ក្រោយតវ៉ាពេញមួយថ្ងៃអង្គារ ទី២១ ខែតុលា កម្មករកាត់ដេរសម្លៀកបំពាក់រាប់រយនាក់ក្នុងក្រុមហ៊ុន ថូនវីន (ខេមបូឌា) អឺភែរីល នៅតំបន់សេដ្ឋកិច្ចពិសេសហ្គីហ្គា ក្នុងខេត្តស្វាយរៀងបានបញ្ចប់ការតវ៉ា ហើយបានចូលធ្វើការវិញ ក្រោយមន្ត្រីមូលដ្ឋានអន្តរាគមន៍ករណីកម្មករទាមទារឱ្យដកបុគ្គលិកម្នាក់ ដែលកាន់តួនាទីរដ្ឋបាល និងគណនេយ្យ ក្រោមហេតុផលថាខ្វះចន្លោះការងារ។
ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង លោក អ៊ូ សាខឿន បានប្រាប់ សារព័ត៌មានខេមបូចា ថា ជំនួបរវាងភាគីពាក់ព័ន្ធកាលពីថ្ងៃអង្គារ មាន៩ចំណុចបានឯកភាពគ្នា ប៉ុន្តែលោកមិនអាចបញ្ជាក់លម្អិតបានទេ។ ទោះជាយ៉ាងណាលោកថា រដ្ឋបាលរោងចក្រដែលកម្មករទាមទារក្រុមហ៊ុនបញ្ឈប់រូបនោះបានលាលែងពីការងារហើយ ចាប់ពីថ្ងៃពុធ ទី២២ ខែតុលា ឆ្នាំ២០២៥។
លោកបានថ្លែងថា៖ «រឿងដែលសំខាន់នោះគឺពួកគាត់ចង់សុំដកអ្នកធ្វើការផ្នែករដ្ឋបាល ប៉ុន្តែអ្នករដ្ឋបាលនោះមិនចង់ឱ្យមានបញ្ហាស្មុគស្មាញគាត់ក៏ដាក់ពាក្យលាឈប់ទៅ ដូច្នេះរឿងក៏ចប់ទៅ។ ហើយបងប្អូនយើងក៏ចូលធ្វើការអស់ទៅ។ [រដ្ឋបាល] គាត់ឈប់ពីថ្ងៃហ្នឹងទៅហើយ»។
ទាក់ទងនឹងការបើកប្រាក់ខែយឺតយ៉ាវ លោកថាក្រុមហ៊ុននឹងបើកប្រាក់ឱ្យពួកគេ «សមស្រប» ហើយសម្រាប់ប៉ុន្មានខែខាងមុខនេះ។ លោកបន្តថា ប្រព័ន្ធរដ្ឋបាលត្រឹមត្រូវនឹងត្រូវបានបង្កើតឡើង ដោយថាក្រុមហ៊ុនដែលគ្រប់គ្រងដោយជនជាតិចិននេះគឺទើបតែដំណើរការបានបីខែប៉ុណ្ណោះ ដោយមានកម្មករប្រមាណ ៣០០នាក់។
លើសពីនេះ លោក សុខឿន ឱ្យដឹងដែរថា មន្ទីរការងារនឹងបន្តធ្វើការជាមួយក្រុមហ៊ុន និងត្រួតពិនិត្យការអនុវត្តរបស់ក្រុមហ៊ុនលើចំណុចដែលបានព្រមព្រៀងគ្នា។
នៅព្រឹកថ្ងៃពុធ ទី២២ ខែតុលា កម្មករមួយចំនួនដែលមិនបានដឹងពីការលាលែងពីតំណែងរបស់បុគ្គលិករដ្ឋបាល ក៏បានមកជួបជុំតវ៉ារយៈពេលខ្លីផងដែរ តែថាការតវ៉ាត្រូវបានរំសាយភ្លាមៗបន្ទាប់ពីអាជ្ញាធរបានចុះមកសម្របសម្រួល និងពន្យល់។
រៀបរាប់ប្រាប់អ្នកសារព័ត៌មានខេមបូចាកំឡុងពេលចូលរួមតវ៉ារយៈពេលខ្លីនៅព្រឹកថ្ងៃពុធនេះ កម្មការិនីម្នាក់ឈ្មោះ ជា ស្រួច បានឱ្យដឹងថា ពិតជាមានការតវ៉ាបានធ្វើឡើងកាលពីថ្ងៃអង្គារ ដោយបញ្ជាក់ថា កម្មករនឹងមិនចូលធ្វើការវិញទេ រហូតដល់បុគ្គលិកជារដ្ឋបាល និងជាមន្ត្រីគណនេយ្យក្នុងពេលតែមួយនោះ ត្រូវដកចេញពីក្រុមហ៊ុន។
អ្នកស្រីបានកត់សម្គាល់ថា អាកប្បកិរិយាមិនសមរម្យរបស់បុគ្គលិករូបនេះ រួមបញ្ចូលទាំងការបណ្តេញកម្មករគឺខុសទាំងស្រុង ព្រោះគ្រាន់តែពួកគេសួរតិចតួចទាក់ទងនឹងការទូទាត់ប្រាក់ខែ និងការកាត់ប្រាក់ខែដោយគ្មានហេតុផល។
អ្នកស្រីនិយាយថា៖ «ឱ្យតែដល់ពេលបើកលុយគឺរញ៉េររញ៉ៃតែម្ដង។ ហើយដល់ឥឡូវកម្មករគ្រប់គ្នាគេអត់ចូលធ្វើការហ្នឹង ដោយគេសុំទម្លាក់រដ្ឋបាលហ្នឹង គណនេយ្យហ្នឹងចេញ។ ហើយមេៗចូលប្រជុំថាឱ្យដូររដ្ឋបាលហ្នឹងទៅកាន់Office មុខ ប៉ុន្តែកម្មករអត់ចង់បានអ៊ីចឹង គឺគេចង់ឱ្យគាត់ចេញពីកន្លែងហ្នឹងតែម្ដង»។
កម្មការិនីម្នាក់ទៀតឈ្មោះ ទុំ សេដ្ឋា ដែលបានចូលបម្រើការងារនៅក្រុមហ៊ុននេះបានរយៈពេល២ខែកន្លះ ឱ្យដឹងថា អ្នកស្រីមានអារម្មណ៍សប្បាយចិត្តជាមួយនឹងលទ្ធផល ហើយគាត់ក៏បានចូលធ្វើការវិញហើយដែរ។ ក្នុងនោះ អ្នកស្រីសង្ឃឹមថា បុគ្គលិករដ្ឋបាលថ្មីនឹងមានសមត្ថភាពក្នុងការបំពេញការងារ។
បើតាមអ្នកស្រី ឱ្យដឹងថា កម្មករប្រឈមនឹងការលំបាកនៅពេលដែលអតីតបុគ្គលិកនៅទីនោះ ដោយសារការបើកប្រាក់យឺតយ៉ាវ ការប្រើពាក្យសម្ដីមិនសមរម្យ និងបញ្ហាអនាម័យ ដោយសារក្រុមហ៊ុនមិនទិញសម្ភារៈសម្អាតបន្ទប់ទឹកគ្រប់គ្រាន់។
អ្នកស្រីបានបន្តថា៖ «ខ្ញុំចង់បានអ្នកដែលចូលថ្មីហ្នឹង គឺគាត់គិតគូរលុយប្រាក់ខែឱ្យកម្មករ ឱ្យបានច្បាស់លាស់ដើម្បីកុំឱ្យវាមានរឿងបែបនេះកើតឡើងទៀត ព្រោះពួកខ្ញុំក៏អត់ចង់(តវ៉ា)ដែរ ព្រោះអីតែច្រើនដងពេកក៏វាពិបាកដែរ»។
អ្នកស្រីបន្ថែមថា ថៅកែក្រុមហ៊ុនបានស្នើឱ្យកម្មករកុំតវ៉ាទៀត ហើយត្រូវអត់ធ្មត់ ប្រសិនបើមានការបើកប្រាក់ខែយឺតយ៉ាវ ព្រោះវាជាការខ្ជះខ្ជាយពេលវេលាសម្រាប់ភាគីទាំងសងខាង។
ក្នុងកិច្ចសម្ភាសជាមួយចាងហ្វាងសារព័ត៌មានក្នុងស្រុកម្នាក់ កម្មករបានលើកឡើងថា បុគ្គលិកដែលពួកគេស្នើឱ្យដកចេញនោះឈ្មោះ កញ្ញា មានតួនាទីជាគណនេយ្យ និងរដ្ឋបាល។ កញ្ញា មិនអាចទាក់ទងសុំការបំភ្លឺបានទេ។
អនុប្រធានសម្ព័ន្ធសហជីពកាត់ដេរសម្លៀកបំពាក់ និងឧស្សាហកម្ម(សម្ព័ន្ធអេអាយ) លោក ឃុន សុខុម បានលើកឡើងថា ការតវ៉ានេះបានកើតឡើងដោយសារតែក្រុមហ៊ុនមិនបានបើកប្រាក់ឈ្នួលឱ្យកម្មករឱ្យបានត្រឹមត្រូវ។ លោកថា ប្រាក់ឈ្នួលគោលរបស់កម្មករ គឺ២០៨ដុល្លារ ដែរក្នុងមួយខែពួកគេនឹងបើកពីរដង។ ប៉ុន្តែនៅពេលដល់កាលកំណត់ ពួកគេខ្លះទទួលបានតិចជាង ១០៤ដុល្លារ ខណៈខ្លះទៀតមិនបានទទួលប្រាក់ទាំងនោះទេ។
លោកសង្កេតឃើញថា មានករណីស្រដៀងគ្នានេះកាលពីពេលថ្មីៗ។ លោកថា នេះមកពីក្រុមហ៊ុនទាំងនោះមិនបានអនុវត្តច្បាប់ការងារត្រឹមត្រូវ និងកង្វះអធិការកិច្ចពីសំណាក់មន្ទីរការងារ ដើម្បីពិនិត្យមើលថាតើច្បាប់ត្រូវបាននិយោជកអនុវត្តឬអត់។
លោកមានប្រសាសន៍ថា៖ «ខ្ញុំចង់ឱ្យក្រសួងនិងមន្ទីរ បង្កើនការយកចិត្តទុកដាក់បន្ថែមទៀត ជាពិសេសគឺជំរុញឱ្យមានការអនុវត្តស្របតាមច្បាប់ពេញលេញ នោះវានឹងមិនមានការតវ៉ាកើតឡើងនោះទេ។ កន្លងមក វាកើតឡើងដោយសារការអនុវត្តមិនត្រឹមត្រូវ ទើបធ្វើឱ្យកម្មករផ្ទុះការតវ៉ាទាមទារ»៕
ប្រែសម្រួលពីអត្ថបទភាសាអង់គ្លេស៖ Tonewin Workers Protest Over Admin Staff’s Alleged Misconduct; Issue Resolved After Demands Met
