សមាគមសម្ព័ន្ធអ្នកសារព័ត៌មានកម្ពុជា

យុវតីពីរនាក់ត្រូវបានគេបោកយកទៅលក់នៅចិនចែករំលែកបទពិសោធន៍ដែលគេធ្វើបាប

កូនកំលោះជនជាតិបរទេស និងកូនក្រមុំជនជាតិខ្មែរកាត់នំខេកក្នុងពិធីមង្គលការនៅរាជធានីភ្នំពេញ កាលពីឆ្នាំ២០១១។ រូបភាពផ្តល់ឱ្យ
កូនកំលោះជនជាតិបរទេស និងកូនក្រមុំជនជាតិខ្មែរកាត់នំខេកក្នុងពិធីមង្គលការនៅរាជធានីភ្នំពេញ កាលពីឆ្នាំ២០១១។ រូបភាពផ្តល់ឱ្យ

យុវតីពីររូបដែលចាញ់បោកមេខ្យល់យកទៅលក់នៅប្រទេសចិន ហើយត្រូវបានជួយសង្គ្រោះ និងបញ្ជូនត្រលប់មកកម្ពុជាវិញកាលពីចុងឆ្នាំ២០២២ រៀបរាប់ពីដំណើរជីវិតរងទុក្ខវេទនា​ទាំងការបំពានផ្លូវភេទ វាយដំលើរូបរាងកាយ និងសម្ពាធផ្លូវចិត្ត ដែលពួកគាត់អស់សង្ឃឹម ហើយគិតថាប្រាកដជាស្លាប់ខ្លួននៅក្នុងប្រទេសចិន។​

យុវតីទី១ដែលចែករំលែកបទពិសោធន៍នេះមានស្រុកកំណើតនៅខេត្តព្រៃវែង ដើម្បីការពារ​កិត្តិយស​ជូនគាត់ អ្នកសរសេរសុំដាក់ឈ្មោះហៅក្រៅថា កញ្ញា ព្រៃវែង។​ កាលពីឆ្នាំ២០២០ កញ្ញា ព្រៃវែង ជាឈ្មោះអ្នកសរសេរដាក់ឱ្យ មានអាយុ១៥ឆ្នាំ បានធ្វើដំណើរពីស្រុកកំណើត​មក​ធ្វើ​ការងារនៅក្នុងអាហារដ្ឋានមួយកន្លែងនៅរាជធានីភ្នំពេញ។ បន្ទាប់មកមានស្ត្រីម្នាក់​ទាក់​ទង​តាម​​បណ្តាញសង្គមហ្វេសប៊ុកបបួលឱ្យទៅធ្វើការងារនៅក្នុងប្រទេសចិន​ដោយប្រាប់​ថា ទទួល​បានប្រាក់ខែច្រើន។

ដោយសារតែភាពក្មេងខ្ចី និងចំណេះដឹងនៃការគិតនៅមានកម្រិត កញ្ញាមិនបានចាប់អារម្មណ៍​អ្វីទាំងអស់គឺចាប់អារម្មណ៍តែប្រាក់ខែច្រើន ក៏យល់ព្រមទៅតាមការអូសទាញ។ ពេលនោះ​គាត់​ត្រូវបានគេនាំធ្វើលិខិតឆ្លងដែនក្លែងក្លាយ ឬធ្វើដោយខុសច្បាប់ព្រោះគាត់ទើបតែមាន​អាយុ​១៥ឆ្នាំមិនទាន់គ្រប់អាយុធ្វើលិខិតឆ្លងដែនទេ។ កន្លែងធ្វើលិខិតឆ្លងដែននោះ​គាត់មិនចាំ​ថា​នៅកន្លែងណាទេគ្រាន់តែចាំថា អ្នកនៅកន្លែងធ្វើនោះពាក់ម៉ាស់បិទមុខទាំងអស់។​

កញ្ញាត្រូវបានដឹកជញ្ជូនដោយលួចលាក់តាមរយៈម៉ូតូផង តាមរថយន្តផង និងដើរកាត់ព្រៃភ្នំ​ផង ទីបំផុតទៅដល់ប្រទេសចិនដូចក្តីស្រមៃរបស់នាងមែន។ ប៉ុន្តែអ្វីដែលនាង​មិននឹកស្មាន​ដល់នោះ គឺគេយកនាងទៅឃុំនៅក្នុងបន្ទប់តូចមួយដោយបង្ខំឱ្យយកប្តីជាជនជាតិចិន ឬហៅ​ថា បង្ខំឱ្យនៅជាមួយបុរសជនជាតិម្នាក់នោះតាមដែលមេខ្យល់ចាត់ចែង។​

ដោយរងការគំរាមកំហែងវាយដំ បង្អត់អាហារ កញ្ញា ព្រៃវែង ក៏ព្រមទទួលយក​បុរសម្នាក់​ដែល​ខ្លួនមិនស្គាល់ មិនចេះភាសាក្នុងការនិយាយស្តីមកធ្វើជាប្តី។​

កញ្ញា ព្រៃវែង បញ្ជាក់ថា៖ «គេគំរាមយើងថា បើអត់យកប្តីទេគេវាយធ្វើបាបយើងបង្អត់អាហារ​យើង អត់ឱ្យស៊ីបាយស៊ីអីចឹងទៅ»។​

ជាអកុសលប្តីដែលកញ្ញាព្រមទទួលយកនេះ ជាបុរសមានបញ្ហាខួរក្បាល ហើយជាញឹកញាប់​ក៏វាយដំក្នុងមូលហេតុរឿងតិចតួច ឬក៏វាយដំបង្ខំរួមភេទជាដើម។​ កញ្ញាយំស្ទើររាល់យប់​ដោយ​​សារ​​នឹកផ្ទះផង និងបារម្ភខ្លាចមានការវាយដំធ្វើទារុណកម្មរហូតដល់ស្លាប់ផង។​

កញ្ញា ព្រៃវែង ឱ្យដឹងថា៖ «ខ្ញុំភ័យខ្លាចគេសម្លាប់ខ្ញុំចោលចឹងទៅម៉ែឪខ្ញុំមិនវេទនា។ ភ័យខ្លាច​ណា​ស់​នៅ​ស្រុកគេម្នាក់ឯងមិនដឹងពឹងអ្នកណាមានតែពឹងខ្លួនឯង។ នៅចិនហ្នឹងគេឈឺ គេងាប់​២​ទៅ​៣នាក់​ដែរ ខ្មែរៗនៅហ្នឹង»

កញ្ញា ព្រៃវែង ឱ្យដឹងទៀតថា ពេលព្រមយកបុរសជាជនជាតិចិននោះធ្វើជាប្តីដោយមិនបាច់​រៀប​ការ​នោះ ៣ខែដំបូងគេមិនឱ្យប្រើទូរសព្ទ ឬដើរទៅណាទេ ប៉ុន្តែក្រោយមកគេ​ឱ្យគាត់បាន​ប្រើ​ទូរសព្ទធម្មតាក្នុងការទំនាក់ទំនងគ្នា។ ក្រោយពេលដែលបានទូរសព្ទប្រើហើយ​គាត់ក៏​តែង​តែ​​ប្រឹងប្រែងក្នុងការទាក់ទងមកសាច់ញាតិនៅកម្ពុជា។ ដោយនៅតែ​មិនអាចទាក់ទងគ្រួសារ​បាន ហើយទ្រាំនៅជាមួយគ្រួសារជាប្តីជនជាតិចិននោះមិនបាន កញ្ញា ព្រៃវែង ក៏សម្រេច​ចិត្ត​ចាក​​ចេញ​​ពីផ្ទះនោះទៅនៅបន្ទប់ជួលជាមួយជនជាតិខ្មែរម្នាក់ទៀត ដែលរត់ចេញពីផ្ទះប្តីដូចគ្នា ក្រោយ​មកទើបព្យាយាមទាក់ទងស្ថាប័នពាក់ព័ន្ធអាចវិលត្រលប់មកកម្ពុជាវិញ។​

ក្រោយពេលវិលមកដល់ស្រុកកំណើតវិញនៅថ្ងៃទី៤ ខែវិច្ឆិកា ឆ្នាំ២០២២ កញ្ញាសម្រេចរៀប​ចំ​លក់អាហារខ្លះនៅមុខផ្ទះនៅក្នុងខេត្តព្រៃវែង មិនហ៊ានទៅរកការងារនៅឯណាទៀតទេ ព្រោះ​ខ្លាចគេយកទៅលក់ទៀត។​

កញ្ញា ព្រៃវែង បន្តទៀតថា៖ «ចង់លក់អីវ៉ាន់ ចង់បើកហាងនៅមុខផ្ទះខ្លួនឯង។ ខ្ញុំលែងចង់​ទៅ​ណាហើយខ្លាចចាញ់បោកគេទៀត»

សូមងាកមកតាមដានករណីទី២គឺយុវតីម្នាក់ដែលមានស្រុកកំណើតនៅខេត្តរតនគិរី ដែល​អ្នកសរសេរដាក់​ឈ្មោះថា ​កញ្ញា រតនគិរី។ កាលពីឆ្នាំ២០២០ កញ្ញា រតនគិរី អាយុ២៥ឆ្នាំ ធ្វើការនៅកាស៊ីណូ​ក្នុងក្រុង​បាវិត។ នៅឆ្នាំនោះស្ត្រីជាសាច់ញាតិដែលគាត់ទុកចិត្តម្នាក់​បាន​បបួល​​ទៅចូលរួមបុណ្យ​​គម្រប់ខួប៧ថ្ងៃអ្នកសា្គល់គ្នានៅក្នុងប្រទេសវៀតណាម។​ កញ្ញា​ឱ្យដឹង​ថា ពេលចប់កម្មវិធី​បុណ្យ​នៅប្រទេសវៀតណាមហើយសាច់ញាតិរបស់គាត់ដែលគាត់ហៅថា ជាយាយ នោះ បានឱ្យគាត់ចាំនៅទីតាំងមួយ ហើយលោកយាយនោះក៏គេចខ្លួនបាត់។

កញ្ញា រតនគិរី ប្រាប់ថា៖ «បុណ្យរួចអីរួចពួកខ្ញុំក៏រៀបចំទៅវិញ​ហើយគាត់ឱ្យខ្ញុំចាំនៅ​បេនឡាន​ហើយគាត់ថា គាត់ទៅបន្ទប់ទឹក ហើយគាត់ក៏ទៅបាត់ចឹងទៅ។​ ហើយមានពួកវៀតណាម​៥​ទៅ​៦នាក់នៅរង់ចាំមើលយើងចឹងទៅ ហើយយើងទៅណាក៏មាន​គេ​ទៅតាមដែរ។ ខ្ញុំដឹងដល់​ពេលខ្ញុំបានជួបខ្មែរ២នាក់ហើយគេប្រាប់ហ្អែងចាញ់បោកគេហើយ»។​

​បន្ទាប់ពីដឹងខ្លួនថា ត្រូវគេបោកប្រាស់ កញ្ញាគ្មានដើរថយក្រោយវិលមកស្រុកកំណើតវិញ​បាន​ទេគឺមានតែបន្តដើរទៅមុខតាមការរុញច្រានពីមេខ្យល់ពីមួយដំណាក់ទៅមួយដំណាក់​ទៀត។​ កញ្ញាត្រូវបានគេដឹកជញ្ជូនតាមរថយន្ត១សប្តាហ៍ ហើយដើរកាត់ព្រៃភ្នំ២សប្តាហ៍​ទើបទៅ​ដល់​ព្រំដែនវៀតណាមចិន។​

​ពេលរៀបឆ្លងដែនចូលទឹកដីចិន អាជ្ញាធរវៀតណាមបានចាប់មេខ្យល់ជនជាតិវៀតណាម ហើយ​​បានជួយសង្គ្រោះជនជាតិ​វៀតណាម​៣០នាក់ចេញពីការជួញដូរ​នោះបញ្ជូន​ទៅ​ស្រុក​កំណើត​​វិញអស់ ចំណែកកញ្ញា រនតគិរី និងស្ត្រីជនជាតិខ្មែរ២នាក់ទៀតបែកផ្លូវគ្នាចា​ប់​ពីពេលនោះ​មក។

កញ្ញា រតនគិរី រៀបរាប់ថា ពេលនោះ រូបគាត់ដូចជាសំរាមដែលគេមិនត្រូវការ ​គឺអាជ្ញាធរ​វៀតណាម​រុញគាត់ឱ្យចូលទឹកដីចិនដើម្បីគេចចេញពីការទទួលខុសត្រូវ ចំណែកអាជ្ញាធរចិន​រុញគាត់ចូលទឹកដីវៀតណាមវិញដោយគេចពីការទទួលខុសត្រូវវិញដែរ។ សកម្មភាពនេះ ៣ដង​ទើប​គាត់បន្លំខ្លួនជាមួយអ្នកដំណើរផ្សេងទៀតដើរចូលទឹកដីចិនក្បែរព្រំដែន។ ពេលនោះ​សម្ភារៈ​ប្រើ​ប្រាស់​គ្រឿងអលង្ការរបស់គាត់ត្រូវគេដកហូត អស់គឺនៅសល់តែខោអាវជាប់ខ្លួន ដើរសុំបាយ​អ្នកភូមិជនជាតិចិនហូបហើយដេកតាមផ្លូវក្នុងសភាពត្រជាក់ធ្លាក់ទឹកកក។​

នៅទីបំផុតគឺ១សប្តាហ៍កន្លងផុតទៅ កញ្ញា រតនគិរី បានសុំផ្ទះគ្រួសារជនជាតិចិនដែលមាន​លក់ទំនិញគ្រឿងសំណង់ខ្នាតតូចមួយស្នាក់នៅ ម្ចាស់ផ្ទះក៏អនុញ្ញាតឱ្យនៅហើយ​គាត់ក៏ជួយ​ធ្វើការងារដើម្បីដូរបាយទទួលទាន ហើយរៀនភាសាចិនខ្លះដើម្បីទំនាក់ទំនងគ្នា។​ ស្ថានភាព​សំណាងល្អរយៈពេលខ្លីក៏ប្រែទៅជាគ្រោះអាក្រក់វិញនៅក្នុងផ្ទះនេះដដែល គឺកញ្ញារតនគិរីត្រូវ​បានបុរសជាប្តីម្ចាស់ផ្ទះនេះបង្ខំរួមភេទបន្តបន្ទាប់នៅពេលដែលប្រពន្ធគាត់មិននៅផ្ទះ។​ ដោយ​ការមិនអាចទ្រាំនឹងការបំពានបែបនេះបានហើយមើលទៅទឹកចិត្តប្រពន្ធជាម្ចាស់ផ្ទះនេះអាច​ទុកចិត្តក៏ប្រាប់ពីសកម្មភាពរបស់ប្តីម្ចាស់ផ្ទះធ្វើបាបរូបនាង។​

ក្រោយពេលដឹងរឿងហើយស្តី្រម្ចាស់ផ្ទះមិនបានរករឿងអ្វីទេ ហើយបានទិញទូរសព្ទឱ្យកញ្ញា រតនគិរី ទាក់ទងសាច់ញាតិនៅកម្ពុជាដើម្បីវិលត្រលប់ស្រុកកំណើតវិញ។ កញ្ញាទាក់ទងរហូត​ដល់២០លេខទើបទាក់ទងសាច់ញាតិបាន ប៉ុន្តែសាច់ញាតិទាំងនោះមិនមាន​មធ្យោបាយ​ជួយ​គាត់ទៅស្រុកកំណើតវិញទេ។

ដោយមិនអាចវិលត្រលប់មកស្រុកកំណើតបាន ហើយក៏មិនអាចនៅផ្ទះនោះបន្តទៀត កញ្ញា រតនគិរី បានស្វែងរកអ្នកផ្សេងទៀតក្បែរនោះឱ្យជួយ ហើយគាត់ត្រូវបានគេលក់​ទៅគ្រួសារ​ផ្សេងទៀតដែលគេទិញយកទៅធ្វើជាប្រពន្ធ។​

វាសនា កញ្ញា រតនគិរី ក៏មិនខុសពីកញ្ញាព្រៃវែងដែរ គឺបានប្តីដែលមានសតិមិនល្អ និយាយ​មិនចេញ ហើយតែងតែវាយដំបង្ខំរួមភេទ និងវាយដំក្នុងរឿងរ៉ាវ​ផ្សេងៗពេលដែលប្តីនោះ​មានអារម្មណ៍មិនល្អ។​

កញ្ញាឱ្យដឹងថា ដោយសារទ្រាំនឹងការលំបាកមិនបានទើបគាត់រត់ទៅរកសមត្ថកិច្ចចិនឱ្យជួយ ប៉ុន្តែសមត្ថកិច្ចចិនតែងតែបញ្ជូនរូបគាត់មកគ្រួសារប្តីនោះវិញដដែល ហើយក៏មានការឃុំខ្លួន​រូបគាត់ទៀតផង។

កញ្ញា រតនគិរី បញ្ជាក់ថា៖ «រត់ទៅគេនាំខ្ញុំមកផ្ទះវិញ រត់ទៅទៀតគេនាំខ្ញុំមកផ្ទះវិញ ហើយគេ​ឃុំខ្លួន។​ លើកទី២ គេឃុំខ្លួនខ្ញុំតែម្តងទៅ»

កញ្ញា រតនគិរី បន្តថា រហូតដល់ឆ្នាំ២០២២ ទើបសមត្ថកិច្ចចិនមួយក្រុមបានសម្រុក​ចូល​ផ្ទះ​ដែល​គាត់នៅនោះ ហើយសង្គ្រោះគាត់រៀបចំបញ្ជូនមកកម្ពុជាវិញ។ 

ទាំងកញ្ញា ព្រៃវែង និងកញ្ញា រតនគិរី សុទ្ធតែបង្ហាញអារម្មណ៍ថា ស្ថានភាព​នៅក្នុង​ប្រទេសចិន​ប្រមាណ២ឆ្នាំរបស់ពួកគាត់គឺពួកគាត់មិនដែលរំពឹងថា មានជីវិតបានវិលមកស្រុកវិញទេ ហើយពួកគាត់ក៏បានឃើញស្ត្រីដែលចាញ់បោកគេយកទៅលក់នៅចិនស្លាប់បន្តបន្ទាប់​ចោល​ឆ្អឹងនៅទីនោះដែរ។​

លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍​នៃ​គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកយកព័ត៌មានខេមបូចា ព្យាយាម​ទាក់ទងតាមទូរសព្ទ និងផ្ញើសារតាមតេឡេក្រាម រយៈពេល២សប្តាហ៍កន្លងមកនេះ មិនមាន​អ្នកទទួលហើយក៏មិនមានការឆ្លើយតបសារដែរ។​

ក្រុមការងារខេមបូចាក៏បានព្យាយាមទាក់ទងអ្នកនាំពាក្យក្រសួងការបរទេស និង​សហប្រតិបត្តិការអន្តរជាតិលោក អាន សុខខឿន តាមទូរសព្ទជាច្រើនដង និងច្រើនថ្ងៃ តែ មិនមានអ្នកទទួលទូរសព្ទ ហើយសារដែលផ្ញើតាមបណ្តាញទំនាក់ទំនងសង្គម WhatsApp ក៏មិនមានអ្នកឆ្លើយតប។  

ចំណែកអ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា អាជ្ញាធរតែងតែ​យក​ចិត្តទុកដាក់អប់រំដល់ពលរដ្ឋកុំឱ្យចាញ់​បោកគេ និងបង្ក្រាបដល់ក្រុមជួញដូរ។ ប៉ុន្តែលោក​ថា នៅឆ្នាំ២០២២កន្លងទៅនេះ ក្រសួងមិនទទួលបានបណ្តឹងករណីជួញដូរមនុស្សទេ។​

លោក ខៀវ សុភ័គ ថ្លែងថា៖ «យើងកម្រទទួលបានសំណើ ឬសំណូមពរអីឱ្យជួយណាស់ មាន​ដែរមានតែស្នើឱ្យជួយ[ជន]ជាតិគេនៅស្រុកខ្មែរដែលមានការចាប់ជំរិតអីចឹងទៅជាង៧០០នាក់។​ដោយឡែកបើសំណូពរឱ្យជួយខាងខ្មែរកម្រឃើញមានណាស់និយាយរួមមិនឃើញមាន​តែ​ម្តង»​

លោកស្រី ប្រុក វ៉ាន្នី ទី​ប្រឹក្សា​ឯករាជ្យ​ផ្នែក​យេន​ឌ័រមានប្រសាសន៍ថា ដោយសារតែ​ភាពក្រីក្រ​ទើបនាំឱ្យមានការជួញដូរទាំងកម្លាំង​ពលកម្ម និងជួញដូរផ្លូវភេទ។ លោកស្រីកត់សម្គាល់ថា អ្នករងគ្រោះមានទាំងបុរស និងស្ត្រី។​

លោកស្រី ប្រុក វ៉ាន្នី អំពាវនាវឱ្យអាជ្ញាធរពាក់ព័ន្ធបង្កើនការផ្សព្វផ្សាយអប់រំដល់ក្មេងស្រី​ដែល​ជា​គោលដៅខ្ពស់នៃការជួញដូរ។ លោកស្រីបន្តថា ក្រុមប្រឹក្សាឃុំសង្កាត់ដែលកើតចេញ​ពីការ​បោះឆ្នោតដើរតួនាទីសំខាន់ក្នុងការផ្សព្វផ្សាយបញ្ហាទាំងនេះ ព្រោះពួកគេនៅជិតពល​រដ្ឋ​ជាង​មន្ត្រីជំនាញថ្នាក់លើ។​

លោកស្រី ប្រុក វ៉ាន្នី បញ្ជាក់ថា៖ «ជាទូទៅរឿងកើតឡើងនៅតាមភូមិតាមឃុំហើយដែលស្ត្រី​ទូទៅ​​ត្រូវតែ​ដឹង។​ ស្ត្រីក្នុងឃុំត្រូវតែផ្សព្វផ្សាយ ចែកចាយ ចងក្រង ឱ្យដឹងថា ស្ត្រីនេះមាន​បញ្ហានេះ​ត្រូវ​ទៅ​ណា? ត្រូវទៅពេទ្យ»។​

ប្រធាន​ផ្នែក​ស្ត្រី​របស់​សមាគម​សិទ្ធិមនុស្ស​អាដហុក (Adhoc) លោកស្រី ម៉ៅ ម៉ាប់ មាន​ប្រសាសន៍​ថា ករណីជួញដូរមនុស្សទាំង​ជួញ​ដូរកម្លាំងពលកម្ម និងជួញដូរផ្លូវភេទមិនមានការ​ថយចុះទេ។ មូលហេតុដែលនាំឱ្យជនរងគ្រោះធ្លាក់ខ្លួនចាញ់បោកគេគឺដោយសារ​តែស្ថានភាព​សេដ្ឋកិច្ច ពួកគេខ្វះការពិចារណាជឿតាមមេខ្យល់​ដែលឃោសនាថាស្វែងរកការងារ​មាន​ប្រាក់​ខែ​ច្រើន។ នៅក្នុងនោះបញ្ហាអំពើហិង្សាក្នុងគ្រួសារលោកស្រី ម៉ៅ ម៉ាប់ ក៏កត់សម្គាល់ថា ជា​មូលហេតុមួយធ្វើឱ្យជនរងគ្រោះបាត់ភាពកក់ភាពកក់ក្តៅក្នុងគ្រួសារហើយងាយចាញ់បោកគេ។

លោកស្រី ម៉ៅ ម៉ាប់ ឱ្យដឹងទៀតថា ករណីស្ត្រីខ្មែរចាញ់បោកគេនាំទៅលក់នៅចិន​គឺតែងតែ​រងគ្រោះ​ទាំងការវាយដំផ្លូវកាយ និងរំលោភបំពានផ្លូវភេទ។

លោកស្រី ម៉ៅ  ម៉ាប់ ថ្លែងថា៖ «ភាគច្រើនត្រូវបានបង្ខាំងឱ្យនៅក្នុងផ្ទះ។ ​ហើយក៏ត្រូវទទួលរង​អំពើ​ហិង្សា​វាយដំពីប្តី។ ករណីខ្លះគាត់ត្រូវបានលក់ពីគ្រួសារមួយទៅគ្រួសារមួយ។ ហើយ​ពេល​ខ្លះក៏ត្រូវបានបង្ខំឱ្យរួមភេទជាមួយសមាជិកគ្រួសារផ្សេងទៀតក៏មានដែរ»

លោកស្រី ម៉ៅ ម៉ាប់ អំពាវនាវឱ្យស្ថាប័នពាក់ព័ន្ធបង្កើនយន្តការជួយដល់​ជនរងគ្រោះ​ដែល​ត្រូវ​បាន​គេជួញដូទាំងជួយសង្គ្រោះ​ឱ្យ​វិល​ត្រលប់មកស្រុកកំណើត និងការជួយពង្រឹង​សមត្ថកិច្ច​ក្រោយជួយសង្គ្រោះ។ លោកស្រីបញ្ជាក់ថា យន្តការរបស់អាជ្ញាធរបច្ចុប្បន្ន​មានច្រើនតែ​ហាក់​មិន​ទាន់ឆ្លើយតបគ្រប់គ្រាន់លើបញ្ហាដែលកំពុងកើតមាននៅឡើយ។​

អ្នកនាំពាក្យក្រសួងសង្គមកិច្ច អតីត​យុទ្ធជន និងយុវនីតិសម្បទា លោក តូច ចាន់នី មាន​ប្រសាសន៍ សម្រាប់ក្រសួងមិនទាន់មានមណ្ឌល​ជួយ​ស្តារនីតិសម្បទា​ដល់ជនរងគ្រោះ​ក្រោយ​ពេលសង្គ្រោះបានពីការជួញដូរទេ។ លោកបន្តថា បច្ចុប្បន្នក្រសួង​ក៏​កំពុង​រៀបចំ​បង្កើត​មណ្ឌល​ផ្ទាល់ខ្លួន និងកំពុងសហការជាមួយដៃក្នុងជួយជនរងគ្រោះ។​

លោក ចាន់នី បន្ថែមថា៖ «យើងអត់មានមណ្ឌលហ្នឹងទេ។ យើងកំពុងរៀបចំមណ្ឌល​សំចត។ មណ្ឌលហ្នឹងយើងអត់ទាន់មាននៅ​ឡើយ​បើមាន​ករណីហ្នឹងយើងបោះ​ទៅអង្គការ​ដៃគូឱ្យជួយ ព្រោះអង្គការខ្លះគាត់មានកម្មវិធីរបស់គាត់»។

របាយការណ៍របស់សមាគមការពារសិទ្ធិមនុស្សអាដហុកបង្ហាញថា ការជួញដូរមនុស្សទាំង​ជួញដូរ​កម្លាំងពលកម្ម និងជួញដូរផ្លូវភេទមិនមានការថយចុះទេ។ របាយការណ៍សមាគមនេះ​ទទួលបានគឺនៅឆ្នាំ២០២០ មាន៤៦ករណី នៅឆ្នាំ២០២១ មាន៦៤ករណី និងនៅឆ្នាំ​២០២២​​មាន៧៨ករណី។​

កាលពីខែកក្កដាឆ្នាំ២០២២ ក្រសួងការបរទេសសហរដ្ឋអាមេរិក​បានចេញរបាយការណ៍​បញ្ជាក់​​ថា កម្ពុជាមិនទាន់បានបំពេញកាតព្វកិច្ចក្នុងការលុបបំបាត់ការជួញដូរមនុស្ស​នៅ​ឡើយទេ។ សហរដ្ឋ​អាមេរិកបានទម្លាក់ចំណាត់ថ្នាក់កម្ពុជាពីលេខ២ទៅលេខ៣​គឺជា​ចំណាត់​ថ្នាក់ទាបបផុតស្តីពីការ​ជួញដូរមនុស្ស៕

1,035 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម