ក្រសួងមហាផ្ទៃបានអនុញ្ញាតឱ្យ សមាគមសម្ព័ន្ធសហគមន៍កសិករកម្ពុជា បន្តសកម្មភាពសមាគមជាបណ្តោះអាសន្ន នៅថ្ងៃទី១៧ ខែកក្កដា បន្ទាប់ពីលោកនាយករដ្ឋមន្ត្រី អំពាវនាវឱ្យសមាគមនេះអាចដំណើរការឡើងវិញកាលពីដើមខែមុន។
យោងតាមសេចក្តីសម្រេចរបស់ក្រសួងមហាផ្ទៃ ចុះថ្ងៃទី១៧ ខែកក្កដា ឆ្នាំ២០២៣ បញ្ជាក់ថា ក្រសួងមហាផ្ទៃបានសម្រេច «អនុញ្ញាតឱ្យសមាគមសម្ព័ន្ធសហគមន៍កសិករកម្ពុជា ដែលមានអាស័យដ្ឋានទីស្នាក់ការកណ្តាលនៅផ្ទះលេខ៣៥ ផ្លូវលេខ១០១៣ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បន្តសកម្មភាពសមាគមជាបណ្តោះអាសន្ន រហូតដល់មានការសម្រេចថ្មីរបស់តុលាការ»។
ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា បានឱ្យដឹងថា យោងតាមសេចក្តីសម្រេចរបស់ក្រសួងមហាផ្ទៃ បញ្ជាក់ថាសមាគម ស៊ីស៊ីអេហ្វស៊ី អាចដំណើរការបានឡើងវិញ ហើយបុគ្គលិករបស់សមាគមនៅធ្វើការដដែល ដោយមិនមានការផ្លាស់ប្តូរ ឬប្រែប្រួលអីទេ។
លោក សាវឿន ថ្លែងថា៖ «យើងនឹងបន្តសកម្មរបស់យើងដូចដើម»។ លោកបន្តថា៖ «យើងសង្ឃឹមថា កិច្ចការងារសមាគមនឹងដំណើរការបានឡើងវិញ ក្នុងការជួយប្រយោជន៍ដល់ប្រជាពលរដ្ឋ ជាពិសេសកសិករងាយរងគ្រោះហើយនិងកសិករនៅក្នុងតំបន់ជនបទ ហើយយើងនឹងបន្តការងារយើងដោយឈរលើគោលការណ៍ទស្សនៈវិស័យបេសកម្ម និងគុណតម្លៃរបស់សមាគមយើងផងដែរ»។
លោក សាវឿន បន្តថា រូបគាត់ និងបុគ្គលិករបស់គាត់ផ្សេងទៀតមិនទាន់ត្រូវបានតុលាការលើកលែងបទចោទប្រកាន់នៅឡើយទេ ប៉ុន្តែគាត់នឹងដាក់ពាក្យស្នើទៅតុលាការដើម្បីសុំលើកលែងបទចោទ បន្ទាប់ពីសមាគមរៀបចំដំណើរការឡើងវិញស្រួលបួលហើយ អាចនឹងដាក់ពាក្យស្នើក្រោយបោះឆ្នោតជាតិរួច។
លោក សាវឿន បន្ថែមថា សមាគម ស៊ីស៊ីអេហ្វស៊ី នៅមិនទាន់ក្តាប់បានថាសមាជិក ឬសកម្មជនដីធ្លីប៉ុន្មាននាក់ដែលត្រូវបានចាប់ខ្លួននៅពេលថ្មីៗ ប៉ុន្តែគ្រាន់តែដឹងថា មានសកម្មជនដីធ្លីចំនួន៩នាក់ត្រូវបានចាប់ខ្លួនដាក់ពន្ធនាគារនៅខេត្តកោះកុង ពាក់ព័ន្ធនឹងបទញុះញង់ ហើយសមាគមកំពុងពិនិត្យលទ្ធភាពលើករណីនេះដើម្បីស្នើសុំឱ្យនៅក្រៅឃុំ ឬលើកលែងចោទប្រកាន់ក្នុងពេលឆាប់ៗ។
លោកនាយករដ្ឋមន្ត្រី ហ៊ុន សែន បានអំពាវនាវឱ្យសមាគមសម្ព័ន្ធសហគមន៍កសិករកម្ពុជាអាចដំណើរការឡើងវិញ និងទម្លាក់ចោលបទចោទចំនួនបីប្រឆាំងនឹងបុគ្គលិកស្ថាប័នមួយនេះ បន្ទាប់ពីក្រសួងមហាផ្ទៃបានផ្អាកដំណើរការបណ្ដោះអាសន្នកាលពីដើមខែមិថុនា។
បន្ទាប់ពីជួបជាមួយប្រធានសមាគមសម្ព័ន្ធសហគមន៍កសិករកម្ពុជា និងបុគ្គលិកពីររូបទៀតកាលពីថ្ងៃទី១៩ ខែមិថុនា លោកនាយករដ្ឋមន្ត្រីបានសរសេរនៅក្នុងតេឡេក្រាមថា៖ «យើងពិនិត្យឃើញនូវផលប្រយោជន៍ដែលសមាគមបានធ្វើដូចនេះខ្ញុំបានលើកទឹកចិត្តឱ្យសមាគមបន្តសកម្មភាពដើម្បីផលប្រយោជន៍ប្រជាជនយើង»។ លោកនាយករដ្ឋមន្ត្រីសរសេរបន្ថែមថា៖ «សមាគមត្រូវយកចិត្តទុកដាក់លើកិច្ចការពារចំពោះកម្មករក្នុងវិស័យកសិកម្មផងដែរ»។
កាលពីខែឧសភា សមត្ថកិច្ចបានឃុំខ្លួន និងសាកសួរមនុស្សចំនួន១៧នាក់ដែលបានចូលរួមក្នុងសិក្ខាសាលាដែលរៀបចំដោយសមាគមសម្ព័ន្ធសហគមន៍កសិករកម្ពុជាក្នុងខេត្តរតនគិរី។ លោក ថេង សាវឿន និងសហការីលោកចំនួនពីររូបគឺលោក ញិល ភាព និងលោក ថាន់ ហាច ត្រូវបានចាប់ខ្លួនបន្ទាប់ពីការសាកសួរ ដោយចោទពីបទញុះញង់ និងរួមគំនិតក្បត់។ អ្នកនាំពាក្យក្រសួងមហាផ្ទៃលោក ខៀវ សុភ័ក្រ បានចោទប្រកាន់សមាជិករបស់សមាគមសម្ព័ន្ធសហគមន៍កសិករកម្ពុជាថារួមគំនិតក្បត់តាមរយៈ «បដិវត្តន៍កសិករ»។
បើតាមសំណេរក្នុងតេឡេក្រាម លោកនាយករដ្ឋមន្ត្រី បានណែនាំដល់រដ្ឋមន្ត្រីក្រសួងយុត្តិធម៌ លោក កើត រិទ្ធ ឱ្យធ្វើការជាមួយតុលាការខេត្តរតនគិរីលើកលែងការចោទប្រកាន់ និងអនុញ្ញាតឱ្យសមាគមសម្ព័ន្ធសហគមន៍កសិករកម្ពុជា អាចដំណើរការឡើងវិញឱ្យបានឆាប់តាមដែលអាចធ្វើទៅបាន៕
