សមាគមសម្ព័ន្ធអ្នកសារព័ត៌មានកម្ពុជា

គម្រោងជំនួយជាសាច់ប្រាក់របស់រដ្ឋាភិបាល នៅតែជាតម្រូវការចាំបាច់សម្រាប់អ្នកងាយរងគ្រោះពីអតិផរណា

អ្នកស្រីធឿន សុភា បង្ហាញបណ្ណអាទិភាពទទួលសេវាសុខភាពសាធារណៈ ខណៈអ្នកស្រីកំពុងលក់ដូរភេសជ្ជៈនៅខាងមុខរោងចក្រមួយកន្លែងនៅជាយរាជធានីភ្នំពេញ ថ្ងៃទី៥ ខែមករា ឆ្នាំ២០២៣។ ខេមបូចា/ព្រីង សំរាំង
អ្នកស្រីធឿន សុភា បង្ហាញបណ្ណអាទិភាពទទួលសេវាសុខភាពសាធារណៈ ខណៈអ្នកស្រីកំពុងលក់ដូរភេសជ្ជៈនៅខាងមុខរោងចក្រមួយកន្លែងនៅជាយរាជធានីភ្នំពេញ ថ្ងៃទី៥ ខែមករា ឆ្នាំ២០២៣។ ខេមបូចា/ព្រីង សំរាំង

បី​ខែបន្ទាប់​ពី​លោក​នាយក​រដ្ឋមន្ត្រី​ ហ៊ុន សែន ប្រកាស​ពី​កម្មវិធី​ជំនួយ​ជា​សាច់​ប្រាក់​សម្រាប់​ប្រ​ជា​ពល​រដ្ឋងាយរង​ហានិភ័យ តម្រូវ​ការ​​ក៏​នៅ​តែ​​មាន​ច្រើន​។ កម្មវិធី​នេះ មាន​បំណង​ជួយ​ដល់​អ្នក​ដែល​រង​គ្រោះ​ខ្លាំង​ពី​ការ​ឡើង​ខ្ពស់​នៃ​អតិផរណា ហើយ​កម្ម​វិធីនេះបាន​ផ្ដល់​ទៅ​កាន់​ប្រជា​ពលរដ្ឋរាប់​ម៉ឺន​នាក់​។ ប៉ុន្តែអ្នក​ដែល​ធ្វើការ​ជាមួយនឹង​អ្នក​ប្រកបរបរក្រៅប្រព័ន្ធ និងងាយរងគ្រោះបំផុត ​និយាយ​ថា​ខ្លួន​បារម្ភ​ថា​អាជ្ញាធរ​មូល​ដ្ឋាន​អាច​ប្រើ​ ជំនួយ​សាច់​ប្រាក់​នេះជា​​ឧបករណ៍​ចរចា​នយោបាយ​មុន​ការ​បោះ​ឆ្នោត​ជាតិ​ខែ​កក្កដា ឆ្នាំ​២០២៣​ ចូល​មក​ដល់​។​

អ្នកស្រី​ ធឿន សុភា​ វ័យ​៣៥​ឆ្នាំ បាន​ស្នើ​សុំ​ជំនួយ​នេះពី​រដ្ឋាភិបាល​កាល​ពី​ដើម​ខែ​នេះ។ ជា​ស្រ្តី​មេម៉ាយ មាន​កូន​ពីរ​នាក់ និង​ជា​អ្នក​លក់​ដូរ​តាម​ដង​ផ្លូវ​ផង បាន​​ឲ្យ​ដឹង​ថា អ្នកស្រី​បាន​ជំពាក់​បំណុល​ដោយ​សារ​តែ​តម្រូវ​ការ​ទិញម្ហូប​អាហារ​ផ្គត់ផ្គង់​គ្រួសារ​ប្រចាំ​ថ្ងៃ​។​

អ្នកស្រី​បន្តថា៖ «​ខ្ញុំ​បាន​ចំណាយ​ ​៥ ០០០​រៀល​​សម្រាប់​អាហារ​បី​ពេល​ក្នុង​មួយ​ថ្ងៃ»។ អ្នកស្រី​បន្ត​ថា៖ «​ខ្ញុំ​ត្រូវ​តែ​សន្សំ ដូច​នេះ​ទើប​​ខ្ញុំ​អាច​សល់​ប្រាក់​ខ្លះ​ដើម្បី​សង​គេ»។​

បញ្ហា​ម្ហូប​អាហារ​ឡើង​ថ្លៃ និង​បញ្ហាជីវភាព​ផង ធ្វើ​ឲ្យ​អ្នក​ស្រី​មិន​អាច​បញ្ជូន​កូន​ប្រុស​វ័យ​១៣​ឆ្នាំ​ឲ្យ​ចូល​រៀន​បាន​ទេ ដោយ​អ្នកស្រី​បាន​បញ្ជូន​កូន​ឲ្យ​ទៅ​រៀន​ធ្វើ​ជា​ជាង​មាស​វិញ​។ ចំណែក​កូន​ប្រុស​អាយុ​៣ឆ្នាំវិញ​នៅជាមួយ​អ្នកស្រី​ពេល​លក់​ដូរ​នៅ​មុខ​រោង​ចក្រមួយ​កន្លែង​នៅ​ខណ្ឌពោធិ៍សែនជ័យ រាជធានីភ្នំពេញ​។​

ខណៈ​ពេល​អ្នកស្រី​កំពុង​រង់​ចាំ​មើល​ថា​ខ្លួន​អាច​ត្រូវ​លក្ខខណ្ឌ​សម្រាប់​ជំនួយ​ចុងក្រោយ​នេះ​ឬ​យ៉ាងណា អ្នកស្រី​ហាក់​មិនសង្ឃឹម​ក្នុងការទទួល​បាន​ការឧបត្តម្ភនេះទេ។​​

អ្នកស្រី​បាននិយាយថា៖ «​មេភូមិ​ដឹង​ពី​ស្ថានភាព​ខ្ញុំ​ច្បាស់​ណាស់ ប៉ុន្តែ​គាត់​ដូច​ជា​មិន​សូវ​ជា​យក​ចិត្ត​ទុក​ដាក់​ទេ»។ អ្នក​ស្រី​ថា៖ «អ្វី​ដែល​ខ្ញុំ​ខ្លាច​បំផុត​ គឺ​ថា​បើ​សិន​ជា​ខ្ញុំ​ឈឺ ខ្ញុំ​គ្មាន​ប្រាក់​សម្រាប់​ព្យាបាល​ទេ»។​

​បើ​តាម​សេចក្ដី​ប្រកាស​របស់​រដ្ឋាភិបាល កម្មវិធី​នេះ​គឺ​សម្រាប់​ប្រជា​ពល​រដ្ឋទូទាំង​ប្រទេស​ដែល​រស់​ជិតនឹង​​បន្ទាត់​​នៃភាព​ក្រី​ក្រ រួម​ទាំង​ជន​មាន​ពិការភាព ស្រ្តី​មេម៉ាយ និង​អ្នក​មាន​វ័យ​លើស​ពី​៦០​ឆ្នាំ​ផង​ដែរ​។​

គ្រួសារ​ដែល​ត្រូវ​នឹង​លក្ខខណ្ឌនេះ​អាច​ទទួល​បាន​ថវិកា​គាំទ្រម្ដង​ក្នុង​មួយវគ្គ ដោយ​ផ្អែក​តាម​ទំហំគ្រួសារ​ដោយ​អាច​ទទួល​បាន​ចាប់ពី៥០​ដុល្លារ​ឡើង​។​​

កម្មវិធី​នេះ​ធ្វើ​បន្ថែម​លើ​គម្រោង​បណ្ណក្រីក្រ​របស់​រដ្ឋាភិបាល​ក​ន្លងមក ដែល​​​ផ្ដល់​ថវិកា​ប្រចាំខែ​ និង​ការព្យាបាល​ដល់​ ប្រជាពល​រដ្ឋ​ក្រី​ក្រ​ដោយមិន​គិត​ថ្លៃ និង​អ្នក​ដែល​រង​ផល​ប៉ះពាល់​ដោយសារ​តែ​កូវីដ-១៩​។ គិត​មក​ដល់​ពេល​នេះមាន​ ប្រ​ជា​ពល​រដ្ឋ​​ជា​២,៨​លាន​នាក់​បាន​ទទួល​អត្ថប្រយោជន៍ពី​កម្មវិធី​នេះ​។​

អ្នកស្រី​ ធឿន សុភា លក់​ភេសជ្ជៈនៅ​មុខ​រោង​ចក្រ​មួយ​កន្លែង​ជាយរាជធានី​ភ្នំពេញ ថ្ងៃទី​៥ ខែមករា ឆ្នាំ​២០២៣។ខេមបូចា/ ព្រីង សំរាំង

លោក វ៉ន់ ពៅ ប្រធាន​សមាគម​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ មាន​ប្រសាសន៍​ថា មាន​១០​ភាគរយ​នៃ​សមាជិក​ទាំង ១៥ ០០០​នាក់​របស់​លោក​បាន​ស្នើ​សុំ​ថវិកា​ពី​កម្មវិធីថ្មី​នេះ ប៉ុន្តែ​ថា​មាន​អ្នកខ្លះ​កំពុង​តែ​រង់​ចាំ​ការ​ផ្ដល់​ថវិកា​នេះ​នៅ​ឡើយ​។​

លោក​ឲ្យ​ដឹង​ថា៖ «​កម្មករ​ក្រៅ​ប្រព័ន្ធជាអ្នក​​ងាយ​រង​គ្រោះបំផុត ពិសេស​អ្នក​បើក​កង់​បី និង​អ្នក​លក់​ដូរ​តាម​ផ្លូវ ហើយ​ពួកគាត់​ត្រូវតែ​ទទួលបាន​​ការ​គាំ​ទ្រពី​រដ្ឋាភិបាល​»។​

លោក ពៅ បាន​ស្នើ​ដល់​អាជ្ញាធរ​មូល​ដ្ឋាន​ធ្វើ​ការ​ដោយ​មាន​តម្លាភាព ចៀសវាង​ការ​រើស​អើង និង​ប្រកាន់​បក្ស​ពួក​។

លោក​ឲ្យ​ដឹង​ថា៖ «​កន្លង​​មក​សមាជិក​របស់​យើងបាន​ដាក់​ស្នើ​បណ្ណ​ក្រីក្រ ប៉ុន្ដែពួកគាត់​ភាគច្រើន​ត្រូវ​បាន​គេរើស​អើង ពីព្រោះ​ពួក​គាត់​ [​អាជ្ញាធរមូល​ដ្ឋាន] គិត​ថា​ពួក​យើង​ជាអ្នក​​ប្រឆាំង»។​

លោកបន្ត​​ថា កម្មវិធី​សាច់​ប្រាក់​ចុង​ក្រោយ​នេះ​អាច​ត្រូវ​គេ​ប្រើ​ជា​ប្រយោជន៍​នយោបាយ ដោយសារតែការ ចែក​សាច់​ប្រាក់​ចុង​ក្រោយ​​គឺ​នៅ​ត្រឹម​ខែ​កក្កដា ជា​ពេល​ដែល​មាន​ការ​រៀប​ចំ​ការ​បោះ​ឆ្នោត​ជាតិ​។​

លោក​បន្តថា៖ «មេឃុំ​ខ្លះ​អាច​យក​ឱកាស​នេះ​ស្នើ​ឲ្យ​ប្រជា​ពល​រដ្ឋ​ចូល​ជាសមាជិក​គណបក្ស​ប្រជា​ជន​កម្ពុជា»។ លោកបន្ថែម​ថា មាន​សមាជិក​លោក​ម្នាក់​ត្រូវ​គេ​ប្រាប់​ឲ្យ​ចូល​ជា​សមាជិក​បក្សប្រ​ជាជន​កម្ពុជា ជា​ថ្នូរ​នឹង​ការ​បាន​ទទួល​ជំនួយ​ថវិកា​​នេះ​។​

លោក ថេង បញ្ញាធន អគ្គនាយកដ្ឋាន​ផែនការ​នៃ​ក្រ​សួង​ផែន​ការ និង​ជា​អ្នក​ទទួល​ខុស​ត្រូវ​គម្រោង​ថវិកា​នេះ បានបដិសេធថា​គម្រោង​នេះ​ មិន​ជាប់​ពាក់ព័ន្ធ​នឹង​រឿង​នយោបាយ​ទេ​។​

លោកបន្ត​ថា៖ «ការ​វាយតម្លៃនេះ​​មិន​ត្រឹម​ត្រូវ​ទេ យើង​ត្រូវ​តែ​ផ្ដល់​យុត្តិ​ធម៌​សម្រាប់​គ្រប់គ្នា…​ចំពោះ​បញ្ហា​នេះ យើង​ត្រូវ​តែ​ឈរនៅកណ្តាល សម្រាប់​ប្រយោជន៍​ប្រ​ជាជន​ និងការអភិវឌ្ឍសង្គម​។ ក្នុង​អំឡុង​ឆ្នាំ​២០១៨ រដ្ឋាភិបាល​មិន​មាន​គម្រោង​ផ្ដល់​ថវិកានេះ​ទេ តែ​គណបក្ស​ប្រជាជន​កម្ពុជា​បាន​ ឈ្នះ​ការ​បោះ​ឆ្នោតភ្លូកទឹកភ្លូកដី​»។​

លោក​បាន​ប្រាប់​ខេមបូចា​ថា ដំណើរ​ការ​ជ្រើស​រើស​លើ​អ្នក​ដាក់​សំណើ​គឺ​ធ្វើ​ឡើង​ដោយ​តម្លាភាព និង​យុត្តិធម៌​។​

លោក​បន្ថែម​ថា៖ «​ប្រជា​ពល​រដ្ឋ​អាច​ស្នើ​ដោយ​ខ្លួនឯ​ង​ផ្ទាល់ យើង​យើង​ក៏​មាន​ apps សម្រាប់​ឲ្យ​ប្រ​ជា​ពល​រដ្ឋ​ដាក់​ពាក្យ​បណ្ដឹង ក្នុង​ករណី​ដែល​មានការ​រើស​អើងពី​អាជ្ញាធរ​មូល​ដ្ឋាន​ផង​ដែរ»។​​

បើ​តាម​លោក ថេង បញ្ញាធន កម្មវិធី​សាច់​ប្រាក់​នេះ​ត្រូវ​បែង​ចែក​ជា​បី​ដំណាក់​កាល​។ ក្នុង​ខែ​ធ្នូ​មាន​ជាង ៣៥០ ០០០​គ្រួសារ​បាន​ទទួល​ប្រាក់ និង​ពី​រដំណាក់​កាល​ទៀត​​នឹង​ត្រូវ​ធ្វើឡើង​នៅ​ខែ​មេសា និង​ខែ​កក្កដា​។ រដ្ឋាភិបាល​មាន​ផែន​ការ​ផ្ដល់​សាច់​ប្រាក់​ឲ្យ​ដល់ប្រជា​ពល​រដ្ឋ​ដែលងាយរងគ្រោះជាង​១លាន​គ្រួសារ​។​

លោក​បន្តថា៖ «​គម្រោង​ថ្មី​នេះ​ជួយ​គាំ​ទ្រ​ដល់​គ្រួសារងាយ​រង​គ្រោះ ដែលប្រឈម​នឹង​បញ្ហា​អតិផរណាខ្ពស់​ដែល​បណ្ដាល​ពី​ សង្គ្រាម​នៅ​អ៊ុយក្រែន»។ លោក​ថា៖ «យើង​មិន​បាន​ផ្ដោត​លើ​វិស័យ​ណាមួយ​ជាក់​លាក់​ទេ យើង​កំណត់​គោល​ដៅ​ណា​ដែល អាជ្ញាធរ​មូល​ដ្ឋាន​បញ្ជាក់​ថា​មាន​​ភាព​ងាយ​រង​គ្រោះ»។​

លោក ប៉ិច ពិសី នាយក​ប្រតិបត្តិ​អង្គការ​តម្លាភាព​អន្តរជាតិ​កម្ពុជា គាំទ្រ​ដល់​កម្មវិធី​របស់​រដ្ឋាភិបាល​ដើម្បី​ជួយ​ កាត់​បន្ថយ​ហានិភ័យដែល​បង្ក​ដោយ​វិបត្តិ​សកល​នេះ។ យ៉ាងណា​ លោក​ស្នើ​ឲ្យ​មាន​ការ​អនុវត្ត​ប្រកប​ដោយ​តម្លាភាព និង​គ្មាន​ការរើស​អើង​។​

លោក​បន្ថែម​ថា៖ «​នេះ​គឺ​ជា​យុទ្ធសាស្រ្តល្អ​មួយ​ជួយ​ដល់​អ្នក​ដែល​ងាយ​រង​គ្រោះ និង​អ្នក​ដែល​បាន​ធ្លាក់​ចុះ​ក្រោម​បន្ទាត់ នៃភាព​ក្រី​ក្រ​»។ លោក​ថាកម្មករ​ក្នុង​វិស័យ​សេដ្ឋកិច្ច​ក្រៅប្រព័ន្ធ​ ជា​អ្នក​ដែល​ងាយ​រងគ្រោះ​ជាង​គេ គួរ​តែ​ទទួល​​បាន​ការ​គាំទ្រ​ ពេញលេញ​​ពី​រដ្ឋាភិបាល»។​

​យ៉ាងណា លោក ពិសី កត់​សម្គាល់​ឃើញ​ដែរ​ថា​អាជ្ញាធរ​មូល​ដ្ឋាន​អាច​នឹងងាយ​​រើស​អើង​លើ​មនុស្ស​មួយ​ចំនួន ខណៈ​ដែល​អ្នក​ទាំង​នោះ​ជា​អ្នក​នុវត្ត​កម្មវិធី​ផ្ទាល់​នៅ​តាម​សហគមន៍។​​​

លោក​បន្តថា៖ «​ជំនួយ​បាន​ពី​​ថវិកា​ជាតិ ថវិកា​បានពី​ការបង់​ពន្ធរបស់​ប្រជា​ពល​រដ្ឋ និង​មាន​ខ្លះ​ទៀត​បាន​ពី​ជំនួយ​អភិវឌ្ឍន៍របស់​ដៃគូនានា និង​កម្ចី​ផ្សេងៗ​»។ លោក​បន្ថែម​ថា៖ «​ដូច​នេះ មិន​គួរ​មាន​​ការ​រើស​អើង​​ក្នុង​ទម្រង់​ណា​មួយ​លើសកម្ម​ជន​នយោបាយ និង​អ្នករិះគន់នោះទេ»។​

បើ​តាម​ធនាគារ​ពិភព​លោក អត្រា​ភាព​ក្រី​ក្រ​នៅ​កម្ពុជា​មាន​ការ​កើន​ឡើង​ក្នុង​រយៈពេល​ពីរ​ឆ្នាំ​ចុង​ក្រោយ​នេះ​ដោយ​សារ​តែ​វិបត្តិ កូវីដ-១៩ ដោយ​មាន​ប្រ​ជាពល​រដ្ឋ​ ៤៦០ ០០០​នាក់​បាន​ធ្លាក់​ក្រោម​បន្ទាត់​នៃ​ភាព​ក្រី​ក្រ គិត​ចាប់ពី​មាន​វិបត្តិ​កូវីដ-១៩​មក។

អតិផរណា​​ក្នុង​រយៈកាល​ពីរ​ឆ្នាំ​កន្លង​មក​នេះ ធនាគារពិភព​លោក​ប៉ាន់​ស្មាន​ថា​មាន​ដល់ទៅ​៦ភាគ​រយ​ដែល​ឡើង​គុណនឹង​ពីរ​។​

(រាយការណ៍បន្ថែមដោយ៖ ផុន សុទ្ធីរ័ត្ន)

ប្រែសម្រួលពីអត្ថបទភាសាអង់គ្លេស៖ Three Months in, Government’s Cash Aid Scheme Remains Badly Needed

417 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម