តុលាការកំពូលបានសម្រេចបង្វែរសំណុំរឿងម្ស៉ៅទឹកគោ នូទ្រីលេត (Nutrilatt) ទៅសាលាឧទ្ធរណ៍ ជំនុំជម្រះសាជាថ្មី ដោយសំអាងថា ទឹកប្រាក់ពិន័យដែលកំណត់ឱ្យក្រុមហ៊ុនបង់ចំនួន៨លានរៀលនេះ មិនបានបញ្ជាក់ឱ្យច្បាស់ថា ឱ្យក្រុមហ៊ុនអ្នកបង់ ឬបុគ្គលជាប្រធានក្រុមហ៊ុនអ្នកបង់។
សាលដីកាដែលអានដោយប្រធានក្រុមប្រឹក្សាជំនុំជម្រះលោកចៅក្រម គង់ ស្រ៊ីម នៅព្រឹកថ្ងៃទី២១ ខែធ្នូ បានបញ្ជាក់សេចក្តីសម្រេចរបស់តុលាការថ្នាក់ក្រោមថាមិនបានបញ្ជាក់ឱ្យច្បាស់ពីចំនួនលុយផាកពិន័យ៨លានរៀលនោះអ្នកណាអ្នកចេញនោះទេ។
ក្រោយស្តាប់សាលដីការបស់តុលាការហើយក្រុមដើមបណ្តឹងចាត់ទុកសេចក្តីសម្រេចបង្វែរសំណុំរឿងនេះ ជាការអូសបន្លាយពេលធ្វើឱ្យពួកគាត់ឈឺចាប់ និងមានអារម្មណ៍ថា មានកំហុសកាន់តែខ្លាំងចំពោះកូន ដែលខ្លួនទិញទឹកដោះគោមានជាតិពុលឱ្យពួកគេបៅ។
ដើមបណ្តឹងម្នាក់ក្នុងចំណោម២១នាក់អ្នកស្រី លីវ សំណាង ឱ្យដឹងថា កូនភ្លោះរបស់អ្នកស្រី២នាក់បៅទឹកដោះគោនេះ រយៈពេល៣ខែបានកើតជំងឺខ្វះគ្រាប់ឈាម និងខ្វះជាតិដែកធ្ងន់ធ្ងរ។ អ្នកស្រី ចាត់ទុកការបង្វែរសាច់រឿងនេះ ជាការពន្យារពេលធ្វើឱ្យរូបគាត់មិនទទួលបានយុត្តិធម៌។
អ្នកស្រី លីវ សំណាង៖«រឿងហ្នឹងខ្ញុំស្មានអត់ត្រូវ និយាយរួមសូមស្មានលែងត្រូវ សូមឈប់ស្មានទៀត ព្រោះអីយើងគិតថាយើងដល់ដំណាក់កាលទី៣ហើយណា យើងគិតថាបញ្ចប់ ខ្ញុំឮគេថាប្រវត្តិសាស្ត្រហ្នឹងគឺវាត្រូវអូសបន្លាយជាច្រើនឆ្នាំ តែឥឡូវជួបខ្លួនឯងខ្ញុំជឿ ជឿខ្លាំងម៉ងថាមែនពិតជាមែនសម្រាប់រឿងក្តីមួយៗនៅស្រុកខ្មែរយើង ដែលធំៗគឺអូសបន្លាយរាប់ឆ្នាំ»។
អ្នកស្រី ប៉ុន ពេជ្រវត្តា ជាម្តាយម្នាក់ស្ថិតនៅក្នុងចំណោមដើមបណ្តឹងដែរបង្ហាញការខកចិត្តដោយអះអាងថា ភស្តុតាងមានគ្រប់គ្រាន់បង្ហាញថា ទឹកដោះគោមានជាតិពុល ធ្វើឱ្យប៉ះពាល់ដល់កូនអ្នកស្រី និងកុមារផ្សេងទៀត។ អ្នកស្រីបញ្ជាក់ថា រូបគាត់តែងតែតក់ស្លុតពេលនឹកឃើញស្ថានភាពកូន ហើយប្តេជ្ញាស្វែងរកយុត្តិធម៌តទៅមុខរហូត។
អ្នកស្រី ប៉ុន ពេជ្រវត្តា៖ «ខ្ញុំនៅតែហ៊ុននិយាយភាសាមួយម៉ាត់ថាពិតជាអយុត្តិធម៌សម្រាប់ពួកខ្ញុំណាស់២១គ្រួសារនេះ អយុត្តិធម៌ខ្លាំងមែនទែនមកដល់ពេលនេះ ខ្ញុំនឹងព្យាយាម និងសូមអង្វរទៅខាងសម្តេចបវរធិបតីឱ្យជួយដោះស្រាយរឿងនេះ ព្រោះអីរឿងនេះសំខាន់ណាស់សម្រាប់ក្មេង បង កុមារ ពួកខ្ញុំត្រូមានកូនទៀត»។
ដើមបណ្តឹងម្នាក់ទៀត អ្នកស្រី គង់ ចន្ទម៉ាលីស ឱ្យដឹងថា កូនអ្នកស្រីបៅទឹកដោះគោនេះតាំងពី កើតភ្លាមរហូតដល់៦ខែពេលធ្វើទុក្ខខ្លាំងរហូតវៀចមាត់ និងពកបង្ហើយទើបយកទៅពេទ្យ បានដឹងថា បញ្ហាបណ្តាលមកពីទឹកដោះគោនេះ។ អ្នកស្រីឱ្យដឹងថា កូនអ្នកស្រីពេលនេះ អាយុ៤ឆ្នាំហើយ ប៉ុន្តែពេលអ្នកស្រីមើលមុខកូនតែងតែហូរទឹកភ្នែកហើយមានអារម្មណ៍ថា បានសាងកំហុសធ្វើឱ្យខូចសុខភាពកូន។
អ្នកស្រី គង់ ចន្ទម៉ាលីស ក៏បានតាំងចិត្តដូចដើមបណ្តឹងផ្សេងទៀតដែរ គឺបន្តស្វែងរកយុត្តិធម៌រហូត ទទួលបានលទ្ធផលដែលអាចទទួលបាន។
អ្នកស្រី គង់ ចន្ទម៉ាលីស៖«អ្វីដែលពួកខ្ញុំនៅតែទទូចចង់ឃើញ នៅតែបន្តសកម្មភាពបន្តទៀត ទោះបីរឿងក្តីនេះតតាំងឡើងរហូតដល់កូនខ្ញុំក្រាបផ្ទឹមសំពះ វាដឹកដៃភរិយាវាចូលមកស្តាប់សវនាការទៀតក៏ពួកខ្ញុំនៅតែតតាំងរហូតដល់ទីបញ្ចប់ដែរ គឺពួកខ្ញុំចង់ឃើញពាក្យថាតុលាការកំពូល ចង់ឃើញភាពយុត្តិធម៌ សគឺស ខ្មៅគឺខៅ កុំឱ្យមានពាក្យថាពណ៌ប្រផេះបន្តទៀត»។
កាលពីដើមខែធ្នូឆ្នាំ២០២០ គ្រួសារកុមារដែលរងផលប៉ះពាល់ដល់សុខភាពពីទឹកដោះគោ នូទ្រីលេត ចំនួន២១គ្រួសារបានដាក់ពាក្យប្តឹងទៅសាលាដំបូងរាជធានីភ្នំពេញដើម្បីឱ្យក្រុមហ៊ុនទទួលខុសត្រូវ។ ការដាក់បណ្តឹងនេះបន្ទាប់ពីឪពុកម្តាយកុមារទាំងនោះយកទឹកដោះគោទៅពិសោធន៍ ហើយរកឃើញថា ពិតជាដើមហេតុធ្វើឱ្យកុមារបាត់បង់គ្រាប់ឈាមក្រហម និងខ្វះជាតិដែកធ្ងន់ធ្ងរ។
អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» នៃក្រសួងពាណិជ្ជកម្ម លោក ផាន អូន ថ្លែងថា លោកពិតជា ដឹកនាំក្រុមការងារត្រួតពិនិត្យក្រុមហ៊ុនទឹកដោះគោ នូទ្រីលេត មែន ប៉ុន្តែលោកបដិសេធមិនបង្ហាញលទ្ធផលទេ ដោយបញ្ជាក់ថា របាយការណ៍បានដាក់ទៅតុលាការអស់ហើយ។
ចំណែកអ្នកនាំពាក្យក្រសួងសុខាភិបាលលោកស្រី ឱ វណ្ណឌីន បញ្ជាក់ថា ជាប់រវល់ប្រជុំមិនបានឆ្លើយតបករណីនេះបានទេនៅថ្ងៃទី២១ ខែធ្នូ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ឃើញថា បញ្ហានាំផលិតផលខូចគុណភាពចូលប្រទេសបានដោយសារតែអំពើពុករលួយ។ លោកចាត់ទុកថា ទង្វើនេះប៉ះពាល់ធ្ងន់ធ្ងរដល់សុខភាពសាធារណៈដែលត្រូវផ្តល់យុត្តិធម៌ដល់ជនរងគ្រោះ និងទប់ស្កាត់កុំឱ្យមានបទល្មើសរបៀបនេះកើតឡើងទៀត។
លោក យង់ គិមអេង៖«សំខាន់បំផុតគឺស្ថាប័នដែលទទួលខុសត្រូវរឿងច្បាប់ទម្លាប់ហ្នឹងដែលជាអ្នកត្រូវធនាការខុសត្រូវចំពោះប្រជាពលរដ្ឋនៅក្នុងការផ្តល់យុតិ្តធម៌ក្នុងការដាក់ទោសទណ្ឌកុំឱ្យករណីដដែលៗហ្នឹងវាកើតឡើងទៀត»។
នៅខែមេសា ឆ្នាំ២០២២ សាលាដំបូងរាជធានីភ្នំពេញ បានប្រកាសសាលក្រម សម្រេចផ្ដន្ទាទោសជនជាប់ចោទជាប្រធានក្រុមហ៊ុន នូទ្រីលេត គឺលោកស្រី ខុន កែវកេសី ដាក់ពន្ធនាគាររយៈពេល ១០ខែ និងពិន័យជាប្រាក់៨លានរៀល (៨ ០០០ ០០០) និងបង្គាប់ឱ្យផ្ដល់សំណងដល់ជនរងគ្រោះចន្លោះពី ១ម៉ឺន(១០ ០០០) ទៅ២ម៉ឺនដុល្លារ (២០ ០០០) ផ្អែកលើស្ថានភាពជាក់ស្ដែង។ ប៉ុន្តែភាគីក្រុមហ៊ុន បានប្ដឹងសាទុក្ខទៅសាលាឧទ្ធរណ៍ ហើយសាលាឧទ្ធរណ៍បានរក្សាសេចក្តីសម្រេចរបស់ តុលាការដំបូងរាជធានីភ្នំពេញ ទុកជាបានដោយឥតកែប្រែ ហើយក្រុមភាគីក្រុមហ៊ុនក៏បន្តប្ដឹងជំទាស់ដល់តុលាការកំពូល ដោយបញ្ជាក់ថា ក្រុមហ៊ុននាំចូលផលិតម្ស៉ៅទឹកដោះគោម៉ាកនូទ្រីលេត ពី ប្រទេសសិង្ហបុរីមកលក់នៅកម្ពុជានេះ មានការទទួលស្គាល់ពីស្ថាប័នពាក់ព័ន្ធរបស់កម្ពុជា៕
