សមាគមសម្ព័ន្ធអ្នកសារព័ត៌មានកម្ពុជា

ចៅហ្វាយខេត្តមួយចំនួនថានឹងពន្លឿនការដោះស្រាយវិវាទដីធ្លីក្រៅប្រព័ន្ធតុលាការតាមបញ្ជានាយករដ្ឋមន្ត្រី

លោកនាយករដ្ឋមន្ត្រី ហ៊ុន សែន នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរគឺផ្លូវជាតិលេខ៣១ និងលេខ៣៣ នៅព្រឹកថ្ងៃទី៣០ ខែធ្នូ ឆ្នាំ២០២២ ស្ថិតក្នុងភូមិសាស្ត្រខេត្តកំពត និងខេត្តកែប។ រូបភាពពីហ្វេសប៊ុកនាយករដ្ឋមន្ត្រី
លោកនាយករដ្ឋមន្ត្រី ហ៊ុន សែន នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរគឺផ្លូវជាតិលេខ៣១ និងលេខ៣៣ នៅព្រឹកថ្ងៃទី៣០ ខែធ្នូ ឆ្នាំ២០២២ ស្ថិតក្នុងភូមិសាស្ត្រខេត្តកំពត និងខេត្តកែប។ រូបភាពពីហ្វេសប៊ុកនាយករដ្ឋមន្ត្រី

អភិបាលខេត្តមួយចំនួនបានអះអាងថានឹងពន្លឿនការដោះស្រាយបញ្ហាដីធ្លីក្រៅប្រព័ន្ធ​តុលាការឱ្យបានឆាប់រហ័សតាមការបញ្ជារបស់លោកនាយករដ្ឋមន្ត្រី ហ៊ុន សែន​ ខណៈ​ដែលតំណាងសហគមន៍មួយចំនួនសង្ឃឹមថាបទបញ្ជានេះនឹងក្លាយជាច្រកចេញចំពោះ​វិវាទដីធ្លីរ៉ាំរ៉ៃរបស់ពួកគាត់។

ថ្លែងក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរគឺផ្លូវជាតិលេខ៣១ និង​លេខ​៣៣ នៅព្រឹកថ្ងៃទី៣០ ខែធ្នូ ឆ្នាំ២០២២ ស្ថិតក្នុងភូមិសាស្ត្រខេត្តកំពត និងខេត្តកែប​ លោក​នាយក​រដ្ឋមន្ត្រី ហ៊ុន សែន ​បាន​ឱ្យផ្ដាំដល់អភិបាលខេត្តទៅតាមខេត្តនីមួយៗ​គិតគូរ និងដោះ​ស្រាយបញ្ហាដីធ្លីក្រៅប្រព័ន្ធតុលាការជាជាងតាមប្រព័ន្ធតុលាការជូនប្រជាពលរដ្ឋ។ ដោយ​លោកថាគួរតែយកគំរូតាមអភិបាលខេត្តកំពត លោក ម៉ៅ ធនិន្ទ ដែលបានធ្វើឱ្យ​ប្រជាពលរដ្ឋ​មាន​ភាពស្ងប់ចិត្តបានមួយចំនួនលើបញ្ហានេះ។

លោកមានប្រសាសន៍ថា៖«បើសិនជាអភិបាលខេត្តគ្រប់ខេត្ត ធ្វើត្រឹមតែបាន ម៉ៅ ធនិន្ទ ធ្វើនៅពោធិ៍សាត់ ឯបន្តមកធ្វើនៅកំពតខ្ញុំគិតថា អាជម្លោះដីធ្លីនេះវានឹងស្ងប់ឯង ព្រោះវា​អត់មានអីច្រើននោះទេ»

លោកបន្តថា៖«អ៊ីចឹងទេ! បើសិនគ្រប់ខេត្តទាំងអស់ធ្វើអារឿងហ្នឹងហើយធ្វើដោយមិនគិតអំពី​លម្អៀងទៅខាងណាហើយរកការសម្របសម្រួលខុសត្រូវគ្នាបន្តិចបន្តួច[..]អាហ្នឹង(បញ្ហាដីធ្លី)ត្រូវបន្តធ្វើពីបញ្ហាការងារហ្នឹង មុនដាច់ឆ្នាំគឺខ្ញុំគួរតែនិយាយឱ្យដឹង»

អភិបាលខេត្តបាត់ដំបង លោក សុខ លូ​ បាន​បង្ហាញការគាំទ្រនូវប្រសាសន៍​របស់​លោក​នាយករដ្ឋមន្ត្រីលើការដែលជំរុញឱ្យអភិបាលតាមខេត្តនីមួយៗពន្លឿនការដោះស្រាយវិវាទដីធ្លីក្រៅប្រព័ន្ធតុលាការឱ្យបានច្រើនជាងតាមតុលាកាជូនដល់ប្រជាពលរដ្ឋ។ ក្នុងនោះ លោកថា គិតត្រឹមរយៈពេលជិត១ឆ្នាំ២០២២ ការដោះស្រាយវិវាទដីធ្លីជូនប្រជាពលរដ្ឋមាន​ភាពល្អ​ប្រសើរ​។ ដោយលោកបន្តថា ភាគរយនៃករណីដោះស្រាយបានគឺមានច្រើន​ជាងវិវាទ​ដែល​មិន​ទាន់បានដោះស្រាយ តែថាលោកពុំអាចប៉ាន់ស្មាននិងប្រាប់ពីទិន្នន័យ​ជាក់លាក់បាន​ដោយ​ថានៅមិនទាន់បូកសរុបទិន្នន័យប្រចាំឆ្នាំនៅឡើយ។

លោក សុខ លូ ឱ្យដឹងបន្ថែមថាសម្រាប់ការដោះស្រាយក្រៅប្រព័ន្ធតុលាការ​គឺអាជ្ញាធរបាន​ហៅភាគីដែលមានវិវាទទាំងសងខាងមកជួបគ្នាដើម្បីធ្វើការសម្របសម្រួលដោយផ្អែកលើ​នីតិវិធីផ្លូវច្បាប់។ លោកបន្តថា ករណីមួយចំនួនត្រូវបានដោះស្រាយដោយមានការឯកភាព​ពីភាគីទាំងសងខាងក៏ដូចជាត្រឡប់មករាប់អានគ្នាធម្មតា តែលោកថា ក៏នៅមានករណីដែល​ភាគីខ្លះ​គាត់នៅពុំព្រមទទួលយកផងដែរ ដោយថាពួកគាត់ជ្រើសប្រើវិធីផ្សេង។

លោកបន្ថែមថា៖«បាទ!គឺគាត់បញ្ចប់គាត់ព្រមទទួលយកដំណោះស្រាយហ្នឹង! ហើយក្នុងនោះ​ក៏មានបងប្អូនខ្លះគាត់អត់ទទួលយកដែរ គឺថារឿងខ្លះគាត់អត់ទទួលយកទេ អ៊ីចឹងគឺគាត់​ដោះ​ស្រាយ​តាមវិធីផ្សេង។ អាហ្នឹងគឺយើងអត់អាចបង្ខិតបង្ខំគាត់បាននោះទេ»

អភិបាលខេត្តកោះកុង លោកស្រី មិថុនា ភូថង ក៏បានគាំទ្រនូវប្រសាសន៍របស់សម្ដេចផងដែរ​ ដោយអ្នកស្រីថាកន្លងមកគឺអាជ្ញាធរខេត្តបានខិតខំក្នុងការអនុវត្ត តែលោកស្រីថា​នឹងបន្ត​ពង្រឹង​ឱ្យបានល្អជាងនេះទៅទៀត។ លោកស្រីបន្តថា កន្លងមកអាជ្ញាធរបានបន្តដោះស្រាយជូន​ប្រជាពលរដ្ឋទៅតាមដំណាក់កាលជាធម្មតាដោយផ្អែកលើនីតិវិធីច្បាប់។ ដោយលោកស្រី​បន្ថែមថា សម្រាប់ការដោះស្រាយគឺអាជ្ញាធរបានសិក្សាស្រាវជ្រាវទៅលើសាវតានៃរឿងនីមួយ​ជា​មុន​សិន ទើបអាចរកដំណោះស្រាយសមប្រកបជូនដល់ប្រជាពលរដ្ឋ។

លោកស្រីអភិបាលខេត្តថ្លែងថា៖«ចំពោះយើងគឺយើងដោះស្រាយទៅតាមនីតិវិធី​សម្រាប់ការ​ដោះស្រាយគឺយើង​ដោះស្រាយតាមច្បាប់[..]រាល់ថ្ងៃគឺបងដោះស្រាយ​ទៅតាមដំណាក់កាល​តាមដំណោះស្រាយជាធម្មតាហើយយើងស្រាវជ្រាវទៅតាមសាវតានៃរឿង តាមសាច់រឿង​មួយៗ»

យ៉ាងណាមិញលោកស្រីក៏នៅពុំទាន់អាចប្រាប់ពីទិន្ន័យសរុបប្រចាំឆ្នាំបាននៅឡើយព្រោះនៅមិនទាន់បូកសរុបកិច្ចការងារប្រចាំឆ្នាំរួចរាល់។

អ្នក​ភូមិ​មក​ពី​ខេត្ត​កោះកុង ប្រមូល​ផ្តុំ​គ្នា​នៅ​មុខ​ក្រសួង​មហាផ្ទៃ ក្នុង​រាជធានី​ភ្នំពេញ ដើម្បី​ស្វែង​រក​កិច្ច​អន្តរាគមន៍​ក្នុង​ជម្លោះ​ដីធ្លី​ជាមួយ​លោក ហេង ហ៊ុយ។ រូបភាពថតថ្ងៃទី២៨ ខែមីនា ឆ្នាំ ២០២២។ ខេមបូចា/ ព្រីងសំរាំង

យោងតាមរបាយការណ៍បូកសរុបការងារប្រចាំឆ្នាំ២០២២របស់ក្រសួងដែនដីនគររូបនីយកម្ម និងសំណង់ ចុះថ្ងៃទី២៧ ខែធ្នូ​ ឆ្នាំ២០២២ ឱ្យដឹងថា ក្រសួងបានសម្រេចនូវសមិទ្ធផល​សំខាន់ៗ​មួយចំនួនដូចជា ការងារចុះបញ្ជីដីធ្លី ការងារដោះស្រាយវិវាទដីធ្លី ការងាររៀបចំដែនដី និងនគរូបនីយកម្ម ការងារគ្រប់គ្រង និងអភិវឌ្ឍតំបន់ឆ្នេរសមុទ្រ ការងារគ្រប់គ្រង និងអភិវឌ្ឍ​វិស័យសំណង់ ការងារសម្បទានដីសង្គមកិច្ច និងការងារអភិវឌ្ឍលំនៅឋាន ចូលរួមពង្រឹងភាព​សុខដុមរមនាក្នុងសង្គម បង្កើតចលករ និងបរិយាកាសល្អ សម្រាប់ធុរកិច្ច និងការវិនិយោគ ជួយរដ្ឋបាលថ្នាក់ក្រោមជាតិ ក្នុងការរៀបចំនយោបាយសាធារណៈ និងផែនការសកម្មភាព ក៏ដូចជាជំរុញបង្កើនចំណូលរបស់រដ្ឋ ។

របាយការណ៍ដដែលបានបង្ហាញថា ក្នុងឆ្នាំ២០២២ ក្រសួងបានប្រមូលចំណូលចូលថវិកាជាតិ​សរុបប្រមាណ ៣៦៧ ១៣៩ ៨៩៦ ០៥០រៀល ជិត៩០លានដុល្លារអាមេរិក។ ក្នុងនោះ ក្រសួង​បាន​បញ្ជាក់ថាវាមានការថយចុះជាង២២ភាគរយ បើធៀបនឹងឆ្នាំ២០២១។

របាយការណ៍នោះបានបង្ហាញថា ក្នុងឆ្នាំ២០២២ ក្រសួងបានចេញបណ្ណកម្មសិទ្ធិដីបានចំនួន ៣១៥ ៤៤១បណ្ណ និងចែកដល់ដៃប្រជាពលរដ្ឋចំនួន ២៦៤ ៨០៤បណ្ណ។ ក្នុងនោះ របាយការណ៍​បានគូសបញ្ជាក់ថា គិតចាប់ពីថ្ងៃចាប់ផ្តើមអនុវត្តដល់ខែវិច្ឆិកា ឆ្នាំ២០២២ ក្រសួង​បានចេញបណ្ណកម្មសិទ្ធិដីចំនួន ៦ ៧៣០ ៧៥២បណ្ណ ស្មើនឹងជាង៩៦ភាគរយ នៃចំនួនក្បាល​ដី​ប៉ាន់ស្មានដំបូង៧លានក្បាលដី។ 

មួយវិញទៀត ការចុះបញ្ជីដីមានលក្ខណៈជាប្រព័ន្ធសម្រេចបាន ៦ ១០៤ ០៥២បណ្ណ និងចែក​បណ្ណបានចំនួន ៥ ៥៩០ ៨០៨បណ្ណ (សម្បទានដីសង្គមកិច្ចចំនួន ១៧ ៩៩៣បណ្ណ) និងការចុះ​បញ្ជីដីមានលក្ខណៈដាច់ដោយដុំសម្រេចបាន ៦២៦ ៧០០បណ្ណ។ ក្នុងនោះ ដីរដ្ឋ​បាន ១៩៦ទី​តាំង ស្មើចំនួន ២ ១៧៨បណ្ណ ទំហំ ៩៤២ ៦១៧ហិកតា (ដីគោលដៅ​សម្បទាន​សេដ្ឋកិច្ច ១៨២​ទី​តាំង ស្មើចំនួន ២ ០៩១បណ្ណ ទំហំ ៧២៥ ៥៦១ហិកតា តំបន់ការងារ/ព្រៃស្តារឡើងវិញ ១៦ទី​តាំង ចំនួន ៨៧បណ្ណ ទំហំ ២១៧ ០៥៦ហិកតា។ ក្នុងនោះ ដីស្ថិតក្រោមការ​កាន់កាប់​របស់​ក្រសួង​បរិស្ថាន ៩ទីតាំង ចំនួន ៦៦បណ្ណ ទំហំ ១៩៥,២៣៦ហិកតា និងក្រសួងកសិកម្ម រុក្ខាប្រមាញ់ និងនេសាទ ៧ទីតាំង ចំនួន ២១បណ្ណ ទំហំ ២១ ៨២០ហិកតា)។

ជាមួយគ្នា របាយការណ៍ឱ្យដឹងបន្ថែមថា ចំពោះដីឯកជនរបស់បុគ្គលឯកជន បានចំនួន ៦២៣ ៥៤១បណ្ណ និងដីសហគមន៍ជនជាតិដើមភាគតិច បានចំនួន៣៨សហគមន៍ ស្មើនឹង៩៨១​បណ្ណ ទំហំ ៣៩ ៣៤២,៤១ហិកតា សម្រាប់ ៣ ៧១៧គ្រួសារ។ ដោយឡែកការចុះបញ្ជីដីគរុភណ្ឌវត្ត បានចំនួន ១ ៩៣៦វត្ត ស្មើនឹង ២ ៤០៤បណ្ណ។

តំណាងសហគមន៍ លោក សុង ថន រស់នៅភូមិព្រៃពាយ ឃុំពង្រក់ជ័យល័ក្ស ស្រុកឈូក ខេត្តកំពត​ ដែលកំពុងមានវិវាទដីធ្លីយូរឆ្នាំជាមួយក្រុមហ៊ុនឯកជន​បានសម្ដែងសេចក្ដីត្រេកអរ​ចំពោះប្រសាសន៍របស់លោកនាយករដ្ឋមន្ត្រីក្នុងការជំរុញឱ្យអភិបាលខេត្តនីមួយៗពន្លឿន​សមត្ថភាពក្នុងការស្វែងរកដំណោះស្រាយជូនពួកគាត់ឱ្យសមប្រកប។

លោក សុង ថន ឱ្យដឹងថា៖«បើសិនជាដូចប្រសាសន៍របស់សម្ដេចថាជំរុញឱ្យអភិបាល​នៃ​គណៈអភិបាលខេត្ត ជំរុញឱ្យគាត់(អភិបាលខេត្ត)ដោះស្រាយវិវាទដីធ្លីឱ្យឆាប់ចប់ ខ្ញុំបាទ​តំណាង​ឱ្យប្រជាពលរដ្ឋ សូមត្រេកអរដល់សម្ដេចព្រមទាំងអភិបាលខេត្ត​ដែលបានជួយ​ពន្លឿន​ការដោះស្រាយ ខ្ញុំអរគ្មានអ្វីប្រៀបផ្ទឹមនោះទេ។ ខ្ញុំអរណាស់!»

យ៉ាងណា លោកឱ្យដឹងបន្ថែមថា មកទល់ពេលនេះគឺលោកពុំទាន់ឃើញអភិបាលខេត្តកំពត លោក ម៉ៅ ធនិន្ទ ចុះមកធ្វើការដោះស្រាយទៅតាមការសន្យាថានឹងចុះមកកាលពីខែ១១ នៅឡើយទេ។ ប៉ុន្តែលោក សុងថន នៅតែបន្តទទូចស្នើឱ្យលោកអភិបាលខេត្តចុះ​មកជួយ​ដោះស្រាយវិវាទដីធ្លីនេះឱ្យបានកាន់តែឆាប់ ដោយលោកថា​អាជ្ញាធរមិនគួរបន្តសន្យាចោល​នោះឡើយ។

កាលពីពេលថ្មីៗនេះពលរដ្ឋជាង៣០០គ្រួសាររស់នៅស្រុកឈូក ខេត្តកំពត បានស្នើឱ្យ​អាជ្ញាធរ​ផ្ដល់ប្លង់កម្មសិទ្ធិដីធ្លីដែលពួកគេបានរស់នៅនិងអាស្រ័យផលជាង២០ឆ្នាំ ប៉ុន្តែ​ត្រូវបាន​រងការយាយីពីសំណាក់​ក្រុមហ៊ុន​ឯកជនចាប់ពីឆ្នាំ២០២០ ខណៈឆ្នាំ២០២១ ពលរដ្ឋ​ថាដី​ប្រមាណ ៥ ០០០ហិកតា​ត្រូវបានរដ្ឋ​កាត់​​ឱ្យក្រុមហ៊ុនឯកជនមួយ។

ពលរដ្ឋរងគ្រោះដីធ្លីទប់ស្កាត់និងអង្វរឱ្យភាគីក្រុមហ៊ុនបញ្ឈប់ការឈូសឆាយដីធ្លីរបស់ពួកគាត់ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត កំឡុងឆ្នាំ២០២១។ រូបភាពផ្ដល់ឱ្យ

តំណាងសហគមន៍ និងជាជនរងគ្រោះមកពីស្រុក បទុមសាគរ ខេត្តកោះកុង អ្នកស្រី ជុំ ស្រីនៅ បានចាត់ទុកថាការប្រកាសរបស់លោកនាយករដ្ឋមន្ត្រី ហ៊ុន សែន ជារឿងត្រឹមត្រូវ ដោយសារតែមើលឃើញពីវិវាទដីធ្លីជាច្រើនកំពុងជាប់គាំងមិនទាន់មានការដោះស្រាយ ជាពិសេសមិនមានការអើពើពីមន្ត្រីថ្នាក់ក្រោម។ មួយវិញទៀត អ្នកស្រីថា ការជាប់គាំងនេះ​បានធ្វើឱ្យប៉ះពាល់ដល់ជីវភាពរបស់ប្រជាពលរដ្ឋធ្ងន់ធ្ងរ ដោយសារមិនបានអាស្រ័យផង។

អ្នកស្រីថា៖«ខ្ញុំគិតថាគាត់(នាយករដ្ឋមន្ត្រី)គិតនឹងត្រឹមត្រូវហើយ ព្រោះអីប្រជាពលរដ្ឋ​គាត់​បាត់បង់ពិតប្រាកដមែន […] ខ្ញុំយល់ថាថ្នាក់ក្រោមគាត់មិនអើពើជាមួយនឹងប្រជាពលរដ្ឋទេ អនុសាសន៍របស់សម្តេចនឹងគាត់បានប្រកាសហើយ ប៉ុន្តែនៅឡើយតែថ្នាក់ក្រោមនៀក»

នាយកចាត់ការទូទៅ​នៃអង្គការ ​លីកាដូ ​លោក អំ សំអាត បានសង្កេត​ឃើញថា ជាទូទៅ​វិវាទ​ដីធ្លីនៅតែបន្តកើតមានខណៈករណីវិវាទដីធ្លីរ៉ាំរ៉ៃធំៗនៅតាមបណ្ដាខេត្តមួយចំនួននៅពុំទាន់​មានការដោះស្រាយនៅឡើយ។ ជាក់ស្ដែង លោកថា សហគមន៍នៅតាមបណ្ដាខេត្តដូចជា ខេត្តកោះកុង ខេត្តកំពង់ស្ពឺ ខេត្តកណ្ដាល​(ទាក់ទងនឹងការសាងសង់ព្រលានយន្តហោះថ្មី)​ខេត្តសៀមរាប(ទាក់ទងនឹងដីរបស់អាជ្ញាធរអប្សរ)និងខេត្តមួយចំនួនផ្សេងទៀត។ លោកបាន​គូសបញ្ជាក់បន្ថែមថាកត្តាដែលធ្វើឱ្យករណីវិវាទដីធ្លីកើតមានឡើងដោយសារករណីផ្ដល់ដី​សម្បទានសង្គមកិច្ចទៅកាន់ក្រុមហ៊ុនឯកជន ការរំលោភបំពានពីអ្នកមានអំណាច និងការ​អភិវឌ្ឍផ្សេងទៀត។

លោកបានឱ្យដឹងថា៖ «ការកើតមានវិវាទដីធ្លីហ្នឹង!វាបន្សល់ទុកពីរឿងការផ្តល់​សម្បទានដី​សេដ្ឋកិច្ចទៅកាន់ក្រុមហ៊ុនហ្នឹង[…]ហើយករណីផ្សេងទៀតគឺកើតឡើងចេញពីអ្នកដែលមាន​អំណាចមានទ្រព្យធនមួយចំនួនរំលោភបំពានទៅលើដីធ្លីរបស់ប្រជាពលរដ្ឋ ហើយមួយ​ចំនួន​ទៀតកើតចេញពីការអភិវឌ្ឍដែលធ្វើឱ្យប៉ះពាល់ទៅដល់ដីធ្លីរបស់ប្រជាពលរដ្ឋ»

យ៉ាងណាមិញ លោក អំ សំអាត ឱ្យដឹងបន្ថែមថា អភិបាលតាមខេត្តនីមួយៗ គួរបន្តពង្រឹង​និង​ព្យាយាមក្នុងការដោះស្រាយវិវាទដីធ្លីនេះតាមការបញ្ជារបស់លោកនាយករដ្ឋមន្ត្រី ហ៊ុន សែន​កាលពីពេលថ្មីៗនេះដោយឱ្យអភិបាលខេត្តព្យាយាមដោះស្រាយទំនាស់ដីធ្លីក្រៅប្រព័ន្ធ​តុលាការជាជាងតាមប្រព័ន្ធតុលាការ។ 

លោកសំអាតបន្ថែមថា៖ «ជម្រើសនៃការប្តឹងផ្តល់ការគំរាមកំហែងធ្វើទុក្ខបុកម្នេញប្រជាពលរដ្ឋ​ទាក់ទង​នឹងទំនាស់ដីធ្លីតាមផ្លូវតុលាការវាមិនមែនជាជម្រើសល្អទេ​ផ្ទុយទៅវិញវាបង្កនូវ​ផល​លំបាក​​​ច្រើនសម្រាប់ប្រជាពលរដ្ឋ។ ក្រៅពីរងគ្រោះដីធ្លី គាត់ត្រូវរងគ្រោះដោយប្រព័ន្ធ​តុលាការ គឺការជាប់ពន្ធនាគារ ការជាប់បណ្ដឹងដែលធ្វើឱ្យប៉ះពាល់ដល់សេដ្ឋកិច្ច​គ្រួសាររបស់​គាត់កាន់តែធ្ងន់ធ្ងរថែមទៀត»

វិលមកតំណាងសហគមន៍ស្រុកបុទុមសាគរខេត្តកោះកុង អ្នកស្រី ជុំ ស្រីនៅ បានដាក់ក្តីរំពឹង​ថា បទបញ្ជារបស់លោកនាយករដ្ឋមន្ត្រីនេះ​នឹងក្លាយជាឧបករណ៍ជំរុញឱ្យ​អាជ្ញាធរពន្លឿនការ​ដោះស្រាយវិវាទដីធ្លីនានាបានជោគជ័យ និងឆាប់រហ័ស។ អ្នកស្រីក៏បានស្នើឱ្យប្រមុខ​រាជ​រដ្ឋាភិបាល​បន្តតាមដាន និងជំរុញបន្ថែមទៀត ចៀសវាងការព្រងើយកន្តើយរបស់អាជ្ញាធរ។ 

អ្នកស្រី ស្រីនៅ បន្ថែមថា៖«អនុសាសន៍របស់សម្តេចហ្នឹងបានប្រកាសជាសាធារណៈហើយ សូមឱ្យសម្តេចគាត់ចាត់វិធានការឱ្យថ្នាក់ក្រោមបន្តបន្ទាប់ហ្នឹងចុះមើលស្រាវជ្រាវ​ដល់​ប្រជាពលរដ្ឋ​ផង។ ហើយសូមឱ្យដោះស្រាយជូនប្រជាពលរដ្ឋឱ្យបានឆាប់»

532 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម