សមាគមសម្ព័ន្ធអ្នកសារព័ត៌មានកម្ពុជា

ម្ចាស់អចលនទ្រព្យនៅក្រុងព្រះសីហនុរង់ចាំអ្នកវិនិយោគក្នុងភាពមិនច្បាស់លាស់ ខណៈអគារខ្ពស់ៗសាងសង់មិនទាន់ហើយពាសពេញក្រុង

ការដ្ឋានសំណង់មួយនៅខេត្តព្រះសីហនុត្រូវបានទុកចោលជិត២ឆ្នាំមកហើយ។ វិនិយោគិនចិនជាច្រើនបានចាកចេញពីទីក្រុងនេះដោយសារ រដ្ឋាភិបាលបានហាមឃាត់ការលេងហ្គេមអនឡាញ និងជំងឺកូវីដ-១៩។ រូបភាពថតថ្ងៃទី២៣ ខែសីហា ឆ្នាំ២០២២។ ខេមបូចា/ព្រីង សំរាំង
ការដ្ឋានសំណង់មួយនៅខេត្តព្រះសីហនុត្រូវបានទុកចោលជិត២ឆ្នាំមកហើយ។ វិនិយោគិនចិនជាច្រើនបានចាកចេញពីទីក្រុងនេះដោយសារ រដ្ឋាភិបាលបានហាមឃាត់ការលេងហ្គេមអនឡាញ និងជំងឺកូវីដ-១៩។ រូបភាពថតថ្ងៃទី២៣ ខែសីហា ឆ្នាំ២០២២។ ខេមបូចា/ព្រីង សំរាំង

ខេត្តព្រះសីហនុ៖ នៅឆ្នាំ២០១៨ លោក ខៀវ សុថានី បានជួលដីទំហំ៦០០ម៉ែត្រការ៉េរបស់លោកនៅកណ្តាលក្រុងព្រះសីហនុឱ្យវិនិយោគិនចិនដើម្បីសាងសង់ខុនដូកម្ពស់១៤ជាន់។ តាមរយៈកិច្ចសន្យានោះ លោក​ទទួលបានថ្លៃជួលដីចំនួន ២០ ០០០ដុល្លារក្នុងមួយខែ។

បន្ទាប់​ពី​ចុះ​កិច្ច​សន្យា​រួច លោក សុថានី ទទួល​បាន​ប្រាក់​កក់​ស្មើ​នឹង​តម្លៃ​ជួល​រយៈ​ពេល​​មួយ​ឆ្នាំ។ លោក​បាន​បន្ត​ថា​៖ «​ខ្ញុំ​យក​លុយ​ទៅ​ទិញ​ដី​កន្លែង​ផ្សេង​នៅ​ខេត្ត​ព្រះសីហនុ ទិញ​វីឡាមួយ​តម្លៃជាង ២០ ម៉ឺន​ដុល្លារ​នៅ​ភ្នំពេញ និង​ឡាន​ថ្មីមួយ»។

ដោយរំពឹងពីចំណូលពីការជួលដីនោះ លោក សុថានី បានខ្ចីប្រាក់ជាង៥០ម៉ឺនដុល្លារ ដើម្បីវិនិយោគលើអចលនទ្រព្យ និងប្រើប្រាស់ផ្ទាល់ខ្លួន។ ក្នុងមួយខែលោកត្រូវសងត្រឡប់ទៅធនាគារវិញប្រហែល ១០ ០០០ ដុល្លារ។​

ប៉ុន្តែអ្វីៗបានផ្លាស់ប្តូរយ៉ាងខ្លាំងចាប់​ពីពាក់កណ្តាលឆ្នាំ២០១៩ បន្ទាប់ពីរដ្ឋាភិបាលបានហាមឃាត់ការលេងហ្គេមអនឡាញ និងការផ្ទុះឡើងនៃជំងឺកូវីដ-១៩។​ បញ្ហាទាំងពីរនេះបានបញ្ឈប់គម្រោងវិនិយោគរបស់ចិនទាំងអស់នៅក្នុងខេត្តព្រះសីហនុ។

នៅ​ក្នុង​រយៈពេល​ពីរឆ្នាំនេះ លោក​ សុថានី បាន​លក់​ផ្ទះ និង​វីឡា​នៅ​ភ្នំពេញអស់ហើយ​ ដើម្បី​សងប្រាក់ដែលលោកបានខ្ចីពីធនាគារវិញ។​

លោក​បាន​ថ្លែង​ថា​៖ «​ខ្ញុំ​គិត​ថា​​កូវីដ-១៩ ប្រហែលតែមួយឆ្នាំប៉ុណ្ណោះ ហើយ​អ្នក​វិនិយោគ​ចិន​នឹង​ត្រឡប់​មក​វិញ​ក្នុង​ពេល​ឆាប់ៗ​»

លោក សុថានី បាននិយាយថា ចាប់តាំងពីពាក់កណ្តាលឆ្នាំ២០១៩មក វិនិយោគិនបានស្នើរសុំបញ្ចុះ​តម្លៃជួលម្តងហើយម្តងទៀត ដែលចុងក្រោយបង់ត្រឹមតែ ២ ៥០០ដុល្លាប៉ុណ្ណោះក្នុងមួយខែ​។ ដូច្នេះក្រៅពីលុយកក់មួយឆ្នាំដំបូង លោក​មិនដែលបានទទួល​ថ្លៃឈ្នួល​ ២០ ០០០ដុល្លារនោះទេ។

លោក​បន្ត​ថា​៖ «​មាន​ម្ចាស់​ដី​ជា​ច្រើន​ដែល​មិន​បាន​ទទួល​ថ្លៃ​ជួលដី​សូម្បីតែមួយរៀល ចាប់​តាំង​ពី​​​ចិន​ផ្អាក​គម្រោង។ សម្រាប់​ខ្ញុំ ខ្ញុំ​គ្មាន​ជម្រើស​អ្វី​ក្រៅតែ​ពី​ទទួល​យក​ថ្លៃ​ឈ្នួល​តិចតួចនេះទេ ព្រោះវាគ្រាន់បើជាងអត់សោះ»

វិនិយោគិន​ចិនបានប្រាប់លោក សុថានី ថា​នឹងត្រឡប់មកបន្តគម្រោងនេះ​វិញនៅខែធ្នូ ដូច្នេះ​បានជំរុញឱ្យលោកសម្រេច​មិន​បញ្ចប់កិច្ចសន្យាជួលនេះទេ។

លោកបានបន្ថែមថា៖ «ខ្ញុំ​រង់ចាំវិនិយោគិន​ចិនត្រឡប់មកវិញពីមួយឆ្នាំទៅមួយឆ្នាំ ព្រោះខ្ញុំមិនអាចធ្វើអ្វីជាមួយអគារហ្នឹងបានទេ។ ខ្ញុំមិនមានលុយដើម្បីវិនិយោគលើអគារបន្ថែមទេ ខ្ញុំគ្មានជម្រើសក្រៅពីលក់អគារនេះទេ ក្នុងករណី​​ជម្រើសចុងក្រោយ»។

ការដ្ឋាន​សំណង់​មួយ​នៅ​ខេត្ត​ព្រះសីហនុត្រូវ​បាន​ទុក​ចោល​​ជិត២​ឆ្នាំ​មក​ហើយ។ វិនិយោគិនចិនជាច្រើនបានចាកចេញពីទីក្រុងនេះដោយ រដ្ឋាភិបាលបានហាមឃាត់ការលេងហ្គេមអនឡាញ និងជំងឺកូវីដ-១៩។ រូបភាពថតថ្ងៃទី២៣ ខែសីហា ឆ្នាំ២០២២។ ខេមបូចា/ព្រីង សំរាំង

ក្នុងរយៈពេលតែប៉ុន្មានឆ្នាំប៉ុណ្ណោះ រមណីយដ្ឋានមាត់សមុទ្ររបស់ប្រទេសកម្ពុជាពោលគឺខេត្តព្រះសីហនុត្រូវបានប្រែក្លាយទៅជាទីក្រុងកាស៊ីណូដ៏មមាញឹក ខណៈដែលអគារខ្ពស់ៗបានផុសឡើងពេញទីក្រុង។

