រាជរដ្ឋាភិបាលកម្ពុជានៅព្រឹកថ្ងៃទី៣០ ខែតុលានេះបានប្រារព្ធមិទ្ទីញមហាជន ដើម្បីអបអរសាទរព្រះរាជពិធីខួបលើកទី២០នៃការគ្រងព្រះបរមសិរីរាជសម្បត្តិ នៅមុខព្រះបរមរាជវាំង ក្រោមព្រះរាជវត្តមានដ៏ខ្ពង់ខ្ពស់របស់ព្រះមហាក្សត្រ ព្រះបាទនរោត្តម សីហមុនី និងមានការចូលរួមពីថ្នាក់ដឹកនាំកំពូលៗ អង្គទូត មន្ត្រីរាជការ កងកម្លាំងគ្រប់ជាន់ថ្នាក់ និងប្រជារាស្ត្រ។
ពិធីនេះធ្វើឡើងដើម្បីរំលឹកខួបទី២០នៃការគ្រងព្រះបរមសិរីរាជសម្បត្តិ ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា (ថ្ងៃទី២៩ ខែតុលា-៣០ ខែតុលា ឆ្នាំ២០២៤)។ ព្រះមហាក្សត្របានមានព្រះរាជបន្ទួលទៅកាន់ថ្នាក់ដឹកនាំកំពូលៗ រួមមាន ប្រធានព្រឹទ្ធសភា លោក ហ៊ុន សែន ប្រធានរដ្ឋសភា លោកស្រី ឃួន សុដារី និងលោកនាយករដ្ឋមន្ត្រី ហ៊ុន ម៉ាណែត ប្រធានកិត្តិយសឧត្តមក្រុមប្រឹក្សានៃព្រះមហាក្សត្រ លោក ហេង សំរិន និងមន្ត្រីជាន់ខ្ពស់ពីគ្រប់ស្ថាប័ន ព្រមទាំងប្រជារាស្ត្រទាំងអស់ថា ប្រទេសកម្ពុជាមានសុខសន្តិភាព សាមគ្គីភាព ឯកភាពជាតិ កិត្យានុភាពជាតិ ល្បីរន្ទឺលើកឆាកអន្តរជាតិ។
ព្រះមហាក្សត្របានមានព្រះបន្ទូលថា៖ «រយៈកន្លងមក មាតុភូមិកម្ពុជា និងប្រជាពលរដ្ឋយើងមានការប្រែប្រួលមុខមាត់ថ្មីគួរអោយកោតសរសើរ»។
ព្រះបាទនរោត្តម សីហមុនី ក៏បានកោតសរសើរលោក ហ៊ុន សែន ប្រធានព្រឹទ្ធសភា និងប្រធានឧត្តមក្រុមប្រឹក្សានៃព្រះមហាក្សត្រ និងលោក ហ៊ុន ម៉ាណែត នាយករដ្ឋមន្រ្តី ដែលបានដឹកនាំប្រទេសដោយសន្តិភាព និងស្របតាមព្រះរាជបណ្តាំចុងក្រោយនៃព្រះបាទនរោត្តម សីហនុ ដែលជាអតីតព្រះមហាក្សត្រ។
ព្រះអង្គមានព្រះរាជបន្ទួលបន្ថែមថា៖ «សម្តេចមហាបវរធិបតីហ៊ុន ម៉ាណែត ជាប្រមុខដឹកនាំរាជរដ្ឋាភិបាលដ៏ឆ្លាតវៃបានដាក់ចេញនូវយុទ្ធសាស្រ្តបច្ចកោណដំណាក់កាលទី១ និងគោលនយោបាយដ៏ត្រឹមត្រូវក្នុងការប្រតិបត្តិតាមមាគ៌ាដ៏ល្អប្រពៃ និងមរតកនយោបាយដ៏ថ្លៃថ្លារបស់សម្តេចអគ្គមហាសេនាធិបតីតេជោ ហ៊ុន សែនបាននាំមកនៅសុខសន្តិភាព សាមគ្គីភាព ឯកភាពជាតិ កិត្យានុភាពជាតិ ល្បីរន្ទឺលើកឆាកអន្តរជាតិ ស្របតាមគោលមាគ៌ា បង្រួបបង្រួមជាតិផ្សះផ្សាជាតិ ជាព្រះរាជបណ្តាំបន្ថែមចុងក្រោយរបស់ព្រះករុណាព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត»។

លោក ឃួង ស្រេង អភិបាលរាជធានីភ្នំពេញ បានថ្លែងសុន្ទរកថាមុនព្រះមហាក្សត្រទ្រង់មានព្រះរាជបន្ទួល ថា លោកសូមសម្ដែងនូវការរំលឹកដឹងគុណដល់ព្រះមហាក្សត្រក្នុងព្រះរាជពិធីខួប២០នៃការគ្រងរាជសម្បត្តិ។
លោកបានលើកឡើងថា ស្របពេលដែលព្រះរាជាណាចក្រកម្ពុជាកំពុងត្រៀមរៀបចំព្រះរាជពិធីបុណ្យធំៗដូចជាខួបអនុស្សាវរីយ៍លើកទី៧១នៃទិវាឯករាជជាតិ ៩ វិច្ឆិកា និងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលព្រះរាជពិធីទាំងនេះពិតជាបង្កប់នូវអត្ថន័យដ៏ត្រចះត្រចង់ និងបានបង្ហាញពីសុខដុមរមនារបស់ប្រជាជនកម្ពុជាទាំងក្នុងនិងក្រៅប្រទេស។ ជាពិសេសស្មារតីឯកភាពជាតិ អធិបតេយ្យជាតិ បូរណភាពទឹកដី ដោយគោរពយ៉ាងត្រឹមត្រូវនៅរបបរាជានិយមអាស្រ័យរដ្ឋធម្មនុញ្ញដោយមានព្រះមហាក្សត្រគ្រងព្រះបរមសិរីសម្បត្តិ។
លោកបានថ្លែងថា ការបន្តបាននៅរបបរាជានិយមអាស្រ័យរដ្ឋធម្មនុញ្ញ គឺ«បានកើតឡើងដោយការលះបង់ខ្ពស់បំផុតរបស់សម្តេចអគ្គមហាសេនាធិបតីតេជោ ហ៊ុន សែន អតីតនាយករដ្ឋមន្ត្រី ជាមួយនឹងអតីតព្រះមហាក្សត្រ គឺព្រះករុណាព្រះបាទនរោត្តម សីហនុ ដែលតែងប្រាថ្នាចង់បាននៃសុខសន្តិភាព ឯកភាពជាតិ និងការបង្រួបបង្រួមជាតិរហូតសម្រេចបានរដ្ឋធម្មនុញ្ញឆ្នាំ១៩៩៣ និងបន្តសម្រេចបានសន្តិភាពពិតប្រាកដក្នុងឆ្នាំ១៩៩៨ តាមរយៈការដាក់ចេញគោលនយោបាយឈ្នះៗរបស់បិតា ស្ថាបនិកសន្តិភាពកម្ពុជាគឺតេជោ ហ៊ុន សែន»។

សម្ព័ន្ធភាពឆ្ពោះទៅអនាគត ដែលមានគណបក្ស៥បានចងសម្ព័ន្ធភាពនឹងគ្នាដូចជា គណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន គណបក្សកែទម្រង់កម្ពុជា និងគណបក្សកម្ពុជានិយម បានចេញសារលិខិតថ្វាយព្រះមហាក្សត្រនៅថ្ងៃទី២៩ ដើម្បីអបអរសាទរព្រះរាជពិធីខួបទី២០នៃការគ្រងព្រះបរមសិរីរាជសម្បត្តិ ព្រះករុណាព្រះបាទសម្តេចព្រះនរោត្តម សីហមុនី។
ជាមួយគ្នានេះដែរ គ្រប់អង្គទូតប្រចាំប្រទេសកម្ពុជាក៏បានផ្ញើសារអបអរសាទរនៅក្នុងព្រះរាជពិធីខួបទី២០នៃការគ្រងព្រះបរមសិរីរាជសម្បត្តិ ព្រះករុណា ព្រះបាទសម្តេច ព្រះនរោត្តម សីហមុនី។
ស្ថានទូតអាមេរិកនៅភ្នំពេញ នៅថ្ងៃទី២៩ ខែតុលា បានសរសេរលើទំព័រហ្វេសប៊ុករបស់ខ្លួនថា សូមថ្វាយព្រះពរក្នុងព្រះរាជពិធីបុណ្យខួបលើកទី ២០ នៃការគ្រងរាជសម្បតិ្ត ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី ។ ព្រះអង្គ បានបំពេញព្រះរាជកិច្ចក្នុងការអភិវឌ្ឍព្រះរាជាណាចក្រកម្ពុជា។ សូមថ្វាយព្រះពរព្រះអង្គ មានព្រះរាជសុខភាពល្អបរិបូរណ៍ និងសុខសុភមង្គលនាថ្ងៃដ៏វិសេសវិសាលនេះ។
លោក Wang Wenbin ឯកអគ្គរដ្ឋទូតប្រទេសចិនប្រចាំកម្ពុជា បានផ្សព្វផ្សាយលើទំព័រហ្វេសប៊ុករបស់ស្ថានទូតថា ប្រទេសចិនយកចិត្តទុកដាក់យ៉ាងខ្លាំងចំពោះទំនាក់ទំនងរបស់ខ្លួនជាមួយកម្ពុជា និងស្រឡាញ់ចំណងមិត្តភាពប្រពៃណីរបស់ខ្លួនជាមួយគ្រួសាររាជវង្សកម្ពុជា។ ប្រទេសចិនត្រៀមខ្លួនជាស្រេច ដើម្បីធ្វើការជាមួយកម្ពុជា ដើម្បីបន្តទំនាក់ទំនងមិត្តភាពជាប្រពៃណី ធ្វើឱ្យស៊ីជម្រៅកិច្ចសហប្រតិបត្តិការផ្តល់ផលប្រយោជន៍ទៅវិញទៅមក បង្កើនការផ្លាស់ប្តូររវាងប្រជាជន និងវប្បធម៌ និងធ្វើឱ្យមានវឌ្ឍនភាពថ្មីក្នុងការកសាងសហគមន៍ចិន-កម្ពុជាជាមួយនឹងអនាគតរួម៕

