សមាគមសម្ព័ន្ធអ្នកសារព័ត៌មានកម្ពុជា

ជនជាតិឥណ្ឌាមួយចំនួនកំពុងដាក់លុយរាប់ឱ្យពលរដ្ឋនៅខេត្តប៉ៃលិន

ជនជាតិឥណ្ឌាម្នាក់កំពុងរង់ចាំទារលុយពីប្រជាពលរដ្ឋ ក្នុងសង្កាត់អូរតៅវ៉ៅ ក្រុងប៉ៃលិន ខេត្តប៉ៃលិន។ រូបថតនៅថ្ងៃទី២២ ខែវិច្ឆិកា ឆ្នាំ២០២២។ ខេមបូចា/ បញ្ញា ឆ័ពណ្ណ
ជនជាតិឥណ្ឌាម្នាក់កំពុងរង់ចាំទារលុយពីប្រជាពលរដ្ឋ ក្នុងសង្កាត់អូរតៅវ៉ៅ ក្រុងប៉ៃលិន ខេត្តប៉ៃលិន។ រូបថតនៅថ្ងៃទី២២ ខែវិច្ឆិកា ឆ្នាំ២០២២។ ខេមបូចា/ បញ្ញា ឆ័ពណ្ណ

ប្រជាពលរដ្ឋមួយចំនួននៅក្នុងខេត្តប៉ៃលិនអះអាងថា ពួកគាត់កំពុងតែប្រើប្រាស់​លុយ​កម្ចី​ពី​ជនជាតិឥណ្ឌាជាលក្ខណៈឯកជនក្នុងរូបភាពជាលុយរាប់ដែលគិតការប្រាក់២០ភាគរយ ប្រើ​ប្រាស់​អត្តសញ្ញាណបណ្ណជាវត្ថុធានា។​

តំណាងសហគមន៍ដីធ្លីប៉ៃលិន អ្នកស្រី អោម សំអុល ថ្លែងថា នៅទូទាំងខេត្ត​ជនជាតិឥណ្ឌា​ដាក់​​លុយរាប់ជាលក្ខណៈក្រុមហ៊ុនឯកជន។ អ្នកស្រីថា លុយរាប់ដែលមាន​ការប្រាក់ខ្ពស់​ដល់​២០​ភាគរយហើយត្រូវបង់សងរាល់ថ្ងៃនេះ ធ្វើឱ្យប្រជាពលរដ្ឋកាន់តែលំបាកវេទនាថែមទៀត។​

អ្នកស្រី អោម សំអុល បញ្ជាក់ថា៖ «១លានការ២០ម៉ឺនលោកគ្រូ ដូចអារកចឹង។ ខ្ចីអត់បាន​ច្រើន​​ទេ បានត្រឹម១លានឬច្រើន២លានរៀល។ ការខ្ចីដាក់អត្តសញ្ញាណបណ្ណ​អត់ដាក់​ឯកសារ​អីផ្សេងទេ»។​

អ្នកស្រី អោម សំអុល បង្ហាញការព្រួយបារម្ភពីបំណុលកាន់តែកើនឡើងធ្ងន់ធ្ងរ ហើយអាច​បាត់​បង់​អត្តសញ្ញាណបណ្ណ ព្រោះការផ្តល់កម្ចីរបស់ជនជាតិឥណ្ឌាទាំងនោះ​ត្រូវយក​អត្តសញ្ញាណបណ្ណផ្ទាល់មិនមែនប្រភេទថតចម្លងទេ។​

ចំពោះការសងត្រឡប់វិញអ្នកស្រីថា ជនជាតិឥណ្ឌាទាំងនោះដើរទាររាល់ថ្ងៃ​ដោយប្រមូល​យកតាមចំនួននៃការព្រមព្រៀងនៅពេលខ្ចី។​

អ្នកស្រី សំអុល បន្ថែមថា៖ «ទោះរៀងយប់បន្តិចក៏នៅចាំទារដែរគឺធ្វើម៉េចទារឱ្យទាល់តែ​បាន»។​

អ្នកស្រី សុខឿន ពលរដ្ឋនៅប៉ៃលិនរៀបរាប់ថា គាត់ខ្ចីលុយឥណ្ឌា ៥០ម៉ឺនរៀល ហើយត្រូវបង់​សងវិញ​មួយថ្ងៃ២ម៉ឺនរៀលរាល់ថ្ងៃ ក្នុងរយៈពេល៣០ថ្ងៃ សរុបការសងទាំងដើម និងការ​៦០​ម៉ឺន​រៀល។ អ្នកស្រីឱ្យដឹងថា រូបគាត់ខ្ចីលុយឥណ្ឌាដោយសារតែ​មិនមានលុយបង់​សងស្ថាប័ន​ធនាគារ។​

អ្នកស្រី សុខឿន ឱ្យដឹងថា៖ «ខ្ញុំជាប់តើស បើមិនយកយ៉ាងម៉េចអង្គការធំអត់មានលុយឱ្យ មានតែយក​ចឹង»។​

អ្នកស្រីបន្តទៀតថា រូបគាត់ពឹងលើលុយស៊ីឈ្នួល ធ្វើចម្ការឱ្យអ្នកដទៃបានតែ២៥០០០រៀល​ក្នុង​១ថ្ងៃ យកមកសងបំណុលទាំងលុយរាប់ប្រចាំថ្ងៃ និងត្រៀមលុយសងធនាគារប្រចាំខែ។​

អ្នកស្រី សុខ ប៉ែត អ្នកដែលបានយកលុយកម្ចីរាប់ប្រចាំថ្ងៃពីឥណ្ឌាម្នាក់ទៀតថ្លែងថា រូបគាត់ និងអ្នកភូមិផ្សេងទៀត យកលុយរាប់ឥណ្ឌាប្រើប្រាស់ស្ទើរគ្រប់គ្នានៅក្នុងភូមិ។​ អ្នកស្រីថា រូប​គាត់​បានយកកម្ចីរាប់ថ្ងៃពីឥណ្ឌា ២០ម៉ឺនរៀល​ គាត់ត្រូវបង់សង​ប្រចាំថ្ងៃ១ម៉ឺនរៀល​រយៈពេល​២៤ថ្ងៃ។

អ្នកស្រី សុខ ប៉ែត បន្តថា សូម្បីតែលុយ១ថ្ងៃម៉ឺនរៀល ក៏រូបគាត់ពិបាកក្នុងការរកសង​ត្រឡប់​វិញដែរ។​

អ្នកស្រីសុខ ប៉ែត ថ្លែងថា៖ «ចេះតែត្រដរត្រដូសចឹងទៅលោកគ្រូអើយ គេអត់ខានទេ ត្រូវ​តែបង់ឱ្យគេរហូតទោះជាអត់មានក៏ត្រូវបង់ឱ្យគេដែរ»។​

ពលរដ្ឋរស់នៅខេត្តប៉ៃលិនលោក មឿង មិជ ថ្លែងថា រូបគាត់មិនហ៊ានយក​លុយកម្ចី​ឥណ្ឌា​មកប្រើប្រាស់ទេខ្លាចលង់ខ្លួនក្នុងបំណុល ដោយលោកឃើញអ្នកខ្ចីលុយរាប់​ទាំងនេះ​មាន​ការលំបាកខ្លាំង។​ លោកបន្តថា សកម្មភាពផ្តល់កម្ចីលុយរាប់ជនជាតិឥណ្ឌា​ទាំងនេះបាន​ធ្វើសកម្មភាពច្រើនឆ្នាំហើយ។​

លោក មឿង មិជ បានបញ្ជាក់ថា៖ «យូរហើយ តាំងលក់មុងមក ហើយវានៅស្រុកខ្មែរ​យើង​ហ្នឹង យក​ប្រពន្ធ​ខ្មែរនៅហ្នឹងបណ្តោយ។ លក់មុងយូរស្គាល់ភូមិសាស្ត្រ​រួចក៏បន្តរស់នៅ​ដាក់​លុយរាប់»។

ពលរដ្ឋនៅក្នុងខេត្តប៉ៃលិនម្នាក់ទៀត លោក សំ កូលីន បានឱ្យដឹងថា សកម្មភាពផ្តល់កម្ចីលុយ​រាប់​របស់ជនជាតិឥណ្ឌាមានច្រើនឆ្នាំ ប៉ុន្តែសកម្មភាពនេះកើនឡើងខ្លាំងគឺប្រមាណ២ទៅ៣ឆ្នាំ​ចុង​ក្រោយ​នេះ។​

លោក សំ កូលីន បន្តថា៖ «រកស៊ីយូរហើយ តែទើបលេចធ្លោរប្រហែល២ឆ្នាំនេះខ្លាំង ២ឆ្នាំ៣ឆ្នាំ​នេះ ពីមុនរកតិចទេឥឡូវរកច្រើន។​ រកទាំងអស់គ្រប់ច្រកគ្រប់កន្លែងណាក៏មាន»។​

លោក កូនលីនថា រូបលោកមិនបានខ្ចីលុយឥណ្ឌានេះទេ ប៉ុន្តែបានឃើញសកម្មភាព​ជនជាតិ​ឥណ្ឌាដើរដាក់លុយ និងទារលុយពីអ្នកភូមិវិញគ្រប់កន្លែង។ លោកឱ្យដឹងថា ក្រៅពីជនជាតិ​ដើរដាក់លុយរាប់ជាប្រព័ន្ធបើកចំហគ្រប់កន្លែងនេះ ក៏មានជនជាតិប៉ាគីស្ថានតិចតួច​ប្រកបរបរ​ដូចជនជាតិឥណ្ឌានេះដែរ។​

លោក អំ សំអាត នាយករង​ទទួលបន្ទុក​កម្មវិធី​ឃ្លាំមើល​នៃអង្គការ​លីកាដូ បារម្ភពីបញ្ហាការ​ផ្តល់​កម្ចីដោយមិនបានចុះបញ្ជីធ្វើអាជីវកម្មត្រឹមត្រូវ ហើយយកការប្រាក់ខ្ពស់កាន់តែ​បន្ថែម​បន្ទុកលើពលរដ្ឋថែមទៀត។​

លោក អំ សំអាត មានប្រសាសន៍ថា៖ «បើកម្ចីហ្នឹងច្រើន អាចប្រឈមមុខធ្វើឱ្យជំពាក់បំណុល​វណ្ឌក ធ្វើឱ្យបាត់បង់ទ្រព្យសម្បត្តិឬក៏ដីធ្លីដែលត្រូវលក់ដើម្បីសង»។​

សម្រាប់លោក មេធាវី សុខ សំអឿន ពន្យល់ថា ជាគោលការណ៍ច្បាប់មិនបានហាមឃាត់​ចំពោះ​​ការធ្វើអាជីវកម្មលុយរាប់នេះ។ ប៉ុន្តែលោកថា បើករណីជនជាតិឥណ្ឌា​ផ្តល់កម្ចីជា​ប្រព័ន្ធ​របៀបនេះ អាចផ្នែកពន្ធដារប្តឹងបានករណីមិនបានចុះបញ្ជី និងបង់ពន្ធចូលរដ្ឋ។​

លោក សុខ សំអឿន៖ «គាត់អាចនឹងត្រូវគេពិន័យ ខុសច្បាប់ពន្ធដារទៅវិញទេ គឺមិនមែនជា​បទល្មើសទេ»។​

អ្នកនាំពាក្យគ្រឹះស្ថានមីក្រូហិរញ្ញវត្ថុ លោក កាំង តុងងី យល់ថា សកម្មភាពជនជាតិឥណ្ឌា​ទាំង​នេះ ខុសច្បាប់បើមិនបានចុះបញ្ជីត្រឹមត្រូវ។​ លោកបន្តថា ចំពោះការប្រាក់ដល់២០ភាគរយ​គឺ​ខ្ពស់​លើសពីច្បាប់កម្ពុជា ដែលកំណត់ការប្រាក់ច្រើនបំផុតត្រឹម១,៥ភាគរយ​ក្នុង១ខែឬ​១៨​ភាគរយ​ក្នុង១ឆ្នាំ។​

លោក តុងងី លើកឡើងថា៖ «ច្បាប់ព្រះរាជាណាចក្រកម្ពុជាយើងកំណត់ហើយគឺមិន​លើស​១,៥ភាគរយ ក្នុង១ខែឬ១៨ភាគរយក្នុង១ឆ្នាំ។ អាជ្ញាធរមូលដ្ឋានត្រូវទប់ស្កាត់ករណីហ្នឹង ហើយ​ជាពិសេសពួកគាត់ជាជនបរទេស តើមានបណ្ណការងារឬលិខិតអាជីវកម្មអីទេ?»។​

លោក មេធាវី សេក សោភ័ណ ពន្យល់ថា ផ្លូវច្បាប់មិនបានលម្អិតពីកម្ចីលុយរាប់ទេ ហើយ​នៅ​ពេលដែលមានជម្លោះកើតឡើងនឹងដោះស្រាយតាមច្បាប់កិច្ចសន្យារវាងបុគ្គល និងបុគ្គល។

លោក សោភ័ណ ថ្លែងថា៖ «បើសិនជាមានរឿងពេលហ្នឹងគេលែងយកកុងត្រាឯកជនមកគិត​ជាផ្លូវច្បាប់ហើយ។ ពេលហ្នឹងទំនាក់ទំនងរវាងអ្នកឱ្យខ្ចី និងអ្នកខ្ចីគេហ្នឹងលុយរាប់ប្រចាំថ្ងៃ​ឬ​ប្រចាំអាទិត្យហ្នឹងពេលហ្នឹងច្បាប់គេមើលថា តើកិច្ចសន្យាហ្នឹងស្របច្បាប់ឬអត់? ហើយស្រប​ច្បាប់អត្រាការប្រាក់មិនឱ្យលើសពី១៨ភាគរយក្នុង១ឆ្នាំទេ ហើយបើហួសពីហ្នឹងគេចាត់ទុកថា ការសងនោះជាការសងប្រាក់ដើមហើយ»។​

លោក យិន ម៉េងលី អ្នក​សម្រប​សម្រួល​សមាគម​អាដហុកប្រចាំខេត្តបាត់ដំបង និងប៉ៃលិន​ ជំរុញឱ្យអាជ្ញាធរនៅខេត្តប៉ៃលិនស្រាវជ្រាវករណីនេះ ដើម្បីកុំឱ្យប៉ះពាល់កាន់តែធ្ងន់ធ្ងរ​ដល់​ប្រជាពលរដ្ឋ។​

លោក ម៉េងលី មានប្រសាសន៍ថា៖ «ឱ្យជនបរទេសដែលគាត់ដើរដាក់ចឹង ឱ្យពលរដ្ឋខ្ចីចឹង  តើអត្រាការប្រាក់ខ្ពស់ឬទាប ត្រឹមត្រូវតាមគោលការណ៍នៃធនាគារជាតិយើងទេ ឯកសារ​អីខ្លះដែលគាត់ត្រូវការ ដើម្បីធានាលើប្រាក់កម្ចីហ្នឹង ហើយបើពលរដ្ឋមិនមានលទ្ធភាពសង តើជនបរទេសហ្នឹងមានវិធានការយ៉ាងម៉េច? សំខាន់អាជ្ញាធរនៅតំបន់នោះគាត់ត្រូវធ្វើការ​សាកសួរ»។​

អភិបាលរងខេត្តប៉ៃលិន លោក អ៊ុន ប៊ុនលី ឆ្លើយយ៉ាងខ្លីដោយបដិសេធថា មិនមានករណី​ឥណ្ឌាដើរដាក់កម្ចីលុយរាប់ដូចការលើកឡើងទេ។ 

លោក អ៊ុន ប៊ុនលី៖ «អត់ផង អត់មានទេ»។​

អភិបាលរងខេត្តម្នាក់ទៀតលោក ហែម ឫទ្ធី ថ្លែងថា លោកមិនបានដឹងករណីនេះទេ។​

ខេមបូចា ព្យាយាមទាក់ទងលោកស្រី បាន ស្រីមុំ អភិបាលខេត្តប៉ៃលិន ដើម្បីសាកសួរ​ករណី​នេះ តាំងពីថ្ងៃទី១០ដល់ថ្ងៃទី១៨ខែវិច្ឆិកា គឺទូរសព្ទហៅចូលតែមិនមានអ្នកទទួលទេ។​

បើតាមការអះអាងរបស់ពលរដ្ឋគឺជនជាតិឥណ្ឌាដែលដើមឡើយជាអ្នកលក់មុង ហើយ​ក្រោយ​មកបានដាក់លុយរាប់នេះធ្វើឡើងច្រើនឆ្នាំហើយ លុះដល់ប្រមាណ៥ឆ្នាំ​ចុងក្រោយសកម្មភាព​កាន់តែរីកច្រើនឡើង ហើយដល់ប្រមាណ២ឆ្នាំចុងក្រោយនេះសកម្មភាពកាន់តែខ្លាំង ខណៈ​ពលរដ្ឋមានជីវភាពកាន់តែលំបាកដោយសារតែវិបត្តិកូវីដ។ ចំណែកដំណើរការខ្ចី​គឺគ្រាន់តែ​ដាក់​អត្តសញ្ញាណបណ្ណធានា និងមានធ្វើកិច្ចសន្យាជាលក្ខណៈឯកជន​ទៅអាចខ្ចីលុយ​បាន​ហើយ៕

275 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម