ទាហានថៃបានបន្តឈូសឆាយដីនៅតំបន់ព្រំដែនដែលមានជម្លោះក្នុងខេត្តបន្ទាយមានជ័យ ព្រមទាំងចាក់សំឡេងខ្មោចលង ឆ្កែលូ ដ៏ព្រឺព្រួចនៅពេលយប់ ដែលបណ្តាលឱ្យមានការភ័យខ្លាច និងបញ្ហាសុខភាពដល់អ្នកភូមិ ដែលករណីនេះត្រូវបានគេចាត់ទុកថាជាការបំភិតបំភ័យផ្លូវចិត្តដែលបំពានកិច្ចព្រមព្រៀងបទឈប់បាញ់។
នៅប្រហែលម៉ោង ១១ព្រឹកថ្ងៃចន្ទ ទាហានថៃប្រមាណ ២០ ទៅ ៣០នាក់បានមកដល់ភូមិព្រៃចាន់ ឃុំអូរបីជាន់ ដោយនាំមកជាមួយនូវគ្រឿងចក្រឈូសឆាយដីមួយគ្រឿង។ នេះបើយោងតាមសាក្សីនៅនឹងកន្លែង និងមន្ត្រីរដ្ឋាភិបាល។
អ្នកនាំពាក្យរដ្ឋបាលខេត្តបន្ទាយមានជ័យ លោក លី សុវណ្ណារិទ្ធ បានប្រាប់ សារព័ត៌មានខេមបូចា ថា ទាហានថៃបានចាប់ផ្តើមឈូសឆាយដីដែលពួកគេបានដាក់បន្លាលួសព័ទ្ធយកកាលពីថ្ងៃទី ១៣ ខែកញ្ញា។
លោកបានបន្ថែមថា ពួកគេបានចាក់សំឡេងបែបលងបន្លាច និងសំឡេងខ្មោចយ៉ាងខ្លាំងនៅពេលយប់ ដែលធ្វើឱ្យអ្នកភូមិភ្ញាក់ពីដំណេក និងប៉ះពាល់ដល់សុខភាពផ្លូវចិត្តរបស់ពួកគេ។
លោក សុវណ្ណារិទ្ធ បានថ្លែងថា៖ «ឥឡូវនេះ ពួកគេកំពុងឈូសឆាយដីម្ដងទៀត ហើយយើងមិនឃើញមានបន្លាលួសទេ ប៉ុន្តែយើងអាចឃើញថា ពួកគេកំពុងដំឡើងការតភ្ជាប់អ៊ីនធឺណិតនិងកាមេរ៉ាដើម្បីសង្កេតមើលប្រជាពលរដ្ឋរបស់យើង»។
លោក វីរយុទ្ធ រ៉ាក់ស៊ីន( Weerayut Raksin) មេបញ្ជាការយោធភូមិភាគទី២របស់ប្រទេសថៃ ត្រូវបានគេរាយការណ៍ថា បានថ្លែងថា កងកម្លាំងរបស់លោកត្រៀមខ្លួនជាស្រេចដើម្បីការពារទឹកដីគ្រប់ពេលវេលា ដោយប្តេជ្ញាថានឹង «ការពារទឹកដីគ្រប់អ៊ីញ» និង «ទាមទារយក»ប្រាសាទតាក្របីនិងប្រាសាទខ្នារមកវិញ។
ស្របពេលជាមួយគ្នានេះ កិច្ចប្រជុំគណៈកម្មាធិការព្រំដែនថ្នាក់យោធភូមិភាគ(RBC) ដែលគ្រោងធ្វើឡើងពីថ្ងៃទី១០ ដល់ថ្ងៃទី១២ ខែតុលា នៅខេត្តបន្ទាយមានជ័យ ត្រូវបានពន្យារពេលដោយសារភាគីថៃមិនបានចូលរួម។ នេះបើយោងតាមអ្នកនាំពាក្យខេត្តបន្ទាយមានជ័យ។
នៅពេលដែលអ្នកសារព័ត៌មានកំពុងសរសេរអត្ថបទនេះ អ្នកភូមិព្រៃចាន់ម្នាក់ឈ្មោះ ហ៊ុល ម៉ាលីស បានប្រាប់ថា ទាហានថៃកំពុងឈូសឆាយដីនៅក្នុងភូមិរបស់គាត់។
អ្នកស្រីបានលើកឡើងថានៅពេលយប់ ពួកគេចាក់ភ្លេងរំខានដល់អ្នកភូមិ ដែលបណ្តាលឱ្យអ្នកភូមិគេងមិនបាន ប៉ះពាល់ដល់ការគេង និងជួបបញ្ហាសុខភាពនានា ដូចជាឈឺទ្រូង ក្តៅខ្លួននិងជំងឺផ្លូវចិត្តផងដែរ។
តាមការឱ្យដឹងពីអ្នកភូមិរូបនេះ ទាហានថៃចាក់សំឡេងនៅចន្លោះម៉ោង១០យប់ដល់ម៉ោង៣ទៀបភ្លឺ ហើយនៅថ្ងៃខ្លះវាបន្តពេញមួយយប់ ទោះបីជាអាជ្ញាធររួមទាំងមន្ត្រីក្រសួង និងអ្នកព័ត៌មានបានចុះទៅពិនិត្យទីតាំងនោះក៏ដោយ។ សំឡេងទាំងនោះរួមមាន សំឡេងឧទ្ធម្ភាគចក្រហោះ សំឡេងឆ្កែលូ និងសំឡេងស្ត្រីស្រែកជាដើម។
អ្នកស្រី ម៉ាលីស បាននិយាយថា៖ «សំឡេងនេះបង្កគ្រោះថ្នាក់ណាស់ជាពិសេសដល់កុមារនិងមនុស្សចាស់ ដែលងាយនឹងភ័យខ្លាចនិងឆាប់គ្រុន ព្រោះពួកគេមិនអាចគេងលក់ស្រួលឡើយ ឬពេលខ្លះខ្លាចទាំងគេងទៀត។ សំឡេងនេះហ្នឹងរំខានខ្លាំងណាស់នៅពេលយប់ ហើយវាលឺខ្លាំង [ព្រោះថាវានៅ] ខាងមុខផ្ទះរបស់ខ្ញុំ។ មនុស្សចាស់ដូចខ្ញុំ មិនអាចគេងលក់ទេ ប៉ុន្តែខ្ញុំទម្លាប់ហើយ អ៊ីចឹងមិនរត់ចេញទៅណាទេ»។
សារព័ត៌មានមួយរបស់ថៃបានរាយការណ៍ថា យោធភូមិភាគី១របស់ថៃគ្រោងនឹងដោះមីននៅភូមិបានណងចាន់និងភូមិបានណងយ៉ាកែវ ដែលកម្ពុជាកំណត់ថាជាភូមិជោគជ័យនិងភូមិព្រៃចាន់ស្ថិតនៅក្នុងដែនអធិបតេយ្យរបស់កម្ពុជា។
ភូមិព្រៃចាន់ស្ថិតនៅទល់មុខភូមិណងយ៉ាកែវក្នុងប្រទេសថៃ ខណៈភូមិមានជម្លោះមួយទៀតគឺភូមិជោគជ័យស្ថិតនៅទល់មុខភូមិបានណងចាន់របស់ប្រទេសថៃ។
កាលពីថ្ងៃទី១១ ខែតុលា មន្ត្រីមកពីក្រសួងការពារជាតិនិងអនុព័ន្ធយោធាមកពីក្រុមអ្នកសង្កេតការណ៍អន្តរកាល (IOT) បានទៅមើលភូមិជោគជ័យ និងភូមិព្រៃចាន់ ក្នុងខេត្តបន្ទាយមានជ័យ ដើម្បីផ្ទៀងផ្ទាត់ជុំវិញការរាយការណ៍ថាថៃបានប្រើឧបករណ៍បំពងសំឡេងដោយចាក់សំឡេងដ៏គួរឱ្យខ្លាចនៅពេលយប់។
អ្នកភូមិម្នាក់ទៀតឈ្មោះ យី ភឿក បាននិយាយអំពីការភ័យខ្លាច និងការគេងមិនលក់របស់គាត់ នៅពេលដែលគាត់ព្យាយាមគេង និងចេញដើររកម្ហូបនៅពេលយប់ដើម្បីចិញ្ចឹមគ្រួសាររបស់គាត់។
លោក ភឿក បាននិយាយថា៖ «ខ្ញុំតែងតែខ្លាចខ្មោច។ បេះដូងខ្ញុំលោតញាប់ខ្លាំងណាស់ពេលឮសំឡេង [គួរឱ្យខ្លាច]ហ្នឹង។ ខ្ញុំមិនហ៊ានចេញទៅរកកង្កែប ឬត្រីនៅពេលយប់ទេ»។
កាលពីថ្ងៃអាទិត្យ លោក ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំរបស់កម្ពុជាក្នុងការដោះស្រាយជម្លោះដោយសន្តិវិធី និងស្របតាមច្បាប់អន្តរជាតិទាំងស្រុង។
លោកបានថ្លែងនៅទីក្រុងកូឡាឡាំពួរថា៖ «កម្ពុជាគ្មានចេតនាទាមទារអ្វីដែលមិនមែនជារបស់យើងទេ ប៉ុន្តែយើងក៏នឹងមិនទទួលយកការបាត់បង់អ្វីដែលជាកម្មសិទ្ធិរបស់យើងដោយស្របច្បាប់ឡើយ។ យើងស្វែងរកដំណោះស្រាយដោយយុត្តិធម៌ មិនលម្អៀង និងផ្អែកលើច្បាប់ ដែលអាចធានាបាននូវសន្តិភាពយូរអង្វែងសម្រាប់ប្រជាជនរបស់យើង»។
ថ្មីៗនេះគណៈកម្មាធិការសិទ្ធិមនុស្សកម្ពុជា បានដាក់បណ្តឹងទៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សពីការរំលោភសិទ្ធិមនុស្សយ៉ាងធ្ងន់ធ្ងរដែលប្រព្រឹត្តដោយកងកម្លាំងប្រដាប់អាវុធថៃនៅតាមបណ្តោយព្រំដែនកម្ពុជា–ថៃ។
គណៈកម្មាធិការសិទ្ធិមនុស្សកម្ពុជា បានអំពាវនាវឱ្យអង្គការសហប្រជាជាតិស៊ើបអង្កេតលើឧប្បត្តិហេតុដែលបានរាយការណ៍ និងធានាឱ្យមានការទទួលខុសត្រូវ ខណៈពេលដែលទាមទារឱ្យបញ្ឈប់គ្រប់សកម្មភាពបំភិតបំភ័យផ្លូវចិត្តលើជនស៊ីវិលកម្ពុជាជាបន្ទាន់។
ស្ថាប័ននេះក៏បានស្នើឱ្យមានការគាំទ្រផ្នែកវេជ្ជសាស្ត្រ និងផ្លូវចិត្តដល់អ្នកភូមិដែលរងផលប៉ះពាល់ និងលើកទឹកចិត្តក្នុងការពង្រឹងកិច្ចសន្ទនាតាមព្រំដែនដើម្បីទប់ស្កាត់កុំឱ្យកើតឡើងវិញនូវភាពតានតឹង និងលើកកម្ពស់ស្មារតីនៃបទឈប់បាញ់។
ឆ្លើយតបនឹងការអំពាវនាវនោះ សមាជិកព្រឹទ្ធសភាថៃ Angkhana Neelapaiji បានលើកឡើងថា រដ្ឋាភិបាលរបស់លោកស្រីគួរបានដឹងពី «សកម្មភាពណាមួយដែលបង្កឱ្យមានការភ័យខ្លាច ឬប៉ះពាល់ដល់សុខុមាលភាពផ្លូវចិត្តរបស់ជនស៊ីវិល ទាំងអ្នកដែលក្នុងតំបន់ជម្លោះ ជាពិសេសក្រុមដែលងាយរងគ្រោះ អាចបង្កើតជាការធ្វើទារុណកម្មផ្លូវចិត្តក្រោមអនុសញ្ញា CAT (គណៈកម្មាធិការប្រឆាំងទារុណកម្ម) ដែលថៃជាប្រទេសហត្ថលេខីមួយ»។ លោកស្រីបានបន្តថា៖ «ខ្ញុំចង់ឮពីរដ្ឋាភិបាលថានឹងបញ្ជាក់បញ្ហានេះនៅលើឆាកអន្តរជាតិដោយរបៀបណា»។
ការប៉ះទង្គិចគ្នានៅព្រំដែនកម្ពុជា–ថៃ បានបញ្ចប់ដោយកិច្ចព្រមព្រៀងបទឈប់បាញ់កាលពីថ្ងៃទី២៨ ខែកក្កដា ហើយបន្ទាប់មកនៅថ្ងៃទី៧ ខែសីហា ភាគីទាំងពីរបានឈានដល់កិច្ចព្រមព្រៀងអនុវត្តចំនួន១៣ចំណុចបន្ថែមទៀត។
លោក វ៉ុលកឺ ធួក (Volker Türk) នៃការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានថ្លែងថា ប្រទេសថៃដែលបានឃុំខ្លួនទាហានកម្ពុជា គួរតែគោរពតាមច្បាប់អន្តរជាតិដោយបញ្ជាក់ថាយោធាកម្ពុជាដែលត្រូវបានឃុំខ្លួនក្នុងអំឡុងពេលមានជម្លោះប្រដាប់អាវុធ ត្រូវតែទទួលបានការយកចិត្តទុកដាក់ដោយអនុលោមតាមច្បាប់សិទ្ធិមនុស្សអន្តរជាតិ និងច្បាប់មនុស្សធម៌អន្តរជាតិដែលមានជាធរមាន។
លោកបានជំរុញឱ្យកម្ពុជានិងថៃ «គោរពឱ្យបានពេញលេញនូវកិច្ចព្រមព្រៀងបទឈប់បាញ់និងចាត់វិធានការដើម្បីធានាការការពារជនស៊ីវិល»។ លោកបានបញ្ជាក់ថា ការិយាល័យរបស់លោកប្តេជ្ញាចិត្តក្នុងការគាំទ្ររដ្ឋាភិបាលទាំងពីរនិងលើកកម្ពស់កាតព្វកិច្ចសិទ្ធិមនុស្សរបស់ពួកគេ។
អ្នកនាំពាក្យក្រសួងការពារជាតិ លោកស្រី ម៉ាលី សុជាតា បានបដិសេធមិនធ្វើអត្ថាធិប្បាយបន្ថែមពីស្ថានការណ៍នេះទេ។
លោក ប៉ែន បូណា អ្នកនាំពាក្យរដ្ឋាភិបាល បានប្រាប់ សារព័ត៌មានខេមបូចា ថា រដ្ឋាភិបាលបានចាត់វិធានការក្នុងជម្លោះព្រំដែននេះជាបន្តបន្ទាប់ ហើយក៏ដូចជាចាត់វិធានការការទូតបន្ថែមទៀតតាមរយៈក្រសួងការបរទេស និងភ្នាក់ងាររដ្ឋាភិបាល។
លោក បូណា បានថ្លែងថា៖ «អ្វីដែលយើងបានធ្វើ គឺត្រូវបានគេមើលឃើញជាសាធារណៈរួចហើយ។ យើងបានដាក់ពាក្យបណ្ដឹង ហើយយើងបានជជែកវែកញែក[តាមរយៈយន្តការ]ជាច្រើន។ យើងផ្សព្វផ្សាយតែអ្វីដែលយើងបានធ្វើប៉ុណ្ណោះ។ យើងមិនអាចចែករំលែកសកម្មភាពបន្ទាប់នៅពេលនេះទេ»៕
ប្រែសម្រួលពីអត្ថបទភាសាអង់គ្លេស៖ Thai Troops Accused of Psychological Harassment as Border Tensions Escalate in Banteay Meanchey
