កសិករខេត្តស្វាយរៀងតវ៉ាលើសំណងគម្រោងប្រព័ន្ធធារាសាស្រ្ត

អ្នកភូមិតវ៉ានៅលើដីស្រែរបស់ខ្លួននៅថ្ងៃចន្ទ។ ដីជម្លោះស្ថិតក្នុងព្រំប្រទល់នៃគម្រោងស្ដារប្រឡាយឡើងវិញ។ រូបភាពផ្ដល់ឲ្យ
អ្នកភូមិតវ៉ានៅលើដីស្រែរបស់ខ្លួននៅថ្ងៃចន្ទ។ ដីជម្លោះស្ថិតក្នុងព្រំប្រទល់នៃគម្រោងស្ដារប្រឡាយឡើងវិញ។ រូបភាពផ្ដល់ឲ្យ

ប្រ​ជា​ពល​រដ្ឋ​រាប់​រយ​គ្រួសារ​ដែល​បាន​អះអាងថាបាន​នឹង​កំពុង​កាន់​កាប់​​ដីស្រែ​ជិត​១០០​ហិកតា​ក្នុង​ខេត្ត​ស្វាយ​រៀង​បាន​តវ៉ា​ប្រឆាំង​នឹង​អាជ្ញាធរ​ខេត្ត ដោយ​បាន​​បង្ខំ​​ឲ្យពួកគាត់​​ទទួល​សំណង​ដី​ធ្លី​ក្នុង​តម្លៃ​ទាប ដើម្បី​យក​ដី​អនុវត្ត​គម្រោង​ស្តារ​ប្រឡាយ​ឡើង​វិញ​។​

គម្រោងស្តា​រប្រព័ន្ធ​​ប្រឡាយ​ទឹក​កំពង់ជ្រៃ​ ស្ថិត​ក្រោម​ការ​គ្រប់​គ្រង​របស់​ក្រ​សួង​ធនធានទឹក បាន​ប៉ះពាល់​ប្រ​ជា​ពល​រដ្ឋ​១២០​គ្រួសារ​លើ​ផ្ទៃ​ដី​ជាង​៩៩​ហិកតា ក្នុង​ឃុំ​ចំនួន​ពីរ​ ក្នុង​ស្រុក​ស្វាយ​ជ្រុំ​។ អ្នក​ភូមិ​ឲ្យ​ដឹង​ថា​គម្រោង​ពង្រីក និង​ស្ដារ​ឡើង​វិញ​ប្រឡាយទឹក​នេះ​បាន​ចាប់​ផ្ដើម​ឡើង​តាំងពី​ឆ្នាំ២០០៩ ប៉ុន្តែត្រូវ​បាន​ពន្យារ​ពេល​ដោយសារតែមានការ​តវ៉ាពីប្រ​ជា​កសិករ​។ ប៉ុន្តែ មន្ត្រី​​ក្រ​​សួង​ធនធាន​ទឹក​បាន​អះអាង​ថា​តំបន់​ដែល​ប៉ះពាល់​ជា​ដី​របស់​រដ្ឋ ហើយ​សំណង​នោះ​គឺ​សង​លើ​ផល​ដំណាំ មិន​មែន​លើ​តម្លៃដី​ជាក់​ស្ដែង​នោះទេ​។ ​មន្ត្រី​ឲ្យ​ដឹង​ដែរ​ថា គម្រោង​នេះ​មិន​ពង្រីក​ប្រឡាយ​នោះទេ ដោយ​គ្រាន់​តែ​ជួសជុល​ស្ដារ​ឡើង​វិញ​ប៉ុណ្ណោះ​។​

ចំពោះ​តម្លៃ​សំណងត្រូវ​បាន​គេ​រាយការណ៍​ថា ​អាជ្ញាធរ​ខេត្ត​ផ្ដល់​ឲ្យ​ទៅ​ប្រជា​កសិករ​៩០០​រៀល​ក្នុង​មួយ​ម៉ែត្រការ៉េ ដែល​ចំនួន​នេះ​កសិករ​មិន​ព្រម​ទទួល​យក​។​

អ្នកស្រី យស សុភ័ណ្ឌ  ជាកសិករមកពី​សហគមន៍​សាមគ្គីចេកមាសក្នុង​ភូមិ​ចេក ឃុំឈើ​ទាល បាន​ឲ្យ​ដឹង​ថា គ្រួសារ​អ្នកស្រី​បាន​ធ្វើ​ស្រែ​​លើ​ដី​របស់​ខ្លួន​តាំងពី​ឆ្នាំ​១៩៨២​។

អ្នកស្រី​និយាយ​ថា៖ «បើ​សិន​ជា​រដ្ឋាភិបាល​ឲ្យ​សំណង​ត្រឹម​៩០០​រៀល​ក្នុងមួយ​ម៉ែត្រការ៉េ ប្រ​ជា​ពល​រដ្ឋ​មិន​អាច​ទទួល​បានទេ ពីព្រោះ​ប្រ​ជា​ពល​រដ្ឋ​ពឹង​លើ​ដី​ធ្វើស្រែ​ដើម្បី​ចិញ្ចឹម​ជីវិត»។ អ្នក​ស្រី​បន្ត​ថា៖ «ពេល​ដែល​យើង​គ្មាន​ដី ជីវិត​នឹង​ពិបាក វាគ្មាន​អ្វី​ពឹង​ពាក់ ដូច​ជាគ្មាន​ដៃ និង​ជើងអញ្ចឹង​»។

កាល​ពី​ថ្ងៃ​ចន្ទ កសិករ​រាប់​រយ​នាក់​បាន​តវ៉ា​ប្រឆាំង​នឹង​អាជ្ញាធរ​ដែល​បាន​បង្ខំ​ពួកគេ​ឲ្យ​ទទួល​សំណង​។ កសិករ​បាន​បន្ត​ប្រមូល​ផ្ដុំ​គ្នា​នៅ​ថ្ងៃអង្គារ ទាម​ទារ​ប្រាក់សំណង​ខ្ពស់​បន្តិច ប៉ុន្តែ​ អ្នកស្រី សុភ័ណ្ណ ថាអាជ្ញាធរ​ស្រុក​នៅព្រឹក​ថ្ងៃដដែល បាន​បង្ខំ​ឲ្យ​ប្រជា​ពល​រដ្ឋ​ខ្លះ​ចុះហត្ថលេខា​ទទួល​សំណង និង​គំរាម​អ្នក​ផ្សេង​ទៀត​មិ​ន​ឲ្យ​តវ៉ា​។​

អ្នកស្រីឥន​ សូត្រ ប្រធាន​សហគមន៍កសិករ​​សាមគ្គី​ចេកមាស និង​មាន​ដី​ស្រែ​០,៧០​ហិកតា​ផង ថា​ប្រ​ជា​ពល​រដ្ឋ​ទាមទារ​សំណង​បីដុល្លារ​ក្នុង​មួយ​ម៉ែត្រ​ការ៉េ​។​

អ្នកស្រី​បន្ថែម​ថា៖ «​យើង​បានដាក់​សំណើរ​ទៅ​អាជ្ញាធរ ប៉ុន្តែ​ពួកគាត់​បាន​​បដិសេធ និង​ថា​ប្រជា​ពល​រដ្ឋ​គ្រាន់​តែ​ចង់​បាន​សំណងកាន់​តែ​ច្រើនប៉ុណ្ណោះ»។​

កសិករ​ម្នាក់​ទៀត​ឈ្មោះ ប៉ុល ស៊ី រស់នៅ​ភូមិ​ធ្នង់ បាន​ឲ្យ​ដឹង​ថា​អាជ្ញាធរ​មិន​បាន​ដោះ​ស្រាយ​បញ្ហា​ដល់​ប្រ​ជា​ពល​រដ្ឋ​នោះទេ ហើយ​បាន​គំរាម​កំហែង និង​បង្ខំ​ឲ្យ​ទទួល​សំណង​ជា​កញ្ចប់​តិច​តួច​ទៀត​។

កសិករ​ដដែល​បន្ថែម​ថា៖ «បើសិនជា​យើង​បាត់​បង់ដី វា​នឹង​ប៉ះពាល់​ធ្ងន់ធ្ងរ​ដល់​ជីវភាពគ្រួសារ…​ខ្ញុំ​រស់នៅ​ពឹង​លើ​ដី​ធ្វើស្រែ​ពីរ​ហិកតា​ចិញ្ចឹម​កូនៗ និង​រក​ប្រាក់​បាន​ខ្លះ»។​

អ្នក​ភូមិ​តវ៉ា​នៅ​លើ​ដីស្រែ​របស់​ខ្លួន​នៅ​ថ្ងៃចន្ទ។ ដី​ជម្លោះ​ស្ថិត​ក្នុង​ព្រំ​ប្រទល់​នៃ​គម្រោង​ស្ដារ​ប្រឡាយ​ឡើង​វិញ​។ រូបភាព​ផ្ដល់​ឲ្យ​
អ្នក​ភូមិ​តវ៉ា​នៅ​លើ​ដីស្រែ​របស់​ខ្លួន​នៅ​ថ្ងៃចន្ទ។ ដី​ជម្លោះ​ស្ថិត​ក្នុង​ព្រំ​ប្រទល់​នៃ​គម្រោង​ស្ដារ​ប្រឡាយ​ឡើង​វិញ​។ រូបភាព​ផ្ដល់​ឲ្យ​

អភិបាល​ស្រុក​ស្វាយជ្រុំ លោក ហែម សារិទ្ធ មិន​អាច​ទាក់​ទង​សុំ​ការ​អត្ថាធិប្បាយ​បានទេ​។ ប៉ុន្តែ​មេឃុំឈើទាល អ្នកស្រី លន់ សូនី បាន​ច្រាន​ចោល​ការអះអាង​របស់​កសិករ​ថាមាន​កម្មសិទ្ធិ​លើដី​ទាំង​នោះ ដោយ​លោក​ថា​តំបន់​នោះ​ជា​ដី​ស្រែ​តាំងពី​សម័យ​ប៉ុល ពត និង​មិន​មាន​នរណាម្នាក់​មាន​ប្លង់​នៅឡើយ​ទេ។​

អ្នកស្រី​បន្ថែមថា៖ «​គម្រោង​ប្រព័ន្ធធារាសាស្រ្ត​នេះ​ផ្ដល់​ប្រយោជន៍​ច្រើន​ដល់​កសិករ​ក្នុង​តំបន់ និង​[សូម្បី​] អ្នក​បដិសេធនោះ​ផង​ដែរ»។​

លោក គឹម សាវុធ ប្រធានមន្ទីរ​ធនធានទឹក​ខេត្តស្វាយ​រៀង បាន​លើក​ឡើង​ដូច​នឹង​មេឃុំដែរ និង​បាន​ប្រាប់​ខេមបូចា ថាអ្នក​ភូមិ​បាន​រស់​នៅ​ពឹង​អាស្រ័យ​ផល​លើ​ដី​រដ្ឋ​ជាយូរ​ឆ្នាំ​មក​ហើយ​។​

លោកមាន​ប្រសាសន៍ថា៖​«ប្រ​ជា​ពល​រដ្ឋ​ដែល​បាន​ធ្វើ​ស្រែ​លើ​ដី​នោះ​ច្រើន​ឆ្នាំ​គិត​ថា​វា​ជា​របស់​ពួកគាត់ យើង​ឥឡូវនេះ​កំពុង​ធ្វើ​ការ​ដោះស្រាយ​ដើម្បី​ប្រយោជន៍​រួម មិន​មាន​ដើម្បី​តែក្រុម​ណាមួយ​នោះទេ»។​

លោក សាវុធ ថា​អាជ្ញាធរ​គ្មាន​គម្រោង​ពង្រីក​ប្រឡាយទេ ហើយ​ថា​រដ្ឋ​ក៏​មិនមានថវិ​កា​ធ្វើ​ដូច​នោះ​ដែរ​។

លោក​បន្ថែម​ថា៖ «យើង​គ្រាន់​តែ​ស្ដារ និង​ជួសជុល​កន្លែង​ស្តុក​ទឹក យើងគ្មាន​លទ្ធភាព​ពង្រីក​វា​ទេ…រដ្ឋ​នឹង​ផ្ដល់​សំណង​ទៅ​ប្រជា​ពល​រដ្ឋ​ផ្អែក​លើ​ផល​ដំណាំ​ មិន​មែន​ដី​នោះទេ»។​

លោក​ឲ្យ​ដឹង​ដែរ​ថា អាងទឹក​កំពង់ជ្រៃ ជា​ផ្នែក​មួយ​របស់​ទន្លេ​វ៉ៃគោ ​បាន​ជួយ​ដល់​ការ​ស្រោច​ស្រប់​ដី​កសិកម្ម​រាប់ម៉ឺន​​ហិចតា​ទាំង​​នៅខេត្ត​ព្រៃវែង និង​ស្វាយ​រៀង។ អាងស្តុក​ទឹកនេះ ធ្លាប់​បាន​ស្ដារ​ឡើងវិញ​ម្ដង​ក្នុង​សម័យ​ប៉ុល ពត និង​ឥឡូវ​ត្រូវ​ជួសជុល​ឡើង​វិញ​។​

លោក ថេង សាវឿន ប្រធាន​​សមាគម​សម្ព័ន្ធ​សហគមន៍​កសិករ​កម្ពុជា មាន​ប្រសាសន៍​ថា កសិករ​តូច​តាច​ពឹង​លើ​ដី​ស្រែ​ដើម្បី​ចិញ្ចឹម​ជីវិត និង​ថា​គម្រោង​សំណង​​ត្រូវ​តែ​ឲ្យ​សម​នឹង​អាច​ដោះ​ដូរ​បាន​។​

លោកនិយាយថា៖ «ការ​អភិវឌ្ឍ​របស់​រដ្ឋាភិបាល គឺ​ដើម្បីជា​ប្រយោជន៍ និង​លើក​កម្ពស់​ជីវភាព​ប្រ​ជាពល​រដ្ឋ ប៉ុន្តែ​បើ​សិនជា​យើង​មើល​លើ​រូប​ភាព​នេះ [គម្រោង​] ដែល​បង្ខំ​ប្រជា​ពល​រដ្ឋ​ឲ្យ​បាត់​បង់​ដីស្រែ​របស់​ពួកគេ វា​នឹង​មិន​ឆ្លុះ​បញ្ចាំង​ទៅ​នឹង​គោលបំណង​នៃការ​អភិវឌ្ឍនោះទេ​»។ ដោយលោក​បន្ថែម​ថា៖ «​បើសិន​ជា​គ្រាន់តែ​ស្ដារ​ឡើង​វិញ វាមិន​គួរ​មាន​ផល​ប៉ះពាល់​ដល់​ប្រជា​ពល​រដ្ឋ​នោះទេ ហើយ​ប្រជាពល​រដ្ឋ​មាន​ឆន្ទៈ​ក្នុងការ​កាត់​ចំណែក​ដី​របស់ពួកគាត់ឲ្យ​រដ្ឋក្នុង​ការពង្រីង​គម្រោង។ ប៉ុន្តែ​អាជ្ញាធរ​ចង់​បានវា​ទាំង​អស់»។​

អ្នកស្រី ប៉ុល សេត កសិករ​ម្នាក់ទៀត​នៅ​ឃុំឈើទាល ឲ្យ​ដឹងថា​តម្លៃ​សំណង​៩០០​រៀល​ក្នុង​មួយ​ម៉ែត្រការ៉េ​នឹង​មិនអាច​ឲ្យ​ប្រជា​ពល​រដ្ឋ​យក​ទៅ​ទិញ​ដី​កន្លែង​ផ្សេង​សម្រាប់​ធ្វើ​ស្រែ​បានទេ។​

អ្នកស្រី​និយាយថា៖ «បើសិនជា​ខ្ញុំ​បាត់​បង់ដី កូនៗ​របស់​ខ្ញុំ​នឹង​មិន​មានអ្វីស៊ី​ទេ»

ប្រែសម្រួលពីអត្ថបទភាសាអង់គ្លេស៖ Svay Rieng farmers protest against irrigation project compensation

101 views
ព័ត៌មានថ្មីៗ »
អត្ថបទពេញនិយម »