សមាគមសម្ព័ន្ធអ្នកសារព័ត៌មានកម្ពុជា
KH | EN

កូនប្រុស​មេដឹកនាំកំពូលនៃសាសនា​ឥស្លាម​ត្រូវបាន​ចោទប្រកាន់​ពីបទ​រំលោភ​សេពសន្ថវៈ និង​ប្រទូស្តកេរខ្មាស​លើ​កុមារី​មិនទាន់​គ្រប់​អាយុ

លោក កាម៉ារូទីន ស៊ូហៃមី នៅឯទីស្នាក់ការនរគបាល ដែលបង្ហោះដោយ Freshnews ។
លោក កាម៉ារូទីន ស៊ូហៃមី នៅឯទីស្នាក់ការនរគបាល ដែលបង្ហោះដោយ Freshnews ។

សាលា​ដំបូង​រាជធានី​ភ្នំពេញ​បាន​ចោទ​ប្រកាន់​កូន​ប្រុស​របស់​លោក សុះ កំរី មេដឹកនាំកំពូល​នៃសាសនា​ឥស្លាម​នៅកម្ពុជា ឈ្មោះ កាម៉ារូទីន ស៊ូហៃមី ពី​បទ​រំលោភ​សេពសន្ថវៈ និង​រំលោភ​បំពាន​ផ្លូវ​ភេទ​លើ​សិស្ស​ស្រី១៨នាក់ នៅ​អន្តេវាសិកដ្ឋាន​សាលារៀនភាសាឥស្លាមមួយកន្លែង​ក្នុង​រាជធានី​ភ្នំពេញ។

លោក ប្លង់ សុផល ព្រះរាជអាជ្ញារង បានបញ្ជាក់ពីការចោទប្រកាន់របស់ លោក ស៊ូហៃមី ពីបទរំលោភសេពសន្ថវៈមានស្ថានទម្ងន់ទោសទាក់ទងនឹងជនល្មើស តាមមាត្រា ២៤០ នៃក្រមព្រហ្មទណ្ឌ និងប្រទូស្តកេរខ្មាសមានស្ថានទម្ងន់ទោសទាក់ទងនឹងចារី​ និង​ស្ថានទម្ងន់ទោសទាក់ទងទៅនឹងជនរងគ្រោះ​ តាមមាត្រា​ ២៤៧​ និងមាត្រា​ ២៤៨​ នៃក្រមព្រហ្មទណ្ឌ។

យោងតាមមាត្រា២៤០នៃក្រមព្រហ្មទណ្ឌ លោក ស៊ូហៃមី អាចនឹងត្រូវផ្តន្ទាទោសដាក់ពន្ធនាគារពី៧ទៅ១៥ឆ្នាំ និងតាមមាត្រា​ ២៤៧​ និងមាត្រា​ ២៤៨​ នៃក្រមព្រហ្មទណ្ឌ លោក ស៊ូហៃមី នឹងប្រឈមមុខនឹងការជាប់ពន្ធនាគារពី២ទៅ៥ឆ្នាំ ប្រសិនបើរកឃើញថាមានកំហុស។

លោក សុះ កំរី បានបដិសេធ​ការចោទប្រកាន់​មកលើរូបកូនប្រុសរបស់​លោក ​តាមរយៈ​សារបង្ហោះ​នៅលើ​ហ្វេសប៊ុក បន្ទាប់ពីមានការចែករំលែក​រាលដាល​​នូវ​សារ​មួយ​ពីគណនីហ្វេសប៊ុកឈ្មោះ Som Mengly កាលពីថ្ងៃទី១០ ខែតុលា ។ បួនថ្ងៃក្រោយមកទៀត គណនី​ហ្វេសប៊ុកនោះ​ក៏លែងដំណើរការ ។

នៅក្នុងការបង្ហោះនោះ លោក ស៊ូហៃមី ត្រូវបានគេចោទប្រកាន់ថា បានរំលោភផ្លូវភេទសិស្សស្រីចំនួន18នាក់ ខណៈដែលគាត់ជាប្រធានសន្តិសុខ សណ្តាប់ធ្នាប់ និងអនាម័យនៅអន្តេវាសិកដ្ឋាននោះ។

លោក សុខ សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការនគរបាលជាតិ មានប្រសាសន៍ថា លោក ស៊ូហៃមី ត្រូវបានសាកសួរ និងចាប់ខ្លួន កាលពីថ្ងៃទី១៥ ខែតុលា ឆ្នាំ២០២៤។

លោក​បាន​បន្ត​ថា​៖ «​ជន​សង្ស័យ​ត្រូវ​បាននាំមកស្តាប់ចម្លើយ តែមិនឆ្លើយសារភាព គេចវេះពីការទទួលខុសត្រូវ។ ព្រះ​រាជ​អាជ្ញា​អនុញ្ញាតសមត្ថកិច្ចឃាត់ខ្លួន​ជនសង្ស័យកសាងសំណុំរឿងបញ្ជូនទៅសាលាដំបូងចាត់ការតាមនីតិវិធីច្បាប់»

លោក សំបូរ បានបញ្ជាក់ថា ការស៊ើបអង្កេតនៃនាយកដ្ឋានរបស់លោកបានរកឃើញថា ជនរងគ្រោះបួននាក់(អាយុ១៣ឆ្នាំម្នាក់ ១៤ឆ្នាំម្នាក់ និង១៥ឆ្នាំម្នាក់)ត្រូវបានរំលោភសេពសន្ថវៈ និងប្រទូស្តកេរខ្មាសពី លោក ស៊ូហៃមី។

ក្នុង​ចំណោម​ជន​រង​គ្រោះ​ទាំង​៤​នាក់ មាន​តែ​២​នាក់​ប៉ុណ្ណោះ​បាន​ដាក់​ពាក្យ​បណ្តឹង ខណៈ​សាក្សី​​៤​នាក់​បាន​ផ្តល់​សក្ខីកម្ម​ដល់​ប៉ូលិស ។ លោក សំបូរ បាន​បន្ថែមថា៖ «សមត្ថកិច្ចបន្តស្រាវជ្រាវរកភស្តុតាង និងស្វែងរកកុមាររងគ្រោះផ្សេងទៀត»

លោក សុះ កំរី បដិសេធ​មិន​ធ្វើ​អត្ថាធិប្បាយ​ទេ។ លេខា​របស់​លោក ម៉ាត់ អាល់ទី ដែល​បាន​លើក​ទូរសព្ទ​ប្រាប់ ខេមបូចា ថា កំរី ចង់«នៅ​ស្ងៀម​មួយ​រយៈ» និង«មិន​ចង់​និយាយ​ជាមួយ​អ្នក​សារព័ត៌មាន»

លោកស្រី អេង ចាន់ឌី នាយកប្រតិបត្តិនៃអង្គការយេនឌ័រ និងអភិវឌ្ឍន៍ដើម្បីកម្ពុជា បានសាទរចំពោះចំណាត់ការផ្លូវច្បាប់ចំពោះជនសង្ស័យ ខណៈអំពាវនាវឱ្យមានការផ្តន្ទាទោសធ្ងន់ធ្ងរ។

លោកស្រី ចាន់ឌី បានមានប្រសាសន៍ថា៖ «ប្រសិនបើមិនមានចំណាត់ការឆ្លើយតបបែបយុត្តិធម៌ទេ អំពើអ៊ីចឹងអាចនឹងកើតមានបន្តទៅមុខទៀត….. ហើយមិនត្រឹមប៉ុណ្ណឹងទៀតអាការខិតខំប្រឹងប្រែងដើម្បីឱ្យមាននូវយុត្តិធម៌ដល់ក្មេងស្រីនឹងមិនទទួលបានជោគជ័យទេនៅក្នុងប្រទេសខ្មែរយើង»

លោកស្រីបានកត់សម្គាល់ឃើញថា ក្នុងករណីដែលបទចោទប្រកាន់រាងស្រាល រឺទាក់ទងនឹងការកាត់ក្តីមិនដាក់ដល់អតិបរមាតាមស្ថានទម្ងន់ទោសទេនឹងធ្វើឱ្យមានផលប៉ះពាល់ច្រើនទៅថ្ងៃក្រោយទៀត នៅពេលដែលអ្នកប្រព្រឹត្តបទល្មើស រឺអ្នកដែលហ៊ានប្រព្រឹត្តបទល្មើសទាំងអស់ហ្នឹង គាត់អាងគាត់ហ៊ាន ហើយធ្វើឱ្យក្មេងស្រីរងគ្រោះមិនទទួលបានយុត្តិធម៌ត្រឹមត្រូវ។

រាយការណ៍បន្ថែមដោយ ស៊ើង និមល់

ប្រែសម្រួលពីអត្ថបទភាសាអង់គ្លេស៖ Top Islamic Cleric’s Son Charged with Rape and Indecent Assault of Underage Girls

614 views

ព័ត៌មានថ្មី

អត្ថបទពេញនិយម