សមាគមសម្ព័ន្ធអ្នកសារព័ត៌មានកម្ពុជា

សហជីពផ្តល់ «ឱកាសចុងក្រោយមួយលើកទៀត» ដល់ក្រុមហ៊ុនរថយន្តក្រុង ដើម្បីបញ្ចប់ការចរចា

អ្នកបើកបររថយន្តក្រុងរបស់ក្រុមហ៊ុន Giant Ibis Transport ដែលត្រូវបានបណ្តេញចេញពីការងារតវ៉ាកាលពីថ្ងៃទី៧ ឧសភា នៅមុខទីស្នាក់ការក្រុមហ៊ុនក្នុងរាជធានីភ្នំពេញ ដើម្បីទាមទារសំណងសម្រាប់ប្រាក់ឈ្នួលដែលមិនបានបើក។ (រូបភាពផ្តល់ឱ្យ)
អ្នកបើកបររថយន្តក្រុងរបស់ក្រុមហ៊ុន Giant Ibis Transport ដែលត្រូវបានបណ្តេញចេញពីការងារតវ៉ាកាលពីថ្ងៃទី៧ ឧសភា នៅមុខទីស្នាក់ការក្រុមហ៊ុនក្នុងរាជធានីភ្នំពេញ ដើម្បីទាមទារសំណងសម្រាប់ប្រាក់ឈ្នួលដែលមិនបានបើក។ (រូបភាពផ្តល់ឱ្យ)

ក្រុមហ៊ុន Giant Ibis Transport បានពន្យាពេល​ការចរចាជា​ថ្មី​​ទៀតជាមួយសមាជិកសហជីព​ចំនួន​៣០នាក់ ដែលអះអាងថា ពួកគេមិន​ត្រូវបាន​បើក​ប្រាក់ឈ្នួល និងអត្ថប្រយោជន៍​ផ្សេងទៀតជាច្រើន​ឆ្នាំ​មក​ហើយ។ 

ក្រុមហ៊ុនរថយន្តក្រុង ដែលត្រូវបានបង្កើតឡើងដោយក្រុមហ៊ុន Royal Group របស់​លោក​ឧកញ៉ា គិត ម៉េង កន្លង​មក​បានសន្យាថា នឹងគណនា និងផ្តល់ប្រាក់បំណាច់ការងារ និងប្រាក់​អត្ថប្រយោជន៍ផ្សេងទៀត ដែលជំពាក់និយោជិតត្រឹម​ថ្ងៃពុធ បន្ទាប់ពីការចរចារ ដែល​សម្របសម្រួលដោយក្រសួងការងារ។

ក្រុមហ៊ុននេះ​បាន​ខកខាន​មិនបាន​អនុវត្តតាមកាលកំណត់កាលណពីលើក​មុនម្ដងមកហើយ ​ក្នុង​ការ​ផ្តល់​ប្រាក់ឈ្នួល និងអត្ថប្រយោជន៍ដែលមិនទាន់ផ្តល់ជូនសមាជិកសហជីព​​​ ហើយបានស្នើសុំពន្យារពេលមក​ចុងខែឧសភា។

លោក សៀម​ ម៉ូរ៉ាឌី ប្រធាន​សហជីព​បាន​និយាយ​ថា សមាជិក​សហជីព​បាន​ប៉ាន់​ប្រមាណ​ថា ពួកគេ​​ត្រូវ​ក្រុមហ៊ុន​ជំពាក់​សរុប​ជាង១០ម៉ឺន​ដុល្លារ ​យោង​តាម​ច្បាប់​ការងារ ឬ​ប្រហែល​ពី ៧ ០០០ ទៅ ៨ ០០០ ដុល្លារ​ក្នុង​ម្នាក់។ លោក និង​មេដឹកនាំ​សហជីព​ពីរ​នាក់​ទៀត​បាន​ផ្តិត​មេដៃ​លើ​លិខិត​មួយ​កាលពី​ថ្ងៃ​ពុធ ​ដែល​អនុញ្ញាត​ឱ្យក្រុមហ៊ុន​គណនា ​និង​ផ្តល់​សំណង​ត្រឹម​ថ្ងៃ​ទី២៣ ខែ​មិថុនា នេះ​បើ​យោង​តាម​លិខិត​ដែល​ខេមបូចា​បាន​ពិនិត្យ​។

លោក ម៉ូរ៉ាឌី ថ្លែងថា សហជីព​ជឿ​ថា ​ក្រុមហ៊ុន​ដែល​លោក​អះអាង​ម្តង​ហើយ​ម្តង​ទៀត​ថា ​បាន​គណនា​ខុស​ចំពោះ​​អ្វី​ដែល​ជំពាក់​កម្មករ​​នោះ មិន​បាន​ប្រព្រឹត្ត​ដោយ​សុចរិត​ទេ។

លោក ម៉ូរ៉ា​ឌី បានបញ្ជាក់ថា៖ «សមាជិកសហជីពរបស់យើងបានគណនា​រួចហើយ​អំពីប្រាក់​បំណាច់ការ​ងារ និងប្រាក់អតីតភាពការងារ ប៉ុន្តែពួកគេ [ក្រុមហ៊ុន] នៅតែមិនចង់គណនា។ ពួកគេគ្មានទំនួលខុសត្រូវក្នុងការគណនាប្រាក់សំណង​នោះទេ។ ខ្ញុំឆ្ងល់ថា ហេតុអ្វីបានជា​ក្រុមហ៊ុន​ធំមួយគ្មាន​អ្នកជំនាញក្នុងការគណនា [ដើម្បីធ្វើការ​ងារ​​នេះ]។ ខ្ញុំ​គិត​ថា ​នេះ​គ្រាន់​តែ​ជា​ល្បិចកលរបស់​ពួក​គេ​ប៉ុណ្ណោះ»

លោក ម៉ូរ៉ាឌី បន្តថា ប្រសិន​បើ​ក្រុមហ៊ុន​មិនបោះ​ជំហាន​​ទៅ​មុខ​ក្នុង​ការ​កំណត់​​កញ្ចប់​សំណង​តាម​ការ​ព្រមព្រៀង​គ្នា​នៅ​ថ្ងៃ​ទី២៣ ខែ​មិថុនាទេ នោះ​កម្មករ​នឹង​បន្ត​ការ​តវ៉ា។

ម៉ូរាឌី បានបន្ថែមថា៖ «ក្រុមហ៊ុនមានចរិតរឹងរូស។ ពួកគេតែងតែពន្យារ [ការបង់​ប្រាក់​សំណង]។ វា​គឺ​ជា​រឿង​ដដែល​ ដោយ​​ពន្យារ​ពេល​ម្តង​ហើយ​ម្តង​ទៀត​។ យើងបានសម្រេចចិត្ត​ផ្តល់ឱកាសចុងក្រោយដល់ពួកគេរហូតដល់ថ្ងៃទី២៣ ខែមិថុនា។ ប៉ុន្តែនឹងមិនមានការ​ពន្យា​ពេលផ្សេងទៀតទេ»

លោក អ៊ូ ផាន់នី តំណាងក្រុមហ៊ុន Giant Ibis ដែលបានចុះហត្ថលេខាលើកិច្ចព្រម​ព្រៀងជួស​មុខឱ្យ​ក្រុមហ៊ុន បានថ្លែងថា លោក​ «គ្រាន់តែជាអ្នកសម្របសម្រួលប៉ុណ្ណោះ» ហើយបាន​ស្តី​បន្ទោសក្រសួងការងារចំពោះការពន្យាពេលក្នុងការ​ចរចារ»។

លោក ផាន់នី បាន​បញ្ជាក់ថា៖ «យើង​បាន​ផ្តល់​ឲ្យ​ពួកគាត់​ [​​សមាជិក​សហជីពដែល​ត្រូវ​បាន​បញ្ឈប់​​] ​រួច​ហើយ​នូវ​ចំនួន​ទឹកប្រាក់ដែល​ត្រូវ​បើកជូន​​​ [​ការ​គណនា​] ​ទៅ​តាម​នោះ ​មិន​មាន​បញ្ហា​​អ្វី​ទេ​​។ ប៉ុន្តែ​ក្រសួងបានស្នើឱ្យពន្យាពេលការចរចា ក្រុមហ៊ុនក្រាន់តែ​ជាអ្នក​ធ្វើ​ការសម្រេចចិត្ត»

លិខិត​មួយ​ដែល​ខេមបូចា​ទទួលបាន​​មានអត្ថន័យថា ក្រុមហ៊ុន និង​សមាជិក​សហជីព​បាន​ជួបសម្របសម្រួល​គ្នា​នៅ​​ក្រសួង​ការងារ​កាលពី​ថ្ងៃ​ពុធ ប៉ុន្តែ «មិន​បាន​ឈាន​ដល់​ការ​សម្រុះសម្រួល​ទេ»

លិខិត​នោះ​បាន​បញ្ជាក់​ថា ភាគី​ទាំង​ពីរ​ «បាន​យល់ព្រម​ពន្យាពេល​កិច្ចប្រជុំ… ដើម្បី​ឱ្យភាគី​ទាំង​ពីរត្រៀម​ខ្លួន​ និង​រៀបចំ​ឯកសារ​ពាក់ព័ន្ធ​នឹង​ការទូទាត់ប្រាក់ឈ្នយលឲ្យបានច្បាស់លាស់បន្ថែមទៀត»

លោក ម៉ូរ៉ាឌី ប្រធាន​សហជីព​បាន​បន្ថែមទៀត​ថា ​លោក​មាន​អារម្មណ៍​ថា ​ក្រសួង​ការ​ងារ ​ «មិនបានមកយកចិត្តទុកដាក់​»​ក្នុង​ការ​ដោះស្រាយ​ករណី​នេះ។

នៅពេលសាកសួរតាម Telegram ថា តើក្រុមហ៊ុនរថយន្តក្រុងនេះ បានបំពានច្បាប់​ការងារ ​ឬ​យ៉ាងណា ដោយ​ព្យួរការងារបុគ្គលិក​លើសពីពីរខែ ដោយមិនទទួលបានការអនុញ្ញាត​ពី​រដ្ឋាភិបាល​នោះ លោក ហេង សួរ អ្នកនាំពាក្យក្រសួងការងារបានឆ្លើយតបថា «មិន​ត្រឹមត្រូវ»

លោក ហេង សួរ​ មិន​បាន​ឆ្លើយ​តប​នឹង​សំណើសុំការ​អត្ថាធិប្បាយ​​បន្ថែម​នោះទេ​​។

លោក ម៉ូរ៉ាឌី បាននិយាយថា សមាជិកសហជីពប្រឈមមុខនឹងការរើសអើងពីក្រុមហ៊ុន ដែល​តាម​ចោទថា បានជួលបុគ្គលិក​ថ្មីជំនួសឱ្យការទទួល​យក​បុគ្គលិកសហជីពចូល​ធ្វើ​ការ​វិញ​។ ម៉ូរ៉ា​ឌី បាននិយាយថា និយោជិតសហជីពអាចត្រូវបានជួលឡើងវិញ ប្រសិនបើ​ពួកគេយល់​ព្រម​បោះបង់ចោលប្រាក់អត្ថប្រយោជន៍ទាំង​អស់​ ដែលពួកគេជំពាក់ ហើយចាប់ផ្តើមកិច្ចសន្យា​ថ្មី។

លោក​បាន​បញ្ជាក់ទៀតថា៖ «​បុគ្គលិកដែល​គ្មាន​ជម្រើស ពួកគាត់​​បាន​ទទួល​យក​​សំណើរ។ នេះ​គឺជា ការកេងប្រវ័ញ្ចពិតប្រាកដពីក្រុមហ៊ុន»

លោក គិត ម៉េង និង​ក្រុមហ៊ុន Royal Group មិន​បាន​ឆ្លើយ​តប​នឹង​សំណើ​សុំ​ការ​អត្ថាធិប្បាយ​ទេ៕

​ប្រែសម្រួលពីអត្ថបទអង់គ្លេស៖  Union Gives Bus Company ‘One Last Chance’ To Finish Negotiations

570 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម