ប្រជាពលរដ្ឋរស់នៅភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង រិះគន់ក្រុមហ៊ុនមួយចំនួន ដែលធ្វើអាជីវកម្មកាយថ្មនិងរ៉ែ បង្កផលប៉ះពាល់ដល់សុខភាពប្រជាពលរដ្ឋ ដោយសារការបំផ្ទុះថ្មធ្វើឲ្យភាយចេញក្លិនខ្យល់អាក្រក់ ព្រមទាំងធ្វើឲ្យហុយ និងខូចផ្លូវនៅពេលដឹកជញ្ជូនថ្មចេញ។
ប្រជាពលរដ្ឋដែលស្នើសុំមិនបញ្ចេញឈ្មោះបានឲ្យដឹងថា ប្រជាពលរដ្ឋមានការព្រួយបារម្ភអំពីផលប៉ះពាល់ដោយសារការបំផ្ទុះថ្ម មានរំញ័រសំឡេង ហើយមានក្លិនខ្យល់អាក្រក់។
ពលរដ្ឋដដែលថាបាននិយាយថា៖ «ការដឹកជញ្ជូនថ្មចេញដែលមានរថយន្តរាប់សិបគ្រឿង បណ្ដាលឲ្យហុយ និងខូចផ្លូវ។ ខ្ញុំស្នើឲ្យអាជ្ញារធមូលដ្ឋានក៏ដូចជាថ្នាក់ខេត្តមេត្តាជួយដោះស្រាយបញ្ហានេះផង»។
ជាការឆ្លើយតបទៅនិងកង្វល់របស់ប្រជាពលរដ្ឋ លោក នៃ ពៅ មេឃុំតាគ្រាម ដែលទើបជាប់ឆ្នោតឡើងកាន់តំណែងថ្មី ដែលបានចូលរួមជាវាគ្មិន ក្នុងកម្មវិធីសន្ទនាមតិវិទ្យុជាតិកម្ពុជាចំការចេកកន្លងមកបានលើកឡើងថា លោកទទួលស្គាល់ថាកន្លងទៅផ្លូវថ្នល់នៅមូលដ្ឋានខាងលើពិតជាទទួលរងផលប៉ះពាល់ ពីឡានដឹកថ្មនិងរ៉ែនេះមែន។
លោកបន្ថែមថា៖ «វាមិនត្រឹមតែទទួលរងផ្លូវខូចបាក់ស្រុតប៉ុណ្ណោះទេ វាធ្វើឲ្យប៉ះពាល់ដល់សុខភាពប្រជាពលរដ្ឋនៅក្បែរៗនោះដោយសារតែធូលីហុយផងដែរ»។
លោកមេឃុំបន្ដថា អាជ្ញាធរឃុំ កម្លាំងប៉ុស្ដិ៍នគរបាល និងប្រជាការពារភូមិ សហការគ្នា ដាក់កម្លាំងឈរចាំមើលចំពោះរថយន្ដដឹកថ្មណាមួយដែលដឹក ហើយមិនគ្របត្រឹមត្រូវ គឺមិនអនុញាតឲ្យធ្វើដំណើរទៅមុខបន្ដទៀតឡើយ។
លោក នៃ ពៅ ជាមេឃុំតាគ្រាម បានឲ្យដឹងថា ៖«ក្រុមហ៊ុនដែលធ្វើអាជីវកម្មមានដូចជា ក្រុមហ៊ុន ហេង ឆាត ខនស្រ្តាក់សិន ក្រុមហ៊ុន តាំង ថៃឡុង ក្រុមហ៊ុន ហុង ប៊ុននី ក្រុមហ៊ុនហ្គូណៃនិងក្រុម ពេញ អាន ដែល កំពុងធ្វើអាជីវកម្មវាយកម្ទេចថ្មស្ទើរអស់ភ្នំតាគ្រាមទាំងមូលដោយគ្មានការទប់ស្កាត់ពីអាជ្ញាធរ[ថ្នាក់លើ]ឡើយ»។
សូមបញ្ជាក់ថា តំបន់ភ្នំ ក្នុងឃុំតាគ្រាមដែលក្រុមហ៊ុន កំពុងជីកគាស់កាយស្ទើរតែបាត់រូបរាងភ្នំហើយ មានដូចជា ភ្នំតាគ្រាម ភ្នំតាត្រងោល ភ្នំថ្មក្រហម ភ្នំប៉ើយស្វាយ ភ្នំអន្សែ ភ្នំប៉ើយស្វាយ និងភ្នំពពូល ជាដើម។ ភ្នំធម្មជាតិទាំងនេះ ធ្លាប់ផ្តល់ម្លប់បៃតងស្រស់ស្អាត ទាក់ទាញភ្ញៀវទេសចរ។ ប៉ុន្តែបច្ចុប្បន្នបានក្លាយជាការដ្ឋាន ជីកកកាយ និងកិនថ្ម ដែលមានឡាន គ្រឿងចក្ររាប់សិបគ្រឿង ដឹកជញ្ជូនថ្មធ្វើអាជីវកម្មស្ទើរតែរៀងរាល់ថ្ងៃ៕
