អ្នកបញ្ជាទិញនាំមុខគេរបស់ចក្រភពអង់គ្លេសចំនួនប្រាំពីរដែលមកពីឧស្សាហកម្មអង្ករ គ្រាប់ស្វាយចន្ទី និងផ្លែឈើស្ងួតកំពុងមកទស្សនកិច្ចប្រទេសកម្ពុជាចាប់ពីថ្ងៃទី៩ ដល់ថ្ងៃទី១៥ ខែកុម្ភៈ ឆ្នាំ២០២៥ ដើម្បីស្វែងរកឱកាសអាជីវកម្ម និងពង្រឹងទំនាក់ទំនងពាណិជ្ជកម្មជាមួយអ្នកផលិតកសិកម្មក្នុងស្រុក។ ទន្ទឹមនឹងនោះ កសិករក្នុងស្រុកកំពុងអំពាវនាវឱ្យមានការគាំទ្របន្ថែមទៀត ដើម្បីបង្កើនការនាំចេញផលិតផលកសិកម្ម។
ទទួលបានមូលនិធិពីរដ្ឋាភិបាលចក្រភពអង់គ្លេស ក្រោមកម្មវិធីភាពជាដៃគូពាណិជ្ជកម្មរបស់ចក្រភពអង់គ្លេស (UKTP) និងអនុវត្តដោយមជ្ឈមណ្ឌលពាណិជ្ជកម្មអន្តរជាតិ (ITC) គណៈប្រតិភូនឹងភ្ជាប់ទំនាក់ទំនងជាមួយអ្នកផលិតនៅរាជធានីភ្នំពេញ បាត់ដំបង សៀមរាប និងកំពង់ធំ តាមរយៈកិច្ចប្រជុំធុរកិច្ច ក៏ដូចជាការចុះមើលទីតាំងរោងចក្រកែច្នៃគ្រាប់ស្វាយចន្ទី ស្រូវ និងប្រតិបត្តិការស្វាយស្ងួត។
កម្មវិធីនេះផ្តល់ឱកាសសម្រាប់ការផ្លាស់ប្តូរមុខមាត់ជាមួយអ្នកផលិត និងភាគីពាក់ព័ន្ធសំខាន់ៗនៅកម្ពុជា។
លោក អួន ស៊ីឡូត ប្រធានសមាគមគ្រាប់ស្វាយចន្ទីកម្ពុជាបានប្រាប់ សារព័ត៌មានខេមបូចា ថា គ្រាប់ស្វាយចន្ទីកែច្នៃត្រូវបាននាំចេញទៅកាន់ប្រទេសជប៉ុន ចិន និងអឺរ៉ុប។ លោកបន្តថា ប្រសិនបើចក្រភពអង់គ្លេសវិនិយោគ ឬនាំចូលពីកម្ពុជា វានឹងក្លាយជា «ការសាកល្បងទីផ្សារដ៏ល្អ» និងជាសញ្ញាវិជ្ជមានសម្រាប់ទីផ្សារស្វាយចន្ទីនៅកម្ពុជា។
កម្ពុជានាំចេញផលិតផលគ្រាប់ស្វាយចន្ទីឆៅជាចម្បង។ ក្នុងឆ្នាំ២០២៤ គ្រាប់ស្វាយចន្ទីឆៅប្រហែល ៨៥០ ០០០តោនដែលមានតម្លៃ ១,២ពាន់លានដុល្លារត្រូវបានដឹកជញ្ជូនទៅកាន់ប្រទេសវៀតណាម ឥណ្ឌា បង់ក្លាដែស និងប្រទេសផ្សេងៗទៀត។ ក្នុងនោះ វៀតណាម ជាប្រទេសនាំចេញធំជាងគេដែលមានចំនួន ៧៩៥ ០០០ តោន។
លោក ស៊ីឡូត បានបញ្ជាក់ថា៖ «មានសហគ្រាសប្រមាណ ៥០ នៅកម្ពុជា ដែលផលិត និងកែច្នៃគ្រាប់ស្វាយចន្ទី រួមទាំងសហគ្រាសធុនមធ្យមចំនួនប្រាំមួយផងដែរ។ សហគ្រាសក្នុងស្រុករបស់យើងមានទំហំតូច ហើយមិនមានដើមទុនធ្វើការគ្រប់គ្រាន់ទេ»។
បញ្ហាមួយទៀតគឺកម្រិតកែច្នៃ និងផលិតកម្មរបស់សហគ្រាសនៅមានកម្រិតទាប។ លោកបានលើកឡើងថា ការដាក់ចេញនូវទីផ្សារថ្មីគឺល្អសម្រាប់ប្រទេសកម្ពុជា ប៉ុន្តែបញ្ហាចម្បងគឺទំនិញមិនគ្រប់គ្រាន់សម្រាប់តម្រូវការទីផ្សារ ដោយសារសហគ្រាសខ្វះទុនធ្វើការដើម្បីទិញគ្រាប់ស្វាយចន្ទីឆៅដើម្បីកែច្នៃពេញមួយឆ្នាំ។
លោក ស៊ីឡូត បានឱ្យដឹងថា៖ «សមាគមចង់ឱ្យធនាគារបន្ធូរបន្ថយតម្រូវការ ហើយរដ្ឋាភិបាលពង្រឹងសមត្ថភាពសហគ្រាសក្នុងស្រុកក្នុងការស្នើសុំប្រាក់កម្ចី ដូច្នេះសហករណ៍ទាំងនោះអាចមានដើមទុនធ្វើការដើម្បីទិញគ្រាប់ស្វាយចន្ទីឆៅ»។
យោងតាមលោក Escipión Oliveira-Gómez នាយក ITC នៃផ្នែកប្រកួតប្រជែងសហគ្រាស និងស្ថាប័ន បេសកកម្មនេះនឹងមានដំណើរទស្សនកិច្ចទៅកាន់ក្រុមហ៊ុន និងសហករកម្ពុជាល្បីៗ ដោយផ្តល់ឱ្យអ្នកទិញនៃចក្រភពអង់គ្លេសនូវការយល់ដឹងអំពីសមត្ថភាពផលិតកម្មក្នុងស្រុក និងស្តង់ដារគុណភាព។
លោក Oliveira-Gómez មានប្រសាសន៍ថា៖ «គំនិតផ្តួចផ្តើមនេះនឹងជួយផ្លាស់ប្តូរជីវិតពាណិជ្ជកម្ម និងការផ្លាស់ប្តូរ ដោយសម្របសម្រួលទំនាក់ទំនងផ្ទាល់ និងជំរុញការយល់ដឹងកាន់តែច្រើនរវាងអ្នកទិញចក្រភពអង់គ្លេស និងអ្នកផលិតកសិកម្មកម្ពុជា។ វាត្រូវបានគេរំពឹងផងដែរក្នុងការពង្រឹងទំនាក់ទំនងពាណិជ្ជកម្មរវាងប្រទេសទាំងពីរតាមរយៈយុទ្ធសាស្រ្តឈ្នះ-ឈ្នះ ស្របតាមគោលដៅអភិវឌ្ឍន៍ប្រកបដោយចីរភាព»។
ព្រឹត្តិការណ៍បណ្តាញធុរកិច្ចដែលរៀបចំដោយស្ថានទូតអង់គ្លេសប្រចាំនៅកម្ពុជានឹងភ្ជាប់អ្នកទិញចក្រភពអង់គ្លេសជាមួយអ្នកផ្គត់ផ្គង់នៅកម្ពុជា រួមទាំងតំណាងមកពីសហព័ន្ធស្រូវអង្ករកម្ពុជា និងសហព័ន្ធគ្រាប់ស្វាយចន្ទីកម្ពុជា។
បេសកកម្មពាណិជ្ជកម្មគូសបញ្ជាក់ពីការប្តេជ្ញាចិត្តរបស់ UKTP ក្នុងការពង្រឹងទំនាក់ទំនងពាណិជ្ជកម្មជាមួយទីផ្សារដែលកំពុងរីកចម្រើន។ តាមរយៈការសម្របសម្រួលការចូលរួមដោយផ្ទាល់រវាងអ្នកទិញចក្រភពអង់គ្លេស និងអ្នកផលិតកម្ពុជា គំនិតផ្តួចផ្តើមនេះមានគោលបំណងលើកកម្ពស់កំណើនប្រកបដោយនិរន្តរភាពក្នុងវិស័យកសិកម្មនៃប្រទេសទាំងពីរ បង្កើតភាពជាដៃគូដែលមានអត្ថប្រយោជន៍ទៅវិញទៅមក និងការពង្រីកលទ្ធភាពទទួលបានទីផ្សារសម្រាប់ផលិតផលកម្ពុជា។
អ្នកស្រី អ៊ឹម ធីតា កសិករនៅខេត្តបាត់ដំបង ជឿជាក់ថា វត្តមានក្រុមហ៊ុនវិនិយោគនៅកម្ពុជា ជាសញ្ញាល្អសម្រាប់ទីផ្សារអង្ករកម្ពុជា។ កសិករសប្បាយចិត្តដែលពួកគេអាចមានទីផ្សារកាន់តែប្រសើរ ព្រោះតម្លៃស្រូវអាចនឹងមានភាពប្រសើរឡើង។
អ្នកស្រីបន្តថា៖ «ប្រសិនបើគ្មានទីផ្សារសម្រាប់ការផលិតរបស់យើងទេ កសិករនឹងមិនដឹងពីកន្លែងលក់ស្រូវរបស់ពួកគេទេ ហើយពេលលក់បានតម្លៃទាប»។
អ្នកស្រីដាំដុះស្រូវលើផ្ទៃដីស្រែ១០ហិកតា ហើយលក់ទៅឲ្យក្រុមហ៊ុន Amru Rice Cambodia ជាក្រុមហ៊ុនដែលនឹងចូលរួមជាមួយ UKTP ។
ក្នុងនាមជាសមាជិកសហគមន៍កសិកម្ម និងជាអ្នកលក់អង្ករទៅ Amru ដែលអ្នកស្រីត្រូវបានតម្រូវឱ្យបំពេញតាមនីតិវិធីប្រតិបត្តិការស្តង់ដារ អ្នកស្រីបានលើកឡើងថា គួរតែមានក្រុមហ៊ុនផ្សេងទៀតដែលអាច «ទិញស្រូវបានច្រើនតោន» ពីកសិករ។
បច្ចុប្បន្នចំនួនក្រុមហ៊ុនដែលទិញស្រូវមានកម្រិត ដូច្នេះកសិករត្រូវបង្ខំចិត្តលក់ក្រោមតម្លៃទីផ្សារ។
អ្នកស្រីបន្ថែមថា៖ «ឈ្មួញកណ្តាលទិញស្រូវក្នុងតម្លៃទាបជាងក្រុមហ៊ុន។ បើយើងមិនលក់ ស្រូវយើងនឹងខូចខាត។ ដូច្នេះខ្ញុំចង់ឲ្យអ្នកវិនិយោគទាក់ទងសហគមន៍ដោយផ្ទាល់»។
លោក Dominic William ឯកអគ្គរាជទូតអង់គ្លេសប្រចាំនៅកម្ពុជាបានថ្លែងថា វិស័យកសិកម្មជានិយោជកដ៏សំខាន់នៅកម្ពុជា។ ដូច្នេះ ជាផ្នែកមួយនៃគោលដៅរបស់ពួកគេ ចក្រភពអង់គ្លេសកំពុងធ្វើការជាមួយកម្ពុជា ដើម្បីនាំចេញផលិតផលកសិកម្មបន្ថែមទៀតទៅកាន់ចក្រភពអង់គ្លេស។
ដោយបង្ហាញពីក្តីរីករាយដែលអ្នកទិញនៅចក្រភពអង់គ្លេសជាច្រើនបានមកទស្សនានោះ លោកបានថ្លែងថា ពួកគេនឹងអាចមើលឃើញដោយខ្លួនឯងនូវគុណភាពនៃផលិតផលកម្ពុជា។
លោក Dominic បានបន្តថា៖ «គោលបំណងរបស់ខ្ញុំគឺចង់ឱ្យចក្រភពអង់គ្លេសដើរតួនាទីយ៉ាងសំខាន់ក្នុងការរីកចម្រើនរបស់ប្រទេសកម្ពុជា ដើម្បីជួយមនុស្សកាន់តែច្រើននៅក្នុងប្រទេសដ៏អស្ចារ្យនេះ ដើម្បីទទួលបានការងារដែលមានប្រាក់ខែល្អ និងលើកកម្ពស់ជីវភាពរស់នៅសម្រាប់ពួកគេ និងក្រុមគ្រួសាររបស់ពួកគេ»។
លោក Dominic បានថ្លែងថា៖ «យើងចាប់អារម្មណ៍ជាពិសេសសម្រាប់អ្នកទិញរបស់យើងក្នុងការស្វែងរកទំនិញកែច្នៃដែលមានតម្លៃខ្ពស់ជាងនេះ ចាប់តាំងពីផលិតផលទាំងនេះធានាថាប្រជាជនកម្ពុជាចូលរួមចំណែកកាន់តែច្រើននៃតម្លៃដែលអតិថិជនអង់គ្លេសបានបង់នៅហាង ឬផ្សារទំនើបក្នុងស្រុករបស់ពួកគេ។ ខ្ញុំសង្ឃឹមយ៉ាងខ្លាំងថា ពេលខ្ញុំត្រឡប់ទៅចក្រភពអង់គ្លេសវិញ ខ្ញុំនឹងអាចទិញផលិតផលខ្មែរដែលខ្ញុំចូលចិត្តពីហាងជាច្រើននៅទីនោះ»។
កម្មវិធី UKTP មានគោលបំណងជំរុញពាណិជ្ជកម្មពីប្រទេសទៅកាន់ចក្រភពអង់គ្លេស និងសហភាពអឺរ៉ុប ដោយប្រើប្រាស់អត្ថប្រយោជន៍នៃកិច្ចព្រមព្រៀងភាពជាដៃគូសេដ្ឋកិច្ច និងគម្រោងពាណិជ្ជកម្មរបស់ប្រទេសកំពុងអភិវឌ្ឍន៍របស់ចក្រភពអង់គ្លេស។ វាធ្វើការជាមួយសហគ្រាសធុនតូច និងមធ្យម ទីភ្នាក់ងាររដ្ឋាភិបាល អង្គការវិស័យឯកជន និងអ្នកពាក់ព័ន្ធផ្សេងទៀត ដើម្បីជួយសម្រួលដល់សកម្មភាពលើកកម្ពស់ពាណិជ្ជកម្ម និងការកសាងសមត្ថភាព។
លោក ចាន់ សុខឃំាង ប្រធានសហព័ន្ធស្រូវអង្ករកម្ពុជា មិនអាចសុំការអត្ថាធិប្បាយបានទេកាលពីថ្ងៃទី១១ ខែកុម្ភៈ។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មិនអាចសុំការអត្ថាធិប្បាយតាមទូរស័ព្ទ និងកម្មវិធីសង្គម Telegram ទេ៕
ប្រែសម្រួលពីអត្ថបទភាសាអង់គ្លេស៖ UK Buyers Seek to Raise Rice, Cashew Imports from Cambodia, as Farmers Urge More Support
