សមាគមសម្ព័ន្ធអ្នកសារព័ត៌មានកម្ពុជា

នគរបាលកំពុងស្រាវជ្រាវរកមេក្លោងដែលជួញដូរយុវតីម្នាក់ក្រោមរូបភាព​រៀបការទៅចិន

បុរសម្នាក់កំពុងមើលវីដេអូដែលបង្ហោះដោយក្មេងស្រីម្នាក់នៅលើបណ្ដាញសង្គម ដោយនាងអំពាវនាវសុំជំនួយ កាលពីថ្ងៃទី១១ ខែមីនា ឆ្នាំ២០២៤ ។ (ខេមបូចា/ ព្រីង សំរាំង)
បុរសម្នាក់កំពុងមើលវីដេអូដែលបង្ហោះដោយក្មេងស្រីម្នាក់នៅលើបណ្ដាញសង្គម ដោយនាងអំពាវនាវសុំជំនួយ កាលពីថ្ងៃទី១១ ខែមីនា ឆ្នាំ២០២៤ ។ (ខេមបូចា/ ព្រីង សំរាំង)

នគរបាលក្រសួងមហាផ្ទៃកំពុងស្រាវជ្រាវរក​មេក្លោង​ក្នុងករណីជួញដូរមនុស្ស បន្ទាប់ពី​​សង្គ្រោះ​ក្មេងស្រីអាយុ១៦ឆ្នាំមួយរូបដែលត្រូវបាន​ជួញដូរក្រោមរូបភាពរៀបការទៅ​ប្រទេស​ចិន។

យុវតីជនរងគ្រោះ​មកពីខេត្តត្បូងឃ្មុំបានចែករំលែក​ពីរឿងរ៉ាវអកុសលរបស់នាងនៅក្នុង​វីដេអូ​មួយ​​ដែលមានរយៈពេល ១នាទី និងដែលបានបង្ហោះនៅលើ​បណ្ដាញសង្គម​ហ្វេសប៊ុក និងចែករំលែក​បន្ត​ដោយ​គណនីហ្វេសប៊ុក ឈ្មោះ នាង ធីតា ដោយក្នុង​វីដេអូ​នោះ នាងបាននិយាយថា នាងត្រូវបានមេខ្យល់​ឆបោក​និង​លក់​មកកាន់​ប្រទេស​ចិន ។

នាងបាននិយាយថា៖ «គេថាយកខ្ញុំមកធ្វើការ ប៉ុន្តែឥឡូវ គេយក​ខ្ញុំ​មក​​លក់​ គេ​ចាប់ខ្ញុំ​​ឃុំ​នៅតែ​ក្នុងបន្ទប់៥-៦ខែហើយ គេ​អត់​ដែល​ឱ្យខ្ញុំចេញទៅក្រៅទេ ។ គេ​ចាក់សោ​ពីខាង​ក្រៅ​ទៀត»

ដោយ​អំពាវនាវ​សុំ​ឱ្យ​នាយករដ្ឋមន្ត្រី ហ៊ុន ម៉ាណែត និងអាជ្ញាធរ​ពាក់ព័ន្ធ​ជួយ​អន្តរាគមន៍ ភីផា បាន​និយាយថា មេខ្យល់ដែលនាំនាងមកប្រទេសចិន​បានគំរាមនាង​«មិនឱ្យរត់ ឬធ្វើអ្វីទេ»

នាងបានបន្ថែមថា៖ «មេខ្យល់តែងតែតេមកគំរាម កុំឱ្យខ្ញុំ​គិតធ្វើអ្វី​ផ្ដេសផ្ដាស ឬគិតចង់​រត់ […]។ ប៉ុន្តែ ខ្ញុំ​ថត​វីដេអូ​ហ្នឹង ខ្ញុំ​ភ័យខ្លាចមែន​ទែន ។ ខ្ញុំខ្លាច​ផុសវីដេអូ​នេះ​ទៅ គេ​ឃើញ គេមកធ្វើបាបខ្ញុំទៀត»

រដ្ឋបាលខេត្តត្បូងឃ្មុំបានចេញសេចក្ដីថ្លែងការណ៍មួយកាលពីថ្ងៃអាទិត្យ បន្ទាប់ពី​ទទួល​បាន​ព័ត៌មានអំពីករណីនេះ ។ មន្ត្រីនគរបាលបាន​ស៊ើបអង្កេត​ និងបាន​ជួប​បងស្រី​របស់​យុវតី​​ដើម្បី​បញ្ជាក់អត្តសញ្ញាណរបស់​នាង ។ ភីផា ត្រូវបានគេនិយាយថា បានចាក​ចេញ​​​ពី​ស្រុក​កំណើត​ទៅធ្វើការជាកម្មកររោងចក្រកាត់ដេរ និងផ្ញើប្រាក់​ទៅឱ្យ​ក្រុម​គ្រួសារ​​​​រៀងរាល់ខែ ប៉ុន្តែក្រោយមក៥ ឬ៦ខែ ក៏លែងមាន​ទំនាក់ទំនង​ពីនាង។

អ្នកនាំពាក្យក្រសួងមហាផ្ទៃ លោក ទូច សុខៈ បានបញ្ជាក់ថា ក្មេងស្រីអាយុ១៦ឆ្នាំ​នេះ​ត្រូវ​បាន​​សង្គ្រោះពី​អគារ​កម្ពស់​៧ជាន់​នៅក្នុង​ខេត្ត​ជើជាំង កាលពីថ្ងៃអាទិត្យ នៅក្នុង​ប្រតិបត្តិការរួមគ្នា​មួយ​ជាមួយ​អាជ្ញាធរចិន។ បច្ចុប្បន្ន រូបនាងកំពុងស្នាក់នៅឯ​ការិយាល័យ​សន្តិសុខ​សាធារណៈ​ នៅមុនពេល​បញ្ជូនត្រឡប់មកកម្ពុជាវិញ ។

បច្ចុប្បន្ន អាជ្ញាធរចិនកំពុងធ្វើការជាមួយ​ស្ថានទូត​កម្ពុជា​ប្រចាំនៅប្រទេស​ចិនដើម្បី​បើក​ការ​ស៊ើបអង្កេត​បន្ថែមទៀត និងរៀបចំ​ឱ្យនាង​វិលត្រឡប់មកផ្ទះវិញ ។​

លោក សុខៈ បាននិយាយថា៖ «យោងតាមការបញ្ជាក់របស់ប្អូនស្រីនោះ វាជាបញ្ហា​ជួញដូរមនុស្ស ពីព្រោះមានមេខ្យល់​នាំប្អូន​ទៅធ្វើការនៅប្រទេសចិន ប៉ុន្តែតាមពិត លក់នាង​ឱ្យរៀបការជាមួយ​បុរសជនជាតិចិនធ្វើជាប្រពន្ធគេជាដើម»។

លោក អំ សំអាត នាយក​ចាត់ការទូទៅរបស់​អង្គការ​សិទ្ធិមនុស្ស លីកាដូ បាន​សម្ដែង​ការ​ព្រួយបារម្ភ​ថា អំពើជួញដូរមនុស្ស​បាន​លេច​ចេញជារូបភាពថ្មីមួយទៀត ដោយ​គេ​ថា​​​នាំ​មនុស្ស​ទៅ​ធ្វើទេសចរណ៍ ឬទៅធ្វើការ ប៉ុន្តែ បង្ខំ​ឱ្យ​រៀបការជាមួយជនបរទេស​ ឬបុរសជនជាតិចិន។  ការបន្តកើតឡើង​នូវអំពីជួញដូរមនុស្ស គឺជាការគួរឱ្យបារម្ភ ជាពិសេសការជួញដូរ​រៀបការ​​ទៅចិន ។

លោក សំអាត បាន​ថ្លែងថា៖ «យើងកត់សម្គាល់ឃើញថា នៅមានចន្លោះខ្វះខាត​នៅ​ក្នុង​​​ការអនុវត្ត​ច្បាប់ ទាក់ទង​មេខ្យល់មួយចំនួនដែល​ធ្វើការជួញដូរមនុស្ស​ហ្នឹងមិនត្រូវ​បាន​ចាប់ខ្លួននៅក្រៅប្រទេស ផ្ទុយទៅវិញ​ វាជារឿងមួយធ្វើឱ្យស្ត្រីនិងកុមារ​ត្រូវរង​គ្រោះ​រឿងមេខ្យល់ឆបោកហ្នឹង»

លោកបានគូសបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ របាយការណ៍​រដ្ឋាភិបាល​​សហរដ្ឋអាមេរិក​បាន​បន្ទាបចំណាត់ថ្នាក់​របស់​ប្រទេសកម្ពុជា មកនៅត្រឹម​លេខ៣ នៅក្នុង​«បញ្ជី​ខ្មៅនៃករណីជួញដូរមនុស្ស»។ ចំណាត់ថ្នាក់នេះ​បាន​បង្ក​ផល​ប៉ះពាល់​ដល់ប្រទេសកម្ពុជា ក្នុងន័យ​ពាក់ព័ន្ធនឹងការវិនិយោគ ទេសចរណ៍ និង​បញ្ហា​ផ្សេងទៀត ដែលពាក់ព័ន្ធនឹងការអភិវឌ្ឍ។

កាលពីឆ្នាំ២០២៣ របាយការណ៍របស់ក្រសួងមហាផ្ទៃ​កម្ពុជា​បាន​បង្ហាញថា ករណី​ជួញ​ដូរ​មនុស្ស១៥៧ករណីត្រូវបានបង្ក្រាប ក្នុងនោះចាប់ខ្លួនជនល្មើសបាន១៨៥នាក់ ដោយ​៣៧នាក់ជាស្ត្រី និង១១នាក់​ជាជនបរទេស។ អាជ្ញាធរក៏បានជួយសង្គ្រោះ​ជនរង​គ្រោះ​បាន ៤៩៥​នាក់ ក្នុងនោះ ១៣១នាក់ជាប់ពាក់ព័ន្ធនឹង​ការជួញដូរផ្លូវភេទ។ លើស​ពី​នេះ ១៥១នាក់ត្រូវបានចាប់ខ្លួន ក្នុងនោះ មានស្ត្រី២៧នាក់ និងជនបរទេស៤នាក់។

ចំពោះករណីជួញដូរមនុស្ស២៦ករណីត្រូវបាន​បង្ក្រាប ក្នុងនោះមនុស្ស ៣៤នាក់ត្រូវ​បាន​​ចាប់ខ្លួន ក្នុងនោះ ១០នាក់ជាស្ត្រី និង៧នាក់ជា​ជនបរទេស ហើយ​ជនរងគ្រោះ ២២១​នាក់ បានត្រូវ​ដោះលែង។ ជនរងគ្រោះប្រមាណ១៨២នាក់ ត្រូវបានបញ្ជូន​ទៅ​ក្រសួង​សង្គមកិច្ច​ និង​៣១៣នាក់ ត្រូវបានបញ្ជូន​ទៅឱ្យអាណាព្យាបាលរបស់ពួកគេវិញ ៕

(រាយការណ៍បន្ថែមដោយ លី រួស្សឡាន)

ប្រែសម្រួលពីអត្ថបទភាសាអង់គ្លេស៖ Teenager Rescued After Trafficked To China For Marriage, Police Search For Ringleader

348 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម