ប្រិយមិត្តទស្សនិកជនជាទីគោរព និងជាទីមេត្រី !
នេះគឺជាវីដេអូទិដ្ឋភាពខ្លះៗនៃសកម្មភាពហាត់សម និងត្រៀមរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទី១៣ និងព្រឹកថ្ងៃទី១៤ ខែវិច្ឆិកា ។
ដើម្បីព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលមានរយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៤ គណៈកម្មាធិការជាតិ រៀបចំបុណ្យជាតិ-អន្តរជាតិ សហការជាមួយក្រសួង មន្ទីរ ស្ថាប័នពាក់ព័ន្ធ និងក្រុមហ៊ុនមួយចំនួនផង បានត្រៀមរៀបចំ ជាចម្បង គឺការប្រណាំងទូកង ការរក្សានូវសន្តិសុខសុវត្ថិភាពសម្រាប់ទាំងអស់គ្នា ការត្រៀមលក្ខណៈជួយសង្គ្រោះបឋម ការរៀបចំឱ្យមានជាស្តង់ពាណិជ្ជកម្ម ឬតូបលក់ដូរផ្សេងៗ ការសម្ដែងសិល្បៈ ឆាកតន្ត្រី ព្រមទាំងកម្មវិធីសប្បាយៗជាច្រើនទៀត ទាំងនៅត្រើយខាងលិច ទាំងនៅត្រើយខាងកើតទន្លេ នារាជធានីភ្នំពេញ រមណីយដ្ឋានវត្តភ្នំ និងនៅសួនមុខវត្តបទុមវតី ។
គណៈកម្មាធិការជាតិ រៀបចំបុណ្យជាតិ-អន្តរជាតិ បានឱ្យដឹងថា ឆ្នាំនេះ ទូកពីបែណ្ដាខេត្តក្រុងនៅទូទាំងប្រទេសសរុបចំនួន ៣៥០ទូក បានចុះឈ្មោះចូលរួមប្រកួតប្រជែង ។
អ្នកចូលរួមរៀបចំកម្មវិធីតាមផ្នែកខ្លះៗ កីឡាករ និងប្រជាពលរដ្ឋមួយចំនួន ដែលបានមកទស្សនាការហាត់សមរបស់ក្រុមកីឡាករប្រណាំងទូកង បានបញ្ចេញមតិយោបល់រៀងៗខ្លួន ៕
