ធ្វើបច្ចុប្បន្នភាពព័ត៌មាននៅរសៀលថ្ងៃទី២៩ ខែមីនា៖ ចំនួនអ្នកស្លាប់ដោយសារគ្រោះរញ្ជួយដីកម្រិត ៧,៧រ៉ិចទ័រ នៅប្រទេសមីយ៉ាន់ម៉ា និងប្រទេសថៃ កាលពីរសៀលថ្ងៃសុក្រ បានកើនឡើងជាង៧០០នាក់ និងអ្នករងរបួសជាង ១ ០០០នាក់ហើយ។ ក្នុងចំណោមអ្នកបាត់ខ្លួននៅទីតាំងអគារកើតហេតុនៅទីក្រុងបាងកក ក៏មានពលករខ្មែរពីរនាក់ផងដែរ។
លោក លឹង សុផុន មន្ត្រីសម្របសម្រួលទទួលបន្ទុកពលករចំណាកនៅអង្គការសង់ត្រាល់ប្រចាំប្រទេសថៃ បានឱ្យដឹងថា ផ្អែកតាមបណ្តាញរបស់អង្គការសង់ត្រាល់ដែលកំពុងនៅទីតាំងកើតហេតុ បានបញ្ជាក់ថា មានពលករខ្មែរពីរនាក់កំពុងបាត់ខ្លួននៅក្នុងអគារដួលរលំកម្ពស់៣០ជាន់នោះដែរ។
លោក សុផុន បញ្ជាក់ថា៖ «ខ្ញុំបានទាក់ទងជាមួយបណ្ដាញដែលនៅទីតាំងកើតហេតុពេញមួយព្រឹកហើយ ហើយគាត់បានប្រាប់ថា មានពលករខ្មែរយើងពីរនាក់កំពុងបាត់ខ្លួននៅក្នុងគំនរអគារដួលរលំនោះ»។ លោកបន្តទៀតថា៖ «ពលករខ្មែរពីរនាក់ដែលបាត់ខ្លួនក្នុងអគារនោះ គឺមកពីខេត្តបន្ទាយមានជ័យ»។
យោងតាម កាសែតអេភី ចុះផ្សាយនៅព្រឹកថ្ងៃទី២៩ ខែមីនា ចំនួនអ្នកស្លាប់ដោយសារគ្រោះរញ្ជួយដីកម្រិត ៧.៧រ៉ិចទ័រ នៅក្នុងប្រទេសមីយ៉ាន់ម៉ា បានកើនឡើងដល់ជិត ៧០០នាក់ហើយ។
ទូរទស្សន៍រដ្ឋ MRTV បានរាយការណ៍ថា មនុស្សចំនួន ៦៩៤ នាក់ត្រូវបានគេរកឃើញថាបានស្លាប់ និង ១ ៦៧០ នាក់ផ្សេងទៀតបានរងរបួស និង ៦៨ នាក់ផ្សេងទៀតបានរងរបួស នេះបើយោងតាមសេចក្តីថ្លែងការណ៍របស់រដ្ឋាភិបាលដែលដឹកនាំដោយយោធា។ តួលេខដូចគ្នានេះក៏ត្រូវបានគេរាយការណ៍ដោយគេហទំព័រព័ត៌មានឯករាជ្យ The Irrawaddy។
យោងតាមប្រព័ន្ធផ្សព្វផ្សាយថៃ នាយកដ្ឋានបង្ការ និងកាត់បន្ថយគ្រោះមហន្តរាយ (DDPM) រាយការណ៍ពីការខូចខាតក្នុងខេត្តចំនួន ១៤ បន្ទាប់ពីគ្រោះរញ្ជួយដីកាលពីថ្ងៃសុក្រ។
ព័ត៌មានថៃបានបញ្ជាក់ទៀតថា យ៉ាងហោចណាស់ បានរកឃើញអ្នកស្លាប់ចំនួន៩នាក់ របួសចំនួន៩នាក់ និងបាត់ខ្លួន១០១នាក់ទៀត។ តំបន់ផ្តល់ជំនួយសង្គ្រោះបន្ទាន់ពីគ្រោះមហន្តរាយត្រូវបានប្រកាសនៅ Pathum Thani, Phrae និងទីតាំងទាំងអស់នៃទីក្រុងបាងកក ប្រទេសថៃ។
យោងតាមហ្វេសប៊ុកផេកក្រសួងការងារ នាព្រឹកថ្ងៃសៅរ៍ ទី២៩ ខែមីនា ឆ្នាំ២០២៥ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បន្តដឹកនាំប្រជុំក្រុមការងារចំពោះកិច្ចនៃក្រសួងការងារ និងបណ្តុះបណ្តាលវិជ្ជាជីវៈ ដើម្បីតាមដាន និងដោះស្រាយផលប៉ះពាល់ដែលអាចកើតមានឡើងដោយគ្រោះរញ្ជួយដីក្នុងទីក្រុងបាងកក និងខេត្តមួយចំនួនក្នុងប្រទេសថៃ កាលពីរសៀលថ្ងៃទី២៨ ខែមីនា ឆ្នាំ២០២៥។
ក្រុមការងារចំពោះកិច្ចនៃក្រសួងការងារ និងបណ្តុះបណ្តាលវិជ្ជាជីវៈ កំពុងបន្តប្រមូលព័ត៌មាន ពីអនុព័ន្ធការងារប្រចាំប្រទេសថៃ ស្ថានឯកអគ្គរាជទូតកម្ពុជាប្រចាំប្រទេសថៃ អគ្គនាយកដ្ឋានការងារ អាជ្ញាធរមានសមត្ថកិច្ចថៃ និងបណ្តាញភ្នាក់ងារផ្សេងៗនៅប្រទេសថៃ ដើម្បីបន្តតាមដានព័ត៌មាន វាយតម្លៃស្ថានការណ៍ និងត្រៀមអន្តរាគមន៍ ដោះស្រាយ ឱ្យបានទាន់ពេលវេលា និងផ្តល់ការគាំពារជូនបងប្អូនពលករខ្មែរនៅក្នុងប្រទេសថៃ។
លោកនាយករដ្ឋមន្ត្រី ហ៊ុន ម៉ាណែត បានសម្តែងការសោកស្តាយជាមួយរាជរដ្ឋាភិបាលថៃ និងរដ្ឋាភិបាលសាធារណរដ្ឋសហភាពមីយ៉ាន់ម៉ា និងចំពោះប្រជាពលរដ្ឋដែលបានទទួលរងគ្រោះដោយឧបទ្ទវហេតុគ្រោះធម្មជាតិរញ្ជួយដីនៅប្រទេសទាំងពីរ កាលពីរសៀលសុក្រ ថ្ងៃទី២៨ ខែមីនា ឆ្នាំ២០២៥។
លោកនាយករដ្ឋមន្ត្រីបានលើកឡើងថា ចាប់តាំងពីឧបទ្ទវហេតុរញ្ជួយដីបានកើតឡើង ក្រសួងការបរទេស និងសហប្រតិបត្តិការអន្តរជាតិ និងក្រសួងការងារ និងបណ្តុះបណ្តាលវិជ្ជាជីវ: តាមរយ:ឯកអគ្គរាជទូតកម្ពុជាប្រចាំប្រទេសថៃ និងទីប្រឹក្សាពលករ បានចុះផ្ទាល់ដល់កន្លែងកើតហេតុ ដើម្បីក្តាប់នូវព័ត៌មាន និងស្ថានភាពនៅទីនោះ និងទំនាក់ទំនងជាមួយពលករកម្ពុជាដែលកំពុងធ្វើការនៅទីក្រុងបាងកក ដើម្បីបន្តតាមដានការវិវត្តស្ថានភាព និងផ្តល់ការជួយអន្តរាគមន៍។
លោក ម៉ាណែត បានបន្ថែមថា៖ «សូមអំពាវនាផងដែរ ចំពោះបងប្អូនប្រជាពលរដ្ឋខ្មែរយើងដែលរស់នៅប្រទេសថៃនិងប្រទេសមីយ៉ាន់ម៉ា ដែលមានតម្រូវការ ឬត្រូវការផ្តល់ព័ត៌មានផ្សេងៗ សូមទាក់ទងស្ថានទូតនៃព្រះរាជាណាចក្រកម្ពុជាប្រចាំនៅប្រទេសនីមួយៗ»៕
