សមាគមសម្ព័ន្ធអ្នកសារព័ត៌មានកម្ពុជា

គ្រូបង្រៀននៅវិទ្យាល័យមួយកន្លែងក្នុងក្រុងភ្នំពេញផ្ទុះការតវ៉ា ពាក់ព័ន្ធនឹងការមិនដកនាយកសាលា

គ្រូបង្រៀននិងសិស្សនៅវិទ្យាល័យទួលប្រាសាទសែនសុខផ្ទុះការតវ៉ានៅមុខក្លោងទ្វារសាលាដោយសារការមិនពេញចិត្ដនឹងការសម្រេចមិនដកនាយកសាលា លោក អ៊ុំ សុកំ ខណ្ឌសែនសុខ រាជធានីភ្នំពេញ។ រូបថតនៅថ្ងៃទី២១ ខែតុលា ឆ្នាំ២០២២។ ខេមបូចា/ ឃាង សុខមាន
គ្រូបង្រៀននិងសិស្សនៅវិទ្យាល័យ​ទួលប្រាសាទសែនសុខផ្ទុះការតវ៉ានៅមុខក្លោងទ្វារសាលាដោយសារការមិនពេញចិត្ដនឹងការសម្រេចមិនដកនាយកសាលា លោក អ៊ុំ សុកំ ខណ្ឌសែនសុខ រាជធានីភ្នំពេញ។ រូបថតនៅថ្ងៃទី២១ ខែតុលា ឆ្នាំ២០២២។ ខេមបូចា/ ឃាង សុខមាន

គ្រូបង្រៀននិងសិស្សវិទ្យាល័យទួលប្រាសាទសែនសុខប្រហែល៦០នាក់ផ្ទុះការតវ៉ានៅក្លោងទ្វារ​សាលានៅព្រឹកថ្ងៃសុក្រ ក្រោយមន្ទីរអប់រំរាជធានីភ្នំពេញបានសម្រេចមិនដក​លោកនាយក​សាលា​ តាមសំណើរសុំដករបស់លោកគ្រូអ្នកគ្រូ និងសិស្សានុសិស្ស​មួយ​ចំនួន ខណៈ​ដែល​ពួក​គាត់យល់ថា ការសម្រេចនេះមិនបានផ្ដល់ភាពយុត្ដិធម៌​និង​មានភាពលម្អៀង​។

មន្ទីរអប់រំរាជធានីភ្នំពេញ នៅព្រឹកថ្ងៃទី២១ ខែតុលា ឆ្នាំ២០២២​ បានចុះទៅប្រជុំ​សម្រេច​លើ​ករណី​ស្នើសុំរបស់លោកគ្រូអ្នកគ្រូឱ្យដកលោក អ៊ុំ សុកំ ចេញពីនាយកសាលាវិទ្យាល័យ​ទួល​ប្រាសាទសែនសុខ ប៉ុន្ដែខាងមន្ទីរមិនបានសម្រេចតាមសំណើររបស់ពួកគាត់ទេ ថែមទាំង​ចោទ​​ថាពួកគាត់ចេះតែបង្កបញ្ហានៅក្នុងអង្គភាព ទើបពួកលោកគ្រូអ្នកគ្រូ​និងសិស្សានុសិស្ស​ផ្ទុះការតវ៉ាភ្លាមៗនៅមុខក្លោងទ្វារសាលាដែលនៅតាមបណ្ដោយផ្លូវហាណូយស្ថិតនៅភូមិ​សំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។

ចំណែកឯអ្នកស្រី លី ម៉េងជីង ជាគ្រូបង្រៀនម្នាក់ដែលបានចូលរួមតវ៉ាក្នុងការឱ្យប្ដូរ​នាយក​សាលា បានប្រាប់ខេមបូចាដោយផ្ទាល់ថា មុននឹងមានការតវ៉ានេះកន្លងមកពួកអ្នកស្រី​បាននាំ​គ្នាដាក់ញត្ដិទៅក្រសួងអប់រំ យុវជន និងកីឡា ក៏ដូចជាអង្គភាពប្រឆាំងអំពើពុករលួយដែរ ប៉ុន្ដែ​នៅតែគ្មានការឆ្លើយតបណាមួយ រហូតដល់ថ្ងៃទី៧ ខែតុលា ឆ្នាំ២០២២ ក៏មានខាងមន្ទីរអប់រំ​រាជធានីភ្នំពេញបានចុះមកស៊ើបអង្កេតនៅសាលា ហើយមិនបានហៅលោកគ្រូអ្នកគ្រូឱ្យ​ចូល​រួម​ទេ ​គឺមានតែខាងនាយកសាលានិងក្រុមការងារពួកគាត់និងសិស្សសាលាមួយចំនួន រហូត​មកដល់ព្រឹកថ្ងៃនេះក៏ខាងមន្ទីរអប់រំបានចុះមកប្រកាសសេចក្ដីសម្រេចដោយមិនបានដក​នាយកសាលាដែលប្រព្រឹត្ដអំពើពុករលួយចោលទេ ថែមទាំងថាពួកអ្នកស្រីចេះតែបង្កបញ្ហា​ទៅវិញ ទើបឈានដល់ពួកអ្នកស្រីផ្ទុះការតវ៉ាដូច្នេះ។

អ្នកគ្រូ ម៉េងជីង បានអះអាងថា៖ «កន្លងមកលោកនាយកសាលាបានយកកូនប្រុសគាត់​ដែលរៀន​ជំនាញអក្សរសាស្ដ្រអង់គ្លេស តែបែរជាយកមកឱ្យបង្រៀនជំនាញ​ជីវៈវិទ្យាជំនួសតែម្ដង​ដោយ​មិនមានការស្នើសុំតាមផ្នែករដ្ឋបាលនោះទេ ដោយគាត់សម្រេចតែឯង នេះហើយជាអំពើ​ពុករលួយ​ដែលពួកខ្ញុំមិនអាចទទួលយកបាន»

យ៉ាងណាក្ដីអ្នកស្រីបន្ដថា គោលបំណងនៃការតវ៉ាព្រឹកមិញនេះចង់ឱ្យថ្នាក់ដឹកនាំ​ក៍ដូច​ជា​មន្ទីរអប់រំ ក្រសួងអប់រំ ជួយស្វែងរកដំណោះស្រាយដើម្បីផ្ដល់ភាពយុត្ដិធម៌​និងភាពត្រឹមត្រូវ​ឱ្យពួកអ្នកស្រីក៏ដូចជាស្នើឱ្យដកលោក អ៊ុំ សុកំ ចេញពីនាយកវិទ្យាល័យទួលប្រាសាទ​សែនសុខ​ដើម្បីកុំឱ្យចេះតែកើតអំពើពុករលួយនៅក្នុងសាលាបន្ដទៀត។

អ្នកគ្រូរូបនេះបន្ថែមថា៖ «យើងខ្ញុំទាំងអស់គ្នាងើបតវ៉ានេះមិនមែនចង់បានអ្វីមកជាផល​ប្រយោជន៍​ផ្ទាល់ខ្លួនទេ គឺដោយសារតែមានរឿងអយុត្ដិធម៌ និងគ្មានតម្លាភាពក្នុងអង្គភាព​ដែលយើងមិនអាចទទួលយកបាននិងមានចំណុចជាច្រើនទៀត និយាយរួមរឿងទាំងអស់​គាត់មិនដែលបានប្រជុំរួមជាមួយលោកគ្រូអ្នកគ្រូទេ គាត់ប្រើពាក្យថាឆន្ទានុសិទ្ធិ​គឺថា​សម្រេច​អីតែឯង»

បើតាមគ្រូបង្រៀនម្នាក់នៅវិទ្យាល័យទួលប្រាសាទសែនសុខ លោក ហៀន សុភា បានថ្លែង​ថា មូលហេតុដែលពួកលោកនិងសិស្សផ្ទុះការតវ៉ានេះដោយសារតែខាងមន្ទីរអប់រំចុះមកស៊ើប​អង្កេតករណីនាយកសាលាលោក អ៊ុំ សុកំ ដែលបានប្រព្រឹត្ដអំពើពុករលួយ​និងបង្កបញ្ហា​ជា​ច្រើននៅក្នុងសាលាតែបែរជាខាងមន្ទីរអប់រំមិនហៅលោកគ្រូអ្នកគ្រូឱ្យចូលបំភ្លឺនិងបង្ហាញ​ភស្ដុតាងពីសកម្មភាពរបស់នាយកសាលានោះទេ ថែមទាំងមិនព្រមដក​លោកនាយកសាលា​ចេញទៀតផង។

លោក ហៀន បន្ដថា៖ «លោកគ្រូអ្នកគ្រូកំពុងតវ៉ាទាមទាររកដំណោះស្រាយពីខាងមន្ទីរអប់រំ ដោយសារមន្ទីរអប់រំគេចុះមកដោះស្រាយវិវាទគឺមានភាពលម្អៀងទៅរកក្រុមគណៈនាយក​ដោយមិនអនុញ្ញាតឱ្យលោកគ្រូអ្នកគ្រូបង្ហាញនូវភស្តុតាងឬក៏អ្វីផ្សេងៗ ទើបពួកខ្ញុំតវ៉ានៅ​មុខ​ក្លោងទ្វារតែម្ដង»

ជុំវិញរឿងនេះពេលដែលអ្នកសារព័ត៌មានខេមបូចាចុះទៅដល់ទីតាំងតវ៉ា បានសង្កេតឃើញថា​ក៏មានខាងអាជ្ញាធរនិងខាងមន្ដ្រីអប់រំខណ្ឌសែនសុខចុះមកអន្ដរាគមន៍និងបានស្នើឱ្យលោកគ្រូអ្នកគ្រូបំបែកគ្នានិងស្នើឱ្យបញ្ឈប់សកម្មភាពតវ៉ានៅមុខក្លោងទ្វារសាលាវិទ្យាល័យទួល​ប្រាសាទសែនសុខផងដែរ តែទោះបីជាមានការស្នើសុំ​ក៏លោកគ្រូអ្នកគ្រូ​និងសិស្សានុសិស្ស​នៅតែបន្ដសកម្មភាពតវ៉ាដដែល។

គ្រូបង្រៀននិងសិស្សនៅវិទ្យាល័យទួលប្រាសាទសែនសុខផ្ទុះការតវ៉ានៅមុខក្លោងទ្វារសាលាដោយសារការមិនពេញចិត្ដនឹងការសម្រេចមិនដកនាយកសាលា លោក អ៊ុំ សុកំ ខណ្ឌសែនសុខ រាជធានីភ្នំពេញ។ រូបថតនៅថ្ងៃទី២១ ខែតុលា ឆ្នាំ២០២២។ ខេមបូចា/ ឃាង សុខមាន

ចំណែកឯលោក គឹម ចិន្ដា ប្រធានការិយាល័យផ្នែកអប់រំនិងស៊ីវិលនៃខណ្ឌសែនសុខ មិនអាច​ផ្ដល់បទសម្ភាសន៍ឱ្យខេមបូចាបានទេ ដោយលោកថា លោកកំពុងសម្របសម្រួល​ករណីនេះ​ជាមួយកូនចៅលោកសិន ទើបលោកអាចឆ្លើយបាន។

លោក ចិន្ដា បន្ដថា៖ «ខ្ញុំមិនអាចឆ្លើយបានទេ សុទ្ធតែកូនចៅខ្ញុំទេ ខ្ញុំសុំសម្របសម្រួល​នឹងពួកគាត់សិន សុំទោសផងប្អូន»

កាលពីថ្ងៃទី៧ខែតុលាឆ្នាំ២០២២មន្ទីរអប់រំរាជធានីភ្នំពេញបានចុះទៅបើកការស៊ើបអង្កេតលើករណីភាពមិនប្រក្រតីរបស់លោក អ៊ុំ សុកំ ដឹកនាំដោយលោក​ ហែម ស៊ីណារ៉េត ប្រធានមន្ទីរ​អប់រំរាជធានីភ្នំពេញ ប៉ុន្ដែការចុះស៊ើបអង្កេតនេះគ្រាន់ចុះប្រមូលភស្ដុតាង​និងប្រមូលព័ត៌មាន​ផ្សេងៗ​ពីក្រុមនាយកសាលានិងមានការចូលរួមពីសិស្សសាលាមួយចំនួនប៉ុណ្ណោះ ប៉ុន្ដែមិន​មាន​ការ​សម្រេចបែបណានោះទេ។

ជុំវិញរឿងផ្ទុះការតវ៉ានេះដែរ លោក ហែម ស៊ីណារ៉េត ប្រធានមន្ទីរអប់រំរាជធានីភ្នំពេញ បានលើក​ឡើងថា លោកបានដឹងរឿងរបស់លោកគ្រូអ្នកគ្រូតវ៉ាហ្នឹងហើយ ហើយលោកក៏​កំពុងរាយការណ៍បញ្ហាទាំងអស់នេះទៅថ្នាក់លើ ដូច្នេះលោកមិនទាន់អាចឆ្លើយបានទេ ក្នុងពេលនេះ។

លោកបន្ដថា៖ «រឿងហ្នឹងខ្ញុំដឹងហើយ ហើយខ្ញុំកំពុងរាយការណ៍ទៅថ្នាក់លើសិន ខ្ញុំរាយការណ៍ សុំអធ្យាស្រ័យផង»

ខេមបូចាមិនអាចសុំការបំភ្លឺពីលោក អ៊ុំ សុកំ នាយកសាលាវិទ្យាល័យទួលប្រាសាទសែនសុខ​បានទេ ប៉ុន្ដែលោកធ្លាប់បានប្រាប់ខេមបូចាថា លោកសុំច្រានចោលការចោទប្រកាន់ទាំងស្រុង​លើរូបលោកថា​ លោកមិនបានប្រព្រឹត្ដដូចអ្វីដែលលោកគ្រូអ្នកគ្រូបានលើកឡើងនោះទេ។ លោក​ថា បញ្ហារបស់លោកគឺខាងមន្ទីរអប់រំនិងអង្គភាពប្រឆាំងអំពើពុករលួយ​កំពុងតែដោះ​ស្រាយ​ហើយដូច្នេះការសម្រេចបែបណាគឺខាងមន្ទីរក៏ដូចជាACUនឹងដោះស្រាយ។

លោក សុកំ បានបញ្ជាក់ថា៖ «ខ្ញុំសុំបដិសេធទាំងស្រុងពីព្រោះរឿងនេះខ្ញុំកំពុងស្ថិតនៅក្នុងការ​ស៊ើបអង្កេត​របស់អង្គភាពប្រឆាំងអំពើពុករលួយនៅឡើយ»

បើតាមលោក ប៉ា ចាន់រឿន នាយកប្រតិបត្ដិនៃវិទ្យាស្ថានប្រជាធិបតេយ្យកម្ពុជា បានមាន​ប្រសាសន៍ថា ការតវ៉ានេះជាការសម្ដែងឱ្យឃើញនូវការកើតទុក្ខ​មិនសុខចិត្ត​របស់​គ្រូបង្រៀន​មួយចំនួន ដូច្នេះហើយក្រសួងអប់រំនិងអាជ្ញាធរពាក់ព័ន្ធគួរតែពិនិត្យ​មើលការលើកឡើងនៃ​ការទាមទារ​ដោយបង្កើតគណៈកម្មការត្រួតពិនិត្យវាយតម្លៃ​និងដោះស្រាយមួយដែលមាន​ភាពឯករាជ្យដើម្បីធានាថានឹងស្វែងរកការពិតថាតើវាមានបាតុភាពដូចអ្វីដែលគ្រូបង្រៀនលើកឡើងដែរឬទេ?។

លោកបានថ្លែងថា៖ «បើសិនជារកឃើញថាវាមានអំពើពុករលួយនិងគ្រួសារនិយមចឹងមែន ច្បាប់យើងមានតើ ច្បាប់ក្នុងការគ្រប់គ្រងមន្ដ្រីសាធារណៈយើងហ្នឹង គឺថាមន្ដ្រីដែលធ្វើបានល្អ​គួរតែលើកទឹកចិត្ដ ចំណែកមន្ដ្រីដែលប្រព្រឹត្ដអំពើពុករលួយគួរតែដាក់ពិន័យតាមច្បាប់ចែង»

កាលពីថ្ងៃទី១២ ខែកញ្ញា ឆ្នាំ២០២២ កន្លងមក គ្រូបង្រៀននិង​សិស្ស​វិទ្យាល័យ​ទួលប្រាសាទ​សែនសុខ ស្ថិតនៅភូមិសំរោង សង្កាត់ឃ្មួញ ខណ្ឌសែនសុខ រាជធានី​ភ្នំពេញ បាននាំគ្នាដាក់​ញត្ដិ​ទៅក្រសួងអប់រំយុវជន និងកីឡា ដើម្បីឱ្យក្រសួង​ដកនាយកសាលា​ឈ្មោះ អ៊ុំ សុកំ ចេញ ក្រោយពីនាយកសាលាត្រូវបានលោកគ្រូអ្នកគ្រូរកឃើញថា នាយកសាលាបាន​ប្រព្រឹត្ដ​អំពើ​ពុករលួយ​និងភាពមិនប្រក្រតី​ជាច្រើន។

នៅក្នុងលិខិតមួយដែល ខេមបូចា ទទួលបានបញ្ជាក់ថា លោកគ្រូអ្នកគ្រូនិងសិស្ស​នៃ​វិទ្យាល័យ​ទួលប្រាសាទសែនសុខបានដាក់ទៅរដ្ឋមន្ដ្រីក្រសួងអប់រំ លោក ហង់ ជូនណារ៉ុន ដើម្បីស្នើឱ្យក្រសួងផ្លាស់ប្ដូរនាយកសាលាចេញដោយសារនាយករូបនេះបានប្រព្រឹត្តអំពើ​ពុករលួយជាច្រើន។

កាលពីថ្ងៃទី២៤ ខែសីហា ឆ្នាំ២០២២កន្លងមក លោក អ៊ុំ សុកំ ក៏ត្រូវបានអង្គភាពប្រឆាំង​អំពើ​ពុករលួយធ្លាប់បានអញ្ជើញសាកសួរអំពីភាពមិនប្រក្រតី​មួយចំនួនតាមពាក្យបណ្តឹងចោទ​ប្រកាន់​របស់លោកគ្រូអ្នកគ្រូនិងសិស្សានុសិស្សនៃវិទ្យាល័យទួលប្រាសាទសែនសុខ​បានដាក់​កាលពីថ្ងៃទី២៩ ខែមេសា ឆ្នាំ២០២២ ប៉ុន្ដែនៅមិនទាន់បានសម្រេចជាផ្លូវការ​ណាមួយ​ទើបពួក​គាត់បន្ដប្ដឹងទៅរដ្ឋមន្ដ្រីក្រសួងអប់រំបន្ថែមទៀត៕

596 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម