អតីតមន្ត្រីគណបក្សសង្គ្រោះជាតិមួយចំនួនដែលជាប់ពន្ធនាគារពីបទញុះញង់នោះ បានឆ្លងជំងឺកូវីដ១៩ ចាប់តាំងពីខែឧសភា។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា បានថ្លែងប្រាប់ខេមបូចាកាលពីថ្ងៃទី១២ ខែមិថុនា ថាមានអ្នកជាប់ឃុំមួយចំនួនដែលជាមន្ត្រីអតីតបក្សប្រឆាំងបានឆ្លងជំងឺកូវីដ១៩ នៅក្នុងពន្ធនាគារព្រៃសរ។ លោកបញ្ជាក់ថា ស្ថានភាពជំងឺរបស់ពួកគេទាំងនោះមិនចោទជាបញ្ហាឡើយ។
លោក នុត សវនា មានប្រសាសន៍ថា៖«កន្លងមកមានសមាជិកអតីតគណបក្សប្រឆាំងដែលត្រូវទោសជាប់ចោទពីបទញុះញង់ហ្នឹង គាត់ទាំងប៉ុន្មានដែលមុនរកឃើញថាវិជ្ជមានហ្នឹង។ យើងតេស្តពួកគាត់ជាថ្មីមកឃើញថាអវិជ្ជមានវិញអស់ហើយ។ អត់អីទេ ពួកអ្នកទាំងនោះគាត់ជាសះស្បើយទាំងអស់គ្នាហើយ»។
នេះជាលើកដំបូងដែលអគ្គនាយកដ្ឋានពន្ធនាគារ ទម្លាយឱ្យដឹងពីស្ថានភាពសុខភាពរបស់អតីតមន្ត្រីបក្សប្រឆាំងកំពុងជាប់ពន្ធនាគារ ចាប់តាំងពីជំងឺកូវីដ១៩ផ្ទុះរាលដាលជាសហគមន៍កាលពីខែកុម្ភៈ។
ប្រធានពន្ធនាគារព្រៃសរ ឬមណ្ឌលកែប្រែទី១ លោក យិន គន្ធ មិនឆ្លើយសំណួរលម្អិតជុំវិញករណីនេះទេ។លោកប្រាប់ថា ក្រុមការងាររបស់លោកបានបញ្ជូនបញ្ជីឈ្មោះអ្នកជំងឺដែលជាសកម្មជនអតីតបក្សសង្គ្រោះជាតិនោះទៅកាន់អគ្គនាយកដ្ឋានពន្ធនាគារ។
លោក យិន គន្ធ មានប្រសាសន៍ថា៖ «ប្អូនអាចចាំសួរអ្នកនាំពាក្យទៅ ខាងពេទ្យខ្ញុំបញ្ជូនបញ្ជីឈ្មោះទៅអ្នកនាំពាក្យហើយ»។
ទោះជាយ៉ាងអ្នកនាំពាក្យអគ្គនាយកដ្ឋានពន្ធនាគារ លោក នុត សវនា មិនប្រាប់ឱ្យដឹងពីចំនួនអតីតសមាជិកCNRP ដែលជាប់ឃុំហើយឆ្លងជំងឺកូវីដ១៩ឡើយ។
អ្នកស្រីឡុង ណារិន ជាភរិយារបស់អតីតអនុប្រធានប្រតិបត្តិគណបក្សសង្គ្រោះជាតិខណ្ឌពោធិ៍សែនជ័យ លោក ហេង ច័ន្ទសុទ្ធី បានមានប្រសាសន៍ថា រូបគាត់បារម្ភពីស្វាមីជាខ្លាំងបន្ទាប់ពី ទទួលដំណឹងមកថាស្វាមីរបស់គាត់បានឆ្លងជំងឺកូវីដ១៩ ។
អ្នកស្រី ឡុង ណារិន និយាយថា៖«គេប្រាប់កូនខ្ញុំថាប្ដីខ្ញុំឆ្លងកូវីដ១៩ ខ្ញុំស្លុតណាស់ ព្រោះប្ដីខ្ញុំមានជំងឺប្រចាំកាយគាត់លើសឈាមនិងបេះដូង។ ខ្ញុំបារម្ភថាជំងឺនេះអាចប៉ះពាល់ដល់អាយុជីវិតគាត់»។
លោក ហេង ច័ន្ទសុទ្ធី ត្រូវបានចាប់ខ្លួនកាលពីខែមិថុនាឆ្នាំ២០២០ នៅសង្កាត់ចោមចៅខណ្ឌពោធិ៍សែនជ័យរាជធានីភ្នំពេញ។ តុលាការចោទប្រកាន់រូបលោកពីបទរួមគំនិតក្បត់ និងញុះញង់ ក្នុងចំណោមសំណុំរឿងដែលមានជនជាប់ចោទជាង១៣០នាក់ ពាក់ព័ន្ធនឹងដំណើរវិលត្រឡប់មកប្រទេសវិញ មិនបានសម្រេចរបស់លោក សម រង្ស៊ី។
កញ្ញា ហេង បូរី អាយុ២៥ឆ្នាំជាកូនស្រីរបស់លោក ហេង ច័ន្ទសុទ្ធី បានប្រាប់ថា គាត់ខកខានទទួលដំណឹងពីឪពុកចាប់តាំងពីដើមខែមិនាមក គឺនៅពេលដែលមានផ្ទុះជំងឺកូវីដ១៩ជាសហគមន៍២០កុម្ភៈ។
កញ្ញា ហេង បូរី និយាយថា៖« ពួកខ្ញុំមិនបានទទួលដំណឹងពីពុកសោះ ស្រាប់តែលឺថាពុកមានជំងឺកូវីដ១៩ហើយសុខភាពគាត់ចុះខ្សោយខ្លាំង ធ្វើទុក្ខខ្លាំងថប់ដង្ហើមនិងពិសារបាយមិនបាន។ការណ៍មិនអនុញ្ញាតឱ្យពួកខ្ញុំដឹងដំណឹងពីស្ថានភាពសុខភាពពុកខ្ញុំកំពុងជាប់គុកនេះជារឿងអយុត្តិធម៌ណាស់។ ខ្ញុំសូមអំពាវនាវឱ្យដោះលែងឪពុកខ្ញុំដោយឥតលក្ខខណ្ឌ»។
មេធាវីការពារក្ដីឱ្យសកម្មជនបក្សប្រឆាំង លោកសំ សុខគង់ មានប្រសាសន៍ថា លោកមិនទាន់បានទទួលដំណឹងផ្លូវការពីស្ថានភាពសុខភាពកូនក្ដីខ្លួននៅពន្ធនាគារនៅឡើយទេ។
លោក សំ សុខគង់ មានប្រសាសន៍ថា៖«ខ្ញុំមិនទាន់អត្ថាធិប្បាយថាម៉េចទេ ព្រោះមិនទាន់ បានទទួលព័ត៌មានផ្លូវការពីពន្ធនាគារ។ ក្នុងសប្ដាហ៍នេះខ្ញុំនឹងដាក់លិខិត ទៅពន្ធនាគារដើម្បី សួរព័ត៌មានបន្ថែមពីស្ថានភាពសុខភាពកូនក្ដីខ្ញុំ»។
សមាជិកគ្រួសារអតីតមន្រ្តីCNRPផ្សេងទៀត ក៏បានទទួលព័ត៌មានក្រៅផ្លូវការថា ស្វាមីរបស់ពួកគេបានឆ្លងកូវីដ១៩។ ប៉ុន្តែពួកគេមិនអាចទំនាក់ទំនងផ្ទាល់ជាមួយនឹងស្វាមីរបស់ពួកគេនោះទេ។ ដោយសារមានការព្រួយបារម្ភពីសុខភាពរបស់អ្នកជាប់ឃុំ ក្រុមស្រ្តីដែលហៅថា «ស្រ្តីថ្ងៃសុក្រ» បានដាក់ញត្តិនៅស្ថានទូតអាមេរិក ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ប្រចាំនៅកម្ពុជា និងស្ថានទូតផ្សេងទៀតឲ្យជួយអន្តរាគមន៍ដោះលែងស្វាមីរបស់ពួកគេ។
នាយករងអង្គការលីកាដូ លោក អំ សំអាត មានប្រសាសន៍ថា ពន្ធនាគារចាំបាច់ត្រូវតែផ្ដល់ព័ត៌មានទៅកាន់ក្រុមគ្រួសារអ្នកទោសឬជនសង្ស័យដែលបានឆ្លងជំងឺឬរងគ្រោះថ្នាក់ដោយប្រការណាមួយជាយថាហេតុ។ លោកបន្ថែមថា អាជ្ញាធរត្រូវមានតម្លាភាព ក្នុងការផ្ដល់ព័ត៌មានពីស្ថានភាពសុខភាពអ្នកជាប់ឃុំទាំងអស់នោះទៅកាន់ក្រុមគ្រួសាររបស់ពួកគេ។
លោក អំ សំអាត មានប្រសាសន៍ថា៖ «បើសិនណាអ្នកជាប់ឃុំជាសកម្មជននយោបាយ សកម្មជនបរិស្ថានឬសកម្មជនតស៊ូដើម្បីសេរីភាពបញ្ចេញមតិ ហើយគាត់ឆ្លងជំងឺកូវីដក្នុងពន្ធនាគារឬរហូតដល់មានគ្រោះថ្នាក់ណាមួយនោះ ហើយក្រុមគ្រួសារមិនបានទទួលដំណឹងនោះ មតិជាតិនិងអន្តរជាតិនឹងរិះគន់រដ្ឋាភិបាលជាក់ជាមិនខាន»។
យោងតាមទិន្នន័យរបស់អង្គការសង្គមស៊ីវិលបានបង្ហាញថា ចាប់ពីពីខែមករា ដល់ចុងខែតុលា ឆ្នាំ២០២០ ក្រុមសកម្មជនបរិស្ថាន និងអតីតសកម្មជននយោបាយ ត្រូវចោទប្រកាន់ និងចាប់ខ្លួន ពីបទញុះញង់ចំនួន៣៧ករណី។ ពួកគេភាគច្រើនជាប់ពន្ធនាគារនៅរាជធានីភ្នំពេញ។
សេចក្ដីប្រកាសព័ត៌មានរបស់អគ្គនាយកដ្ឋានពន្ធនាគារក្រសួងមហាផ្ទៃចេញផ្សាយកាលពីថ្ងៃទី១១មិថុនា ឱ្យដឹងថាពន្ធនាគារចំនួន៧មានផ្ទុះជំងឺកូវីដ១៩ ក្នុងនោះរួមមាន ពន្ធនាគារខេត្តព្រះសីហនុ មណ្ឌលអប់រំកែប្រែទី១(ម១) មណ្ឌលអប់រំកែប្រែទី២(ម២) ពន្ធនាគាររាជធានីភ្នំពេញ ពន្ធនាគារខេត្តកណ្ដាល ពន្ធនាគារខេត្តកំពង់ស្ពឺនិងពន្ធនាគារខេត្តបន្ទាយមានជ័យ។ ករណីឆ្លងជំងឺកូវីដ១៩ក្នុងចំណោមអ្នកជាប់ឃុំតាមកម្រិតផ្សេងៗគ្នា។ ក្នុងនោះចំនួនអ្នកឆ្លងតាមកន្លែងនីមួយៗមានប្រមាណពី១០%ទៅ២០%នៃចំនួនអ្នកជាប់ឃុំទាំងអស់។
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ប្រចាំនៅកម្ពុជា កាលពីដើមខែមិថុនា បានអំពាវនាវនិងជំរុញឱ្យមាន ការដោះលែងក្រុមអ្នកជាប់ឃុំជាក់លាក់មួយចំនួនជាបន្ទាន់ដើម្បីកាត់បន្ថយចំនួនចង្អៀត សំដៅគ្រប់គ្រងឱ្យបាននូវការរីលរាលដាល នៃជំងឺកូវីដ-១៩ នៅក្នុងពន្ធនាគារ។
ការិយាល័យនេះលើកឡើងក្នុងសេចក្តីថ្លែងការណ៍មួយថា៖ «យើងអំពាវនាវឱ្យអាជ្ញាធរធានាថា រាល់អ្នកជាប់ឃុំទាំងអស់មានមធ្យោបាយ ដើម្បីទំនាក់ទំនងជាមួយគ្រួសារ ដើម្បីជូនដំណឹងដល់ពួកគេអំពីស្ថានភាពសុខភាពរបស់ខ្លួន »៕
