យោធាថៃបានសម្រេចចិត្តបិទច្រកព្រំដែន កម្ពុជា-ថៃ ទាំងអស់ ជាឯកតោភាគី នៅយប់ថ្ងៃទី ២៣ ខែមិថុនា ឆ្នាំ២០២៥ បន្ទាប់ពីភាពតានតឹងនៃជម្លោះព្រំដែន និងទំនាក់ទំនងរវាងប្រទេសទាំងពីរ បានអូសបន្លាយអស់រយៈពេលជិតមួយខែ ។
ការសម្រេចបិទទាំងស្រុងនូវច្រកតាមបណ្ដោយព្រំដែនកម្ពុជា-ថៃ ដែលមានប្រវែង ៨១៧គីឡូម៉ែត្រ ពីសំណាក់ភាគីថៃ គឺមិនយូរប៉ុន្មានក្រោយពេលដែល នាយករដ្ឋមន្ត្រីកម្ពុជា លោក ហ៊ុន ម៉ាណែត បានប្រកាសនៅព្រឹកថ្ងៃទី២៣ ខែមិថុនា ឆ្នាំ២០២៥ ថានឹងបញ្ឈប់ការនាំចូលប្រេង និងឧស្ម័ន ពីប្រទេសថៃ ដោយកំណត់ឱសានវាទត្រឹមម៉ោង ១២ រំលងអាធ្រាត្រ ។
ទោះបីជាយោធាថៃបានសម្រេចបិទច្រកព្រំដែនទាំងអស់ជាមួយកម្ពុជាក៏ដោយ ក៏ភាគីទាំងពីរចបានរចាគ្នា និងអនុញ្ញាតឱ្យពលរដ្ឋរៀងៗខ្លួនត្រឡប់ចូលប្រទេសវិញ ។
ក្រៅពីការបញ្ឈប់ការនាំចូលប្រេង និងឧស្ម័ន រដ្ឋាភិបាលកម្ពុជាក៏បានបិទច្រកព្រំដែនជាំ និងជប់គគីរជាស្ថាពរ នៅថ្ងៃទី២៣ ខែមិថុនា ឆ្នាំ២០២៥ ដែរ ។
លោក ហ៊ុន ម៉ាណែត ថ្លែងថា កម្ពុជាមិនអាចជាភាគីដែលត្រូវបើកច្រកព្រំដែនឡើងវិញមុនឡើយ ព្រោះការបិទផ្ដើមចេញដោយភាគីថៃតែម្នាក់ឯង ។
ទោះយ៉ាងណាក្ដី នាយករដ្ឋមន្ត្រី ហ៊ុន ម៉ាណែត អំពាវនាវកុំឱ្យមានការរើសអើង ឬប្រកាន់ពូជសាសន៍រវាងប្រជាជាតិទាំងពីរ ។
ប្រជាពលរដ្ឋខ្មែរនៅរាជធានីភ្នំពេញខ្លះប្រាប់ ខេមបូចា ថា ការបិទច្រកព្រំដែនកម្ពុជា-ថៃ មិនបានបង្កផលប៉ះពាល់អ្វីដល់ពួកគាត់ទេ ប៉ុន្តែអ្នកខ្លះថា ការប្រកបរបរទទួលទានរបស់ពួកគាត់បានធ្លាក់ចុះដោយបាត់អតិថិជនអស់មួយចំនួន ។
ទន្ទឹមនឹងនេះ ប្រជាពលរដ្ឋខ្មែរចង់ឱ្យអ្នកដឹកនាំនៃប្រទេសទាំងពីរដោះស្រាយបញ្ចប់វិវាទដោយសន្តិវិធី ។ ជម្លោះព្រំដែនកម្ពុជា-ថៃ បានកម្រើកខ្លាំងសាជាថ្មី បន្ទាប់ពីមានការផ្ទុះអាវុធនៅតំបន់មុំបី ដែលបណ្ដាលឱ្យកងកម្លាំងការពារព្រំដែនកម្ពុជាម្នាក់បាត់បង់ជីវិត ហើយក្រោយមក ថៃបានកាត់បន្ថយម៉ោងប្រតិបត្តិការច្រកព្រំដែនជាបន្តបន្ទាប់ ។ ចំណែកកម្ពុជាបានកាត់ផ្ដាច់ទូរគមនាគមន៍ បិទការនាំចូលបន្លែ និងផ្លែឈើពីប្រទេសថៃ ហើយនិងអំពាវនាវឱ្យពលករចំណាកស្រុកកម្ពុជាត្រឡប់មកប្រទេសរបស់ខ្លួនវិញ ។
ការលាប់ ឬរើឡើងវិញនៃជំងឺវិវាទព្រំដែន បានបំផុសស្មារតីជាតិនិយម ទាំងក្នុងចំណោមប្រជាពលរដ្ឋថៃ ទាំងក្នុងចំណោមប្រជាពលរដ្ឋកម្ពុជា ក្មេង ចាស់ ប្រុស ស្រី ។ ដោយឡែកនៅកម្ពុជា អ្នកចូលរួមច្រើនកុះករ មានទាំងព្រះសង្ឃ មន្ត្រីរាជការ សិស្ស និស្សិត និងប្រជាពលរដ្ឋ បានជួបជុំគ្នា នារាជធានីភ្នំពេញ កាលពីថ្ងៃពុធ ទី១៨ ខែមិថុនា ដើម្បីបង្ហាញការគាំទ្រជំហររបស់រាជរដ្ឋាភិបាល ដែលបានបញ្ជូនករណីវិវាទព្រំដែនកម្ពុជា-ថៃ ទៅតុលាការយុត្តិធម៌អន្តរជាតិ ICJ នាទីក្រុងឡាអេ ប្រទេសហូឡង់ និងដើម្បីលើកទឹកចិត្តកងកម្លាំងការពារជួរមុខ ។
ក្រៅពីការបង្ហាញនូវការគាំទ្រពេញទំហឹងចំពោះការសម្រេចចិត្តរបស់រាជរដ្ឋាភិបាល ដែលបានប្រើប្រាស់វិធានច្បាប់សម្រាប់ដោះស្រាយវិវាទនេះ ក្រុមអ្នកចូលរួមថ្លែងថា ពួកគេហួសចិត្ត និងគួរឱ្យអស់សំណើច ចំពោះការដែលភាគីថៃបន្តទាមទារ ដោយអះអាងថា ប្រាសាទតាមន្តធំ ប្រាសាទតាមន្តតូច ប្រាសាទតាក្របី តំបន់មុំបី និងទឹកដីនៅជុំវិញប្រាសាទព្រះវិហារ ជារបស់ខ្លួននោះ ។
អ្វីដែលធ្វើឱ្យគេមើលឃើញថា កាន់តែតានតឹងនិងឡើងកម្ដៅចុងក្រោយនេះ គឺនៅពេលដែលប្រទេសថៃកោះហៅឯកអគ្គរាជទូតកម្ពុជា ដើម្បីតវ៉ាជាផ្លូវការ ក្រោយពីការសន្ទនារវាងប្រធានព្រឹទ្ធសភាកម្ពុជា លោក ហ៊ុន សែន ជាមួយនាយករដ្ឋមន្ត្រីថៃ អំពីវិវាទព្រំដែន ត្រូវបានបែកធ្លាយ ។
អ្នកនាំពាក្យក្រសួងការបរទេសថៃ លោក Nikorndej Balankura បានថ្លែងនៅក្នុងសន្និសីទសារព័ត៌មានមួយថា ការលេចធ្លាយគឺជាទង្វើដែលមិនអាចទទួលយកបានរវាងរដ្ឋ ព្រោះជាការបំផ្លាញបទដ្ឋានការទូត និងស្មារតីនៃអ្នកជិតខាងដ៏ល្អ ហើយក៏ធ្វើឱ្យបាត់ទំនុកចិត្ត និងការគោរពគ្នាទៅវិញទៅមក រវាងមេដឹកនាំនៃប្រទេសទាំងពីរ និងរារាំងយ៉ាងខ្លាំងដល់កិច្ចខិតខំប្រឹងប្រែងដែលកំពុងតែបន្ត ដើម្បីដោះស្រាយជម្លោះដោយស្មោះត្រង់ ។
ជាប្រតិកម្មតប អ្នកនាំពាក្យនៃប្រធានព្រឹទ្ធសភា លោក ជា ធីរិទ្ធ បានច្រានចោលការលើកឡើង របស់អ្នកនាំពាក្យនៃក្រសួងការបរទេសថៃ ដែលថាការលេចធ្លាយកិច្ចសន្ទនានោះបានបំពានក្រមសីលធម៌ការទូត ។ លោក ជា ធីរិទ្ធ បញ្ជាក់ថា ការផ្ទុះឡើងនូវភាពតានតឹងទាក់ទងនឹងបញ្ហាព្រំដែន គឺភាគីថៃខ្លួនឯងជាអ្នកបង្ក ។
ទាក់ទិននឹងជម្លោះព្រំដែនកម្ពុជា-ថៃ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បណ្ឌិត ហុង វណ្ណៈ យល់ឃើញថា ការដាក់សម្ពាធលើគ្នាទៅវិញទៅមក ធ្វើឱ្យប៉ះពាល់ដល់ប្រជាពលរដ្ឋនិងប្រជាពលរដ្ឋ ពាណិជ្ជកម្មនិងពាណិជ្ជកម្ម និងកាន់តែបង្កើនភាពតានតឹងផ្នែកនយោបាយបន្ថែមទៀត គឺប៉ះពាល់ទាំងសងខាង ៕
