សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចខេត្តសៀមរាបបានឃាត់ខ្លួនឧកញ៉ាម្នាក់ និងបក្ខពួកពាក់ព័ន្ធនឹងការឆបោកលុយពលរដ្ឋរាប់លានដុល្លារ

អ្នកស្រី ឡេង ចាន់ណា ត្រូវបានសមត្ថកិច្ចខេត្ដសៀមរាបឃាត់ខ្លួននៅរសៀលថ្ងៃទី១២ ខែមីនា ឆ្នាំ២០២៤។ (រូបថតផេកហ្វេសប៊ុករបស់អ្នកស្រី ឡេង ចាន់ណា)
អ្នកស្រី ឡេង ចាន់ណា ត្រូវបានសមត្ថកិច្ចខេត្ដសៀមរាបឃាត់ខ្លួននៅរសៀលថ្ងៃទី១២ ខែមីនា ឆ្នាំ២០២៤។ (រូបថតផេកហ្វេសប៊ុករបស់អ្នកស្រី ឡេង ចាន់ណា)

សមត្ថកិច្ចខេត្ដសៀមរាបបានឃាត់ខ្លួនអ្នកស្រី ឡេង ចាន់ណា អគ្គនាយិកាក្រុមហ៊ុន ប្រ៊ីលាន ស៊ីធី និងបក្ខពួកពីបទ«ឆបោក​ រំលោភ​លើ​ទំនុកចិត្ដ និងចេញមូលប្បទានបត្រ​គ្មាន​សាច់​ប្រាក់» តាមដីកាបញ្ជាឱ្យចូលខ្លួន បន្ទាប់ពីពលរដ្ឋជាង៨០០នាក់បាន​ដាក់ពាក្យបណ្ដឹងកាលពីពាក់​កណ្ដាល​​ខែកុម្ភៈ ពាក់ព័ន្ធនឹងឆបោកលុយពួកគេជាង៣០០លានដុល្លារ។

នៅរសៀលថ្ងៃទី១២ ខែមីនានេះ នគរបាលខេត្ដសៀមរាបបានឃាត់ខ្លួនអ្នកស្រី ឡេង ចាន់ណា និងបក្ខពួក តាមដីកាបញ្ជាឱ្យចូលខ្លួនរបស់តំណាង​អយ្យការអមសាលាដំបូង​ខេត្ដ​សៀមរាប​ដោយផ្អែកតាមបណ្ដឹងរបស់ប្រជាពលរដ្ឋដែលបានបណ្ដឹងពីបទឆបោក រំលោភលើ​ទំនុកចិត្ដ និងបានចេញសែកស្អុយដោយគ្មានសាច់ប្រាក់។

ក្នុងលិខិតរបស់​សាលាដំបូងខេត្តសៀមរាប​បាន​បញ្ជាក់​ថា ជនសង្ស័យ និងបក្ខពួក នឹងត្រូវ​បញ្ជូនមកអយ្យការអមសាលាដំបូងខេត្ដសៀមរាបដើម្បីចាត់វិធានការតាមនីតិវិធី។ នេះបើ​យោង​ទៅតាមសេចក្ដីប្រកាសព័ត៌មាន​របស់អ្នកនាំពាក្យអយ្យការអមសាលាដំបូងខេត្ដ​សៀមរាប។

ជុំវិញរឿងឃាត់ខ្លួននេះខេមបូចាមិនអាចសុំការបញ្ជាក់បន្ថែមពីអ្នកស្រី សាត ធីតា  ព្រះរាជអាជ្ញារង​សាលាដំបូងខេត្ដសៀមរាបបានទេ ប៉ុន្ដែអ្នកស្រីធ្លាប់បាន​បញ្ជាក់ឱ្យខេមបូចា​ដឹងថា៖ «អយ្យការអមសាលាដំបូង បានទទួលបណ្តឹងពីប្រជាពលរដ្ឋហើយ បច្ចុប្បន្នសំណុំ​រឿង ​អយ្យការកំពុងចាត់ការតាមនីតិវិធី»

កាលពីថ្ងៃទី៧ ខែមីនាឆ្នាំ២០២៤ អាជ្ញាធរខេត្ដសៀមរាបបានចេញលិខិតអញ្ជើញអ្នកស្រី រ៉េត សុធីតា​ដែលជាតំណាងពលរដ្ឋ​ដែលបានដាក់ពាក្យបណ្ដឹង​ទៅតុលាការ​កាលពីថ្ងៃទី១៤ ខែកុម្ភៈ ឆ្នាំ២០២៤ ដើម្បីសម្របសម្រួលដោះស្រាយវិវាទរវាងក្រុមហ៊ុន ប្រ៊ីលាន ស៊ីធី និង​ប្រជាពលរដ្ឋ។ ក្រោយពីកិច្ចប្រជុំនៅថ្ងៃទី១២ ខែមីនានេះ សមត្ថកិច្ចបានចាប់ខ្លួនអ្នកស្រី ឡេង ចាន់ណា និងបក្ខពួកភ្លាមៗបញ្ជូនទៅសាលាដំបូងខេត្ដសៀមរាបដើម្បីបន្ដនីតិវិធីច្បាប់។

កាលពីថ្ងៃទី២៣ ខែកុម្ភៈឆ្នាំ២០២៤កន្លងទៅសាលាដំបូងខេត្ដសៀមរាបបាន​ចេញសេចក្ដី​ថ្លែងការណ៍​មួយដោយបញ្ជាក់ថា កាលពីថ្ងៃទី៩ ខែកុម្ភៈ ឆ្នាំ២០២៤ សាលាដំបូង​ខេត្ដ​សៀមរាប​​បានចេញដីកាសម្រេចរឹបអូសជាបណ្ដោះអាសន្ន និងបានអនុវត្ដការរឹបអូស​ជា​បណ្ដោះ​​អាសន្ន​ជូនម្ចាស់បំណុលរួចហើយ។ ចំពោះសំណុំរឿងរដ្ឋប្បវេណី​ សាលាដំបូងខេត្ដ​សៀមរាប​កំពុងតែធ្វើចំណាត់ការយ៉ាងយកចិត្ដទុកដាក់បំផុត ប្រកបដោយការទទួលខុសត្រូវ​ខ្ពស់។

កាលពីថ្ងៃទី២១ ខែកុម្ភៈ ឆ្នាំ២០២៤ ខុទ្ទការិយាល័យរបស់លោកនាយករដ្ឋមន្រ្ដី ហ៊ុន ម៉ាណែត​ បានចេញសេចក្ដីបំភ្លឺស្ដីពី ការផ្សព្វផ្សាយព័ត៌មានតាមបណ្ដាញ​ផ្សព្វផ្សាយសង្គម​នានា​ដែល​បាន​លើកឡើងថា លោកនាយករដ្ឋមន្រ្ដី ហ៊ុន ម៉ាណែត មានពាក់ព័ន្ធនឹងក្រុមហ៊ុន ប្រ៊ីលាន ស៊ីធី​ តាមការលើកឡើងរបស់អ្នកស្រី ឡេង ចាន់ណា ធ្វើឱ្យមាន​ការភាន់ច្រឡំ។

ក្នុងសេចក្ដីបំភ្លឺ​ដដែលបានបញ្ជាក់ថា កាលពីថ្ងៃទី១៦ ខែកុម្ភៈ ឆ្នាំ២២៤ អ្នកស្រី ឡេង ចាន់ណា បានចេញបំភ្លឺថា ការលើកឡើងរបស់ខ្លួនមិនបានពាក់ព័ន្ធនឹងលោកនាយករដ្ឋមន្រ្ដី ហ៊ុន ម៉ាណែត​ ទេ។ នៅថ្ងៃទី២០ ខែកុម្ភៈ២០២៤ អ្នកស្រី ឡេង ចាន់ណា​បានចេញ​លិខិតសារភាព​កំហុស និងបានសូ​មអភ័យទោសចំពោះការលើកឡើងថា​ លោកនាយករដ្ឋមន្រ្ដី​ជាអ្នកបង្កើត​សមាគមពលករ និងអតីតពលករដើម្បីសប្បុរសធម៌ផង។

លិខិតបានលើកឡើងថា៖ «សម្ដេចមិនគាំទ្រ ឬនៅពីក្រោយអំពើខុសច្បាប់របស់បុគ្គល​ណា​ម្នាក់​​ឡើយ​ព្រមទាំងជំរុញឱ្យអាជ្ញាធរមានសមត្ថកិច្ចអនុវត្ដច្បាប់ឱ្យ​បានម៉ឹងម៉ាត់​បំផុត​លើ​បុគ្គលទាំងឡាយណាដែលយកឈ្មោះសម្ដេចធិបតីទៅពាក់ព័ន្ធនិងអំពើខុសច្បាប់របស់ខ្លួន»

បើតាមលោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា អាជ្ញាធរ​គួរតែ​ពិនិត្យលើច្បាប់វិនិយោគឱ្យបានច្បាស់លាស់មុននឹងអនុញ្ញាតឱ្យ បើមិនពិនិត្យទេ អ្នករង​គ្រោះ​គឺពលរដ្ឋទាំងអស់។ លោកបន្ដថា កន្លងមក ​ការយកឈ្មោះថ្នាក់ដឹកនាំ ឬអ្នកមាន​តំណែង​​ធំៗ​ដើម្បីមកបោកពលរដ្ឋគឺងាយជឿ និងមានទំនុកចិត្ដរហូត​ដល់ការចាញ់បោក​រាប់​ម៉ឺន​​​ដុល្លារ​។

លោក សំអាត ថ្លែងថា៖ «អាជ្ញាធរគួរពិនិត្យមុននឹងចេញច្បាប់ឱ្យក្រុមហ៊ុនវិនិយោគ។ ការយក​ឈ្មោះ​សម្ដេច ហ៊ុន ម៉ាណែតដើរបោកគេគឺមានច្រើនដែលធ្វើឱ្យ​ពលរដ្ឋចាញ់បោក។ ខ្ញុំគាំទ្រ​អនុសាសន៍សម្ដេចថាបើមានអ្នកណាយកឈ្មោះលោកទៅប្រើត្រូវចាប់ខ្លួនភ្លាមៗ»

1,164 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម