី២៤ ខែវិច្ឆិកា ឆ្នាំ២០២៣។ (រូបភាព៖ លីកាដូ)
ប្រជាពលរដ្ឋខេត្តសៀមរាបប្រមូលផ្ដុំនៅមុខសាលាដំបូងខេត្តសៀមរាបដើម្បីគាំទ្រប្រជាពលរដ្ឋបួនរូបដែលត្រូវតុលាការហៅមកសាកសួរកាលពីថ្ងៃទី២៤ ខែវិច្ឆិកា ឆ្នាំ២០២៣។ (រូបភាព៖ លីកាដូ)

តុលាការ​ខេត្ត​សៀម​រាប​បាន​សាកសួរ​ប្រជពល​រដ្ឋ​បួ​ន​រូប​រួម​ទាំង​នគរបាលប៉ុស្ដិ៍​ម្នាក់​ផង​ដោយ​រងការ​ចោទ​ប្រកាន់​ថា​បាន​រារាំង​ដល់​មន្ត្រី​សាធារណៈ និង​មាន​ចេតនា​បង្ក​ការ​ខូច​ខាត និង​អំពើ​ហិង្សា​។​

អ្នក​នាំ​សាលា​ដំបូង​ខេត្ត​សៀម​រាប លោក យិន ស្រាង បាន​បញ្ជាក់​ថា​ប្រជា​ពល​រដ្ឋ​ទាំង​បួន​រូប​បាន​អនុញ្ញាត​ឲ្យ​ត្រឡប់​ទៅ​ផ្ទះ​វិញ​ហើយ​បន្ទាប់ពីសាកសួរ​។​

លោក​ឲ្យ​ដឹង​ថា៖ «ព្រះរាជអាជ្ញាបានសាកសួរពួកគាត់ ហើយ​យើង​មិន​ទាន់​ដឹង​ថាអ្វីជា​និតិវិធី​បន្ត​នៅឡើយ»។  លោក​បាន​បដិសេធធ្វើអត្ថាធិប្បាយ​ច្រើន​ជាង​នេះ។​

កាលពី​ខែ​សីហា អាជ្ញាធរជាតិ​អប្សរា​បាន​ដាក់​បណ្ដឹង​ពី​រផ្សេង​គ្នា​ប្រឆាំង​នឹង​ប្រជា​ពល​រដ្ឋ​ប្រាំមួយរូប និង​មេប៉ុស្ដិ៍​មួយ​រូប​។ ខណៈ​ប្រជា​ពល​រដ្ឋ​បួន​រូប រួម​នឹង​មេប៉ុស្ដិ៍​ផង​ត្រូវ​បាន​កោះ​ហៅ ក៏​មាន​ដែរ​ដីការកោះ​​មួយ​ផ្សេង​ទៀត​សម្រាប់​ប្រជា​ពល​រដ្ឋ ដែល​រង​ការ​ចោទ​ប្រកាន់​ថា​បាន​ញុះញង់​ប្រជា​ពល​រដ្ឋ​ផ្សេង​ទៀត​។​

បណ្ដឹង​របស់​អាជ្ញាធរ​ជាតិ​អប្សរា​នេះ​ធ្វើ​ឡើង​បន្ទាប់​ពី​ប្រជាពល​រដ្ឋរាប់រយ​នាក់​បានផ្ទុះ​ការ​តវ៉ា​ប្រឆាំង​នឹង​ការ​ប៉ុន​ប៉ង​រុះរើ​សំណង​ដែល​ថា​ខុស​ច្បាប់​កាលពី​ថ្ងៃទី​៨ ខែសីហា ​តាម​សេចក្ដីជូន​ដំនឹង​របស់​អាជ្ញាធរឃុំមានជ័យ ស្រុក​ប្រាសាទបាគង​។​

​ប្រជា​ពល​រដ្ឋ​ដែល​រង​ការ​ចោទ​ពី​បទ​ញុះញង់​បាន​កោះហៅ និង​សាកសួរ​រួច​រាល់​ហើយ​កាលពី​ថ្ងៃទី​២៣ ខែតុលា និង​បច្ចុប្បន្ន​កំពុង​រង​ចាំ​និតិវិធី​បន្ត​។​

ប្រជា​ពល​រដ្ឋ​ប្រហែល​១០០​នាក់​បាន​ប្រមូល​ផ្ដុំ​គ្នា​នៅ​ខាង​ក្រៅ​សាលា​ដំបូង​ខេត្ត​កាល​ពី​ថ្ងៃសុក្រ ដើម្បី​បង្ហាញ​ការគាំទ្រ​ចំពោះ​អ្នកភូមិ​របស់​ខ្លួន​។​ លោក សឹង សៀក​ ពល​រដ្ឋ​ម្នាក់​ក្នុង​ចំណោម​បួន​នាក់​ដែល​តុលាការ​បាន​សាក​សួរ បាន​អំពាវ​នាវ​ឲ្យ​មន្ត្រី​តុលាការ​ទម្លាក់​ចោល​ការ​ចោទ​ប្រកាន់​ប្រឆាំង​នឹង​រូប​លោក​។ លោក​ថា​លោក​មិន​បាន​រារាំង​ដល់​មន្ត្រី​សាធារណៈ ឬ​បង្ក​ជា​អំពើ​ហិង្សាប្រឆាំង​នឹង​អាជ្ញាធរទេ​។​

លោក​ឲ្យ​ដឹង​ថា៖ «​តុលាការ​បាន​សួរ [ខ្ញុំ]​អំពី​ការ​ប្រើ​អំពើ​ហិង្សា​លើ​មន្ត្រី​អាជ្ញាធរ​អប្សរា ប៉ុន្តែ​ខ្ញុំ​មិន​បាន​ប្រើ​អំពើ​ហិង្សា​អ្វី​ផង»។​

លោក​បន្ថែម​ថា៖ «​ខ្ញុំ​មិន​យល់​ស្រប​នឹង​ការ​ដែល​គេ​ចោទ​ប្រកាន់​មក​លើ​ខ្ញុំ​នោះទេ ពីព្រោះ​ខ្ញុំ​មិន​បាន​ធ្វើ​អ្វី​ផង»។ លោក​ថាអាជ្ញាធរ​អប្សរា​បរាជ័យ​ក្នុង​ការ​រុះរើ​តង់​របស់​លោក និង​សំណង់​នៅ​ខាង​មុខ​ដែល​មាន​ប្រវែង​បួន​ម៉ែត្រ​គុណ​នឹង​ប្រាំ​មួយ​ម៉ែត្រ ហើយ​អ្នក​ភូមិ​បានតវ៉ា​ប្រឆាំង​នឹង​អ្នក​ទាំង​នោះ​កាលពី​ខែ​សីហា​។​​

លោក​បានបន្ថែមថា៖​«សំណង់​ដែល​សង់​បន្ថែម​នៅ​ខាង​មុខ​ផ្ទះ​ខ្ញុំ​ហ្នឹង​ធ្វើ​ដើម្បី​ការពារការ​លេចជ្រាប​ទឹក​ភ្លៀង បើ​មិន​អីចឹង​ឲ្យ​ខ្ញុំ​ធ្វើ​ម៉េច [ពេល​មាន​ភ្លៀង]?»។

ប្រជាពល​រដ្ឋ​ខេត្ត​សៀមរាប​ប្រមូល​ផ្ដុំ​នៅ​មុខ​សាលាដំបូងខេត្តសៀមរាប​ដើម្បីគាំទ្រ​​ប្រ​ជា​ពលរដ្ឋ​បួន​រូបដែល​ត្រូវ​តុលាការ​ហៅ​មកសាកសួរ​កាលពី​ថ្ងៃទី​២៤ ខែវិច្ឆិកា ឆ្នាំ២០២៣។ (រូបភាព៖ លីកាដូ)

មេប៉ុស្ដិ៍​រដ្ឋបាល​ឃុំ​​រលួស លោក រ៉ៃ វណ្ណា បដិសេធ​ធ្វើ​អត្ថាធិប្បាយលម្អិត​​ទាក់​ទឹង​ការ​សាកសួរ​របស់​តុលាការ​កាលពី​ថ្ងៃសុក្រ​។​

លោក​ថ្លែងថា៖ «​វា​គ្រាន់​តែ​ជា​ការសាកសួរ​ធម្មតា ប៉ុន្តែ​ខ្ញុំ​មិន​អាច​ប្រាប់​លោក​បាន​ទេ ពីព្រោះ​ថ្នាក់​លើ​មិន​អនុញ្ញាត​ឲ្យ​ផ្ដល់ព័ត៌មាន​ទៅ​លោក [អ្នក​សារព័ត៌មាន]…​ខ្ញុំ​មិន​បារម្ភទេ ពីព្រោះ​ខ្ញុំ​មិន​បាន​ធ្វើ​ដូច​អ្វី​ដែល​គេ​ចោទ [មក​លើ​ខ្ញុំ]ផង»។​

ប្រជា​ពល​រដ្ឋ​ពី​រ​រូប​ទៀត​ដែល​មាន​ឈ្មោះ​ក្នុង​ពាក្យ​បណ្ដឹង វ៉ា ចំណាប់ និង​គ្លោក គុយបា មិន​អាច​ទាក់ទង​សុំ​ការអត្ថាធិប្បាយ​បាន​ទេ​។​

អ្នក​នាំពាក្យ​អាជ្ញាធរអប្សរា លោក ឡុង កុសល បដិសេធអត្ថាធិប្បាយ​លើ​រឿង​នេះ​ដោយ​ថា​មន្ត្រី​តុលាការ​កំពុង​តែ​ចាត់​ការ​​តាមនិតិវិធី​។​

លោក​មានប្រសាសន៍ថា៖ «​ខ្ញុំ​មិន​មាន​អ្វី​អត្ថាធិប្បាយទាក់ទង​នឹង​នីតិវិធី​របស់​តុលាការ​ទេ ពីព្រោះ​តុលាការ​ជា​ស្ថាប័នឯករាជ្យ ហើយ​យើង​ត្រូវ​តែ​គោរពមត្ថកិច្ច​របស់​តុលាការ»។​​

ពេល​សួរ​នាំទាក់​ទង​នឹងរបៀប​ដែល​អាជ្ញាធរ​អប្សរា​អាច​នឹង​ដោះស្រាយ​បញ្ហា​សំណង់​ ឬការ​សាងសង់​របស់​អ្នក​ភូមិ លោក​ កុសល ពន្យល់ថា៖ «​ [ផ្អែកតាម ]គោលការណ៍​របស់​យើង​សំណង់ ឬ​ការសាងសង់​ណា​ដែល​ខុស​ច្បាប់ គឺ​ជា​គោល​ដៅ​ដែល​ត្រូវ​រុះរើ»។

មន្ត្រី​សម្របសម្រួល​របស់​អង្គការ​លីកាដូ ប្រចាំ​ខេត្ត​ភាគឧត្តរ លោក អ៊ិន គង់ជិត មាន​ប្រសាសន៍ថាតុលាការ​គួរតែ​ទម្លាក់​ចោល​​ការ​ចោទ​ប្រកាន់​លើ​ប្រជាពល​រដ្ឋ ពីព្រោះ​ថា​អ្នក​ភូមិ​មិន​បាន​បង្ក​ហិង្សា​លើ​អាជ្ញាធរ​នោះទេ។​

លោក​បន្ថែម​ថា៖​ «​បើ​តាម​ការ​សម្ភាសន៍​របស់​ខ្ញុំ​ជាមួយ​ប្រជា​ពល​រដ្ឋ ពួកគាត់​អះអាង​ថា​មិន​បាន​បង្ក​ហិង្សា​ណាមួយ​ទេ ពីព្រោះ​ថា​ពួកគាត់​គ្រាន់​តែ​ប្រមូល​ផ្ដុំ​គ្នា​ដើម្បី​បញ្ចេញ​មតិ និង​ស្នើ​ឲ្យ​អាជ្ញាធរ​ជួយ​ជួសជុលដំបូល​ផ្ទះ ឬ​តង់​​ចាស់ៗ»​។​

លោក​បន្ត​ថា៖ «​ពួកគាត់​មិន​បាន​ប្រើហិង្សា ឬ​ធ្វើ​ឲ្យ​ខូច​ខាត​ទ្រព្យ​សម្បត្តិ​អាជ្ញាធរទេ។ អាជ្ញាធរអប្សរា​បាន​ខឹង​នឹង​ប្រជាពល​រដ្ឋ​ដែល​បាន​ប្រមូល​ផ្ដុំតវ៉ានៅទីនោះ និង​បញ្ឈប់​ [អាជ្ញាធរ] ពី​ការ​អនុវត្ត​ការងារ» ៕

ប្រែសម្រួលពីអត្ថបទភាសាអង់គ្លេស៖ Siem Reap Court Questions Villagers Named in APSARA’s Lawsuits

565 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម