យោធាបាញ់បុរសម្នាក់របួសក្នុងជម្លោះដីធ្លីនៅខេត្តកណ្ដាល

អ្នកភូមិនាំគ្នាបិទផ្លូវបន្ទាប់ពីយោធាបាញ់ និងបណ្ដាលឲ្យបុរសម្នាក់រងរបួសក្នុងជម្លោះដីធ្លីមួយកន្លែងក្នុងខេត្តកណ្ដាល ថ្ងៃទី៣ ខែមិថុនា ឆ្នាំ២០២១។ រូបភាព៖លីកាដូ
អ្នកភូមិនាំគ្នាបិទផ្លូវបន្ទាប់ពីយោធាបាញ់ និងបណ្ដាលឲ្យបុរសម្នាក់រងរបួសក្នុងជម្លោះដីធ្លីមួយកន្លែងក្នុងខេត្តកណ្ដាល ថ្ងៃទី៣ ខែមិថុនា ឆ្នាំ២០២១។ រូបភាព៖លីកាដូ
Share on facebook
Share on twitter
Share on linkedin
Share on telegram
Share on whatsapp

យោធា​បាន​បាញ់​លើ​ក្រុម​អ្នក​ភូមិ​តវ៉ា​រឿង​ជម្លោះ​ដី​ធ្លី​ក្នុង​ឃុំ​ទួលពេជ្រ ខេត្ត​កណ្ដាល និង​បាន​បណ្ដាល​ឲ្យ​បុរស​ម្នាក់​រង​របួស​។

ក្នុងវីដេអូ​មួយ​ផុស​លើ​បណ្ដាញ​សង្គម​ហ្វេស​ប៊ុក នឹង​ត្រូវបាន​ចែក​ចាយ​ពេញបណ្តាញ​សង្គម គេ​ឃើញ​ ក្រុម​កសិករ​ដៃកាន់​​ដំបងឈើ ​ដើរ​ទៅ​កាន់គ្រឿង​ចក្រ​មួយ​គ្រឿង​។ នៅពេល​អ្នក​ភូមិ​ចូល​ជិត​ដល់​គ្រឿង​ចក្រ​នោះ គេ​អាចឃើញ ​តាម​រយៈ​វីដេអូ យោធា​បាន​បាញ់​បង្ហើរ​លើ​ក្បាល​អ្នក​ភូមិ បាញ់​ភ្ជុច​នឹង​ដី និង​បាញ់​ទៅ​កាន់​ក្រុម​ប្រ​ជាកសិករ​ ហើយ​បាន​បណ្ដាល​ឲ្យ​បុរស​ម្នាក់​រងរបួស​ត្រង់​ស្មា​។​​

ជន​​រង​គ្រោះ​ឈ្មោះ​ អ៊ុំ ចន្ថា វ័យ​៥៦​ឆ្នាំ មកពី​ភូមិ​ស្រែពោធិ៍ ត្រូវ​បាន​បញ្ជូន​ទៅកាន់មន្ទីរ​ពេទ្យ​កាល់ម៉ែត ក្នុង​រាជធានី​ភ្នំពេញ​។ សាច់​ញាតិ​ជន​រងគ្រោះ​​បញ្ជាក់ថា ស្ថានភាព​របស់​លោក​នៅ​មាន​​សភាព​នឹង​ន​។

អ្នក​ភូមិ​ និង​អាជ្ញាធរ​មូល​ដ្ឋាន​លើក​ឡើង​ថា​ជម្លោះ​នេះ​ កើត​មាន​តាំង​ពី​ឆ្នាំ​មុន​មក​ម្លេះ និង​មាន​ប្រជា​ពល​រដ្ឋ​មក​ពី​ភូមិ​ចំនួន​ប្រាំពីរ​ពាក់​ព័ន្ធ​នឹង​ជម្លោះ​​ដី​ទំហំ​២៨០​ហិកតា ជា​ផ្នែក​មួយ​កាន់​កាប់​ដោយ​រដ្ឋ និង​បាន​ប្រើ​ប្រាស់​ជា​កន្លែង​ចាក់​សំរាម និង​មូលដ្ឋានទ័ព។​

អ្នក​ស្រី យ៉ាន សុខខេម មកពី​ភូមិ​ អង្គតាសិត មាន​ប្រ​សាសន៍​ថា​ អ្នក​ស្រី និង​ក្រុម​គ្រួសារ​ជា​ច្រើន​ទៀត​បាន​រស់​នៅ និង​ធ្វើ​ស្រែ​លើ​ដី​នេះតាំងពី​ឆ្នាំ​១៩៧៩។ ខណៈដែល​ផ្នែក​ខ្លះ​ត្រូវ​បាន​កាត់​ចូល​ជា​ដី​រដ្ឋ​កាល​ពី​ប៉ុន្មាន​ឆ្នាំ​មុន អ្នក​ស្រី​ថា ដីជម្លោះ​នោះ​អ្នកភូមិបាន​ធ្វើ​ស្រែ​ជា​យូរ​ឆ្នាំ​មក​ហើយ​។​​

អ្នក​ស្រី​អះអាង​ថា៖ «​ជា​ដី​រដ្ឋ​យ៉ាង​ម៉េច បើ​​ប្រ​ជា​ពល​រដ្ឋ​បាន​ធ្វើ​ស្រែ​លើ​ដី​នេះ​តាំង​ពី​ឆ្នាំ​១៩៧៩​ មក»។

អ្នក​ស្រី សុខខេម ឲ្យ​ដឹង​ដែរថា អ្នក​ភូមិ​ស្ទើរ​ទាំង​អស់​រស់ពឹងផ្អែក​លើ​ការធ្វើ​ស្រែ ហើយ​សុទ្ធ​តែជាប់​បំណុល និង​មិន​មាន​ប្រាក់​សង​ធនាគារ​។

អ្នកស្រីនិយាយថា៖ «ពេល​ពួកគេមិន​អនុញ្ញាត​ឲ្យ​យើង​ធ្វើ​ស្រែ តើ​ឲ្យ​យើង​រស់​នៅ​យ៉ាងម៉េច? បើ​សិនជា​គ្មាន​ដំណោះស្រាយ​ប្រ​ជា​ពល​រដ្ឋ​នឹង​បន្ត​បិទផ្លូវ។ យើង​មិន​ខ្លាចស្លាប់ទេបើពួកគេ​ចង់​សម្លាប់​ប្រជា​ពល​រដ្ឋ ក៏សម្លាប់ទៅ​ ព្រោះ​យើង​គ្មាន​អ្វី​សល់ទៀត​ទេ»។

លោក កុយ រ៉េម រស់​នៅ​ភូមិ​ខ្លុង ឲ្យ​ដឹង​ដែរ​ថា​ជម្លោះនេះ​ចាប់​ផ្ដើម​កាលពី​ចុង​ឆ្នាំ​២០២០ ពេល​ដែល​ក្រុម​យោធាន​មក​ហាម​ឃាត់​ប្រ​ជា​ពល​រដ្ឋ​មិន​ឲ្យ​ធ្វើ​ស្រែ​។ លោក​ថា ការ​តវ៉ា​បាន​ធ្វើ​ឡើង​ចំនួន​បី​ដង​រួច​ហើយ តែ​គ្មាន​ដំណោះស្រាយ​។

លោក​បន្ថែម​ថា៖ «​ទាហាន​តែ​ងតែ​មក​ហាមឃាត់​ប្រ​ជា​ពល​រដ្ឋ​មិន​ឲ្យ​ធ្វើ​ស្រែ ហើយ​ពេ​ល​នេះ ពួក​គេ​បាន​ប្រើ​អំពើ​ហិង្សាដាក់ពលរដ្ឋ។ យើង​សុទ្ធតែជា​ខ្មែរ ហើយពួកគេ​ជា​ទាហាន។ ហេតុ​អ្វី​បាន​ជាពួកគេ​បាញ់​ប្រ​ជា​ពល​រដ្ឋ? យើង​គ្រាន់​តែ​ត្រូវ​ការ​ដី​សម្រាប់​ធ្វើ​ស្រែ​ចិញ្ចឹម​គ្រួសារ»។​

អ្ន​កនាំ​ពាក្យ​ក្រ​សួង​ការពារជាតិ លោក ឈុំ សុជាតិ មិន​អាច​ទាក់ទងសុំ​ការអត្ថាធិប្បាយ​បានទេ​។​

លោក គង់ សោភ័ណ្ឌ អភិបាល​ខេត្តកណ្ដាល មាន​ប្រសាសន៍​ថា ដី​នោះ​ពី​មុន​ហៅថា «ចម្ការបារាំង» គឺ​ជា​ដីរបស់​រដ្ឋ ដែល​ថា​បម្រុង​ទុក​ធ្វើ​ជា​កន្លែង​ចាក់សំរាម និង​ជា​មូលដ្ឋាន​ទ័ព។​

លោក ឲ្យ​ដឹង​ថា អាជ្ញាធរ​បាន​ចេញ​ប្លង់​កម្មសិទ្ធិ​ដល់ពលរដ្ឋ​នៅ​ទី​នោះ​រួច​ហើយ ប៉ុន្តែ​សម្រាប់​ដី​កំពុង​មានជម្លោះ​ អាជ្ញាធរ​មិន​បាន​ចេញ​ប្លង់​ឲ្យ​ទេ។​

​លោកមានប្រសាសន៍ថា៖ «​ជម្លោះ​បាន​រីករាល​ដាល​នៅ​ប៉ុន្មាន​ឆ្នាំ​ចុង​ក្រោយ​នេះ ដោយ​សារ​តែ​ដី​នៅ​តំបន់​នោះ​ចាប់​ផ្ដើម​ឡើ​ងថ្លៃ ហើយ​អ្នក​ភូមិ​បាន​លក់​ដី​ចុះ​ឡើង​ទៅ​ឲ្យ​ឈ្មួញ។ យើង​បាន​ប្រាប់​ទៅ​ប្រ​ជា​ពល​រដ្ឋ​ទាំង​នោះ​ឲ្យ​ឈប់​ធ្វើ​ស្រែ​លើ​ដី​នោះ​ជា​ច្រើន​ដង​មក​ហើយ»។​

បើ​តាម​លោក គង់ សោភ័ណ្ឌ ​ផ្ទៃ​ដី​នោះ​សរុប​មាន​ចំនួន​២៨០​ហិកតា ហើយ​អ្នក​ភូមិ​នបាន​ចូល​កាន់​កាប់​ដោយ​គ្មាន​ការ​អនុញ្ញាត​ចំនួន​១៥០​ហិកតា​។

​ លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ មាន​ប្រសាសន៍​ថា​អំពើ​ហិង្សា​នៅ​បន្ត​កើត​មាន​ក្នុង​រឿង​ជម្លោះ​ដី​ធ្លីដោយ​សារ​តែមាន​វប្បធម៌​និទណ្ឌភាព​។​

លោក លើក​ឡើងថា​៖ «ពី​មុន​មក​យើង​បានសម្គាល់​ឃើញ​មានការ​បង្ក្រាប​​ពី​សំណាក់​អាជ្ញាធរ​មក​លើ​ប្រ​ជា​ពល​រដ្ឋ​។ ពេលខ្លះ​ពួកគេ​បាញ់ បណ្ដាល​ឲ្យ​មាន​មនុស្ស​ស្លាប់ និង​របួស ប៉ុន្តែ​មិន​មាន​អ្នក​ទទួល​ខុស​ត្រូវ​ចំពោះ​មុខច្បាប់ទេ» ដោយលោកបន្ថែមថា៖ «រឿង​បែប​នេះ​នៅ​តែ​បន្ត​កើត​មាន ព្រោះពួកគេ​មិន​ប្រឈម​នឹង​វិធានការ​ច្បាប់។ បើ​យើង​មើល​រូបភាព​កាលពី​ព្រឹក​មិញ យើង​ឃើញ​មាន​ទាំង​ទាហាន និង​ប៉ូលិស»។​

លោក​មានប្រសាសន៍​ថា៖ «​អំពើ​ហិង្សា​គឺ​មិន​អាច​ទទួល​យក​បាន ពីព្រោះ​ថា​ប៉ូលិស និង​ទាហាន ត្រូវ​ប្រើ​សម្រាប់​ប្រយោជន៍​ជាតិ និង​ប្រ​ជាជន ប៉ុន្តែ​ហេតុ​អ្វី​ពួកគេ​ប្រើ​ទានហាន​ឲ្យ​​បង្ក្រាប​លើ​ប្រ​ជា​ពល​រដ្ឋ? រឿង​នេះ​ត្រូវ​តែមានការ​ស៊ើបអង្កេត ហើយ​អ្នក​ដែល​បាញ់នោះ​ត្រូវ​តែ​ទទួល​ចំណាត់​ការ​ផ្លូវ​ច្បាប់»

ប្រែសម្រួលពីអត្ថបទភាសាអង់គ្លេស៖ Soldiers shoot one man in land dispute in Kandal province

492 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »