ឧត្តមសេនីយ៍យោធាជាន់ខ្ពស់មួយរូបត្រូវចាប់ខ្លួនកាលពីថ្ងៃព្រហស្បតិ៍ ជាមួយនឹងមនុស្សប្រាំមួយនាក់ផ្សេងទៀត ដោយចោទថាបានដឹកជញ្ជូនមនុស្សខុសច្បាប់ពីភ្នំពេញទៅតាមខេត្ត បំពាននឹងបំរាមធ្វើដំណើរ ដែលដាក់ចេញក្នុងគោលបំណងបន្ថយការរាលដាលកូវីដ១៩។ ករណីផ្សេងមួយទៀតដែរ អ្នកបើករថយន្តឈ្នួលចំនួនបួននាក់ ក៏ត្រូវចាប់ខ្លួនដែរ បន្ទាប់ពីបានដឹកជញ្ជូនជនបរទេសជាច្រើននាក់ពីភ្នំពេញ ទៅកាន់ខេត្តព្រះសីហនុ ខណៈសមត្ថកិច្ចថាករណីបែបនេះកំពុងកើតមាននៅទូទាំងប្រទេស។
ស្នងការខេត្តស្វាយរៀង លោក កឹង ឃន មានប្រសាសន៍ថា សមត្ថកិច្ចបានចាប់ខ្លួនឧត្តមសេនីយ៍ទោ ស៊ុំ ពៅ និងមនុស្សចំនួនប្រាំមួយនាក់ផ្សេងទៀតនៅថ្ងៃព្រហស្បតិ៍ ប្រហែលជាម៉ោង៣ទៀបភ្លឺ ដោយថាបានដឹកជនជាតិចិនពីភ្នំពេញទៅកាន់ខេត្តស្វាយរៀង។
លោក កឹង ឃន មានប្រសាសន៍ទៀតថា៖ «សំណុំរឿងឧត្តមសេនីយ៍ផ្កាយពីរ[ស៊ុំ ពៅ] កំពុងតែរៀបចំបញ្ជូនទៅតុលាការ»។ យ៉ាងណា លោកបានបដិសេធលម្អិតពីសំណុំរឿងនេះ ដោយគ្រាន់តែបញ្ជាក់ថាជនជាតិចិនចំនួន២៨នាក់កំពុងដាក់ឲ្យនៅធ្វើចត្តាឡីស័ក។
នៅថ្ងៃសុក្រ ព្រះមហាក្សត្របានចេញព្រះរាជក្រឹត្យបញ្ចប់តំណែង និងបណ្ដេញលោក ស៊ុំ ពៅចេញពីក្រមខណ្ឌ បន្ទាប់ពីមានសំណើរបស់លោកនាយករដ្ឋមន្ត្រី ហ៊ុន សែន។ លោកនាយករដ្ឋមន្ត្រីបានអំពាវនាវឲ្យតុលាការចាត់ការតាមច្បាប់លើមន្ត្រីជាន់ខ្ពស់ ដើម្បីធ្វើជាគំរូសម្រាប់អ្នកបំពានវិធានការទប់ស្កាត់កូវីដ១៩ ខណៈកាលពីសប្ដាហ៍មុនឧត្តមសេនីយ៍ទោរបស់អគ្គស្នងការដ្ឋាននគរបាលជាតិម្នាក់ក៏ត្រូវដកចេញពីក្របខណ្ឌដែរ ដោយថាបានរៀបចំការជប់លៀងផឹកស៊ីនៅផ្ទះរបស់ខ្លួនក្នុងរាជធានីភ្នំពេញ។
លោក ថោង សូលីម៉ូ អ្នកនាំពាក្យអគ្គបញ្ជាការដ្ឋាននៃកងយោធពលខេមរភូមិន្ទ មានប្រសាសន៍ថាអគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន បានអនុញ្ញាតឲ្យសមត្ថកិច្ចចាត់ការវិធានការច្បាប់ប្រឆាំងនឹងឧត្តមសេនីយ៍ ដែលត្រូវចាប់ខ្លួននោះ។
លោកបន្ថែមថា៖ «អង្គភាពបានបើកផ្លូវឲ្យនគរបាលចាត់ការវិធាការច្បាប់លើ [ស៊ុំ ពៅ] ព្រោះថាលិខិតបេសកកម្មគាត់ចេញឲ្យដើម្បីបំពេញកិច្ចការចាំបាច់ ហើយមិនមែនសម្រាប់ដឹកជញ្ជូនមនុស្សដោយខុសច្បាប់នោះទេ»។
អ្នកនាំពាក្យរូបនេះបញ្ជាក់ថា លោក ស៊ុំ ពៅ មានតួនាទី អនុប្រធានក្រុមការងារ ស្រាវជ្រាវយុទ្ធសាស្ដ្រយោធានៃអគ្គបញ្ជាការ និងមានលិខិតធ្វើដំណើរដោយអនុញ្ញាតឲ្យគាត់ឆ្លងពីខេត្តមួយទៅខេត្តមួយបាន តែគាត់បានប្រើលិខិតនេះដឹកជញ្ជូនមនុស្សខុសច្បាប់។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមឃឿន មានប្រសានស៍ដែរថាសមត្ថកិច្ចបានពង្រឹងការត្រួតពិនិត្យលើវិធានាការនានា និងបានបង្ក្រាបការផ្លាស់ទីរបស់មនុស្សឆ្លងខេត្តដោយខុសច្បាប់។
លោកបន្ថែមថា៖ «យើងនឹងពង្រឹងវិធានការតាមដានបន្ថែមទៀត…ប៉ុន្តែយើងមិនអាចប្រាប់អ្នកសារព័ត៌មានបានទេ ព្រោះវាជាភារកិច្ច និងជំនាញរបស់សមត្ថកិច្ច»។
អ្នកនាំពាក្យរូបនេះបញ្ជាក់ទៀតថាលោកមិនបានដឹងពីចំនួនករណីសរុបនៅទូទាំងប្រទេសនោះទេ។ ប៉ុន្តែថាករណីដឹកជញ្ជូនមនុស្សដោយខុសច្បាប់ដែលបានរាយការណ៍មកមានដូចជានៅខេត្តកំពត ស្វាយរៀង កែប រតនគិរី និងកំពង់ស្ពឺ ដោយគិតតាំងពីថ្ងៃទី៧ ខែមេសា មក ជាពេលដែលរដ្ឋាភិបាលអនុវត្តវិធានការបិទការធ្វើដំណើរឆ្លងខេត្ត។
លោក សម សាមួន ស្នងការនគរបាលខេត្តកំពង់ស្ពឺ មានប្រសាសន៍ដែរថា នគរបាលបានចាប់ខ្លួនអ្នកបើកបរតាក់ស៊ីចំនួនបួននាក់កាលពីថ្ងៃព្រហស្បតិ៍ និងសុក្រ បន្ទាប់ពីបានស្ទាក់ចាប់អ្នកទាំងនោះពេលដឹកជញ្ជូនជនជាតិឥណ្ឌូណេស៊ីចំនួន១៦នាក់ និងជនជាតិចិនចំនួន១៨នាក់ ក្នុងដំណើរពីភ្នំពេញទៅកាន់ខេត្តព្រះសីហនុ។
ស្នងការរូបនេះបន្ថែមថា៖ «អ្នកបើកបរទាំងពីរត្រូវឃុំខ្លួនបណ្ដោះអាសន្ន និងរងបទចោទថាបានរារាំងដល់ការអនុវត្តវិធានការ តាមមាត្រា១១នៃច្បាប់ស្ដីពីកូវីដ១៩»
លោកបញ្ជាក់ថា សម្រាប់ជនបរទេសទាំងអស់ត្រូវបញ្ជូនទៅកាន់អគ្គនាយកដ្ឋានអន្តោប្រវេស្តន៍។
ករណីដាច់ដោយឡែកមួយទៀត លោក ម៉ៅ ច័ន្ទមធុរិទ្ធ ស្នងការខេត្តកំពត បានឲ្យដឹងដែរថាតុលាការបានឃុំខ្លួនបណ្ដោះអាសន្នជនជាតិចិនចំនួន១៤នាក់ ដោយចោទថាបានបំពាន និងប្រឆាំងវិធានការបង្ការកូវីដ១៩ ដោយបានព្យាយាមធ្វើដំណើរទៅទីក្រុងភ្នំពេញ។
លោកមានប្រសាសន៍ថា៖ «យើងបានបង្ក្រាបបួនករណី[ករណីដឹកជញ្ជូនមនុស្ស] ហើយជនសង្ស័យទាំងអស់ត្រូវបានបញ្ជូនទៅពន្ធនាគារ»។ យ៉ាងណា លោកមិនបានបញ្ជាក់ពីបទត្រូវចោទនោះទេ។
ចាប់តាំងពីមានការបិទខ្ទប់ទីក្រុងភ្នំពេញកាលពីថ្ងៃទី១៥ ខែមេសាមក មនុស្សចំនួន២៤០នាក់ត្រូវបានឃាត់ខ្លួន ប៉ុន្តែថាមានតែ១១នាក់ប៉ុណ្ណោះត្រូវបានបញ្ជូនទៅកាន់តុលាការ។ សម្រាប់អ្នកផ្សេងទៀតត្រូវបានអប់រំ និងឲ្យត្រឡប់ទៅផ្ទះវិញ ជាមួយគ្នានោះដែរក៏មានមនុស្សចំនួន២១៣នាក់ បានរងការពិន័យ។ នេះបើតាមការឲ្យដឹងពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា។
លោកថាអ្នកទាំង១១ដែលត្រូវបញ្ជូនទៅតុលាការគឺបានបំពានបំរាមក្នុងការជួបជុំផឹកស៊ី អំឡុងពេលបិទខ្ទប់។
កាលពីសប្ដាហ៍មុន លោកនាយករដ្ឋមន្ត្រី ហ៊ុន សែន បានជំរុញឲ្យរដ្ឋមន្ត្រីក្រសួងយុត្តិធម៌ ដាក់ទោសអ្នកដែលបានបំពានវិធានការ និងច្បាប់ទាក់ទងនឹងការគ្រប់គ្រងកូវីដ១៩។ លោកនាយករដ្ឋមន្ត្រីបានផ្ដល់ជាយោបល់ថាការអនុវត្តបន្ទាន់លើករណីបែបនេះគឺជារឿងត្រឹមត្រូវ។
លោកមានប្រសាសន៍ថា៖ «ខ្ញុំស្នើដល់រដ្ឋមន្ត្រីក្រសួងយុត្តិធម៌ កើត រិទ្ធ ឲ្យសហការជាមួយតុលាការដើម្បីដាក់ទោសមនុស្សដែល[មិន]ធ្វើចត្តាឡីស័ក បំពានទៅនឹងច្បាប់…ចាប់ខ្លួន[ជនសង្ស័យ]យប់នេះ កាត់ទោសស្អែក»។
លោក នី សុខា ប្រធានផ្នែកសិទ្ធមនុស្ស និងសិទ្ធិដីធ្លីរបស់សមាគមនសិទ្ធិមនុស្សអាដហុក មានប្រសាសន៍ថាមន្ត្រីជាន់ខ្ពស់មួយចំនួនដែលមានធនធាន និងលិខិតធ្វើដំណើរ បានឆ្លៀតឱកាសរកប្រយោជន៍ពេលមានការហាមឃាត់ធ្វើដំណើរ ធ្វើការដឹកជញ្ជូនមនុស្សដើម្បីបានប្រាក់។
លោកលើកឡើងថា៖ «វាជារឿងកម្រដែលឃើញមានមនុស្សធម្មតាអាចធ្វើបាន[រត់ពន្ធមនុស្ស] គឺមានតែមន្ត្រីជាន់ខ្ពស់ដែលប្រើអំណាចរបស់ពួកគេដើម្បីប្រព្រឹត្តរឿងនេះ…យើងបារម្ភថាបើសិនជានៅមានមនុស្សមានអំណាចប្រព្រឹត្តរឿងបែបនេះ នឹងធ្វើឲ្យវិធានការរបស់រដ្ឋាភិបាលគ្មានប្រសិទ្ធភាព»។
លោកបានអំពាវនាវឲ្យតុលាការធ្វើករណីនេះជាឧទាហរណ៍ចំពោះការចាប់ខ្លួនមន្ត្រីទាំងនោះ ដោយត្រូវដាក់ទោសធ្ងន់ធ្ងរ ដោយសារបានប្រើប្រាស់តួនាទីបំពានវិធានការបញ្ឈប់ការរាលដាលវីរុសកូវីដ១៩។
លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ បានគាំទ្រការលើកឡើងរបស់លោក នី សុខា និងបានស្វាគមន៍ចំពោះវិធានការច្បាប់ប្រឆាំងនឹងមន្ត្រីជាន់ខ្ពស់ទាំងនោះ ដែលបានផ្ដល់ប្រាក់ទៅអ្នកបើកបរ ឬអ្នកផ្សេងទៀត។
លោកបន្ថែមថា៖ «យើងមានការព្រួយបារម្ភ ព្រោះថាក្នុងពេលបិទខ្ទប់នេះ គ្រួសារមួយចំនួននឹងមានចំណូលធ្លាក់ចុះ មនុស្សខ្លះអាចប្រថុយដឹកជញ្ជូនមនុស្សឆ្លងទៅខេត្តផ្សេងៗ»។
លោកស្រី ជូ ប៊ុនអេង ជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មានប្រសាសន៍ថារដ្ឋាភិបាលបានយកចិត្តទុកដាក់ខ្ពស់ក្នុងការទប់ស្កាត់ការជួញដូរមនុស្ស ទោះបីជាកំពុងប្រឈមនឹងវិបត្តិកូវីដ១៩ ក៏ដោយ។
សំដៅដល់ករណីថ្មីៗនេះ លោកស្រីមានប្រសាសន៍ថា៖ «មានធាតុផ្សំនៃការរត់ពន្ធមនុស្ស ព្រោះថាពួកគេបានដឹកជញ្ជូនមនុស្សពីតំបន់រដ្ឋបាលដែលហាមឃាត់ក្នុងការធ្វើដំណើរឆ្លងខេត្ត»។
លោកស្រីបន្ថែមថា៖ «ពួកគេទទួលប្រាក់ជាថ្នូរក្នុងការដឹកជញ្ជូនមនុស្សដោយខុសច្បាប់[បំពានវិធានការកូវីដ១៩] ហើយធ្វើឲ្យប៉ះពាល់ដល់ដល់សុខមាលភាពសាធារណៈ»។ យ៉ាងណា លោកស្រីថា មិនអាចចាត់ទុកថាជាការជួញដូរមនុស្សទេ ប្រសិនបើតុលាការមិនចោទប្រកាន់អ្នកទាំងនោះតាមច្បាប់ទាំងនោះ។
ប្រែសម្រួលពីអត្ថបទភាសាអង់គ្លេស៖ Two-star general among latest to be arrested for illegally transporting people amid COVID-19 travel bans
