គ្រូបង្រៀនបារម្ភពីផលលំបាកធ្ងន់ធ្ងរករណីសិស្សលេងទូរសព្ទមិនរៀនសូត្រ

គ្រូបង្រៀននៅតាមសាលាចំណេះដឹងទូទៅមួយចំនួនលើកឡើងពីក្តីបារម្ភ ករណីសិស្សវក់នឹង​ការប្រើប្រាស់ទូរសព្ទ ដោយលេងហ្គេម និងមើលរឿងអាសអាភាស មិនយកចិត្តទុក​ដាក់លើ​ការ​សិក្សាហើយឈានដល់ការប្រព្រឹត្តបទល្មើសផ្សេង​ៗ។​

គ្រូបង្រៀននៅវិទ្យាល័យរស្មីសោភ័ណ ស្រុកស្ទោង ខេត្តកំពង់ធំ លោក ច័ន្ទ រដ្ឋា សង្កេត​ឃើញ​ថា សិស្សមានទូរសព្ទភាគច្រើនមិនបានប្រើក្នុងគោលដៅសិក្សាទេ​គឺប្រើដើម្បីកម្សាន្ត​សប្បាយ​។ លោកបន្តថា ការកម្សាន្តសប្បាយដែលប៉ះពាល់ធ្ងន់ធ្ងរនោះ​គឺមើលរឿងដែល​មាន​ពាក្យសម្តី និងកាយវិការមិនសមរម្យ ហើយក៏ឈានដល់មើលរូបភាពអាសអាភាសពីទូរសព្ទទៀតផង។​

លោក ច័ន្ទ រដ្ឋា៖ «ដូចអត់មានវិជ្ជមាន ដូចជារឿងអាសអាភាស ដូចជារឿងកំប្លែង​វា​ហួស​ពេក ។ មើលយូធូប មើលទីតុក វាអត់ស្រាវជ្រាវ។ វាយកទៅជាការកម្សាន្តសប្បាយជាធំ។ ចឹង​ទៅ​វា​គេចសាលា វាមិនត្រឹមតែគេចសាលាទេថែមទាំងប៉ះពាល់ដល់សុខភាពទៀតផង»។​

គ្រូបង្រៀននៅវិទ្យាល័យមួយនៅខេត្តកំពង់ចាម លោក ជា ធារ៉ា លើកឡើងថា កាលពី​ប្រមាណ​១០ឆ្នាំមុនសិស្សតិចតួចបំផុតដែលមានទូរសព្ទប្រើ ហើយទូរសព្ទនោះ​ទៀតសោត​មិនមែនជាទូរសព្ទទំនើបអាចមើលវីដេអូបានទេ។ លោកថា ពេលនោះសិស្សហាក់​មាន​អារម្មណ៍​នឹងនរក្នុងការរៀនសូត្រ។​

ប៉ុន្តែលោក ច័ន្ទ រដ្ឋា សង្កេតឃើញថា រយៈពេលប្រមាណ៥ឆ្នាំចុងក្រោយនេះ សិស្សរៀន​ចន្លោះ​​​ពីថ្នាក់ទី៧ដល់ថ្នាក់ទី១២ មានទូរសព្ទទំនើបប្រើស្ទើរគ្រប់គ្នា។​ លោកថា សិស្ស​ប្រើ​ដោយបើកទូលាយទាំងនៅផ្ទះ និងនៅសាលារៀន។ លោក ច័ន្ទ រដ្ឋា បញ្ជាក់ថា សិស្ស​ដែល​ភ្ជាប់បណ្តាញទំនាក់ទំនងសង្គមជាមួយលោកគឺភាគច្រើនពួកគេមិនបានចែករំលែកមេរៀនទេ គឺចែករំលែកតែរឿងអត់មានប្រយោជន៍ ឬប្រភេទរឿងអាសអាភាស។​

លោក រដ្ឋា បន្ថែមថា៖ «នៅពេលដែលគាត់អេដមក ខ្ញុំចូលទៅមើលប្រូហ្វាល់របស់គាត់ អត់​មានការស៊ែ ការចែករំលែក ឬការផុសណាដែលទាក់ទងការរៀនសូត្រទេគឺគាត់ផុសតែ​រូប​ណា​ដែលបណ្តាញសង្គមផ្សេងទៀតគេផុសមកដូចជា រឿងកំប្លែង រឿងបែបអាសអាភាស ឬ រឿងជេរ​បញ្ចោរជាដើម»។​

គ្រូបង្រៀននៅវិទ្យាល័យហ៊ុនសែនវត្តភ្នំ លោក ឡុង រឹម លើកឡើងថា រូបលោកផ្ទាល់ក៏ដូចជា​គ្រូ​ផ្សេងទៀតគឺជួបការលំបាកនៅពេលដែលសិស្សនៅក្នុងម៉ោងរៀនចុចទូរសព្ទ ហើយមិន​យក​​ចិត្ត​​ទុកដាក់លើការសិក្សា។​

លោក ឡុង រឹម លើកឡើងថា៖ «ពេលបង្រៀនពេលអីហ្នឹង កូនសិស្សខ្លះក៏ឆ្លៀតចុច ឆ្លៀត​មើល​ទូរសព្ទ។ នៅ​ម៉ោងចេញលេង សិស្សដែលមានទូរសព្ទសង្វាតតែមើលទូរសព្ទ មើលអី​ក្រៅពីការសិក្សា អាហ្នឹង​ហើយជាផលអវិជ្ជមាននោះ»។

ប្រធានសមាគមគ្រូបង្រៀនប្រចាំខេត្តតាកែវ លោកគ្រូ នី ចន្ទតារាវុធ សង្កេតឃើញថា សិស្ស​នៅកម្រិតបឋមក៏រងគ្រោះពីការប្រើទូរសព្ទដូចគ្នាគឺកាលពីតូចមុនចូលរៀន ឪពុកម្តាយ​ឱ្យ​មើល​​ទូរសព្ទដើម្បីមានពេលធ្វើការងារ ហើយនៅពេលចូលរៀននៅតែបន្តមើល​ទោះរបស់​ខ្លួន​ឯង​ឬរបស់អ្នកដទៃ។​ លោកបារម្ភថា សិស្សដែលរៀនដល់ថ្នាក់ទី៦ហើយនៅមិនចេះអានអក្សរ និងមិនចេះសរសេរឈ្មោះខ្លួនឯង។​

លោក ចន្ទតារាវុធ ឱ្យដឹងថា៖ «សិស្សនៅបឋមសិក្សាជាទូទៅ ខ្ញុំក្រឡេកមើលទៅរហូតដល់​ថ្នាក់ទី៦​ពួកគាត់មួយចំនួនអត់ទាន់ចេះសរសេរឈ្មោះខ្លួនឯង អត់ទាន់ចេះអានចេះអានអក្សរ អត់ស្រៈព្យញ្ជនៈទាំងអំបាលម៉ានគឺគាត់អត់ចេះតែម្តង»។

អ្នកគ្រូ រស់ ម៉ាល័យ ជាគ្រូបង្រៀនចូលនិវត្តន៍រស់នៅក្នុងរាជធានីភ្នំពេញ ហើយកំពុងបង្រៀន​នៅតាមសាលឯកជន ក៏មើលឃើញថា បច្ចុប្បន្នសិស្សកំពុងប្រឈមមុខប៉ះពាល់ខ្លាំង​លើការ​ប្រើប្រាស់ទូរសព្ទ។

លោកគ្រូ និងអ្នកគ្រូដែលខេមបូចា បានសម្ភាសសុទ្ធតែយល់ឃើញថា ទូរសព្ទមានទាំងគុណ​សម្បត្តិ និងគុណវិបត្តិ ប៉ុន្តែក្នុងស្ថានភាពបច្ចុប្បន្នដោយសារមិនមានការវិន័យ ឬ ការរឹតបន្តឹង​ការប្រើប្រាស់ធ្វើឱ្យសិស្សានុសិស្សភាគច្រើនកំពុងប្រើប្រាស់ក្នុងផ្លូវខុសបំផ្លាញខ្លួនឯង។​

ម្ចាស់សាលាឯកជនអន្តរទ្វីប អាមេរិកកាំងលោក គួច ម៉េចលី លើកឡើងថា នៅតាមបណ្តាល​ប្រទេស​រីកចម្រើនគេឱ្យសិស្សតាំងពីកម្រិតបឋមប្រើប្រាស់ទូរសព្ទ អាយផេត ឬកុំព្យូទ័រ តែប្រើ​ក្នុងកម្រិតតិចបំផុតក្រោម១ម៉ោង។ លោក​ បន្តថា ការប្រើប្រាសនោះ គឺផ្តោតតែលើកម្មវិធីអប់រំ​តែបណ្ណោះ។​

លោក គួច ម៉េងលី បន្តថា សិស្សនៅក្នុងសង្គមខ្មែរប្រើប្រាស់ទូរសព្ទដោយគ្មានការគ្រប់គ្រង គឺប្រើបានជាប្រយោជន៍ក្រោម១០ភាគរយ ជាហេតុនាំឱ្យមានផលប៉ះពាល់ច្រើន។​

លោក គួច ម៉េងលី ថ្លែងថា៖ «ប្រទេសយើងមានការចែកចាយច្រើន Company Provider។ ប្រើ​ប្រាស់​តាមស្ថាប័នអប់រំដោយអត់មានការ Filter។ យើងអត់ទាន់មានអ្នកយល់ដឹង​ខ្លាំង​ពីប្រព័ន្ធ​បច្ចេកវិទ្យា។ ច្បាប់យើងធូររលុងលើរការចែកចាយរឿងរ៉ាវមិនគប្បី រឿងព្រាននារី​ព្រានបុរស​វ័យក្មេង​លើអនឡាញ»។​

លោក គួច ម៉េងលី ឱ្យដឹងថា នៅក្នុងសាលារបស់លោកក្នុងបន្ទប់មានវិន័យតឹងរឹង​មិនឱ្យប្រើ​ទូរសព្ទ។ លោកបន្តថា នៅក្នុងបរិវេណសាលា គឺខាងបច្ចេកទេបិទអ៊ីនធើណេត មិនឱ្យស្វែង​រកឃើញ រូបភាពអាសអាភាស ហ្គេម ឬរឿងទាក់ទងអំពើហិង្សានោះទេ។​

ជុំវិញបញ្ហានេះអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មិនអត្ថាធិប្បាយ​ច្រើនទេ គ្រាន់តែបញ្ជាក់ថា ក្រសួងមិនបានចេញគោលការណ៍ប្រើប្រាស់បច្ចេកវិទ្យា​ក្នុងការ​អប់រំ​នោះទេ ប៉ុន្តែក្រសួងក៏មានគណៈកម្មាធិការដើម្បីឃ្លាំមើលបញ្ហាទាំងនេះដែរ។​

លោក រស់ សុវាចា មានប្រសាសន៍ថា៖ «គណៈគ្រប់គ្រងគ្រឹះស្ថានសិក្សាត្រូវដោះស្រាយ​ករណី​​បាតុភាពផ្សេងៗនៅតាមគ្រឹះស្ថានសិក្សា ដោយចាត់វិធានការរដ្ឋបាល​តាមទិដ្ឋភាព​ជាក់​ស្តែង។ បើចាំបាច់ គណៈគ្រប់គ្រងគ្រឹះស្ថានសិក្សា អាចសហការជាមួយមន្ទីរអប់រំ យុវជន និង​កីឡាទាំង២៥ខេត្ត រាជធានី ដែលជាសេនាធិការតាមឋានានុក្រមនៃក្រសួងអប់រំ យុវជន និង​កីឡា»។​

របាយការណ៍របស់ Data Reportal បង្ហាញនៅត្រឹមខែកុម្ភៈឆ្នាំ២០២៣ ចំនួនអ្នកប្រើប្រាស់​អ៊ីនធើណេត​បានគឺមានជាង១១លាននៃចំនួនប្រើប្រាស់។ ចំណែកតាមសាលារៀនរដ្ឋ ឬនៅតាមផ្ទះឯកជន មិនសូវមានការរឹតបន្តឹង ឬ មានគោលការណ៍ច្បាស់លាស់​ពីការប្រើ​ប្រាស់​អ៊ីនធើណេតនេះទេ៕