ចាប់តាំងពីការហូរចូលនៃជនជាតិចិនចាប់ពីឆ្នាំ២០១៨ តម្លៃឈ្នួលផ្ទះ កន្លែងស្នាក់នៅ សណ្ឋាគារ ក៏ដូចជាតម្លៃអចលនទ្រព្យបានហក់ឡើងយ៉ាងខ្លាំង ដែលធ្វើឲ្យម្ចាស់អចលនទ្រព្យក្នុងក្រុងមួយនេះក្លាយជាអ្នកមានតែមួយប៉ព្រិចភ្នែក។​

ប៉ុន្តែព្រេងសំណាងបានផ្លាស់ប្តូរយ៉ាងលឿន បន្ទាប់ពីរដ្ឋាភិបាលបានហាមឃាត់ការលេងល្បែង​អនឡាញនៅចុងឆ្នាំ២០១៩ ហើយពិភពលោកត្រូវបានវាយប្រហារដោយជំងឺរាតត្បាត កូវីដ-១៩ ។

ក្រោយពលរដ្ឋចិនរាប់ម៉ឺននាក់ដែលចំណាកស្រុកមករស់នៅកម្ពុជាដើម្បីធ្វើការក្នុងឧស្សាហកម្មល្បែងស៊ីសង និងបដិសណ្ឋារកិច្ច បានចាកចេញពីទីក្រុងឆ្នេរសមុទ្រមួយនេះ សេដ្ឋកិច្ចក្នុងតំបន់នេះបានធ្លាក់ចុះ ហើយអគារខ្ពស់ៗរាប់រយដែលមិនទាន់សាងសង់រួចបានទុកចោលនៅពេញទីក្រុង។

កាល​ពី​ខែ​កក្កដា អាជ្ញាធរ​ខេត្ត​បាន​ជួប​ជាមួយ​តំណាង​អ្នក​វិនិយោគ​ក្នុង​ស្រុក និង​ម្ចាស់​ដី​ដែល​បាន​ជួល​គម្រោង​វិនិយោគ​ឱ្យ​ចិន ដើម្បី​ពិភាក្សា​អំពី​វិបត្តិនេះ។

​តាមអាជ្ញាធរខេត្ត អគារជាង ១ ០០០ ក្នុងក្រុងព្រះសីហនុ ត្រូវបានបោះបង់ចោលអស់រយៈ​ពេលជាងពីរឆ្នាំមកហើយ។

ការដ្ឋាន​សំណង់​មួយ​នៅ​ខេត្ត​ព្រះសីហនុត្រូវ​បាន​ទុក​ចោល​​ជិត២​ឆ្នាំ​មក​ហើយ។ វិនិយោគិនចិនជាច្រើនបានចាកចេញពីទីក្រុងនេះដោយ រដ្ឋាភិបាលបានហាមឃាត់ការលេងហ្គេមអនឡាញ និងជំងឺកូវីដ-១៩។ រូបភាពថតថ្ងៃទី២៣ ខែសីហា ឆ្នាំ២០២២។ ខេមបូចា/ព្រីង សំរាំង

 លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់ខេមបូចាថា អាជ្ញាធរខេត្ត និងក្រសួងសេដ្ឋកិច្ចកំពុងពិភាក្សាគ្នាស្វែររកដំណោះស្រាយបញ្ហានេះ។

លោក​បាន​បន្ត​ថា​៖ «​អ្វី​ដែល​យើង​ត្រូវ​ធ្វើ​នៅ​ពេល​នេះ​គឺ​ធ្វើ​ឱ្យ​អគារ​ទាំង​អស់ហ្នឹង​មាន​ដំណើរការ​វិញ ដោយ​អាច​មាន​ការ​ចូល​រួម​ពី​អ្នក​វិនិយោគ​ថ្មី​។ យើង​ត្រូវ​បង្កើត​គោលការណ៍​ផង​ដែរ ដើម្បី​ធានា​ថា​អគារ​ដែលបាន​សាងសង់ហើយ​ត្រូវ​បាន​ដាក់​ឱ្យ​ដំណើរការ»

គម្រោងអភិវឌ្ឍន៍របស់ចិននៅខេត្តព្រះសីហនុ ក្រៅពី​បន្ថែម​លើការផ្តល់ការងារភាគច្រើនក្នុងវិស័យកាស៊ីណូ ទេសចរណ៍ ក៏មានបុគ្គលិកក្រៅប្រព័ន្ធ ក្នុងស្រុកបម្រើក្នុងវិស័យទេសចរណ៍និង​ សំណង់ផងដែរ។

ក្រីក្រជាងម្ចាស់ដីទៅទៀត កម្មករទាំងនោះភាគច្រើនបានជួបការលំបាកក្នុងការចិញ្ចឹមជីវិតក្នុងអំឡុងពេលជំងឺរាតត្បាត។

លោក យ៉ន បូរិន អាយុ ៤០ឆ្នាំ មកពីខេត្តក្រចេះ បាន​មកធ្វើការជាកម្មករសំណង់នៅខេត្តព្រះសីហនុ តាំងពីឆ្នាំ២០១៩។

បន្ទាប់ពីគម្រោងសាងសង់ដែលលោកធ្វើការត្រូវបានផ្អាក គ្រួសាររបស់លោកបានបោះតង់រស់នៅក្នុងបរិវេនអគារដោយប្រកបរបរ​លក់ភេសជ្ជៈដើម្បីរកប្រាក់ចំណូលប្រចាំថ្ងៃ។

លោក​បាន​ប្រាប់​ថា​៖ «​ឥឡូវ​ស្ងាត់​ណាស់ ខ្ញុំ​សង្ឃឹម​ថា​ពេលមានការ​សាងសង់​ឡើង​វិញ ខ្ញុំ​អាច​រក​ចំណូល​បាន​ច្រើន​ជាងហ្នឹង ហើយ​ជនជាតិ​ចិន​នឹង​មកច្រើនវិញ»។ លោកបានបន្តថាពីមុន​លោកអាច​រក​ចំណូល​បាន​ប្រហែល ២០ ដុល្លារ​ក្នុង​មួយ​ថ្ងៃទាំងការបន្ថែមម៉ោង​។

លោក​បាន​បន្ត​ថា​៖ «​ពី​មុន​ខ្ញុំ​ថាមាន​គម្រោង​ទៅ​ធ្វើ​ការ​នៅ​​ថៃ ប៉ុន្តែ​បងប្អួន​ខ្ញុំ​ប្រាប់​ថា​មក​ខេត្ត​ព្រះសីហនុ​មកព្រោះ​មាន​គម្រោង​សាងសង់​ច្រើន»

លោក អ៊ឹម សេងហ៊ួរ នាយកប្រចាំតំបន់នៃក្រុមហ៊ុនអចនលទ្រព្យ Century 21 Zilllion Holding នៅខេត្តព្រះសីហនុ បានប៉ាន់ប្រមាណថា តម្លៃអគារដែលគេបោះបង់ចោលសរុបមានយ៉ាងហោចណាស់៥ពាន់លានដុល្លារ។ ទោះបីជា​គម្រោង​មួយ​ចំនួន​បាន​ចាប់​ផ្តើម​ដំណើរការឡើង​វិញ​ជា​បណ្តើរៗក៏ដោយ លោក​បានប្រាប់ថា​ម្ចាស់អចលនទ្រព្យជាច្រើនកំពុងជម្នះ​ដោះស្រាយការខាតបង់​របស់ពួកគេ។​

លោក​​​បន្ថែម​ថា​៖ «​យើង​អាច​នឹង​ពិបាក​ក្នុង​ការ​ទាក់​ទាញ​អ្នក​វិនិយោគ​ផ្សេង​ទៀត​ឱ្យ​មក​ជំនួស​ចិន​ ទោះ​បី​អ្នក​វិនិយោគ​ក្នុង​ស្រុក​ខ្លះ​អាច​នឹង​ទិញ​ ប៉ុន្តែពួកគេ​ឱ្យក្នុង​តម្លៃ​ទាបជាងទីផ្សារ​​»

ប្រែសម្រួលពីអត្ថបទភាសាអង់គ្លេស៖ Sihanoukville property owners in limbo as unfinished high-rises litter the city

572 views

ព័ត៌មានថ្មីៗ

អត្ថបទពេញនិយម