សមាគមសម្ព័ន្ធអ្នកសារព័ត៌មានកម្ពុជា

អតីតសកម្មជនបក្សប្រឆាំងពីរនាក់ត្រូវបានចាប់ខ្លួន និងបញ្ជូនទៅតុលាការពាក់ព័ន្ធនឹងការបង្ហោះសារ​រិះគន់ព្រះមហាកក្សត្រ និងប្រមុខដឹកនាំរដ្ឋាភិបាល

លោក យឹម ស៊ីណន អតីតសកម្មជនបក្សប្រឆាំង ចូលរួមលើកចិត្ត លោក កឹម សុខា នៅខាងមុខតុលាការ ខណៈពេលសាលាដំបូងរាជធានីភ្នំពេញប្រកាសសាលក្រមពាក់ព័ន្ធនឹងសំណុំរឿងក្បត់ជាតិរបស់លោក។ រូបថតនៅថ្ងៃទី៣ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ
លោក យឹម ស៊ីណន អតីតសកម្មជនបក្សប្រឆាំង ចូលរួមលើកចិត្ត លោក កឹម សុខា នៅខាងមុខតុលាការ ខណៈពេលសាលាដំបូងរាជធានីភ្នំពេញប្រកាសសាលក្រមពាក់ព័ន្ធនឹងសំណុំរឿងក្បត់ជាតិរបស់លោក។ រូបថតនៅថ្ងៃទី៣ ខែមីនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

អតីតសកម្មជនបក្សប្រឆាំងពីរនាក់ត្រូវបានបញ្ជូនទៅកាន់សាលាដំបូងរាជធានីភ្នំពេញដើម្បី​សាកសួរពាក់ព័ន្ធនឹងការបង្ហោះសារប្រមាថមើលងាយព្រះមហាក្សត្រ និងលោក​នាយករដ្ឋ​មន្ត្រី ហ៊ុន សែន នៅថ្ងៃទី២១ ខែមីនា ឆ្នាំ២០២៣។

លោក ប្លង់ សុផល បានមានប្រសាសន៍តាមប្រព័ន្ធតេឡេក្រាមថា សមត្ថកិច្ចបានបញ្ជូន​ជនសង្ស័យ​ទាំង២រូបមកដល់អយ្យការហើយ  អយ្យការនឹងបន្ត​នីតិវិធី​របស់ខ្លួន ហើយ​នៅ​ពេលដែលអយ្យការមានចំណាត់ការចុងក្រោយ  គាត់នឹងជូនដំណឹង។

លោក យឹម ស៊ីណន និង លោក ហ៊ុន កុសល អតីតសកម្មជនបក្សប្រឆាំង ត្រូវបាន​សមត្ថកិច្ច​ចាប់ខ្លួន នៅល្ងាចថ្ងៃទី២១ ខែមីនា ឆ្នាំ២០២៣ បន្ទាប់ពីបង្ហោះសារ​បែបមើល​ងាយ​ព្រះមហាក្សត្រ និងប្រមុខដឹកនាំរដ្ឋាភិបាល ​តាមបណ្តាញសង្គម បន្ទាប់ពីព្រះមហាក្សត្រ ព្រះរាជទានព្រះអគ្គីជ័យកីឡា សម្រាប់​ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅខេត្តសៀមរាប។

ស ថេត ស្នងការនគរបាលរាជធានីភ្នំពេញ បានឆ្លើយតបតាមទូរសព្ទថា យុវជនពីរនាក់​ដែល​ត្រូវបានចាប់ខ្លួនកាលពីល្ងាចថ្ងៃទី២១​ ខែមីនា​ សមត្ថកិច្ចបានបញ្ជូនខ្លួនពួកគេទៅកាន់​សាលា​ដំបូងរាជធានីភ្នំពេញ ដើម្បីសាកសួរបន្ត កាលពីរសៀលថ្ងៃទី២២ ខែមីនាហើយ ដូច្នេះសូមសួរ​ទៅ​កាន់​តុលាការ​ចុះ។

លោកស្នងការបានបន្ថែមថា ដំបូង សមត្ថកិច្ចបានចាប់ខ្លួនលោក យឹម ស៊ីណន នៅខណ្ឌដង្កោ និងបន្ទាប់មកចាប់ខ្លួនលោក ហ៊ុន កុសល ប៉ុន្តែលោកមិនចាំថា ការចាប់ខ្លួន ហ៊ុន កុសល នៅកន្លែងណាទេ រួចលោកបានបង្វែរសំនួរឱ្យសួរទៅតុលាការជំនួសវិញ។

លោកនាយករដ្ឋមន្ត្រី ហ៊ុន សែន មានប្រសាសន៍ក្នុងពិធីចែកសញ្ញាបត្រដល់និសិត្សនៅ វិទ្យាស្ថាន វ៉ាន់ដា នៅថ្ងៃទី២២ ខែមីនា ថា ពិតជាបាននាំខ្លួនយុវជន​ពីរនាក់​មក​សាកសួរ​ពាក់ព័ន្ធការ​ប្រមាថមើល​ងាយព្រះមហាក្សត្រ និងប្រមុខរដ្ឋាភិបាល កាលពីមិ្សលមិញ។

លោក ហ៊ុន សែន បានថ្លែងដោយយកសាររបស់ លោក យឹម ស៊ីណន មកអានថា៖ «បើតាមសំឡេងពលរដ្ឋ​តាមហាងកាហ្វេ ថ្ងៃនេះយើងអាច​ឃើញ​ច្បាស់ថា នរណាជា​ស្តេចផែនដីពិតប្រាកដ» លោកបន្តថា អាហ្នឹងលើកឡើងដោយ លោក យឹម ស៊ីណន អតតីមេបាតុកម្មនៅកូរ៉េខាងត្បូង ដែលលោកបានលើកលែងឱ្យ ហើយសម្រួល​ឱ្យចូល​ប្រទេស​ម្តងរួចហើយ

នាយករដ្ឋមន្ត្រីបន្តថា៖ «ឯមួយទៀត ហ៊ុន កុសល និយាយថា មានការប្រមាថព្រះចេស្តា រួចហើយគេទៅរួមជាមួយ ឯកឧត្តម កឹម សុខា»។ លោកបានលើកឡើងជាសំនួរថា តើមានការប្រមាថនៅកន្លែងណា?

ចំណែកសាររបស់លោក ហ៊ុន កុសល ដែលបានបង្ហោះលើ​ហ្វេសប៊ុក​កាល​ពី​ម្សិលមិញថា លោកឃើញគេធ្វើបាបព្រះទ័យ និងបន្ទាប​ព្រះចេស្តា​ព្រះមហាក្សត្រខ្មែរ។ លោកសរសេរថា​​​ លោកជាអ្នកនយោបាយជំនាន់​ក្រោយ​ប្តេជ្ញានឹងប្រើសមត្ថភាព​ដែល​មាន​ទាំងប៉ុន្មាន​ចូលរួម​ពូនផ្តុំជាមួយលោក កឹម សុខា ការពារព្រះចេស្ដាព្រះមហាក្សត្រ។ ទោះយ៉ាងណា លោកពុំបាននិយាយអំពីបញ្ហាអ្វីមួយជាក់លាក់នោះទេ។

លោក ហ៊ុន សែន លើកឡើងជាសំនួរថា៖ «តើកន្លែងណាដែលអ្នកនិយាយថាជាការប្រមាថ​ព្រះចេស្តា កន្លែងណា កន្លែងណាទៅ ឱ្យ​ឆ្លើយ កន្លែងណា?» ។​ លោកបានបកស្រាយថា ព្រះករុណាព្រះអង្គយាងតិចៗ ហើយ​គាត់​ចង់ដើរពីក្រោយ ប៉ុន្តែ​ព្រះ​ករុណា​​ត្រូវការជជែក​ជាមួយ​គាត់ ដូច្នេះលោក​ក៏​នៅពីក្រោយចំហៀង​ព្រះករុណា។ ហើយកន្លែង​មួយ​នោះ​ក្នុងវីដេអូ មើល​ឃើញ​ច្បាស់ អ្នកបាំងក្លស់នៅឆ្ងាយពេក ដូច្នេះ​គាត់រុញអ្នកបាំងក្លស់មកបាំង​ថ្វាយជូន​ព្រះអង្គ មិនមែនបាំងឱ្យគាត់ទេ។ លោកបញ្ជាក់ជាសំនួរ​បន្តថា៖ «ទីចុងបញ្ចាប់តើអ្នកឯងចង់​យកត្រង់​កន្លែង​បាំងឆ័ត្រ រឺត្រង់កន្លែងអង្គុយ?»។

លោកថ្លែងទៀតថា ការរៀបចំពិធីការ គឺមានចំណាស់តាំងពីយូរណាស់មកហើយ គឺអាច​ថាតាំងពីកកើតព្រះរាជាណាចក្រកម្ពុជាទី២​មក គឺរៀបចំបែបហ្នឹងឯង ព្រះមហាក្សត្រ​ព្រះអង្គ​គង់មុខ ឯថ្នាក់ប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រី អង្គុយខាងក្រោយ​ចំហៀង មិនមែនបានសេចក្តីថា អង្គុយទឹមគ្នាទេ។

លោកនាយករដ្ឋមន្ត្រីថ្លែងបន្តថា ចំនុចនេះលោក ហ៊ុន សែន ចង់ផ្តោតលើលោក យឹម ស៊ីណន ដែលនិយាយថា នៅតាមតុកាហ្វេ តើនរណាជាស្តេច​ពិតប្រាកដ​។ អ្នកឯង[លោក យឹម ស៊ីណន]​ចង់និយាយថា ហ៊ុន សែន ជាអ្នកមានអំណាចពិតប្រាកដ។ លោកនាយករដ្ឋមន្ត្រី​បន្ថែម​ថា ច្បាប់រដ្ឋធម្មនុញ្ញ បានចែងថា ព្រះមហាក្សត្រសោយរាជ្យ ប៉ុន្តែទ្រង់មិនកាន់អំណាច ដូច្នេះ​ច្បាប់​រដ្ឋធម្មនុញ្ញ បានបញ្ជាក់ច្បាស់ហើយ។

លោក ហ៊ុន សែន បានបន្ថែមទៀតថា លោកមិនអត់ឱនឱ្យនរណាដាច់ខាតលើការប្រមាថ​អស់ទាំងនេះ ហើយលោកមិនទទួលយកការសុំទោសបានទេ។

លោក ឆាយ គឹមខឿន បដិសេធមិនឆ្លើយសំនួរ ហើយគាត់បង្វែរសំនួរឱ្យសួរទៅកាន់ស្នងការ​រាជធានីភ្នំពេញវិញ។

អំ សំអាត នាយកចាត់ការទូទៅនៃអង្គការ លីកាដូ បានថ្លែងថា លោកសុំមិនធ្វើការ​អត្ថាធិប្បាយលើបញ្ហាលោក យឹម ស៊ីណន និង​ លោក ហ៊ុន កុសល ទេ ព្រោះលោកមិនទាន់​ប្រមូលព័ត៌មាន​បានគ្រប់គ្រាន់នៅឡើយ ប៉ុន្តែលោកបានធ្វើការអត្ថាធិប្បាយលើស្ថានភាព​នយោបាយ​ជាទូទៅថា សង្គមស៊ីវិលមានការព្រួយបារម្ភ​ទាក់ទងនឹងស្ថានភាព​នយោបាយ​នៅកម្ពុជា បន្ទាប់ពីតុលាការកាត់ទោសលោក កឹម​ សុខា ក្រោយមកទៀត សភាអឺរ៉ុប បាន​ចេញ​​សេចក្តីសម្រេចចំពោះស្ថានភាពប្រជាធិបតេយ្យ និងការ​គោរពសិទ្ធិ​មនុស្ស​នៅកម្ពុជា និងមើលទៅលើការកាត់បន្ថយអនុគ្រោះពន្ធEBA រឺកាត់ផ្តាច់ទាំងស្រុងថែមទៀត ដែលជា​ស្ថានភាព​មួយភ្ជាប់នឹងបរិយាកាសនយោបាយ រឿងការកាត់ទោស លោក កឹម សុខា និង​មានការចាប់ខ្លួនថ្មីៗនេះ។

លោក សំអាត បញ្ជាក់ជាទូទៅថា៖ «ស្ថានភាពនយោបាយចុងក្រោយនេះ ខ្ញុំមើលទៅ វាហាក់​ដូចជាមានស្ថានភាពតានតឹង ហើយវាមិនសូវជាអំណោយផលល្អ ដល់ការបោះឆ្នោត​ខែកក្កដា ឆ្នាំ២០២៣ ខាងមុខ»

លោក សំអាត បន្ថែមថា ការបញ្ជេញមតិ គឺជាសិទ្ធិសេរីភាពរបស់ប្រជាពលរដ្ឋ​ដែល​ការពារ​ដោយរដ្ឋធម្មនុញ្ញ និងច្បាប់អន្តរជាតិ ប៉ន្តែការបញ្ចេញមតិទាំងឡាយក៏វាត្រូវប្រកបដោយ​ក្រមសីលធម៌ វិជ្ជាជីវៈ និងមានការប្រុងប្រយ័ត្នផងដែរ។

996 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម