អ្នករស់នៅតំបន់ត្រូវបន្តបិទខ្ទប់ក្នុងរាជធានីភ្នំពេញ បានប្រមូលផ្ដុំគ្នាតវ៉ាកាលពីព្រឹកថ្ងៃចន្ទ នៅក្នុងខណ្ឌមានជ័យ ដើម្បីទាមទារឲ្យមានការលើកលែងថ្លៃជួលបន្ទប់ ខណៈពួកគេមិនអាចចេញទៅធ្វើការបាន។
កម្មកររោងចក្រមួយចំនួនបានប្រមូលផ្ដុំគ្នានៅលើផ្លូវវេងស្រេងក្នុងភូមិដំណាក់ធំ៣ សង្កាត់ស្ទឹងមានជ័យ៣។ ការទាមទាររបស់កម្មករទាំងនោះបានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានអំពាវនាវឲ្យម្ចាស់ផ្ទះជួលផ្អាកយកថ្លៃឈ្នួលបន្ទប់ ឬបញ្ចុះតម្លៃបន្ទប់ ពីកម្មករក្នុងអំឡុងពេលការបិទខ្ទប់នៅបន្តក្នុងតំបន់មួយចំនួនដើម្បីបញ្ឈប់ការរាលដាលវីរុសកូវីដ១៩។
ទោះបីជាកម្មករកាត់ដេរជួលបន្ទប់ក្នុងតំបន់ក្រហមទាំងនោះកំពុងជួបការលំបាកក្នុងការចិញ្ចឹមជីវិតប្រចាំថ្ងៃ បន្ទាប់ពីមិនបានចេញទៅធ្វើការអស់ជាច្រើនសប្ដាហ៍ ម្ចាស់ផ្ទះជួលមួយចំនួនក៏បានអះអាងដែរថា ខ្លួនក៏កំពុងប្រឈមការលំបាកដែរ ដោយត្រូវសងប្រាក់ទៅធនាគារដែរ។
ក្នុងចំណោមអ្នកជួលបន្ទប់ទាំងនោះ លោក ស្ដើង សៀង គឺជាកម្មករកាត់ដេរម្នាក់ ដែលបានជួលផ្ទះនៅភូមិដំណាក់ធំ៣នោះដែរ។ លោកប្រាប់ខេមបូចា ថាកម្មករនៅក្នុងតំបន់របស់លោកត្រូវចំណាយ៧០ទៅ៨០ដុល្លារក្នុងមួយខែលើថ្លៃបន្ទប់ ហើយថាលោកផ្ទាល់ក៏បានស្នើទៅកាន់ម្ចាស់បន្ទប់ជួល ឈ្មោះ ក្រូច ដារ៉ាក ឲ្យជួយបន្ថូរបន្ថយថ្លៃឈ្នួលលខ្លះ។ បន្ទាប់ពីមានការចរចាគ្នា លោកថា ម្ចាស់បន្ទប់ជួល ថានឹងផ្ដល់ចម្លើយនៅថ្ងៃពុធ។
លោកឲ្យដឹងថា៖ «ជាដំបូងយើងស្នើសុំឲ្យគាត់លើកលែងថ្លៃជួលមួយខែ ប៉ុន្តែម្ចាស់បន្ទប់ជួលបដិសេធ ហើយបានយល់ព្រមបញ្ចុះថ្លៃ២០ភាគរយ។ យើងទាមទារថាយ៉ាងហោចណាស់បានចុះថ្លៃ៥០ភាគរយ» ដោយលោកបន្ថែមថា៖ «គេបានប្រាប់យើងថាពួកគេក៏ខ្ចីលុយពីធនាគារដែរ បើធនាគារជួយសម្រួលពួកគេខ្លះ ពិតណាស់ ពួកគេក៏អាចជួយសម្រួលដល់កម្មករខ្លះដែរ»។
លោក បញ្ជាក់ថា បើសិនជាម្ចាស់បន្ទប់ជួលមិនយល់ព្រមទេ អ្នកជួលទាំងអស់អាចនឹងអំពាវនាវឲ្យរដ្ឋាភិបាលជួយ។
បើតាមតួលេខក្រសួងការងារកាលពីដើមខែមេសា ការបិទខ្ទប់រយៈពេលបីសប្ដាហ៍ បាននាំឲ្យមានរោងចក្រចំនួន២០៦ បានផ្អាកប្រតិបត្តិការបណ្ដោះអាសន្ន ដោយមានទាំងរោងចក្រកាត់ដេរ រោងចក្រដេរស្បែកជើង និងរោងចក្រផលិតផលិតផលធ្វើដំណើរ ក្នុងនោះមាន១៣៤នៅភ្នំពេញ និងមាន២៣នៅខេត្តកណ្ដាល និងខេត្តផ្សេងៗទៀត។ ជាសរុប ការបិទខ្ទប់នៅភ្នំពេញ និងក្រុងតាខ្មៅនេះ បានធ្វើឲ្យរោងចក្រ និងអាជីវកម្ម ជាង៧ ០០០បានបិទដំណើរការជាបណ្ដោះអាសន្ន និងប៉ះពាល់កម្មករកម្មករប្រហែល១,២លាននាក់។
បន្ទាប់ពីជំងឺកូវីដ១៩ បានរាលដាលដល់រោងចក្រ និងដល់ប្លុកផ្ទះជួលរបស់កម្មកររោងចក្រនៅភាគខាងលិចទីក្រុង តំបន់ដែលមានកម្មកររស់នៅទាំងនេះត្រូវបានកំណត់ជាតំបន់ក្រហម និងមានការរឹតបន្តឹងខ្លាំងដើម្បីទប់ស្កាត់អត្រាឆ្លងជំងឺកូវីដ១៩។
ជាការឆ្លើយតបទៅនឹងការតវ៉ារបស់កម្មករមួយចំនួននេះ ប៉ុស្ដិ៍នគរបាលរដ្ឋបាលស្ទឹងមានជ័យ៣ កាលពីថ្ងៃចន្ទ បានស្នើឲ្យកម្មករកុំប្រមូលផ្តុំគ្នាក្នុងចំនួនច្រើន ដើម្បីចៀសវាងពីការឆ្លងកូវីដ១៩។ បើតាមការផ្សាយលើទំព័រហ្វេសប៊ុករបស់ខ្លួន មន្ត្រីនគរបាលបានស្នើឲ្យតំណាងកម្មករទៅជួបចរចារជាមួយម្ចាស់បន្ទប់ជួលជំនួសវិញ ឬទាក់ទងមកអាជ្ញាធរមូលដ្ឋានដើម្បីជួយសម្របសម្រួលដោះស្រាយបញ្ហានេះ។
ម្ចាស់ផ្ទះជួល លោក ដារ៉ាក ដែលមានបន្ទប់ជួលជាង១០០បន្ទប់ និងមានកម្មករជួលប្រហែល៥០០នាក់ បានប្រាប់ខេមបូចា ថាលោកក៏ជំពាក់ធនាគារ និងត្រូវសង់លុយវិញដែរ។ លោកថា លោកបានដាក់សំណើទៅធនាគារសុំឲ្យពន្យាការបង់ប្រាក់សងមួយ ឬពីរខែ។ បើសិនជាលោកអាចបានទទួលការលើកលែងនេះ លោកថាលោកក៏នឹងសម្រួលដល់អ្នកជួលបន្ទប់ដែរ។
លោកបន្ថែមថា៖ «ខ្ញុំអាចនឹងជួយសម្រួលដល់កម្មករបន្ថែមទៀត [ប៉ុន្តែ] ខ្ញុំកំពុងរង់ចាំចម្លើយពីធនាគារ។ ខ្ញុំមិនរំពឹងអ្វីច្រើនពីពួកគេទេ ព្រោះពួកគេបានប្រាប់ខ្ញុំហើយថាធនាគារមិនមានគោលការណ៍បែបនេះទេ»។
លោកឲ្យដឹងដែរថា លោកបានបញ្ចុះថ្លៃឈ្នួល១០ដុល្លារម្ដងហើយ ហើយពេលនេះនឹងបញ្ចុះថ្លៃ១០ដុល្លារទៀត។
លោកបន្ថែមថា៖ «យើងមិនអាចចុះថ្លៃឲ្យពួកគាត់១០០ភាគរយទេ ព្រោះបើយើងធ្វើដូចនេះ យើងនឹងស្លាប់ទាំអស់គ្នា។ ប៉ុន្តែយើងអាចត្រឹមតែពន្យាពេលឲ្យពួកគាត់ ហើយនៅពេលស្ថានភាពល្អប្រសើរវិញ ខ្ញុំនឹងឲ្យពួកគាត់បង់វិញទៅតាមលទ្ធភាព»។
កាលដើមខែមេសា អំឡុងពេលមានការបិទខ្ទប់ផ្នែកខ្លះក្នុងខណ្ឌមួយចំនួនក្នុងរាជធានីភ្នំពេញ មុនមានការបិទខ្ទប់ទីក្រុងទាំងស្រុងនៅថ្ងៃទី១៥ ខែមេសា លោកនាយករដ្ឋមន្ត្រី ហ៊ុន សែន បានប្រកាសផ្ដល់ប្រាក់ឧត្ថម្ភ៣០ម៉ឺនរៀល សម្រាប់គ្រួសារដែលជាប់ក្នុងតំបន់បិទខ្ទប់។ លោក នាយករដ្ឋមន្ត្រីប្រកាសទៀតថា រដ្ឋនឹងជួយចេញថ្លៃអគ្គិសនីខ្លះដល់អ្នករងផលប៉ះពាល់ និងគ្រួសារអ្នកមានឆ្លងកូវីដ១៩ ក៏ដូចជាអ្នកដែលត្រូវដាក់ឲ្យធ្វើចត្តាឡីស័កសម្រាប់រយៈពេលពីមួយខែដល់បីខែ។ យ៉ាងណា ក្រោយមក លោកនាយករដ្ឋមន្ត្រី ក៏បានលុបចោលគម្រោងនោះវិញ ដោយជំនួសមកវិញដោយការផ្ដល់ជាអំណោយស្បៀងអាហារ បន្ទាប់ពីទីក្រុងទាំងមូលត្រូវបិទខ្ទប់ទាំងស្រុង ក្នុងរយៈពេលបីសប្ដាហ៍។
ជាថ្មីម្តងទៀតកាលពីថ្ងៃសប្តាហ៍មុន លោក ហ៊ុន សែន ក៏បានស្នើដល់អគ្គិសនីកម្ពុជា និងរដ្ឋាករទឹកស្វយ័តក្រុងភ្នំពេញ ឲ្យរកវិធីសម្រួលដល់ថ្លៃប្រើប្រាស់របស់កម្មករក្នុងតំបន់ក្រហម។
រដ្ឋាករទឹកស្វយ័តក្រុងភ្នំពេញ កាលពីថ្ងៃអាទិត្យបានប្រកាសលើកលែងថ្លៃប្រើប្រាស់ទឹកបីខែ ពីខែមីនា ដល់ខែឧសភា សម្រាប់ផ្ទះជួលចំនួន៨៧០ ដែលបច្ចុប្បន្នស្ថិតក្នុងតំបន់ក្រហម។ បន្ទប់ដែលទទួលបានការលើកលែងថ្លៃប្រើប្រាស់ទឹកនេះ គឺភាគច្រើនជាកម្មកររោងចក្រ និងនិស្សិត។ ចំណែកឯខាងអគ្គិសនីកម្ពុជាវិញ នៅមិនទាន់ប្រកាសពីវិធានការបន្ធូរបន្ថយថ្លៃអគ្គិសនីដល់អ្នកទាំងនោះនៅឡើយ។
ទោះបីជាវិធានការបិទខ្ទប់ត្រូវបាកដកចេញស្ទើរគ្រប់កន្លែងក្នុងរាជធានីភ្នំពេញក៏ពិតមែន តែក្រសួងសុខាភិបាលនៅតែបន្តរកឃើញករណីឆ្លងកូវីដ១៩ បន្ថែមទៀត។
នៅថ្ងៃចន្ទ ក្រសួងសុខាភិបាល បានរកឃើញអ្នកឆ្លងកូវីដ១៩ ចំនួន៥០៦ករណីបន្ថែមទៀត នាំឲ្យចំនួនអ្នកឆ្លងសរុបគិតតាំងពីផ្ទុះការរាលដាលតាំងពីដើមឆ្នាំ២០២០ ឡើងដល់១៩ ៧៤៣ករណី។ ជាមួយគ្នានោះដែរ មានមនុស្សចំនួន១២៦នាក់បានស្លាប់ដោយសារកូវីដ១៩។
លោក អាត់ ធន់ ប្រធានសហភាពការងារកម្ពុជា មានប្រសាសន៍ថា ម្ចាស់បន្ទប់ជួលជាច្រើនមិនបានអនុគ្រោះថ្លៃជួលបន្ទប់ទេ ព្រោះថាវិស័យឯកជនគ្មានកាតព្វកិច្ចផ្លូវច្បាប់ធ្វើដូចនេះ។ ដូច្នេះពួកគេមានសិទ្ធិធ្វើតាម និងមិនធ្វើតាមការអំពាវនាវរបស់រដ្ឋាភិបាល។
លោកបន្តថា៖ «ការប្រឈមរបស់កម្មករនៅតែមាន ពេលម្ចាស់ផ្ទះជួលខ្លះបានឲ្យពន្យាការបង់ថ្លៃឈ្នួល ហើយតម្រូវឲ្យបង់សងពេលកម្មករត្រឡប់ចូលធ្វើការវិញ»។
ខណៈកម្មករទំនងជាមិនអាចទទួលបានប្រាក់ឈ្នួលក្នុងរយៈពេលផ្អាកការងារ ការសងបំណុលនឹងរឹតតែជាបន្ទុកធ្ងន់លើអ្នកទាំងនោះ។
លោក អាត់ ធន់ ថានេះជាកាតព្វកិច្ចរបស់រដ្ឋាភិបាល ក្នុងការជួយដល់កម្មករទាំងនោះ។
លោក បន្ថែមថា៖ «ជាការពិត រដ្ឋត្រូវតែផ្ដល់ជំនួយដូចជាស្បៀងអាហារ និងថវិកា ជួយដល់កម្មករ នេះជាកាតព្វកិច្ចរបស់រដ្ឋាភិបាល…ជំនួយជាថវិកាពិតជាសំខាន់ រដ្ឋាភិបាលត្រូវតែបង្ខំឲ្យថៅកែរោចក្រទាំងនោះផ្ដល់ប្រាក់ឈ្នួលដល់កម្មករក្នុងអំឡុងពេលផ្អាកការងារនេះ។ ជាមួយគ្នានេះដែរ រដ្ឋគួរផ្ដល់ការលើកលែងលើថ្លៃទឹក និងភ្លើង»។
ទន្ទឹមនឹងនេះ ភាពលំបាកនៃការជួលបន្ទប់នៅក្នុងភូមិដំណាក់ធំ៣ ក៏កំពុងកើតមាននៅកន្លែងផ្សេងពាសពេញតំបន់ក្រហមក្នុងរាជធានីភ្នំពេញ។ ថ្វីដ្បិតការតវ៉ាដូចនៅព្រឹកថ្ងៃចន្ទ អាចនឹង កើតមានជាថ្មីនៅកន្លែងផ្សេងទៀត ម្ចាស់ផ្ទះជួលមួយចំនួនក៏បានលើកលែងថ្លៃឈ្នួលផ្ទះពីកម្មករដែលមិនមានលទ្ធភាពបង់ដែរ។
លោក សុង សាន ជាកម្មករនៅរោងចក្រកាត់ដេរ ឌីន ហាន ដែលរងការឆ្លងកូវីដ១៩ ជាចង្កោមកាលពីដើមខែមេសា។ លោក សាន បច្ចុប្បន្នកំពុងជួលបន្ទប់រស់នៅក្នុងតំបន់ក្រហម ក្នុងភូមិចំបក់ សង្កាត់ចោមចៅ១ ខណ្ឌពោធិ៍សែនជ័យ បានឲ្យដឹងថាម្ចាស់បន្ទប់ជួលរបស់លោកបានលើកលែងថ្លៃឈ្នួលបន្ទប់សម្រាប់ខែនេះ។
លោក សាន ប្រាប់ខេមបូចា នៅថ្ងៃចន្ទនេះថា៖ «ខ្ញុំមិនដឹងថាគាត់ធ្វើនេះ បន្ទាប់ពីការអំពាវនាវរបស់លោកនាយករដ្ឋមន្ត្រី ហ៊ុន សែន ឬយ៉ាងណា ប៉ុន្តែនៅព្រឹកនេះ គាត់ថា គាត់មិនយកថ្លៃឈ្នួលខែនេះទេ…នេះជួយសម្រួលបន្ទុកដល់កម្មករដែលមិនមានការងារធ្វើ មិនមានចំណូល និងកំពុងខ្វះអាហារ»។
ប្រែសម្រួលពីអត្ថបទភាសាអង់គ្លេស៖ Struggling workers in quarantine zones demand rent waivers for COVID-19 crisis
