ប្រជាពលរដ្ឋភូមិត្រពាំងថ្លឹង ៤ បានតវ៉ានៅព្រឹកថ្ងៃទី៨ ខែកុម្ភៈ ឆ្នាំ២០២៥ ដោយពួកគាត់ទាមទារឱ្យបញ្ឈប់ការសាងសង់ឋានីយបូមរំដោះទឹក លើផ្លូវក្បែរលំនៅរបស់ពួកគាត់ នៅចំណុចផ្លូវលេខ១៩ ជាប់ប្រឡាយ ទួលពង្រ ស្ថិតក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ក្រុមប្រជាពលរដ្ឋដែលតវ៉ាបញ្ជាក់ថា ពួកគាត់ទាំងអស់គ្នាមិនជំទាស់នឹងការអភិវឌ្ឍហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹកនេះទេ ព្រោះជាការគិតគូររបស់អាជ្ញាធររដ្ឋាភិបាល ក្នុងការជួយរំដោះគ្រោះជំនន់ទឹកភ្លៀង ដែលតែងតែជន់លិចផ្ទះសម្បែង ភូមិដ្ឋានរបស់ពួកគាត់នៅរៀងរាល់រដូវវស្សាប៉ុន្មានឆ្នាំជាប់ៗគ្នាមកហើយ ។
ទោះយ៉ាងណាក្ដី ក្រុមប្រជាពលរដ្ឋដែលតវ៉ា គ្រាន់តែស្នើសុំឱ្យមានការពិចារណា កំណត់ទីតាំងឋានីយឱ្យបានសមរម្យ ដែលពុំគួរនឹងដាក់នៅលើផ្លូវក្បែរលំនៅរបស់ពួកគាត់សោះឡើយ ។
បន្ទាប់ការជជែកគ្នាមួយសន្ទុះធំរវាងក្រុមអ្នកតវ៉ា និងអ្នកម៉ៅការសាងសង់ ដោយមានការសម្រមសម្រួលពីសំណាក់មន្ត្រីតំណាងសាលាខណ្ឌពោធិ៍សែនជ័យផង ភាគីទាំងអស់បានឯកភាពថានឹងជួបពិភាក្សាគ្នាជាថ្មី នៅសប្ដាហ៍ក្រោយ ៕
