សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋរាប់ពាន់គ្រួសារប៉ះពាល់ និងជន់លិចផ្ទះសម្បែងដោយសារជំនន់ទឹកភ្លៀង

ប្រជាពលរដ្ឋធ្វើដំណើរតាមបណ្តោយផ្លូវមួយក្នុងខេត្តពោធិ៍សាត់ ខណៈជំនន់ទឹកភ្លៀងកំពុងលិចផ្លូវ កាលពីថ្ងៃទី៣០ ខែកញ្ញា ឆ្នាំ២០២៣។ (ហ្វេសប៊ុកផេករដ្ឋបាលខេត្តពោធិ៍សាត់)
ប្រជាពលរដ្ឋធ្វើដំណើរតាមបណ្តោយផ្លូវមួយក្នុងខេត្តពោធិ៍សាត់ ខណៈជំនន់ទឹកភ្លៀងកំពុងលិចផ្លូវ កាលពីថ្ងៃទី៣០ ខែកញ្ញា ឆ្នាំ២០២៣។ (ហ្វេសប៊ុកផេករដ្ឋបាលខេត្តពោធិ៍សាត់)

ប្រជាពលរដ្ឋរាប់ពាន់គ្រួសារដែលរស់នៅតាមបណ្ដាខេត្តចំនួនប្រាំបួន កំពុងរងផលប៉ះពាល់ និងជន់លិចផ្ទះសម្បែង ខណៈស្រែចម្ការរបស់ពួកគេប្រមាណ៦ ៩៧៤ហិកតាជន់លិច និង​ខូចខាត ដោយសារជំនន់ទឹកភ្លៀង នេះបើតាមរបាយការណ៍បឋមពីអ្នកនាំពាក្យ គណៈកម្មាធិការគ្រប់គ្រងគ្រោះមហន្តរាយ។

លោក សុទ្ធ គឹមកុសលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ ថ្លែង​ប្រាប់ ខេមបូចា យ៉ាងហោចណាស់ មានខេត្តចំនួន៩ ដូចជា ខេត្តព្រះវិហារ ក្រចេះ បាត់ដំបង ពោធិ៍សាត់ ប៉ៃលិន និងកំពង់ធំ​ ត្បូងឃ្មុំ កោះកុង និងព្រះសីហនុ បានជួបនឹងជំនន់​ទឹកភ្លៀង ធ្វើឲ្យប៉ះពាល់ដល់ការរស់នៅ ខូចខាតផ្ទះសម្បែង ស្រែចម្ការ និងហេដ្ឋារចនាសម្ព័ន្ធនានា។ ប៉ុន្តែគិតត្រឹមថ្ងៃទី២ ខែតុលានេះ ស្ថានភាពទឹកបានស្រកទៅហើយ​នៅតាមបណ្ដាខេត្ត​ទាំង​នេះ លើកលែងតែខេត្តកំពង់ធំ និងខេត្តពោធិ៍សាត់ប៉ុណ្ណោះ។

លោក គឹមកុសលមុនី ថ្លែងថា៖ «ជារួមទឹកជំនន់ដែលបានកើតចាប់ពីថ្ងៃទី១២ ដល់ថ្ងៃទី២នេះ​យើង​មាន៩ខេត្តដែលប៉ះពាល់។ ប៉ុន្តែបច្ចុប្បន្ននេះនៅសល់តែខេត្តកំពង់ធំ និងខេត្តពោធិ៍​ដែល​នៅមានទឹកជំនន់នៅឡើយ នៅពេលខាងមុខបើអត់មានភ្លៀងខេត្តពោធិ៍សាត់នឹងអាចស្រក ហើយ​កំពង់ធំនៅលិចនៅឡើយ ដោយសារកម្ពស់ទឹកដល់កម្រិតប្រកាសអាសន្ន»

អ្នកនាំពាក្យរូបនេះបញ្ជាក់ថា ខេត្តដែលរងផលប៉ះពាល់ធ្ងន់ធ្ងរជាងគេ គឺខេត្តកំពង់ធំ ដែល​មាន​ស្រុកនិងក្រុងចំនួន៨ និង២៨ឃុំសង្កាត់ ហើយប៉ះពាល់ដល់ប្រជាជន ៥ ២៩៩​គ្រួសារ លិចផ្ទះ​សម្បែង​ចំនួន ២ ០២៥ខ្នងផ្ទះ ក្នុងនោះមាន២០៩គ្រួសារបានជម្លៀសទៅទីទួលសុវត្ថិភាព និង ប៉ះពាល់លើដំណាំស្រូវមានចំនួន ៣ ៤៣៩ហិកតា។ ចំណែកខេត្តពោធិ៍សាត់ ប៉ះពាល់​៤ក្រុង-​ស្រុក ស្មើនឹង២១ឃុំ​-សង្កាត់​ ប៉ះពាល់ប្រជាពលរដ្ឋ ៣ ៤១០​គ្រួសារ​ ​ផ្ទះ​២ ៧៨៥​ខ្នង ​ស្រូវ៥៤៤​ហិកតា និង​ជម្លៀសពលរដ្ឋ ១៤១​គ្រួសារ​។ រីឯខេត្តព្រះវិហារប៉ះពាល់ស្រុកនិងក្រុងចំនួន៦ ប៉ះពាល់​ប្រជាជនចំនួន១០ឃុំសង្កាត់ ប៉ះពាល់១២៧គ្រួសារ ផ្ទះលិចទឹកមាន១៥០ខ្នង និង​លិច​ស្រូវចំនួន៩៥៧ហិកតា។

ប៉ុន្តែលោក គឹមកុសលមុនី មិនអាចទាក់ទងសុំការអត្ថាធិប្បាយពីបច្ចុប្បន្នភាព​នៃជំនន់​ទឹក​ភ្លៀង​បានទេ កាលពីថ្ងៃទី៣ ខែតុលា ឆ្នាំ២០២៣។

អ្នកស្រីសោម សុវណ្ណា ចៅសង្កាត់រងទី២ នៃសង្កាត់រលកស បានឱ្យដឹងថា ស្ថានភាពជំនន់​ទឹក​ភ្លៀង​នៅតំបន់អ្នកស្រី ហាក់មានភាពធ្ងន់ធ្ងរជាងឆ្នាំកន្លងទៅ ហើយអ្នកស្រីរំពឹងថាមន្រ្តីជំនាញ​នឹង​ជួយប្រជាពលរដ្ឋឲ្យបានស្មើភាពគ្នា ដោយមិនមានការរើសអើង។

អ្នកស្រី​ថ្លែងថា៖ «ឆ្នាំនេះលិចព្រួយបារម្ភជាង ទឹកធំមកពីលើហ្មង៎។ ខ្ញុំចង់ឲ្យស្ថាប័ន​ពាក់​ព័ន្ធ​​ជួយអ្នកក្រ សូមជួយគាត់ឲ្យស្មើភាពគ្នា»។

ចំណែកអ្នកស្រី សន ភារម្យ ជាពលរដ្ឋរស់នៅភូមិកោះ សង្កាត់រលកសបន្តថា ទឹកជំនន់​ចាប់​ផ្ដើមលិចចូលផ្ទះអ្នកស្រីនៅយប់ថ្ងៃទី២៨ ខែកញ្ញា ហើយមកទល់ពេលនេះ​អ្នកស្រីបាន​ជម្លៀស​មកនៅចិញ្ជើមថ្នល់បណ្ដោះអាសន្ន ខណៈផ្ទះអ្នកស្រីលិចត្រឹមមាត់ទ្វារ។ អ្នកស្រី​ភារម្យបញ្ជាក់ថា មិនទាន់មានអាជ្ញាធរមកជួយ ឬផ្ដល់ជាជំនួយ​ដល់គ្រួសារអ្នកស្រី​នៅឡើយ​ទេ។

អ្នកស្រី ភារម្យ និយាយថា៖ «ទឹកលិចមកលំបាកកន្លែងរស់នៅមែនទែន ទាំងពីការហូបចុក និង​ស្នាក់​នៅ។​ ទឹកលិចមកនៅយប់ថ្ងៃ២៨នឹងឯង អត់ឃើញមានមេភូមិអ្នកណាអើតមើលទេ»

ជាស្រ្តីមេផ្ទះ និងមានប្ដីជាកម្មករសំណង់ អ្នកស្រីភារម្យប្រាប់ថា មានជីវភាពមិនធូធារទេ ហើយ​អ្នកស្រីគ្មានស្រែចម្កានឹងគេឡើយ​ ដោយរំពឹងថាអាជ្ញាធរនឹង​ជួយយក​ឧស្សាហ៍​ប្រជាជន​ដោយស្មើភាពគ្នា ក្នុងគ្នាលំបាកនេះ។

អ្នកស្រី ភារម្យ បន្ថែមថា៖ «អត់មានបានទេ[អំណោយ] សំណូមពរឱ្យជួយអ្វីក៏បាន ព្រោះ​លំបាក​ខ្លាំង​ ប្ដីខ្ញុំអត់បានទៅធ្វើការ គាត់ខ្លាចប្រពន្ធនឹងកូនលង់ទឹក»

ទឹកហូរចេញពីស្ទឹងពោធិ៍សាត់​ ព្រោះកម្ពស់ទឹកឡើងខ្លាំងដោយសារជំនន់​ទឹក​ភ្លៀង។ រូបថតផុសនៅលើនៅលើ ហ្វេសប៊ុកផេក​រដ្ឋបាល​ខេត្តពោធិ៍សាត់ កាលពីថ្ងៃទី៣០ ខែកញ្ញា ឆ្នាំ២០២៣។

លោក គឹមកុសលមុនី បញ្ជាក់ថា អាជ្ញាធរក្ដោបក្ដាប់ និងឆ្លើយតបទាន់ពេលវេលា​ចំពោះ​ជំនន់​ទឹកភ្លៀងនេះ ដោយបានចូលរួមទប់ស្កាត់កាត់បន្ថយផលប៉ះពាល់ និងជួយជម្លៀស​ប្រជាពលរដ្ឋ​ទៅទីទួលសុវត្ថិភាព។ លោក គន់ គីម អនុប្រធានទី១ នៃគណៈកម្មាធិការជាតិ​គ្រប់គ្រង​គ្រោះមហន្តរាយ​ មានប្រសាសន៍យ៉ាងខ្លីថា ស្ថានភាពទឹកជំនន់មានភាព​ល្អប្រសើរ​ហើយ។

លោក ខូយ រីដា អភិបាលខេត្តពោធិ៍សាត់ មិនអាចទាក់ទងដើម្បីសុំអធិប្បាយបានទេ។

យ៉ាងណាមិញ លោកហ៊ុន ម៉ាណែត នាយករដ្ឋមន្រ្តីកម្ពុជាដែលទើបឡើង​កាន់តំណែង​ក្នុង​អាណត្តិទី៧នេះ បានចេញសារបន្ទាន់កាលពីថ្ងៃ២៩ ខែកញ្ញា ដោយចាត់ឱ្យអភិបាលខេត្ត​ក្រុង​ស្រុក កងកម្លាំងប្រដាប់អាវុធទាំងអស់ យកចិត្តទុកដាក់ និងទទួលខុសត្រូវនៅ​តាមតំបន់​គោល​ដៅរបស់ខ្លួនដែលមានបញ្ហាទឹកជំនន់ ដើម្បីជួយសង្រ្គោះពលរដ្ឋឱ្យ​បានទាន់​ពេល​វេលា។

លោក ម៉ាណែត មានប្រសាសន៍ថា៖ «ខ្ញុំសូមឲ្យឯកឧត្តមលោកជំទាវ អភិបាលរាជធានីខេត្ត​ទាំងអស់ គឺត្រូវក្ដាប់ឱ្យជាប់ តាមដានឲ្យជាប់ ដោះស្រាយឲ្យទាន់​ពេលវេលានៅក្នុងករណី​ដែលមានបញ្ហាទឹកជំនន់ ដែលប៉ះពាល់នៅក្នុងតំបន់ទទួលខុសត្រូវរបស់ខ្លួន ជាពិសេស​យក​ចិត្ត​ទុកដាក់ទៅលើការជួយសង្រ្គោះ»។

លោក សុខ លូ អភិបាលខេត្តបាត់ដំបង បានថ្លែងថា ស្ថានភាពជំនន់ទឹកភ្លៀងនៅ​ខេត្ត​បាត់ដំបង​ធ្វើឱ្យប៉ះពាល់ដល់ក្រុង និងស្រុកចំនួន៩ ចំណែកទំហំនៃការខូចខាតប៉ះពាល់​ទៅ​លើ​ផលប៉ះពាល់ដូចជា ផ្ទះសម្បែងប្រជាពលរដ្ឋ ស្រែចម្ការ ផ្លូវថ្នល់ លោកថា​អាជ្ញាធរ​មិនទាន់​វាយតម្លៃភ្លាមៗបានទេ។

លោក សុខ លូ បញ្ជាក់ថា៖ «ប៉ះពាល់ផ្ទះបងប្អូនប្រជាពលរដ្ឋច្រើន ប៉ះពាល់ដំណាំស្រូវ​មួយ​ចំនួន​ដែលទុំមួយចំនួន ឯទឹកចូលក្រុងដោយសារទឹកស្ទឹងសង្កែខ្ពស់ហូរ​តាមប្រព័ន្ធលូចូល​មកក្រុង តែមិនលិចយូរទេ មកដល់ពេលនេះអត់មានបញ្ហាអ្វីទេស្រកអស់ហើយ»។

លោក សុខ លូ បញ្ជាក់ថា ចំពោះផ្លូវថ្នល់ដែលរងការខូចខាតអាជ្ញាធរនឹងព្យាយាម​ជួសជុល​ទៅតាមលទ្ធភាព ដើម្បីឱ្យប្រជាពលរដ្ឋប្រើប្រាស់ ខណៈផ្លូវខ្លះលោកថាមិនទាន់​អាចជួសជុល​ក្នុងរដូវវស្សាបានទេ។

អភិបាលខេត្តបាត់ដំបង បានចុះត្រួតពិនិត្យជំនន់ទឹកភ្លៀង នៅតំបន់មួយ​ក្នុងខេត្ត​ កាលពីថ្ងៃទី១​ ខែតុលា​ ឆ្នាំ២០២៣។ (ហ្វេសប៊ុកផេករដ្ឋបាលខេត្តបាត់ដំបង)

លោក វ៉ី សំណាង អភិបាលខេត្តកំពង់ស្ពឺ ប្រាប់ឲ្យដឹងថា បច្ចុប្បន្នភាព​ខេត្តកំពង់ស្ពឺ​មិន​ទាន់​ស្ថិតក្នុងកម្រិតប្រឈមហានិភ័យនៅឡើយទេ ហើយបើទោះជាយ៉ាងណា ក្រុមកម្លាំង​សមត្ថកិច្ច បានត្រៀមកម្លាំងរួចជាស្រេច ក្នុងរកណីជួយសង្រ្គោះប្រជាជន។

លោក សំណាង ថ្លែងថា៖ «បញ្ហាប្រឈមអត់មានទេ មកទល់ពេលនេះ។ ជាទូទៅ​ឲ្យតែ​ខែវស្សា​យើងតែងតែជម្រាបគាត់[ប្រជាជន] វិធាន និងកម្លាំងសរុបយើងត្រៀមបង្ការ​រួច​ហើយសម្រាប់​​​ជួយពួកគាត់»។

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ថ្លែងថាជំនន់ទឹកភ្លៀង និងទឹកទន្លេនៅឆ្នាំនេះ មិនបានជះផលធ្ងន់ធ្ងរដល់ប្រជាពលរដ្ឋ ផលដំណាំ ស្រែចម្កាដូចកាល​ពីឆ្នាំ២០២២ ទេ។ ទោះជាយ៉ាងណា មន្ត្រីរបស់ក្រសួងកសិកម្មនៅតាមបណ្ដាខេត្ត កំពុង​យក​ចិត្ត​​ទុកដាក់យ៉ាងខ្លាំងជុំវិញបញ្ហានេះ ដើម្បីតាមដាន និងកំណត់នូវទំហំនៃផលប៉ះពាល់ រួច​ទើប​ដោះស្រាយទៅតាមស្ថានភាពជាក់ស្ដែងបន្ទាប់ពីទឹកស្រក។

កញ្ញា ថ្លែងថា៖ «យើងនឹងអាចវាយតម្លៃច្បាស់លាស់ពីផលប៉ះពាល់​ និងការខូចខាតជាក់ស្ដែង​ក្រោយពេលដែលទឹកស្រករួចអស់ បន្ទាប់ពីហ្នឹងទៀតយើងនឹងកំណត់ពីវិសាលភាព​នៃ​វិធានការ​ឆ្លើយតប ហើយនិងការអន្តរាគមន៍ណាមួយនៅក្នុងករណីចាំបាច់»។

ចំណែកនៅខេត្តសៀមរាបនៅថ្ងៃទី៣ ខែតុលា​ មន្ទីរសាធារណៈការ និងដឹកជញ្ជូន​ខេត្តសៀមរាប បានប្រកាសផ្អាកចរាចរណ៍លើកំណាត់ផ្លូវជាច្រើនខ្សែរ ដូចជាកំណាត់ផ្លូវ ជាតិលេខ៦៤ ផ្លូវជាតិលេខ៦៧ ផ្លូវខេត្តលេខ២៦៥E ផ្លូវលេខ២៦៦C ផ្លូវលេខ២៦៦F  ផ្លូវលេខ២៦៧៦ ផ្លូវលេខ២៦៤៥ និងផ្លូវលេខ៦២-៣។

យោងតាមសេចក្ដីជូនដំណឹងរបស់ក្រសួងធនធានទឹក និងឧត្តុនិយម ចេញផ្សាយនៅថ្ងៃទី២ ខែតុលា ឆ្នាំ២០២៣ បានឲ្យដឹងថា កម្ពុជារងប្រព័ន្ធសម្ពាធទាប (ITCZ) នៅ លើអាងមេគង្គ ថៃ ឡាវ នឹងរំកិលចុះមកក្រោម អូសបន្លាយលើកម្ពុជាជាមួយនឹងខ្យល់មូសុងនិរតីខ្សោយ ដែល​ចាប់ពីថ្ងៃ០២ ដល់ថ្ងៃទី០៤ ខែតុលា នឹងធ្វើឲ្យបណ្តាខេត្តនានានៅភាគពាយ័ព្យ ភាគខាងជើង និងភាគឦសាន្ត អាចមានភ្លៀងធ្លាក់នៅក្នុងកម្រិតខ្សោយទៅមធ្យម ជាមួយនឹងទំហំទឹកភ្លៀង​ធ្លាក់ គ្របដណ្ដប់លើផ្ទៃដីពី ៤០-៦០%។

រីឯរាជធានី និងបណ្តាខេត្តដទៃទៀតនៅភាគខាងត្បូង ខាងកើត ជាប់ប្រទេសវៀតណាម និងតំបន់មាត់សមុទ្រ អាចមានភ្លៀងនៅក្នុងកម្រិតពីតិចទៅបង្គួរ ជាមួយនឹងទំហំភ្លៀងធ្លាក់ គ្របដណ្ដប់លើផ្ទៃដី ៦០-៨០%។


ស្ថានភាពជំនន់ទឹកភ្លៀងនៅស្ទឹងសង្កែ កាលពីថ្ងៃសុក្រ ទី២៩ ខែកញ្ញា ឆ្នាំ២០២៣ ​ដែលបណ្ដាលឱ្យលិចលង់ក្រុងបាត់ដំបងយ៉ាងដំណំ ។ (ខេមបូចា/ អ៊ួន ឈិន)

លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព យល់ឃើញ​ថា បញ្ហាជំនន់ទឹកភ្លៀងជាបញ្ហាដែលតែងកើតមានរៀងរាល់ឆ្នាំ ដោយសារតែការបាត់បង់​គម្រប​ព្រៃឈើនៅកម្ពុជា។ តែយ៉ាងណាក៏ដោយរដ្ឋាភិបាលត្រូវត្រៀម​លក្ខណៈជួយ​ប្រជាពលរដ្ឋ​ក្រោយពេលគ្រោះទឹកជំនន់បានស្រាកស្រាន្ត ជាពិសេស​ប្រជាកសិករ​ដែល​ខូច​ខាត​ស្រែចម្ការ ផលដំណាំ ផ្ទះសម្បែង។

លោក គិមអេង ថ្លែងថា៖ «អ្នកខ្លះគាត់លិចលង់ស្រូវអង្ករអស់ ចាំបាច់ត្រូវតែធ្វើការ​ដាំដុះ​ទ្រង់ទ្រាយមួយដែលអាចលក់ដូរចិញ្ចឹមជីវិតបាន រដ្ឋាភិបាលគួរឧបត្ថម្ភទន់​ខ្លះដល់​កសិករ​បើអាចធ្វើទៅបាន។ លើសពីនេះត្រូវគិតគូរពីជីវភាពពួកគាត់ គាត់អាចប្រឈមមុខនឹង​ជីវភាព»។

ស្ថានទូតអាមេរិកប្រចាំកម្ពុជាបានចុះផ្សាយកាលពីឆ្នាំ២០២០ថា ប្រទេសកម្ពុជាកំពុងទទួល​រងគ្រោះ​ទឹកជំនន់ខ្លាំងបំផុត ​ក្នុងរយៈពេល​២០ឆ្នាំមក​នេះ ពិសេស​នៅតាមតំបន់​ដែល​មិន​បាន​ត្រៀមចំពោះទឹកជំនន់ដ៏គំហុកនេះ ធ្វើឱ្យប៉ះពាល់ជីវិតមនុស្ស ដីកសិកម្ម និងផ្លូវថ្នល់ ដែលជា​ហេតុ​ធ្វើឲ្យមានការប៉ះពាល់ដល់បញ្ហាស្បៀងអាហារ និងការប្រកបជីវភាព​រស់នៅ​របស់​ប្រជាជន៕

469 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម