សមាគមសម្ព័ន្ធអ្នកសារព័ត៌មានកម្ពុជា

ផ្ទះប្រជាពលរដ្ឋរាប់ពាន់ខ្នងត្រូវបានជន់លិចដោយសារតែជំនន់ទឹកភ្លៀងនៅរដូវប្រាំងដើមឆ្នាំនេះ

ស្ត្រីម្នាក់និងកូនអង្គុយក្រោមផ្ទះ ខណៈជន់លិចដោយជំនន់ទឹកភ្លៀង នៅសង្កាត់ ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង
ស្ត្រីម្នាក់និងកូនអង្គុយក្រោមផ្ទះ ខណៈជន់លិចដោយជំនន់ទឹកភ្លៀង នៅសង្កាត់ ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង

យ៉ាងហោចណាស់ផ្ទះប្រជាពលរដ្ឋដែលមានទីលំនៅនៅតាមសណ្ដស្ទឹងព្រែកត្នោតប្រមាណ ២ ៣០៥គ្រួសារបានរងផលប៉ះពាល់ដោយសារតែជំនន់ទឹកភ្លៀងខុសរដូវ ដោយពលរដ្ឋ​មួយ​ចំនួនអះអាងថាពួកគេខាតបង់ថវិកាព្រោះតែលិចស្រែចម្ការបស់ពួកគេ និងខាតបង់ទ្រព្យ​សម្បត្តិមួយចំនួន។

នៅតាមភូមិមួយចំនួនក្នុងខណ្ឌដង្កោ និងសង្កាត់ពីរផ្សេងទៀតនៅក្រុងតាខ្មៅ គេនឹងឃើញផ្ទះ​ប្រជាពលរដ្ឋ​ដែលនៅប្របមាត់ស្ទឹងជាច្រើនខ្នងលិចលង់ដោយជំនន់ទឹកភ្លៀងនារដូវប្រាំង ខណៈ​ផ្ទះពលរដ្ឋខ្លះលិចត្រឹមក និងខ្លះទៀតនៅអាចធ្វើដំណើរទៅមកបាន និងខ្លះទៀត​ត្រូវប្ដូរ​ទីលំនៅបណ្ដោះអាសន្នមកនៅទីទួលសុវត្ថិភាពក្បែរៗនោះ។

ទន្ទឹមនឹងការជន់លិចផ្ទះសម្បែង ពលរដ្ឋទាំងនោះក៏បានលើកឡើងជាចម្ងល់ និងសម្ដែងការ​ហួសចិត្ត ដោយសារតែមិនធ្លាប់បានឃើញពីមុនឡើយ ថាមានទឹកជន់នៅរដូវប្រាំងដូច្នេះ។

ស្រ្តីវ័យ៧០ឆ្នាំ កំពុងអង្គុយនៅលើគ្រែដែលចងកៅស៊ូតង់ជាដំបូលនៅខាងមុខផ្ទះឈើដែល​មានទឹកលិចដល់កាំជណ្ដើរ គឺអ្នកស្រី អ៊ុក ង៉ែត ប្រាប់ឱ្យដឹងថា អ្នកស្រីមានការចម្លែកចិត្ត នឹកស្មានមិនដល់ថាមានទឹកជំនន់នៅរដូវប្រាំង ត្បិតរដូវវស្សាកន្លងទៅក៏ទឹកមិនឡើង​ខ្លាំង​ដូច្នេះដែរ។

អ្នកស្រីពោលថា៖ «ខ្ញុំចម្លែកក្នុងចិត្តដែរ មិនដែលខែនេះហើយមានទឹកខ្លាំងម្លឹងៗ រើឥវ៉ាន់អត់​ទាន់ទេ ចានក៏ទៅអស់ ខោអាវក៏ទៅអស់ដែរ ស្រាប់តែទឹកមករើអត់ទាន់»។

ដោយសារតែមិនដឹងថាទឹកបន្តឡើងឬក៏ស្រក អ្នកស្រី ង៉ែត មានក្ដីបារម្ភថា ប្រសិនជាទឹកលិច​ខ្លាំងជាងនេះ អ្នកស្រីនឹងគ្មានកន្លែងស្នាក់នៅបណ្ដោះអាសន្ន ហើយបារម្ភអំពីសត្វមានពិស ដែលឡើងតាមទឹក។

ស្រ្តីចំណាស់រូបនេះ បន្ថែមថា៖ «ខ្ញុំបារម្ភខ្លាចសត្វមានពិសអីវាមក ហើយបារម្ភទឹកឡើងខ្លាំង​មែនទែនមិនដឹងទៅនៅឯណា លោតែវាលិចថ្នល់ទៅ! ខ្ញុំចាស់ជរាពិបាកអ៊ីចឹង»។

ព្រះសង្ឃចែវទូកនៅក្នុងវត្ត ខណៈជន់លិចដោយជំនន់ទឹកភ្លៀងខុសរដូវ នៅសង្កាត់ព្រែកជ្រៃ ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ សុវណ្ណ ស្រីពេជ្រ
ព្រះសង្ឃចែវទូកនៅក្នុងវត្ត ខណៈជន់លិចដោយជំនន់ទឹកភ្លៀងខុសរដូវ នៅសង្កាត់ព្រែកជ្រៃ ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ សុវណ្ណ ស្រីពេជ្រ

ពលរដ្ឋមួយរូបទៀតកំពុងរៀបចំឥវ៉ាន់នៅមុខផ្ទះដែលកំពុងលិចទឹកក្នុងសង្កាត់ស្ពានថ្ម គឺ​អ្នកស្រី  យឺន សំបូរ អាយុ៥០ឆ្នាំ លើកឡើងស្រដៀងគ្នាថា ជារៀងរាល់ឆ្នាំទឹកស្ទឹងឡើង ឬអាចលិចផ្ទះសម្បែងពលរដ្ឋនៅរដូវវស្សាតែប៉ុណ្ណោះ ប៉ុន្តែចម្លែកនៅដើមឆ្នាំនេះ បែរជា​ទឹក​លិច​ផ្ទះពលរដ្ឋនារដូវប្រាំងទៅវិញ។

អ្នកស្រី សំបូរ បន្តថា៖ «តាំងពីអ៊ំកើតមក អាយុហាសិបជាងនេះ មិនដែលប្រទះទេ​ទឹកឡើងខែ​ប្រាំង ធ្លាប់តែឃើញទឹកឡើងខែភ្ជំបិណ្ឌ នំាគ្នាហួសចិត្តព្រោះអត់ដែលឃើញក្នុង​ប្រវត្តិ​សាស្រ្ត»។

អ្នកស្រី សំបូរ ឱ្យដឹងថា៖ «ឥវ៉ាន់អត់សំខាន់អណ្ដែត អាណាសំខាន់យកបានទុកអ៊ីចឹងខ្លះទៅ ទឹកហូរខ្លាំងតែថ្ងៃហ្នឹងទឹកថេរអត់ឡើងអត់ស្រក»។

បើតាមពលរដ្ឋរូបនេះ ឱ្យដឹងថា ទឹកជំនន់ដែលលិចផ្ទះពលរដ្ឋនារដូវប្រាំងនេះ អាចដោយសារ កត្តាជាច្រើន ដូចជាការបាត់បង់ព្រៃឈើ ភ្នំ និងការសាងសង់បុរី ផ្ទះល្វែង ដែលមិនមាន​ប្រព័ន្ធ​បង្ហូរទឹកឱ្យបានត្រឹមត្រូវ។ ក៏ប៉ុន្តែ អ្នកស្រីក៏មិនបន្ទោសទាំងស្រុងទៅលើកត្តានេះដែរ ព្រោះ​ដោយសារតែមានការអភិវឌ្ឍ ទើបមានការរីកចម្រើនទៅមុខ។

អ្នកស្រី សំបូរ និយាយយ៉ាងដូច្នេះថា៖ «អ្វីៗប្រែប្រួលទៅតាមកាលៈទេសៈ ខ្លាំងជាងគេគឺអស់​ព្រៃឈើ ទី២ អស់ភ្នំ អស់ប្រព័ន្ធទឹកលូ ពីមុនយើងមានប្រព័ន្ធទឹក ដល់តែឥឡូវទៅជាបុរីអស់​ទៅ​បានទឹកវាស្ទះ បើកុំអ៊ីចឹងវាមានកន្លែងហូរទៅ»។  អ្នកស្រីបន្តថា៖ «តែមិនដឹងធ្វើម៉េច បើយើងមិនមានការអភិវឌ្ឍយើងក៏អត់មានការរីកចម្រើនទៅមុខដែរ»។

ក្រៅតែពីរផ្ទះប្រជាពលរដ្ឋ នៅសង្កាត់ស្ពានថ្ម គេឃើញមានវត្តចំនួន២រងការជន់លិច គឺ​វត្តចម្ការខ្សាច់ និងវត្តហា ខណៈស្ពានចំណាស់ពីរ គឺស្ពានវត្តហា និងស្ពានវត្តកំពង់ក្ដុល ក៏មានសភាពទ្រុឌទ្រោម និងមានស្នាមប្រេះ ត្បិតទឹកស្ទឹងហូរត្របាញ់ក្រោមស្ពាន ប៉ុន្តែ​អាជ្ញាធរ​ហាមឃាត់មិនឱ្យពលរដ្ឋឆ្លងកាត់ឡើយ ខ្លាចមានគ្រោះថ្នាក់។

ដោយសារតែស្ពានមានសភាពទ្រុឌទ្រោម អ្នកស្រី  សំបូរ រំពឹងថានៅពេលដែលទឹកស្រក រដ្ឋាភិបាលនឹងជួយសង់ស្ពានវត្តហា ក្នុងសង្កាត់ស្ពានថ្ម ឱ្យពលរដ្ឋបានធ្វើដំណើរ​ទៅមក​ពី​ត្រើយម្ខាងទៅម្ខាងទៀត ត្បិតស្ពាននេះមានសភាពចាស់ទៅហើយ។

អ្នកស្រីលើកឡើងថា៖ «សំណូមពរឱ្យរដ្ឋាភិបាលជួយកសាងស្ពានឆ្លងវត្តហាទៅត្រើយម្ខាង ព្រោះអីស្ពានហ្នឹងវាទ្រុឌទ្រោមហើយ កាលគេធ្វើគេដាក់ជើងសរសរចាស់ ហើយវានៅក្នុង​ទឹកយើងមើលមិនឃើញ»

ក្មេងៗដើរឆ្លងទឹក ដែលជន់លិចដោយជំនន់ទឹកភ្លៀង នៅសង្កាត់ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង
ក្មេងៗដើរឆ្លងទឹក ដែលជន់លិចដោយជំនន់ទឹកភ្លៀង នៅសង្កាត់ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង

ចៅសង្កាត់រងទី១ នៃសង្កាត់ស្ពានថ្ម គឺលោក លឹម សំបូរ អាយុ៧០ឆ្នាំ លើកឡើងថា លោក មានការភ្ញាក់ផ្អើលនៅពេលដែលមានទឹកជន់នារដូប្រាំង ហើយនេះជាលើកទីមួយ ដែលមាន​ទឹកលិចសាលាសង្កាត់ និងផ្ទះពលរដ្ឋនៅរដូវប្រាំង។ លោកបន្តថា នៅក្នុងសង្កាត់របស់លោក ទឹកចាប់ផ្ដើមលិចនៅថ្ងៃទី១៣កាលពីសប្ដាហ៍មុន ហើយមាន២៥០ខ្នងផ្ទះ ដែលរងការជន់លិច និងខូចខាតហេដ្ឋារចនាសម្ព័ន្ធបន្តិចបន្តួចប៉ុណ្ណោះ។

លោក សំបូរ ថ្លែងថា៖ «ខ្ញុំមិននឹកថាវាលិចដល់ថ្នាក់ហ្នឹង ជំនន់ទឹកភ្លៀងណាមកលិចខែមួយ ខែពីរ ដែលជាខែចែត្រ យើងមិនដែលមាន! កន្លងទៅវាលិចតែខែ១០ ហើយជំនន់​ទឹកភ្លៀង​នេះ ធ្វើឱ្យលិចលង់ទ្រព្យសម្បតិ្តប្រជាពលរដ្ឋប្រមាណ២៥០គ្រួសារ ហេដ្ឋារចនាសម្ព័ន្ធ​ខូច​ខាត​តិចតួចទេ»។

លោក សំបូរ អះអាងថា អ្នកដែលរងផលប៉ះពាល់ជាងគេ គឺពលរដ្ឋដែលមាន​ផ្ទះនៅក្បែរ​សណ្ដ​ស្ទឹង បើប្រៀបធៀបទឹកដែលលិចនៅរដូវប្រាំងឆ្នាំនេះ និងរដូវវស្សាឆ្នាំកន្លងទៅ  គឺ​ទឹក​ឡើងនៅរដូវប្រាំងនេះខ្លាំងជាង។ តែទោះជាយ៉ាងណា កម្លាំងអាជ្ញាធរនៅតែបន្តតាមដាន និង​ប្រចាំការ២៤ម៉ោងដើម្បីការពារប្រជាពលរដ្ឋផងដែរ។

ចំណែកពលរដ្ឋនៅឃុំគងនយ សង្កាត់ដង្កោ គឺអ្នកស្រី អាន គឹមអាង អាយុ៥៤ ថ្លែងថា ក្រៅ​តែ​ពីលិចផ្ទះសម្បែង ស្រែប្រាំងអ្នកស្រីប្រវាស់គេ ទើបតែសាបព្រោះបានជិតមួយខែ និងកំពុង​ពេញ​លូតលាស់ល្អ ត្រូវទឹកជន់លិចគ្មានសល់ ខណៈអ្នកស្រីកំពុង​បារម្ភថា​គ្មាន​ថវិកាដើម្បី​សង​ទៅធនាគារ និងម្ចាស់ស្រែវិញ ត្បិតរំពឹងថានឹងប្រមូលផលស្រូវបាន នឹងបានសងទៅ​ម្ចាស់​ស្រែ និងធនាគារ។

អ្នកស្រី គឹមអាង រៀបរាប់ថា៖ «ស្រែមីង២ហិកតា រលួយអស់ហើយក្មួយ! ខាងត្បូងប្រឡាយ​ហ្នឹង ស្រែហ្នឹងជួលគេធ្វើ ទើបតែព្រោះ និងបូមទឹកដាក់ បាចជីហើយ ឥឡូវទៅអស់! លុយមិន​ទាន់​សងថ្លៃជីថ្លៃភ្ជួរអស់២លានហើយ ខ្ចីគេទាំងអស់  យកលុយគេមក២លាន អត់មានអី​ឱ្យគេ​វិញទេ»

អ្នកស្រី គឹមអាង បន្តថា អ្នកស្រីមិនដែលនឹកស្មានសោះឡើយ ថាទឹកអាចជន់លិចផ្ទះសម្បែង និងស្រែចំការអ្នកស្រី នៅរដូវប្រាំងដូច្នេះ។

កំពុងអង្គុយបោកខោអាវ នៅលើផ្ទះប្រក់ស័ង្កសី ដែលលិចដល់ជញ្ជាំងផ្ទះ អ្នកស្រីនិយាយថា៖ «នរណានឹកស្មានថាខែប្រាំងទឹកលិចមក អត់នឹកស្មានទេ ស្រែកំពុងតែល្អ ឆ្នាំទៅស្រូវកំពុង​ចេញ​លិចអស់ដែរ ខាតអស់៣លាន ឥលូវនេះ៥០០រត់មុខហើយ»

ចំណែកមេភូមិវាលថ្លាន់ ក្នុងសង្កាត់ដង្កោ គឺលោក ផុន ផាន អាយុ៧០ឆ្នាំ មានប្រសាសន៍ថា ទឹកស្ទឹងចាប់ផ្ដើមលិចចូលផ្ទះអ្នកភូមិនៅថ្ងៃទី១៤ ខែមករា ក្នុងនោះមានផ្ទះពលរដ្ឋ​ចំនួន​១១៦​គ្រួសាររងការជន់លិច ដែលលោកចាត់ទុកថាជាលើកទីមួយក្នុងឆាកជីវិត មិនដែលប្រទះ​នឹង​ទឹកជំនន់ខែប្រាំងឡើយ។

លោក ផាន ថ្លែងថា៖ «វាមានតែលិចអ្នកដែលរើឥវ៉ាន់មិនទាន់ មិនលិចអីធំដុំទេ! តាំងពី៧៩មក​ទល់​ឥឡូវ យើងវាមិនដែលបានជួប បើប្រៀបរដូវវស្សា[លិច]ប្រហាក់ប្រហែលគ្នា»

ប្រជាពលរដ្ឋដួសត្រីក្នុងប្រឡាយមួយដែលជន់លិចដោយជំនន់ទឹកភ្លៀង នៅសង្កាត់​ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង
ប្រជាពលរដ្ឋដួសត្រីក្នុងប្រឡាយមួយដែលជន់លិចដោយជំនន់ទឹកភ្លៀង នៅសង្កាត់​ព្រែកកំពឹស ជាយក្រុងភ្នំពេញ។ រូបថតថ្ងៃទី១៦ ខែមករា ឆ្នាំ២០២៣។ ខេមបូចា/ ព្រីង សំរាំង

អភិបាលរាជធានីភ្នំពេញ លោក ឃួង ស្រេង បានប្រាប់ខេមបូចា នៅថ្ងៃទី១៨ ខែមករា នេះថា ផ្ទះប្រជាពលរដ្ឋចំនួន ២ ២២៥គ្រួសារ ក្នុងសង្កាត់ចំនួន១០ នៃខណ្ឌដង្កោបានរងផល​ប៉ះពាល់​ពីគ្រោះជំនន់ទឹកភ្លៀងនេះ។

លោក ស្រេង មានប្រសាសន៍ថា៖ «មានពលរដ្ឋចំនួន ២ ២២៥គ្រួសារ ដែលមាន១០សង្កាត់​ក្នុង​ខណ្ឌដង្កោ រាជធានីភ្នំពេញ [លិចផ្ទះ]»។

​ចំណែកលោក ​ ជឹ​ម​ ស៊ី​ថា​ អធិការ​នគរបាល​ខណ្ឌដង្កោ​ ថ្លែងតាមរយៈអគ្គស្នងការដ្ឋាន​នគរបាល​រាជធានីភ្នំពេញ យ៉ាងដូច្នេះថា ​ ក្រៅតែពីមានការលិចលង់ផ្ទះប្រជាពលរដ្ឋក្នុង​ខណ្ឌដង្កោ ក្នុងនោះក៏មានការលិចហេដ្ឋារចនាសម្ព័ន្ធមួយចំនួនផងដែរ ដូចជា ​លិច​ផ្លូវ​ចំនួន​១៥​ខ្សែ​ វត្ត​ចំនួន​២ មណ្ឌល​សុខភាព​១ ​សាលាសង្កាត់​ចំនួន​២​ សាលារៀន​១​កន្លែង​ និង​ប៉ុស្តិ៍​នគរបាល​រដ្ឋបាល​ចំនួន​២​។​ ជំនន់ទឹកភ្លៀង មិនត្រឹមតែធ្វើឱ្យ​លិចលង់ផ្ទះប្រជាពលរដ្ឋនៅ​ខណ្ឌដង្កោ​ប៉ុណ្ណោះទេ  ប៉ុន្តែនៅ ខេត្តកំពង់ស្ពឺ និងខេត្តកណ្ដាល ក៏រងការលិចលង់ផងដែរ។

បើតាមរដ្ឋបាលខេត្តកណ្ដាលកាលពីថ្ងៃចន្ទកន្លងទៅ បានឱ្យដឹងថា​ ភូមិស្រាស្រ្តក្រុងតាខ្មៅ ខេត្តកណ្ដាល មានសង្កាត់ចំនួនពីរ គឺសង្កាត់រកាខ្ពស់ និងសង្កាត់ព្រែកឫស្សី ប៉ះពាល់ពលរដ្ឋ​ចំនួន៨០គ្រួសារ រងការខូចខាតផ្ទះសម្បែងមួយចំនួន និងធ្វើឱ្យបាក់ស្ពានឈើមួយកន្លែង​ស្ថិត​ក្នុងភូមិបត់តាជី ក្រុងតាខ្មៅ។

ខេមបូចា មិនអាចទាក់ទងទៅលោក វ៉ី សំណាង អភិបាលខេត្តកំពង់ស្ពឺ​នៅរសៀល​ថ្ងៃនេះ​អង្គារ​នេះ បានទេ។

ជុំវិញជំនន់ទឹកភ្លៀងនារដូវប្រាំងនេះ ប្រធាន​មជ្ឍមណ្ឌល​ប្រជាពលរដ្ឋដើម្បី​អភិវឌ្ឍន៍ លោក យង់ គឹមអេង  យល់ឃើញថា ការជន់លិចនេះអាចបណ្ដាលមកពីកត្តាមួយចំនួនរួមមានទី១ ការមិនមាន ឬនៅសល់ចំនួនតិចតួចនៃស្ទឹងបឹងធម្មជាតិ ដែលលោកថាវាគឺជាប្រព័ន្ធ​រំដោះ​ទឹក​មួយសម្រាប់បង្ការការជន់លិចនៅស្ទឹងព្រែកត្នោតនេះ។

លោក គឹមអេង លើកឡើងថា៖ «អ៊ីចឹងហើយបានធ្វើឱ្យមានការជន់លិចលង់នេះ ដោយសារ​យើងជាទូទៅនិយម​លុបបឹងលុបអីអស់អ៊ីចឹងទៅ»។ លោកបន្តថា៖ «ជាធម្មតាដើម្បីគេ​បញ្ចៀស​បញ្ហា​ទាំងអស់​ហ្នឹង! នៅបណ្ដាប្រទេសអឺរ៉ុបអីគឺគេជីកបឹង។ កាលណាគេធ្វើភូមិករ គេមានរៀបចំទីក្រុង ឬក៏ទីប្រជុំអីគឺការជន់លិចហ្នឹងឯង»

ជុំវិញបញ្ហានេះ លោក គឹមអេង បន្ថែមថា អាជ្ញាធរគួរតែធ្វើការសិក្សា និងជីកប្រឡាយមេ​ណា​មួយដើម្បីរៀបចំនិងបង្វែរកុំឱ្យទឹកសម្រុកទៅខាងតំបន់ជាយភ្នំពេញ ក៏ដូចជាការបញ្ចៀសកុំ​ឱ្យមានទឹកជំនន់កើតឡើង។

មួយវិញទៀតលោក គឹមអេង ថា កំណើនផ្ទះល្វែង ឬអគារក៏ជារឿងសំខាន់មួយ តែថាការ​សិក្សា​លើ​ប្រព័ន្ធទឹកនៅមុនពេលដែល​សាង​សង់សំណង់ផ្សេងៗគឺវារឹតតែសំខាន់។ លោកបន្ត​ថា ប្រសិនបើបញ្ហានេះមិនបានគិតគូរឱ្យបានដិតដល់នោះទេ វានឹងបង្កើតជាឧបសគ្គធំមួយ​នៅក្នុងការរស់នៅ៕

445 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម