ភាគីនិយោជក ភាគីសហជីពតំណាងកម្មករ និងភាគីរាជរដ្ឋាភិបាល បន្តមិនយល់ស្របគ្នាក្នុងការកំណត់ប្រាក់ឈ្នួលអប្បបរមារបស់កម្មករនិយោជិតវិស័យវាយនភណ្ឌ កាត់ដេរ សម្រាប់ឆ្នាំ២០២៤ ដោយភាគីនិមួយៗ បានលើកតួលេខរៀងៗខ្លួនកាលពីព្រឹកថ្ងៃ១៨ ខែកញ្ញា ហើយកិច្ចប្រជុំចុងក្រោយនឹងប្រព្រឹត្តទៅថ្ងៃទី២៨ ខាងមុខនេះ។
លោក អាត់ ធន់ ប្រធានសហភាពការងារកម្ពុជា (CLC) លើកឡើងថា តាមរយៈកិច្ចពិភាក្សាត្រីភាគី កាលពីព្រឹកថ្ងៃទី១៨នេះ ខាងភាគីនិយោជកដំឡើងប្រាក់ឈ្នូលបន្ថែមចំនួន១,៥០ដុល្លារ (២០១,៥០ដុល្លារ) ចំណែកឯខាងភាគីរាជរដ្ឋាភិបាលដំឡើងឱ្យត្រឹម២ដុល្លារ (២០២ដុល្លារ) ខណៈពេលខាងភាគីសហជីពឯករាជ្យ បន្ថយមកស្នើត្រឹម១៣ដុល្លារ (២១៣ដុល្លារ) និងសហជីពផ្សេងទៀតស្នើដំឡើងត្រឹម៤ដុល្លារ (២០៤ដុល្លារ)។
លោកបញ្ជាក់ថា៖ «សហជីពដាក់ការជជែកគ្នាទៅ ក្រោយនិយោជកដំឡើងអ៊ីចឹងង យើងបញ្ចុះមកត្រឹមប៉ុណ្នឹង(២១៣ដុល្លារ)។ ប៉ុន្តែនៅពេលដែលចរចាថ្ងៃទី២៨ ប្រហែលមិនមានការចុះទៀតទេ ហើយបើគេមិនសម្រេច ត្រូវធ្វើការបោះឆ្នោត»។
លោកបន្ថែមថា បន្ទាប់ពីកិច្ចប្រជុំចប់នេះ ខាងសហជីពបន្តពិភាក្សាផ្ទៃក្នុង ដើម្បីរកដំណោះស្រាយ និងយន្តការដែលអាចដំឡើងប្រាក់ឈ្នួលឱ្យកម្មករច្រើនជាងនេះ។ លោក អាត់ ធន់ បន្តថា នឹងផ្តល់ជាសារ និងទុក្ខកង្វល់នានារបស់កម្មករ តាមរយៈបណ្តាញសង្គម ដើម្បីឱ្យរដ្ឋាភិបាល និងភាគីផ្សេងៗ មានការកែប្រែគំនិត និងផ្តល់ប្រាក់ឈ្នួលប្រសើរជាងនេះ។ តែបើគ្មានជម្រើសអ្វីផ្សេងទេ លោកថា គឺអាស្រ័យលើការបោះឆ្នោតចុងក្រោយ ក្នុងចំណោមជាង៥១រូប គ្រប់ភាគីទាំងអស់ដែលលទ្ធផលបែបណា គឺមានតែតាមហ្នឹង។
លោកលើកឡើងថា៖ «យើងស្នើឱ្យខាងកម្មករបន្តធ្វើការជំរុញ តាមរយៈការធ្វើយុទ្ធនាការអីផ្សេងៗ ដើម្បីឱ្យមានឥទ្ធិពលលើនិយោជក និងរដ្ឋាភិបាល ក្នុងការដំឡើងប្រាក់ឈ្នួលបន្ថែមទៀត»។
ជុំវិញបញ្ហានេះ លោក ណាង សុធី អនុប្រធានសហព័ន្ធនិយោជក និងសមាគមពាណិជ្ជកម្ពុជា ដែលតំណាងឱ្យនិយោជក ឆ្លើយតបថា ក្រោយពីការពិចារណា និងសម្របសម្រួលតួលេខឱ្យជិតគ្នា រវាងចំណោមភាគីទាំងអស់។ ខាងភាគីនិយោជកក៏សម្រេចដំឡើង៥០សែនបន្ថែម ដែលបានសរុប២០១,៥០ដុលារ។ ខណៈភាគីរដ្ឋាភិបាលបានបញ្ចេញតួលេខដំឡើងប្រាក់ឈ្នួលរហូតដល់២០២ដុល្លារ ដែលលោក សុធី ថា ភាគីនិមួយៗដាក់ចេញតួលេខបាន ដោយអាស្រ័យលើបច្ចេកទេស និងមានសិទ្ធិរៀងៗខ្លួន។
លោកអះអាង៖ «ឈរលើលក្ខខណ្ឌបច្ចេកទេស៧ចំណុច នៅក្នុងលក្ខខណ្ឌច្បាប់ប្រាក់ឈ្នួលអប្បបរមា យើងគណនាទៅ យើងសម្រួលទៅ យើងយកលេខហ្នឹង(២០១,៥០ដុល្លារ)»។
លោកបន្ថែមថា ការដំឡើងត្រឹម២០១,៥០ដុល្លារនេះ សម្រាប់ប្រាក់ឈ្នួលអប្បបរមា ដែលកំណត់ដោយច្បាប់ ប៉ុន្តែកម្មករនៅទទួលបានប្រាក់អត្ថប្រយោជន៍ផ្សេងទៀត ដោយអាស្រ័យលើការខិតខំប្រឹងប្រែងធ្វើការងារ និងការគោរពម៉ោងការងាររបស់ពួកគេ។
លោកបន្តថា៖ «ប្រាក់ឈ្នួល៧ដុល្លារទៀតបន្ថែមលើថ្លៃដឹកជញ្ជួន ឬក៏ថ្លៃផ្ទះជួល ហើយ១១ដុល្លារទៀតប្រាក់អត្ថប្រយោជន៍ការងាររបស់គាត់(កម្មករ) ដែលគាត់ធ្វើការទៀតទាត់»។
ជាមួយគ្នានេះ លោក ព្រុំ ឈាង ជាកម្មកររោងចក្រមួយកន្លែងក្នុងរាជធានីភ្នំពេញ បព្ជាក់ថា មិនពេញចិត្តនោះទេ ដែលនិយោជក និងរដ្ឋាភិបាលដំឡើងប្រាក់ឈ្នួលសម្រាប់ឆ្នាំ២០២៤ខាងមុខនេះ ត្រឹមតែ២ដុល្លារ គឺវាតិចតួចពេក។
កម្មកររូបនេះអះអាងថា៖ «តម្រូវការ២១៥ដុល្លារ បើត្រឹម២០២ដុល្លារ ដូចអត់បានឡើងដដែល»។
លោកបន្ថែមថា ដោយសារសព្វថ្ងៃនេះ កម្មករត្រូវការចំណាយច្រើន ហើយប្រាក់ឈ្នួលត្រឹម២០២ដុល្លារនេះ លោកថាមិនអាចផ្គត់ផ្គង់ជីវភាព និងការរស់នៅរបស់ពួកគាត់បានទេ។ ប៉ុន្តែបើបានប្រាក់ឈ្នួល២១៥ដុល្លារ ទើបអាចសម្រួលបន្ទុកនៃជីវភាពរបស់កម្មករបានច្រើន។
លោកសំណូមពរថា៖ «សុំឱ្យរដ្ឋាភិបាលគាត់ ដំឡើងប្រាក់ខែកម្មករ ឱ្យបាន២១៥ដុល្លារ សម្រាប់កម្មករទាំងអស់គ្នា»។
កម្មករមួយរូបទៀត កំពុងធ្វើការរោងចក្រ ហាយធិច នៃតំបន់សេដ្ឋកិច្ចពិសេសក្នុងក្រុងប៉ោយប៉ែត លោកស្រី កែវ ចាន់នេត លើកឡើងថា ការដំឡើងប្រាក់ឈ្នួលបានត្រឹម២ដុល្លារនេះ វាតិចតួចពេក ដែលមិនអាចគ្រប់គ្រាន់សម្រាប់ជួយសម្រួលជីវភាពកម្មករបានទេ។ ស្របពេលស្ថានភាពសេដ្ឋកិច្ច និងទំនិញក្នុងទីផ្សារឡើងថ្លៃ ដែលតម្រូវឱ្យកម្មករចំណាយច្រើនជាងមុន ដោយឡែកកម្មករខ្លះទៀត កំពុងជំពាក់បំណុលធនាគារលើសលុប។
លោកស្រីបន្តថា៖ «សុខចិត្តការបន្ថយការហូបចុក ដើម្បីផ្គត់ផ្គង់ទៅលើការបង់ថ្លៃធានាគារ»។
តែយ៉ាងណា បើមិនបានដូចការរំពឹងទុករបស់កម្មករចង់បាន២១៥ដុល្លារនោះ លោកស្រីថា សុំត្រឹម២១០ដុល្លារ ក៏កម្មករសប្បាយចិត្ត និងអាចជួយសម្រួលជីវភាពបានប្រសើជាងមុនដែរ។ លោកស្រីបន្ថែមថា ដោយសារបញ្ហាប្រឈមសព្វថ្ងៃនេះ គឺអត់មានការងារធ្វើផង រោងចក្រមួយចំនួនទៀតមិនមានការងារច្រើនឱ្យធ្វើផង ខណៈពេលតម្លៃប្រេងសាំង របស់របបហូបចុក និងទំនិញផ្សេងៗទៀតកំពុងឡើងថ្លៃ។
លោកស្រីសំណូមពរថា៖ «ថ្លៃផ្ទះជួល សុំឱ្យគាត់(រដ្ឋាភិបាល)មានការបន្ថូរបន្ថយចុះ ព្រោះអីបញ្ហាសព្វថ្ងៃ អត់មានការងារធ្វើ ដើម្បីឱ្យសម្រួលដល់កម្មករ គាត់បានស្រួលបន្តិច»។
លោក ហ៊ុន ម៉ាណែត នាយករដ្ឋមន្រ្តីនៃកម្ពុជា ចុះជួបសំណេះសំណាលជាមួយកម្មករ និយោជិតជាង ១៨ ០០០នាក់ មកពីរោងចក្រ សហគ្រាសនានា ក្នុងស្រុកបាទី ខេត្តតាកែវ នៅព្រឹកថ្ងៃទី១៩ ខែកញ្ញា ឆ្នាំ២០២៣នេះ។ លោក បញ្ជាក់ថា រាជរដ្ឋាភិបាលបានប្ដេជ្ញាចិត្តរួចហើយ ក្នុងការបន្តផ្ដល់អត្ថប្រយោជន៍ផ្សេងៗបន្ថែមទៀត ដល់បងប្អូនកម្មករនិយោជិត ជាពិសេសប្រាក់ឈ្នួលអប្បបរមារបស់កម្មករនិយោជិតសម្រាប់ឆ្នាំ២០២៤ គឺត្រូវតែមានការដំឡើង។
លោកថ្លែងថា៖ «ខ្ញុំមិនអួតថាឥឡូវបាន២០០ដុល្លារគ្រប់ទេ អត់ទេ តែវាបានវិវឌ្ឍន៍មកហើយ ហើយយើងបានប្តេជ្ញាចិត្តរួចហើយ នឹងបន្តផ្តល់អត្ថប្រយោជន៍ផ្សេងៗទៀត។ គិតទាំងប្រាក់បៀវត្សអប្បបរមា ត្រូវបន្តដំឡើង និងអត្ថប្រយោជន៍ផ្សេងទៀត ឱ្យបងប្អូនកម្មករ កម្មការិនីឱ្យកាន់តែច្រើន»។
ទន្ទឹមនឹងនេះ លោកក៏ជំរុញឱ្យក្រសួងការងារ ត្រូវសន្យាជាមួយរាជរដ្ឋាភិបាលត្រូវធ្វើយ៉ាងម៉េចសម្រេចឱ្យបាន ចំពោះកិច្ចប្រជុំចរចាប្រាក់ឈ្នួលអប្បបរមារបស់កម្មករនិយោជិតវិស័យកាត់ដេរសម្រាប់ឆ្នាំ២០២៤ មុនពិធីបុណ្យភ្ជុំបិណ្ឌ ខណៈក្រសួងបានឯកភាពគ្នារួចហើយកំណត់កិច្ចពិភាក្សាចុងក្រោយ នៅថ្ងៃទី២៨ ខែកញ្ញា ឆ្នាំ២០២៣ ខាងមុខនេះ តាមរយៈការបោះឆ្នោតសម្រេចលើតួលេខរួមមួយ។
លោក ហេង សួរ រដ្ឋមន្ត្រីក្រសួងការងារ បានបដិសេធធ្វើអត្ថាធិប្បាយលើបញ្ហានេះ៕
