សមាគមសម្ព័ន្ធអ្នកសារព័ត៌មានកម្ពុជា

អង្គការក្រៅរដ្ឋាភិបាលចំនួនពីរ រកឃើញកុមារជាច្រើនក្នុងខេត្តកំពង់ស្ពឺបោះបង់ការសិក្សា ដោយសារគ្រួសារមានវិបត្តិបំណុល

ក្មេងស្រីម្នាក់លក់ពោតបំពង និងរបស់ហូបនៅខាងមុខព្រះបរមរាជវាំង រាជធានីភ្នំពេញ។ រូបថតថ្ងៃទី៨ ខែកញ្ញា ឆ្នាំ២០២៣។ (ខេមបូចា/ ព្រីង សំរាំង)
ក្មេងស្រីម្នាក់លក់ពោតបំពង និងរបស់ហូបនៅខាងមុខព្រះបរមរាជវាំង រាជធានីភ្នំពេញ។ រូបថតថ្ងៃទី៨ ខែកញ្ញា ឆ្នាំ២០២៣។ (ខេមបូចា/ ព្រីង សំរាំង)

ការ​សិក្សាស្រាវជ្រាវ​របស់អង្គការក្រៅរដ្ឋាភិបាលចំនួនពីរ​ បាន​បង្ហាញ​ថា ​​ការ​រីក​រាលដាលនៃការ​​ជំពាក់​បំណុល​ច្រើន​លើស​លប់​ ​បាន​នាំ​ឱ្យ​មាន​ការរំលោភ​សិទ្ធិមនុស្ស​ធ្ងន់ធ្ងរ​មានជាទម្រង់ផ្សេងៗ ដូចជាបណ្តាលឱ្យកុមារ​បង្ខំចិត្តឈប់ពីការសិក្សាដើម្បីធ្វើការរកប្រាក់ជួយក្រុមគ្រួសារក្នុងការសងបំណុល​។

យោងតាម​អង្គការ​សមធម៌​កម្ពុជា​ ​និង​អង្គការ​ស​ម្ព័ន្ធ​ខ្មែរ​ជំរឿន​ ​និង​ការពារ​សិទ្ធិមនុស្ស​ ​លី​កា​ដូ ​ចេញផ្សាយ​របាយការណ៍​មួយកាលពីខែសីហា ឆ្នាំ២០២៣ ​ស្ដីពី​ហា​និ​ភ័យ​នៃ​បំណុល​​ តាមរយៈ​ការ​សិក្សាស្រាវជ្រាវ​បែប​បរិមាណ​នៃ​អ្នក​ជាប់ជំពាក់​ក​ម្ចី​ខ្នាត​តូច​​នៅ​ខេត្ត​កំពង់ស្ពឺ​​។

​លទ្ធផល​នៃ​ការស្ទង់មតិ​នៃរបាយការណ៍ ​ក្នុងចំណោម​ប្រជាពលរដ្ឋ​ ​១​៩​៥​ ៨​៨​២​ខ្នង​ផ្ទះ ​​ទូទាំង​ខេត្ត​កំពង់ស្ពឺ​ បង្ហាញ​ថា ពលកម្ម​កុមារ​ ​និង​កុមារ​បោះបង់​ការសិក្សា​ដោយសារ​បំណុល​គ្រឹះស្ថាន​មីក្រូ​ហិរញ្ញវត្ថុ​ ​ឬ​ធនាគារ​ ​គឺ​កើតឡើង​ញឹកញាប់​ខ្លាំង​។​ រួម​មាន៤​ ៥​៦​៥​ ​ខ្នង​ផ្ទះ ប្រមាណ​ជា​៣​%​នៃ​ប្រជាពលរដ្ឋ​​ ​បាន​ឱ្យ​កូន​បោះបង់​ការ​សិក្សា​ ​ដោយសារតែ​ក​ម្ចី​មីក្រូ​ហិរញ្ញវត្ថុ​ ​ឬ​ធនាគារ​ ​ដោយ​កុមារ​ជាច្រើន​ត្រូវ​ទៅ​ធ្វើការ​ជួយ​រក​ប្រាក់​ ​ដើម្បី​បង់​សង​ក​ម្ចី​ទាំងនោះ​វិញ​​។​ ដែលធ្វើឱ្យ​ប៉ះពាល់​ដល់កុមារ​សរុប​ចំនួន​ ​៨​ ៩​១​២​នាក់​ ​។​

​របាយការណ៍បន្តរកឃើញថា មាន៩​ ៦​០​២​​ខ្នង​ផ្ទះ ​ប្រមាណជា៦​,​១​% ​នៃប្រជាពលរដ្ឋ​បាន​លក់​ដី​ដើម្បី​សង បំណុល​​។ ខណៈពេលមាន១​៤​៤​ ៨​១​៩​ខ្នង​ផ្ទះ​ ​​ប្រមាណជា៩​២​% នៃប្រជាពលរដ្ឋ​បាន​ដាក់​ប្លង់​កម្មសិទ្ធិ​ដីធ្លី​យ៉ាងតិច​មួយ​ ​ជា​ទ្រព្យ​ធានា​ ​សម្រាប់​ក​ម្ចី​មីក្រូ​ហិរញ្ញវត្ថុ​ ​ឬ​ធនាគារ​។ របាយការណ៍បន្ថែមថា គ្រួសារ​របស់​ពួកគេ​ជំពាក់​បំណុល​ច្រើនពេក​ ​ហើយ​អ្នកខ្ចី​ជាង​​២​៧​% ​កំពុង​ចំណាយ​ប្រាក់ចំណូល​របស់​ពួកគេ​ជាង​​៧​០​% ​លើ​ការ​បង់​សងបំណុល​ ​ជា​រៀងរាល់​ខែ​ ​។​

ទន្ទឹងនឹងនេះ អ្នកខ្ចី​ភាគច្រើន​ ​មិនបាន​យល់​ដឹង​ពី​ដំណើរការ​ផ្លូវច្បាប់​ ​ក្នុង​ករណី​ខកខាន​ការ​បង់​សង​ក​ម្ចី ​ឬ​មិន​ជឿ​ថា​ ​មាន​ការប្រើប្រាស់​ដំណើរការ​ផ្លូវច្បាប់​ ​។​ ​ប្រមាណ​តិច​ជាង​​២​%​នៃ​អ្នកផ្ដល់​បទសម្ភាសន៍​ទាំងអស់​ ​បាន​លើកឡើង​ថា​ ​ពួកគេ​បាន​គិត​អំពី​ការ​រឹបអូស​ដី​តាម​ផ្លូវច្បាប់​ ​ក្នុង​ករណី​ខកខាន​ការ​បង់​សង​។

លោកស្រី ចន្ទ (ជាឈ្មោះដាក់ក្រៅ ដើម្បីថែរក្សាភាពថ្លៃថ្នូររបស់គាត់) ដែលកំពុងរស់ក្នុងខេត្តកំពង់ស្ពឺ រៀបរាប់ថា រាល់ថ្ងៃខំប្រឹងធ្វើការ សន្សំលុយដើម្បីតែបង់ធនាគារ ខ្លួនឯងសុខចិត្តហួបប្រហុកហួបអំបិល ហើយមួយរយៈពេលនេះមិនមានលុយ ឬមានលុយតិចតួច យកទៅបង់ធនាគារមិនគ្រប់ចំនួន ក៏ធនាគារ​មិនយកដែរ។ ដល់ពេលដូច្នេះ ខាងធានាគារគេមកថត និងចង់លៃលកដីដែលគាត់កំពុងរស់នៅ ខណៈពេល​ដីនោះ ជាដីដែលរដ្ឋចែកឱ្យគាត់ មិនមែនដីគាត់រកស៊ីបាន ឬទទួលមរតកពីគ្រួសារអីទេ។ លោកស្រីបន្តថា បើខាងធនាគារនៅតែបង្ខំគាត់ មានតែលក់ដីរដ្ឋចែកឱ្យ​ ដើម្បីយកលុយទៅសងធនាគារតែប៉ុណ្ណោះ។

លោកស្រីសំណូមពរ៖ «សុំឱ្យពន្យារតទៅមុខទៀតណា៎ស បំណុលដែលខ្ញុំជំពាក់ ខ្ញុំនៅតែសង។ ហើយ​កុំ​យកការច្រើនពេក សុំតែដើមទៅ! ព្រោះអត់មានអីទេ ខ្ញុំអត់មានផ្ទះ ខ្ញុំអត់មានអីទេ មានតែដីបន្តិចទេ»។

យ៉ាងណា ប្រាក់ដែលលោកស្រីខ្ចីពីធនាគារនោះ ក្នុងគោលបំណងដើម្បីធ្វើជាទុនរកស៊ី ប៉ុន្តែជាអកុសលត្រូវ បានក្ស័យធនអស់ហើយ។ ហើយក្រុមគ្រួសាររបស់លោកស្រីក៏បង្ខំចិត្តឱ្យកូនរបស់ខ្លួនឈប់ពីការសិក្សា ដើម្បី​ទៅធ្វើការងារ យកលុយមកបង់ធនាគារផងដែរ។

លោកសី្របន្តថា៖ «កូនចៅឈប់រៀន ឈប់អី! ដោយសារចឹងដែរហ្នឹង(បំណុល)»

រូបក្រាហ្វិករបស់អង្គការ លីកាដូ និងអង្គការ សមធម៌កម្ពុជា ដែលស្រង់ចេញពីរបាយការណ៍សិក្សាបែបបរិមាណវិស័យដែលមានចំណងជើងថា «ការគំរាមកំហែងនៃបំណុល» របស់អ្នក ខ្ចីកម្ចីតូចៗ នៅខេត្តកំពង់ស្ពឺ ។ (លីកាដូ និង សមធម៌កម្ពុជា)
រូបក្រាហ្វិករបស់អង្គការ លីកាដូ និងអង្គការ សមធម៌កម្ពុជា ដែលស្រង់ចេញពីរបាយការណ៍សិក្សាបែបបរិមាណវិស័យដែលមានចំណងជើងថា «ការគំរាមកំហែងនៃបំណុល» របស់អ្នក ខ្ចីកម្ចីតូចៗ នៅខេត្តកំពង់ស្ពឺ ។ (លីកាដូ និង សមធម៌កម្ពុជា)

លោក​ ​អៀង​ ​វុទ្ធី​ ​នាយក​ប្រតិបត្តិ​នៃ​អង្គការ​សមធម៌​កម្ពុជា លើកឡើងថា ឪពុកម្តាយ​របស់គ្រួសារកុមារ​ដែលបានបោះបង់ចោលការសិក្សាភាគច្រើន គឺពួកគាត់មានជីវភាពក្រីក្រលំបាក និងត្រូវជាប់បំណុល​ធនាគារបន្ថែមទៀត ជាហេតុមិនអាចមានលទ្ធភាពឱ្យកូនបន្តការសិក្សាទៀតបាន។ ដោយឡែកកុមារ​ទាំងអស់នោះ បង្ខំចិត្តធ្វើការងារផ្សេងៗ ទៅតាមឪពុកម្តាយ ដើម្បីស្វែងរកលុយបន្ថែម សម្រាប់បង់មីក្រូ​ហិរញ្ញវត្ថុ​ ​ឬ​ធនាគារ។

លោកបញ្ជាក់ថា៖ «កត្តាបំណុលដែលត្រូវចាំបាច់រកប្រាក់បន្ថែម ដើម្បីជួយទៅដល់ឪពុកម្តាយ និងស្ថានភាពគ្រួសាររបស់កុមារទាំងអស់ហ្នឹង»។លោកបន្ថែមថា៖ «យើងឃើញថាគាត់(កុមារ) ករណីខ្លះមានធ្វើការចំណាក់ស្រុក ឬក៏ទៅធ្វើការងារផ្សេងៗ»

លោក វុទ្ធី បន្តថា ទន្ទឹងនេះលោកក៏ព្រួយបារម្ភផងដែរ ចំពោះការរកឃើញថា មានកុមារច្រើន​បោះបង់ចោល​ការសិក្សា ព្រោះអាចប៉ះពាល់ដល់ជីវភាពរបស់ពួកគាត់នៅពេលអនាគត និងជះឥទ្ធិពលអវិជ្ជមានដល់​ធនធានមនុស្សនៅក្នុងសង្គមជាតិនាពេលខាងមុខ។ លោកចង់ឃើញឱ្យមានការដោះស្រាយ​អំពីបញ្ហា​ជីវភាព និងបំណុលរបស់គ្រួសារកុមារ ពីអ្នកពាក់ព័ន្ធនានា ជាពិសេសរដ្ឋាភិបាល ក្នុងស្ថានភាពដ៏លំបាក​នេះ។

លោកបានលើកឧទាហរណ៍ថា ដូចប្រទេសថៃ តាមរយៈរដ្ឋាភិបាលថ្មី គេមានគោលនយោបាយ​អនុគ្រោះ​ដល់ប្រជាពលរដ្ឋ និងកសិករ ដោយឱ្យពួកគេផ្អាកសងបំណុលដល់មីក្រូ​ហិរញ្ញវត្ថុ​ ​ឬ​ធនាគារ រយៈពេល៣ឆ្នាំ ដើម្បីទុកឱ្យឱកាសពួកគេរកប្រាក់ចំណូល។ ដែលជាកត្តាឱ្យពួកគាត់មិនចាំបាច់បង្ខំលក់ដី ផ្ទះ ឬទ្រព្យផ្សេងៗ ជាពិសេស បញ្ឈប់កូនពីការសិក្សា ដើម្បីរកប្រាក់បង់ធានាគារនោះទេ។

លោក វុទ្ធី អះអាងថា៖ «ចាំបាច់រដ្ឋាភិបាល ខ្ញុំគិតថានឹងមានផែនការ ដើម្បីជួយសម្រួលទៅដល់ប្រជាពលរដ្ឋ ព្រោះយើងមិនមានចំនួនតិចទេ ពលរដ្ឋរហូតទៅដល់២លាន៨សែននាក់ ដែលជាប់បំណុលមីក្រូ​ហិរញ្ញ​វត្ថុ​ទូទាំងប្រទេស»។

ដោយឡែកលោក អ៊ុង សុមិត្ត អ្នកសម្របសម្រួលនៃអង្គការ លីកាដូ ប្រចាំខេត្តកំពង់ស្ពឺ យល់ឃើញថា មីក្រូហិរញ្ញវត្ថុ ឬធនាគារគួរតែបន្ថួរបន្ថយ ឬពន្យារពេលក្នុងការសងបំណុល ព្រោះសព្វថ្ងៃនេះទាំងអ្នករកស៊ី និងប្រជាពលរដ្ឋកំពុងតែលំបាក និងប្រឈមនៃវិបត្តិសេដ្ឋកិច្ចជាច្រើន។

លោកបន្ដែមថា៖ «ប្រសិនបើកុមារបោះបង់ចោលសាលារៀនច្រើន វាជាហានិភ័យមួយដល់សង្គមយើង»។ លោកបន្តថា៖ «ការបោះបង់ចោលការសិក្សា ជួយការងារឪពុកម្តាយ តាំងពីក្មេង កាលណាយើង​បានឱ្យ​មានការធូរការបង់រំលស់តិចតួចទៅ គ្នាអាចមានពេលទៅរៀន ឬក៏ខ្លះទៅ លៃលកឱ្យកូនទៅរៀនកើត!»

លោក ថន ថារិន ប្រធានមន្ទីរអប់រំ យុវជន និងកីឡា ខេត្តកំពង់ស្ពឺ បដិសេធការធ្វើអត្ថាធិប្បាយលើបញ្ហា​នេះ។

ជុំវិញបញ្ហានេះ លោក វ៉ី សំណាង អភិបាលខេត្តកំពង់ស្ពឺ បានបដិសេធចំពោះរបាយការណ៍ដែលចេញ​ផ្សាយដោយអង្គការក្រៅរដ្ឋាភិបាលទាំងពីរនេះ ដែលវាខុសពីទិដ្ឋភាពជាក់ស្តែងរបស់ពលរដ្ឋរស់នៅ​ខេត្តកំពង់ស្ពឺ។ លោកថា នៅក្នុងខេត្តកំពង់ស្ពឺ មានរោងចក្រ និងសហគ្រាសជាច្រើន ដែលជាឱកាស​ឱ្យប្រជាពលរដ្ឋធ្វើការងារ និងរកប្រាក់ចំណូលបាន។ លោកបន្តថារបាយការណ៍នេះ វាជាការ​បម្រើ​ឱ្យមហិច្ឆតារបស់ពួកជនអគតិ ​និងប្រទេសបច្ចាមិត្ត។

លោកបញ្ជាក់ថា៖ «ខ្ញុំយល់ថារបាយការណ៍គាត់(អង្គការ) ស៊ីគម្រោង បើគាត់មិននិយាយអាក្រក់ចឹង! ពីណាទម្លាក់គម្រោងឱ្យគាត់ធ្វើទៀត!»

ដោយឡែកលោកចោទថា​ របាយការណ៍ដែលស្រាវជ្រាវឡើងនេះ ទៅសួរតែប្រជាជនដែលខិលខូច និងយក​លុយពីការខ្ចីធនាគារទៅលេងល្បែង និងផឹកស៊ីជាដើម។ ហើយចង់មកទាមទារឱ្យពន្យារពេលសង ឬមិន​ចង់​សងទៅធនគារ វាមិនត្រូវទេ។

លោកបន្ថែមថា៖ «ចង់និយាយថា បើយើងខ្ចីគេ សងគេទៅ!»

413 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម