ប្រជាពលរដ្ឋដែលរស់នៅលើទឹកដីថ្មីនៃភូមិចំពុះក្អែក សង្កាត់ព្រែកថ្មី រៀបរាប់អំពីផលលំបាកដែលពួកគាត់កំពុងជួបប្រឈម ក្នុងកំឡុងពេលជិត ១០ខែ បន្ទាប់ពីអាជ្ញាធរខណ្ឌច្បារអំពៅ ស្នើឱ្យពួកគាត់រុះរើផ្ទះសម្បែងចេញពីមាត់ប្រឡាយព្រែកប្រា កាលពីខែតុលា ឆ្នាំ២០២៣ ។
ប្រជាពលរដ្ឋជាង ២០០គ្រួសារ ដែលពីមុនរស់នៅតាមបណ្តោយប្រឡាយព្រែកប្រា នាភូមិចំពុះក្អែក១ នៃសង្កាត់ព្រែកថ្មី និងភូមិអូរអណ្តូង នៃសង្កាត់ព្រែកប្រា ត្រូវបានអាជ្ញាធរខណ្ឌច្បារអំពៅបានស្នើឱ្យចាកចេញ ដើម្បីស្តារនិងអភិវឌ្ឍប្រឡាយរំដោះទឹក ដោយរៀបចំឱ្យពួកគាត់ទៅរស់នៅទីតាំងថ្មី ក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដែលមានចម្ងាយប្រមាណជាង ៦គីឡូម៉ែត្រ ពីទីតាំងចាស់ ។
មួយចំនួនក្នុងចំណោមប្រជាពលរដ្ឋដែលកំពុងរស់នៅលើទឹកដីថ្មី ត្អូញត្អែរអំពីកង្វះខាតផ្នែកជីវភាព រួមមានកង្វះស្បៀងអាហារ កូនមិនបានទៅសាលា រកប្រាក់ចំណូលមិនបាន ពុំមានលទ្ធភាពសង់ផ្ទះថ្មីឱ្យបានសមរម្យ ខណៈប្រជាពលរដ្ឋមួយចំនួនទៀតមិនទាន់យល់ព្រមរុះរើនៅឡើយ ដោយសំអាងថា សំណងដែលអាជ្ញាធរផ្តល់ឱ្យមិនគ្រប់គ្រាន់សម្រាប់ពួកគាត់ ។
