រាជរដ្ឋាភិបាលកម្ពុជាបានប្រគល់មណ្ឌលព្យាបាលជំងឺកូវីដ-១៩ ជាដំណាក់កាលទៅឲ្យវិស័យឯកជនវិញដើម្បីឲ្យវិស័យឯកជនដំណើរការឡើងវិញ ក្រោយជំងឺកូវីដ១៩មានភាពធូរស្រាល។
នាយករដ្ឋមន្រ្តី ហ៊ុន សែនបានថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការផ្លូវជាតិលេខ ១១ និងសាងសង់គន្លងផ្លូវថ្មីរវាងក្រុងព្រៃវែងនិងតំបន់ផ្សេងៗកាលពីព្រឹកថ្ងៃទី៦ ខែធ្នូ ថា រាជរដ្ឋាភិបាលបានសម្រេចប្រគល់មណ្ឌលព្យាបាលជំងឺកូវីដ-១៩ ទៅឲ្យវិស័យឯកជន ដើម្បីអាចដំណើរការឡើងវិញ ពីព្រោះស្ថានភាពកូវីដ-១៩ បានធូរស្រាលច្រើនហើយ។
លោក ហ៊ុន សែន បានលើកឡើងថា៖ «ដោយសារជំងឺកូវីដធ្លាក់ចុះនៅទូទាំងប្រទេស ទីក្រុងភ្នំពេញ យើងបានបិទមណ្ឌលព្យាបាលជំងឺកូវីដ-១៩ មួយចំនួន និងបានប្រគល់នូវមណ្ឌលព្យាបាលទាំងនោះទៅឲ្យវិស័យឯកជនវិញ ដើម្បីឲ្យវិស័យឯកជនគេចាប់ផ្ដើមរៀបចំអាពាហ័ពិពាហ៍ និងការប្រជុំផ្សេងៗ»។
លោកបានមានប្រសាសន៍បន្ថែមថា លើកលែងតែស្តាតអូឡាំពិក ដែលនឹងប្រគល់ឲ្យវិញនៅចុងឆ្នាំ ២០២២ ដើម្បីហ្វឹកហាត់ប្រកួតស៊ីហ្គេម ឆ្នាំ២០២៣ ក្រោយពីគម្រោងធ្វើមជ្ឈមណ្ឌលព្យាបាលជំងឺកូវីដ-១៩រួចរាល់ហើយ ដើម្បីផ្ទេរអ្នកជំងឺចេញពីស្តាតអូឡាំពិក។
លោក ហុក គឹមចេង អគ្គនាយកបច្ចេកទេសនិងសុខភាពនៃក្រសួងសុខាភិបាលបានប្រាប់ខេមបូចាថា ការសម្រេចរបស់ថ្នាក់ដឹកនាំដើម្បីប្រគល់មណ្ឌលព្យាបាលជំងឺកូវីដ ១៩ទៅឲ្យវិស័យឯកជន ក្រោយមានការវាយតម្លៃពីក្រុមការងារបច្ចេកទេស។
លោក គឹមចេង មានប្រសាសន៍ថា៖ «យើងមានលទ្ធភាពប្រគល់អាគារអាជីវកម្មទៅឲ្យសប្បុរសជនដែលជាម្ចាស់ទីតាំងនោះឡើងវិញដូចជា អាគារព្រីមមៀ សែនសុខ និងមណ្ឌលឯកជនមួយចំនួនទៀត បើអាគារឬទីតាំងនោះមិនទាន់ចាំបាច់ក្នុងការប្រកបអាជីវកម្មទេ យើងនឹងប្រគល់ឲ្យនៅពេលក្រោយជាជំហានៗ ក្រោយការវាយតម្លៃស្ថានភាពនៃជំងឺកូវីដ ១៩ មានភាពប្រសើរឡើង និងប្រុងប្រយ័ត្នទុកជាមុនខ្ពស់»។
លោក គឹមចេង បន្ថែមទៀតថា៖ «យើងបានមានការវាយតម្លៃលក្ខខណៈបច្ចេកទេសនៃជំងឺឆ្លងនេះរួចហើយ យើងគ្រប់គ្រងបាន ហើយវាជាសញ្ញាណដ៏ល្អមួយដែលយើងនឹងបើកឡើងវិញដើម្បីឲ្យសេដ្ឋកិច្ចសង្គមមានភាពល្អប្រសើរឡើងវិញ»។
រាជរដ្ឋាភិបាលសម្រេចប្រគល់កន្លែងព្យាបាលជំងឺកូវីដទៅឲ្យវិស័យឯកជនវិញ គឺជាសញ្ញាណនៃការធូរស្រាលនៃការឆ្លងជំងឺរាតត្បាត ដែលអាចផ្តល់ឱកាសដល់វិស័យឯកជនអាចដំណើរការឡើងវិញបាន។
លោក មេត មាសភក្ដី អ្នកនាំពាក្យរាជធានីភ្នំពេញបានមានប្រសាសន៍ថា៖ «វាជារឿងដ៏ល្អដែលដកទីតាំងព្យាបាល មានទីតាំងព្យាបាលសម្រាប់ទទួលអ្នកជំងឺ គឺមានអ្នកជំងឺ មានន័យថា មានការឆ្លងច្រើន និងធ្ងន់ ហើយត្រូវមានកន្លែងព្យាបាលជូនពួកគាត់ បញ្ច្រាស់មកវិញ បើថយទីតាំងព្យាបាល ជាសញ្ញាណនៃការថមថយនៃអ្នកជំងឺឆ្លងច្រើន រហូតដល់អាចយកទីតាំងឯកជនទាំងនោះទៅបន្តការងារស្នូលរបស់ពួកគេវិញ ប្រកបរបររកស៊ីគេវិញ»។
លោកបន្ថែមទៀតថា ការប្រគល់នេះ ជាសញ្ញាណដ៏ល្អសម្រាប់វិស័យឯកជនប្រកបរបររកស៊ីឡើងវិញ។
លោក មាសភក្តីឲ្យដឹងថា៖ «វាជាចរន្តមួយនៃការចូលរួមធ្វើឲ្យមានកំណើនសេដ្ឋកិច្ចតាមរយៈការផ្ដល់សេវាឲ្យមានលំហូរហិរញ្ញវត្ថុដូចជា មានគេជួលទីតាំងគាត់ គាត់មានលុយបើកឲ្យបុគ្គលិក បុគ្គលិកអាចប្រើប្រាស់ទិញម្ហូបអាហារប្រចាំថ្ងៃ និងបង់ផ្ទះជួល ម្ចាស់ផ្ទះជួលមានលុយប្រើប្រាស់បន្តដែលជាចរន្តសេដ្ឋកិច្ចរួម»។
លោក យ៉ង គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពមានប្រសាសន៍ថា៖ «វាជារឿងល្អណាស់ដែលរដ្ឋសម្រេចប្រគល់ទីតាំងព្យាបាលទាំងនោះទៅកាន់ក្រុមហ៊ុនឯកជនវិញ ព្រោះបើរដ្ឋជួលពីពួកគាត់ រដ្ឋនឹងចំណេញថវិការវិញ បើកន្លែងនោះគេផ្ដល់ឲ្យរដ្ឋដោយមិនគិតតម្លៃ ក៏ម្ចាស់អាចប្រកបរបររកស៊ីឡើងវិញបានដែរ»។
លោកឲ្យដឹងថា ទោះជាសញ្ញាណដ៏ល្អ តែគួរតែប្រុងប្រយ័ត្នព្រោះកូវីដជាជំងឺដែលមិនទាន់សាបសូន្យ ខណៈពិភពលោកកំពុងប្រទះនិងកើនឡើងផងដែរ។
លោក គឹមអេង បន្ថែមថា៖ «វាជាសញ្ញាណដ៏ល្អបើកូវីដមានការថមថយ អាចធ្វើឲ្យសេវាកម្មសេដ្ឋកិច្ចកម្ពុជាងើបឡើងវិញដូចជា កោះពេជ្រ មានគេការ ចុងភៅ អ្នកសំអាង អ្នកដឹកជញ្ជូនក៏អាចរកចំណូលឡើងវិញ ទោះជាយ៉ាងណាក៏យើងត្រូវប្រុងប្រយ័ត្នដែរ»។
កាលពីថ្ងៃចន្ទ ក្រសួងសុខាភិបាលឲ្យដឹងថា អ្នកឆ្លងកូវីដ-១៩ មាន១៦ករណីថ្មី ក្នុងនោះករណីនាំចូលមានចំនួន៤ករណី។ ចំនួននេះធ្វើឲ្យចំនួនអ្នកឆ្លងសរុបឡើងដល់ ១២០ ២៧២ករណី គិតចាប់ពីមានការឆ្លងរាលដាលកូវីដ-១៩ ដើមឆ្នាំ២០២០ មក។ ករណីឆ្លងភាគច្រើន កើតមានក្រោយពីព្រឹត្តិការណ៍២០ កុម្ភៈ ពេលដែលកម្ពុជាមានការឆ្លងរាលដាលជំងឺកូវីដ-១៩ ក្នុងសហគមន៍។ ក្រសួងឲ្យដឹងដែរថា អ្នកជាសះស្បើយមានចំនួន ១១៦ ៦២៧នាក់ និងអ្នកស្លាប់មានចំនួន២ ៩៦៣នាក់។