បាតុករថៃមួយក្រុមបានប្រមូលផ្ដុំគ្នាតវ៉ានៅថ្ងៃសុក្រ ដើម្បីទាមទារ «ឱ្យមានការគោរពអធិបតេយ្យភាពប្រទេសរបស់ពួកគេ» ក្រោយពីកម្ពុជាសម្រេចចិត្តបន្តវិធានការផ្លូវច្បាប់ទៅកាន់តុលាការយុត្តិធម៌អន្តរជាតិ ICJ ដើម្បីស្វែងរកដំណោះស្រាយជម្លោះព្រំដែនជាមួយថៃដែលនៅបន្តអូសបន្លាយ។
បណ្ដាញនិស្សិត និងប្រជាពលរដ្ឋសម្រាប់កំណែទម្រង់ថៃ បានប្រមូលផ្ដុំគ្នានៅមុខស្ថានទូតខ្មែរប្រចាំទីក្រុងបាងកក ដើម្បីបង្ហាញពីការតាំងចិត្តរបស់ពួកគេក្នុងការការពារដែនដីរបស់ខ្លួន។
គិតចាប់តាំងពីមានការប៉ះទង្គិចគ្នានៅព្រំដែនកម្ពុជា-ថៃ ជិតខេត្តព្រះវិហារ ដែលហេតុការណ៍នោះបានបណ្ដាលឲ្យទាហានខ្មែរម្នាក់ពលី កាលពីថ្ងៃទី២៨ ខែឧសភា ភាគីទាំងពីរបានបន្ទោសគ្នាទៅវិញទៅមកអំពីដើមចមនៃជម្លោះប្រដាប់អាវុធនេះ។
អ្នកនាំពាក្យក្រសួងការបរទេសកម្ពុជាលោក ជុំ សុន្ទរី មានប្រសាសន៍ថា៖ «ខ្ញុំសូមច្រានចោលការចោទប្រកាន់នេះ។ វាមិនបានឆ្លុះបញ្ចាំងពីការពិត ដែលថាទាហានកម្ពុជារំលោភបំពានទៅលើអធិបតេយ្យភាពរបស់ថៃ»។
លោកបន្តថា៖ «កម្ពុជាមានការប្ដេជ្ញាចិត្តខ្ពស់ក្នុងការដោះស្រាយជម្លោះតាមរយៈច្បាប់អន្តរជាតិ និងដោយសន្តិវិធី»។
លោកលើកឡើងថា កាលពីថ្ងៃទី២៨ ខែឧសភា ទាហានថៃបានបើកការបាញ់ប្រហារមកលើបុស្តិ៍យាមរបស់ទាហានកម្ពុជានៅក្នុងភូមិមរតកតេជោ ខេត្តព្រះវិហារ និងថាតំបន់នោះត្រូវបានទទួលស្គាល់ថាជាទីតាំងឈរជើងរបស់ទាហានកម្ពុជាដែលជាប់នឹងខេត្ត Ubon Ratchathani របស់ថៃ។
លោកបន្ថែមថា ការវាយប្រហាររបស់ទាហានថៃ គឺបានរំលោភបំពានមកលើដែនអធិបតេយ្យរបស់កម្ពុជា និងអនុសារណៈនៃការយោគយល់គ្នា (MoU)ដែលបានចុះហត្ថលេខាដោយរដ្ឋាភិបាលទាំងពីរកាលពីខែមិថុនា ឆ្នាំ២០០០ ដែលMoU នោះធ្វើឡើងដើម្បីរក្សាសន្តិភាព និងស្ថិរភាពតាមបន្ទាត់ព្រំដែនរវាងប្រទេសទាំងពីរ ជាពិសេសនៅតំបន់មានជម្លោះ។
ឯកអគ្គរាជទូតកម្ពុជាប្រចាំប្រទេសថៃលោក ហ៊ុន សារឿន មិនបានឆ្លើយតបសំណើសុំអត្ថាធិប្បាយរបស់ សារព័ត៌មានខេមបូចា នោះទេ។
នៅលើបណ្ដាញសង្គមហ្វេសប៊ុក មានការផ្សាយថា នៅថ្ងៃសុក្រមានបាតុករប្រហែល២០០នាក់បានប្រមូលផ្ដុំគ្នានៅមុខស្ថានទូតខ្មែរប្រចាំទីក្រុងបាងកក នៅម៉ោង១០ព្រឹក ដោយបានអះអាងថា ដើម្បី «ទាមទារឲ្យកម្ពុជាគោរពអធិបតេយ្យភាពរបស់ថៃ» ហើយក្រុមទាំងនោះបានបំបែកគ្នាវិញនៅម៉ោង១១ និង១៥នាទីថ្ងៃត្រង់។
ប្រភពដដែលសរសេរទៀតថា៖ «កម្លាំងនគរបាលថៃបានដាក់ពង្រាយដើម្បីការពារសន្តិសុខស្ថានទូត និងធានាសុវត្ថិភាពបុគ្គលិកនៅទីនោះ។ មន្ត្រីស្ថានទូតទាំងអស់មានសុវត្ថិភាព និងធ្វើការជាប្រក្រតី»។
ប្រភពខាងលើសរសេរទៀតថាស្ថានទូតនៅបើក និងបន្តផ្ដល់សេវានានាជាប្រក្រតីដល់ប្រជាពលរដ្ឋខ្មែរ និងជនបរទេសផ្សេងទៀត។
កាលពីថ្ងៃព្រហស្បតិ៍ រដ្ឋមន្ត្រីការពារជាតិកម្ពុជា លោក ទៀ សីហា ជួបជាមួយរដ្ឋមន្ត្រីការពារជាតិថៃលោក Phumtham Wechayachai។ ក្នុងជំនួបនោះ រដ្ឋមន្ត្រីការពារជាតិកម្ពុជាបានបដិសេធដកទ័ពចេញពីតំបន់មុំបី ដែលជាកន្លែងមានការប៉ះទង្គិចគ្នាកើតឡើង ដោយលោកអះអាងថា តំបន់នោះត្រូវបានទទួលស្គាល់ជាយូរមកហើយថាជាកន្លែងឈរជើងរបស់ទាហានកម្ពុជា។
លោក ទៀ សីហា បានសរសេរលើទំព័រហ្វេសប៊ុករបស់ខ្លួននៅថ្ងៃសុក្រថា៖ «កម្ពុជាមិនអាចដកទ័ពចេញពីកន្លែងដែលកងទ័ពកម្ពុជាបានឈរជើងជាយូរមកហើយនោះទេ ដែលទីនោះគឺជាដែនអធិបតេយ្យភាពរបស់កម្ពុជា»។
ភាគីទាំងពីរបានឯកភាពបន្តជួបគ្នាទៀតតាមរយៈគណៈកម្មាធិការព្រំដែនទូទៅ (GBC) គណៈកម្មាធិការព្រំដែនចម្រុះ(JBC) និងគណៈកម្មាធិការព្រំដែនតំបន់(RBC) ដើម្បីស្វែងរកការបន្ធូរបន្ធយភាពតានតឹង។ គណៈកម្មាធិការទាំងនេះត្រូវបានបង្កើតឡើងដោយភាគីទាំងពីរដើម្បីទុកដោះស្រាយជម្លោះព្រំដែននាពេលកន្លងមក។ គណៈកម្មាធិការព្រំដែនចម្រុះ គ្រោងនឹងជួបគ្នានៅថ្ងៃទី១៤ ខែមិថុនា នាទីក្រុងភ្នំពេញ។
កាលពីថ្ងៃព្រហស្បតិ៍ រដ្ឋាភិបាលកម្ពុជាបានបញ្ជាក់ថា តំបន់ជម្លោះចំនួនបួន រួមមានប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី នឹងមិនដាក់បញ្ជូលក្នុងរបៀបវារៈនៃកិច្ចប្រជុំគណៈកម្មកាធិការព្រំដែនចម្រុះខាងមុខនេះទេ។
រដ្ឋាភិបាលកម្ពុជាក៏បានបញ្ជាក់ជំហរស្វែងរកដំណោះស្រាយតាមផ្លូវច្បាប់ តាមរយៈការដាក់បណ្ដឹងទៅកាន់តុលាការយុត្តិធម៌អន្តរជាតិ នៅទីក្រុងឡាអេ បើទោះបីជារដ្ឋាភិបាលថៃបញ្ជាក់ថាខ្លួន «មិនទទួលស្គាល់យុត្តាធិការ ICJ ក្នុងសំណុំរឿងជម្លោះព្រំដែនតាំងពីឆ្នាំ១៩៦០ រហូតដល់បច្ចុប្បន្ន»។
ទាក់ទងនឹងរឿងនេះ អ្នកនាំពាក្យរដ្ឋាភិបាល លោក ប៉ែន បូណា មានប្រសាសន៍ថារដ្ឋាភិបាលនឹងនៅតែបន្តដាក់ពាក្យបណ្ដឹងទៅកាន់តុលាការយុត្តិធម៌អន្តរជាតិ ទោះភាគីថៃមិនមានវត្តមាននៅតុលាការក៏ដោយ៕
ប្រែសម្រួលពីអត្ថបទភាសាអង់គ្លេស៖ Thais Hold Protest at Cambodian Embassy in Bangkok Amid Negotiations to Ease Border Tensions
