សហជីពបន្តទាមទារឱ្យក្រុមហ៊ុនដឹកអ្នកដំណើរ Giant Ibis គោរពកិច្ចសន្យានាពេលកន្លងមក
កំពុងរស់នៅក្នុងផ្ទះថ្មតៀមតូចមួយជាមួយភរិយា និងកូនតូចពីរនាក់ ដែលមានចម្ងាយប្រហែលមួយគីឡូម៉ែត្រពីស្ពានក្រុងតាខ្មៅ អតីតបុគ្គលិកក្រុមហ៊ុនដឹកជញ្ជូន Giant Ibis Transport លោក ឱ ចាន់ធី ដែលមានវ័យ៤៥ឆ្នាំហើយនោះ កំពុងប្រឈមនឹងការលំបាកខ្លាំងក្នុងជីវភាពរស់នៅប្រចាំថ្ងៃ។ កាលពីឆ្នាំ២០២០ លោក ចាន់ធី ដែលជាសមាជិកសហជីពម្នាក់ក្នុងចំណោមអ្នកបើកបរ៨០នាក់ដទៃទៀត ត្រូវបានក្រុមហ៊ុនព្យួរការងារដោយមិនបានទទួលប្រាក់សំណង និងប្រាក់អតីតភាពការងារ ពេលដែលក្រុមហ៊ុនបានផ្អាកដំណើរការក្នុងអំឡុងវិបត្តិកូវីដ-១៩។ ប្រាក់បំណាច់ និងប្រាក់អតីតភាពការងារជាអ្វីដែលនិយោជិតត្រូវទទួលបានតាមច្បាប់ស្ដីពីការងារ។
