ក្រសួងចំនួនពីរបានជូនដំណឹងដល់ប្រព័ន្ធផ្សាព្វផ្សាយដែលផ្សាយពាណិជ្ជកម្មគ្រឿងស្រវឹង ត្រូវគោរពឱ្យបានខ្ជាប់ខ្ជួននៃគោលការណ៍ដែលបានចេញផ្សាយ និងផលប៉ះពាល់ពីការប្រើប្រាស់គ្រឿងស្រវឹង ការណ៍នេះបន្ទាប់ពីមានទូរទស្សន៍មួយបង្ហាញសកម្មភាពយុវជនផឹកស្រា។
តាមរយៈលិខិតរដ្ឋមន្ត្រីក្រសួងព័ត៌មាន ចេញផ្សាយកាលពីថ្ងៃទី៩ ខែមករា បានបញ្ជាក់ថា អង្គភាពប្រព័ន្ធផ្សព្វផ្សាយ ក្រុមហ៊ុនផលិតផល ចែកចាយ នាំចូល និងក្រុមហ៊ុនផ្តល់សេវាផ្សាយពាណិជ្ជកម្មគ្រឿងស្រវឹងទាំងអស់ ដែលផ្សាយពាណិជ្ជកម្មគ្រឿងស្រវឹងនៅលើប្រព័ន្ធផ្សព្វផ្សាយ រួមទាំងវិទ្យុ និងទូរទស្សន៍ រួមបញ្ចូលការផ្តល់រង្វាន់ច្រើន សម្ភាសន៍អ្នកត្រូវរង្វាន់ និងប្រើប្រាស់រូបភាពដើម្បីទាក់ទាញ។
លិខិតដដែលនេះបានបញ្ជាក់ថា សកម្មភាពទាំងអស់នេះខាងលើបានជំរុញ លើកទឹកចិត្ត និងលើកកម្ពស់គ្រឿងស្រវឹងនៅកម្ពុជា ក៏ជាហេតុលើកទឹកចិត្តយុវជនឱ្យប្រើប្រាស់គ្រឿងស្រវឹង ដែលអាចប៉ះពាល់ដល់អនាគតរបស់ពួកគេ ម្យ៉ាងទៀតនាំឲ្យមានគ្រោះថ្នាក់ចរាចរណ៍ អំពើហិង្សាក្នុងគ្រួសារ និងបញ្ហាសុខភាពផងដែរ។
ក្រសួងព័ត៌មានសង្កត់ធ្ងន់ថា ម្ចាស់ផ្សព្វផ្សាយ ក្រុមហ៊ុនផលិត អ្នកនាំចូល អ្នកចែកចាយ និងអ្នកផ្តល់សេវាផ្សាយពាណិជ្ជកម្មគ្រឿងស្រវឹងត្រូវអនុវត្ត និងប្រកាន់ខ្ជាប់តាមស្មារតីសារាចរ ចុះថ្ងៃទី១ ខែតុលា ឆ្នាំ ២០១៤ ស្តីពីការផ្សាយពាណិជ្ជកម្មគ្រឿងស្រវឹង, ហាមផ្សាយពាណិជ្ជកម្មគ្រឿងស្រវឹងផ្តល់រង្វាន់ និងពាក្យស្លោកមានចរិតលើកទឹកចិត្តហួសហេតុ ប្រើសកម្មភាពជំរុញ លើកទឹកចិត្ត ឬអូសទាញប្រជាពលរដ្ឋឱ្យឈ្លក់វង្វេងសេពគ្រឿងស្រវឹង ហាមយកស្ត្រី និងអនីតិជនក្រោមអាយុ១៨ឆ្នាំ ផ្សាយពាណិជ្ជកម្មគ្រឿងស្រវឹងដែលធ្វើឱ្យប៉ះពាល់ដល់សិទ្ធិ និងសេចក្តីថ្លៃថ្នូររបស់ស្ត្រីខ្មែរ, និង រាល់ការផ្សាយពាណិជ្ជកម្មគ្រឿងស្រវឹងតាមកញ្ចក់ទូរទស្សន៍គ្រប់ប្រភេទ សារព័ត៌មានតាមប្រព័ន្ធអនឡាញ អាហ្វីស ប៉ាណូ LED Screen ផ្ទាំងផ្សាយពាណិជ្ជកម្មនានា ត្រូវដាក់សារព្រមាន«ពិសាគ្រឿងស្រវឹងសូមកុំបើកបរ» ឬពិសាដោយការទទួលខុសត្រូវ»។
លិខិតក្រសួងព័ត៌មានបានលើកឡើងថា៖ «ក្នុងករណីម្ចាស់ប្រព័ន្ធផ្សព្វផ្សាយ ឬក្រុមហ៊ុនផលិត នាំចូល ចែកចាយ ឬក្រុមហ៊ុនផ្តល់សេវាកម្មផ្សាយពាណិជ្ជកម្មគ្រឿងស្រវឹងណាមួយមិនអនុវត្តតាមលិខិតជូនដំណឹងនេះ ក្រសួងព័ត៌មាននឹងបញ្ឈប់ការផ្សាយស្ពតពាណិជ្ជកម្មនោះ»។ លិខិតបន្តថា៖ «ចំពោះម្ចាស់ប្រព័ន្ធផ្សព្វផ្សាយណាដែលល្មើស ក្រសួងព័ត៌មាននឹងអនុវត្តតាមកិច្ចសន្យាដែលបានតម្កល់ទុកនៅក្រសួងព័ត៌មាន»។
អ្នកនាំពាក្យក្រសួងព័ត៌មាន លោក ទេព អស្នារិទ្ធ សុំមិនធ្វើការអត្ថាធិប្បាយបន្ថែមទេ ដោយឱ្យអ្នកសារព័ត៌មានខេមបូចា ដកស្រង់ខ្លឹមសារដែលមាននៅក្នុងសេចក្តីជូនដំណឹងដើម្បីយកមកផ្សព្វផ្សាយបន្ត។
លោកមានប្រសាសន៍ថា៖ «អាចស្រង់ខ្លឹមសារដើម្បីសរសេរផ្សាយចុះ! បងមិនខំមិនអីលើនឹងទៀតទេ»។
ដោយឡែក ក្រសួងសុខាភិបាល ក៏បានចេញសេចក្តីប្រកាសព័ត៌មាន ដោយជំរុញឱ្យសាធារណជន អាជ្ញាធរមូលដ្ឋាន ក្រុមគ្រួសារ សាលារៀន និងសហគមន៍ចូលរួមក្នុងសកម្មភាពដូចជា ការអប់រំ ការផ្សព្វផ្សាយ និងការលើកទឹកចិត្តអ្នកប្រើប្រាស់គ្រឿងស្រវឹងឱ្យឈប់ប្រើប្រាស់គ្រឿងស្រវឹង ដើម្បីបង្កើតបរិយាកាសដែលរារាំងការប្រើប្រាស់គ្រឿងស្រវឹងនៅកម្ពុជា។ សេចក្តីប្រកាសបញ្ជាក់ថា ការប្រើប្រាស់គ្រឿងស្រវឹងអាចបង្កើនហានិភ័យនៃជំងឺឆ្លងនានា រួមមានជំងឺក្រិនថ្លើម ខូចថ្លើម និងជំងឺមហារីកនិងជម្ងឺជាច្រើនមុខទៀត។ បន្ថែមពីនេះ ក៏អាចប៉ះពាល់ដល់សង្គម និងសេដ្ឋកិច្ច ជាពិសេសលើមិត្តភក្តិ ក្រុមគ្រួសារ អ្នករួមការងារ និងទំនាក់ទំនងផ្សេងទៀត និងខុសពីសីលធម៌សង្គមជាដើម។
សេចក្តីប្រកាសព័ត៌មាននេះឱ្យដឹងថា៖ «លើសពីនេះ វាអាចបណ្តាលឱ្យយុវ័យ ឈានទៅរកការប្រើប្រាស់គ្រឿងញៀន និងថ្នាំជក់ ដែលប្រាសចាកពីសីលធម៌សង្គម។ ទន្ទឹមនឹងនេះដែរ គ្រឿងស្រវឹងបង្កឱ្យមានផលប៉ះពាល់ ដូចជា អំពើហិង្សា ការប្រព្រឹត្តបទឧក្រិដ្ឋ ជម្លោះបុគ្គល ការចំណាយថវិកាទៅលើការទិញគ្រឿងស្រវឹង ការព្យាបាលសុខភាព គ្រោះថ្នាក់ចរាចរណ៍ និងការបាត់បង់ផ្សេងៗ»។
ក្រសួងក៏បានស្នើដល់ស្ថាប័នផ្សេងៗចូលរួមគាំទ្រ និងទប់ស្កាត់ការប្រើប្រាស់ផលិតផលគ្រឿងស្រវឹង តាមរយៈការឆ្លើយតបពហុវិស័យដោយផ្តោតលើការរៀបចំលិខិតបទដ្ឋានគតិយុត្តពាក់ព័ន្ធផ្សេងៗ ក្នុងការជំរុញការផ្លាស់ប្តូរឥរិយាបថបុគ្គល គ្រួសារ សហគមន៍ ឱ្យជ្រើសរើសទម្លាប់រស់នៅដោយគ្មានគ្រឿងស្រវឹង។ ក្រសួងសុខាភិបាលក៏បានអំពាវនាវដល់អាជ្ញាធរដែនដីសហការគ្រប់គ្រងការដាក់ស្លាក់ប៉ាន់ណូផ្សព្វផ្សាយអំពីផលប៉ះពាលសុខភាពពីការប្រើប្រាស់គ្រឿងស្រវឹងផងដែរ។
ខេមបូចា មិនអាចសុំការអត្ថាធិប្បាយពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន និងរដ្ឋលេខាធិការក្រសួងសុខាភិបាល លោកស្រី យក់ សម្បត្តិ បានទេ។
សូមរំលឹកថា កាលសប្តាហ៍មុន មានកម្មវីធីប្រដាល់មួយ ដែលឧបត្ថម្ភដោយស្រាបៀរកម្ពុជារបស់ក្រុមហ៊ុនជីបម៉ុង បានហៅយុវជន៤នាក់ មានស្រីមានប្រុសឱ្យឡើងលើសង្វែនប្រដាល់ ហើយឱ្យយុវជនទាំងអស់នោះគាស់ក្រវាល់កំប៉ុងស្រាបៀរ និងផឹកបង្ហាញទស្សនិកជនដែលបានចូលរួមនោះ ខណៈពេលសកម្មភាពនេះក៏កំពុងផ្សាយផ្ទាល់លើកញ្ចក់ទូរទស្សទ៍ក្នុងស្រុកមួយផងដែរ។
ខេមបូចា មិនអាចសុំការអត្ថាធិប្បាយពីតំណាងក្រុមហ៊ុនផលិតស្រាបៀរខ្មែរបាននៅឡើយ ដោយទំនាក់ទំនងតាមរយៈលេខទូរសព្ទជាច្រើនដង ប៉ុន្តែគ្មានអ្នកលើក។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ឃើញថា ជារឿងល្អដែលក្រសួងទាំងពីរ មានចាត់ការណ៍ពាក់ព័ន្ធនឹងបញ្ហាផ្សព្វផ្សាយ និងសកម្មភាពផឹកគ្រឿងស្រវឹងនៅតាមកញ្ចក់ទូរទស្សន៍ ឬក៏បណ្តាញសារព័ត៌មានមួយចំនួន។ នេះជាអ្វីដែលលោកចង់ឃើញ ដើម្បីចូលរួមទប់ស្កាត់នៃការលើកកម្ពស់វប្បធម៌ប្រើប្រាស់គ្រឿងស្រវឹងខ្លាំងនៅក្នុងប្រទេស ជាពិសេសប៉ុន្មានឆ្នាំចុងក្រោយនេះ គ្រឿងស្រវឹងក្លាយជាឧបករណ៍ដ៏សាហាវមួយ ដែលធ្វើឱ្យប៉ះពាល់ដល់ផ្នត់គំនិតរបស់យុវជន ហើយយុវជនកាន់តែច្រើនទៅធ្លាក់ក្នុងរណ្តៅនេះ។
លោកបញ្ជាក់ថា៖ «សូមឱ្យការអនុវត្តរបស់ក្រសួងសាមីដែលពាក់ព័ន្ធទាំងអស់ សូមកុំធ្វើដើម្បីតែបង្ហាញឱ្យឃើញថា មានការយកចិត្តទុកដាក់ ក៏ប៉ុន្តែចំពោះការអនុវត្តវិញ គឺមិនទទួលបាននូវលទ្ធផលជាវិជ្ជមាន។ ដូច្នេះការអនុវត្តរបស់ក្រុមហ៊ុន ឬស្ថានីយ៍សារព័ត៌មានទាំងអស់ហ្នឹង បើសិនមានករណីរំលោភបំពាន គឺគួរតែចាត់វិធានការតាមច្បាប់ និងធ្វើការពិន័យឱ្យបានធ្ងន់ធ្ងរ ដោយមិនមានការយោគយល់ ឬក៏មិនមានការលើកលែង»។
យ៉ាងណាមិញ លោកក៏មានក្តីបារម្ភផងដែរ ព្រោះស្ថានីយ៍ទូរទស្សន៍ ឬសារព័ត៌មានធំៗទាំងអស់នោះសុទ្ធតែជារបស់បុគ្គលដែលមានឥទ្ធិពល និងអំណាច ដែលជាហេតុនាំឱ្យក្រសួងសាមី ពិបាកក្នុងអនុវត្តច្បាប់ឱ្យមានប្រសិទ្ធភាព
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ យល់ឃើញថា ស្ថានភាពយុវជនខ្មែរបច្ចុប្បន្ន ដែលមានមនសិការគិតអំពីបញ្ហាជាតិ និងគិតអំពីអនាគតសង្គមជាតិ មានតិចតួចណាស់ ជាមួយគ្នានេះ លោកក៏បានលើកឡើងអំពីរបាយការណ៍របស់អង្គការតម្លាភាព ដែលរកឃើញថាមានយុវជនប្រមាណ១៦%ប៉ុណ្ណោះ ចាប់អារម្មណ៍ទៅលើនយោបាយជាតិ និងគិតគូរអំពីបញ្ហាសង្គមជាតិនាពេលអនាគត។ ដោយឡែក លោកចាត់ទុកការផ្សាព្វផ្សាយគ្រឿងស្រវឹងយ៉ាងគគ្រឹកគគ្រែងនៅពេលនេះ ជារឿងខុសធ្ងន់ណាស់ បើប្រៀបធៀបជាមួយប្រទេសជឿនលឿនផ្សេងទៀត ដែលគេកំពុងពង្រឹងពង្រីកយុវជនរបស់គេឱ្យមានសមត្ថភាព ហើយប្រទេសទាំងអស់នោះ មានវិធានការណ៍យ៉ាងតឹងរឹង ចំពោះការផ្សព្វផ្សាយគ្រឿងស្រវឹងនៅតាមសាធារណៈ។
លោកបញ្ជាក់ថា៖ «យើងឃើញថាគ្រឿងស្រវឹងនេះ ក្លាយទៅជារឿងអាណាធិបតេយ្យ ហើយទាំងអស់គ្នា ទាំងអ្នកលក់ ទាំងអ្នកទិញ ទាំងរដ្ឋមន្ត្រី ទាំងនាយករដ្ឋមន្ត្រី ទាំងពលរដ្ឋទូទៅទាំងអស់ សុទ្ធតែទទួលស្គាល់ថា គ្រឿងស្រវឹងគឺជាផ្នែកមួយនៃការបំបាក់ស្មារតី បំបាក់ផ្នត់គំនិត ធ្វើឱ្យមនុស្សឈ្លោះគ្នា បង្កើតអំពើហិង្សា បង្កើតឱ្យបានភាពអសន្តិសុខសង្គម យ៉ាងណាក៏ដោយ តែយើងនៅតែឃើញគ្រឿងស្រវឹងហ្នឹង នាំមុខគេ ទាំងវិស័យផ្សាយពាណិជ្ជកម្ម ទាំងការដាក់ស្លាកនៅតាមដងផ្លូវ»។[…]។ រហូតដល់ហ៊ានឱ្យយុវជនខ្មែរឈរផឹកប្រកួតប្រជែងគ្នាតាមកញ្ចក់ទូរទស្សទ៍ទៀត នេះជារឿងទើសខុសធ្ងន់ធ្ងរណាស់ ដែលវាកំពុងបង្ហាញពីភាពកម្សោយនៃជាតិសាសន៍មួយ»។
ជាមួយស្ថានភាពនេះ បើគ្មានវិធានការណាមួយពីសាមីក្រសួងដែលពាក់ព័ន្ធទៅលើគ្រឿងស្រវឹងនេះទេ លោកយល់ឃើញថា ជាតិសាសន៍របស់យើង នឹងកាន់តែធ្លាក់ដុនដាប និងខ្សោយទៅពីមួយជំនាន់ទៅមួយជំនាន់ទៀត ហើយទោះបីកន្លងមកយើងធ្លាប់ឮ ធ្លាប់ឃើញពីគោលការណ៍របស់ក្រសួងអំពីការទប់ស្កាត់នៃការផ្សព្វផ្សាយគ្រឿងស្រវឹងយ៉ាងណាក៏ដោយ តែជាលទ្ធផលគ្រឿងស្រវឹងនៅតែផុសផុលនៅក្នុងសង្គមដដែល៕
រាយការណ៍បន្ថែមដោយ៖ ហ៊ែល កំសាន
