សមាគមសម្ព័ន្ធអ្នកសារព័ត៌មានកម្ពុជា

ចៅសង្កាត់វត្តគរត្អូញត្អែរពីការប្រើប្រាស់កញ្ចប់ថវិកាឃុំសង្កាត់មានភាពស្មុគស្មាញ

លោក សុខ ឈឿក អាយុ៧០ឆ្នាំ ជាចៅសង្កាត់វត្តគរ ក្រុងបាត់ដំបង ខេត្តបាត់ដំបង។ រូបថតនៅថ្ងៃទី១២ ខែឧសភា ឆ្នាំ២០២២។ ខេមបូចា/ អ៊ួន ឈិន
លោក សុខ ឈឿក អាយុ៧០ឆ្នាំ ជាចៅសង្កាត់វត្តគរ ក្រុងបាត់ដំបង ខេត្តបាត់ដំបង។ រូបថតនៅថ្ងៃទី១២ ខែឧសភា ឆ្នាំ២០២២។ ខេមបូចា/ អ៊ួន ឈិន

នៅតាមឃុំសង្កាត់ទូទាំងប្រទេសតែងតែទទួលបានកញ្ចប់ថវិកាសម្រាប់អភិវឌ្ឍន៍​ក្នុងមូលដ្ឋាន​តាម​រយៈថ្នាក់ជាតិជិត១៣ម៉ឺនដុល្លារក្នុងមួយឆ្នាំៗ។ ប៉ុន្តែចៅសង្កាត់វត្តគរ ស្ថិតក្នុង​ក្រុង​បាត់ដំបង ខេត្តបាត់ដំបង បានលើកឡើងពីភាពស្មុគស្មាញ​ក្នុងការ​ប្រើប្រាស់​កញ្ចប់ថវិកា​ថ្នាក់ជាតិ​នេះ​ទៅវិញ ដោយលោកអះអាងថាមានភាពតឹងតែង ធ្វើឱ្យ​រាំងស្ទះ​ដល់កិច្ចការ​អភិវឌ្ឍ​​មួយ​ចំនួន។

បើតាមលោក សុខ ឈឿក អាយុ៧០ឆ្នាំ ជាចៅសង្កាត់វត្តគរ បានរៀបរាប់ឱ្យដឹងថា ក្នុង​មូលដ្ឋានរបស់លោកតែងតែចង់ឃើញការប្រើប្រាស់ថវិកាដែលថ្នាក់ជាតិផ្ដល់ឱ្យប្រកបដោយ​តម្លាភាព។ ហើយម្យ៉ាងទៀតសោត កញ្ចប់ថវិកាទាំងនោះ គួរតែប្រើទៅដោយភាព​ងាយ​ស្រួល មិនគួរបង្កភាពស្មុគស្មាញដល់ថ្នាក់មូលដ្ឋានឡើយ។

ទាក់ទងនឹងការប្រើប្រាស់លុយសម្រាប់ដំណើរការគម្រោងអ្វីមួយ លោកចៅសង្កាត់​សង្កត់​ធ្ងន់​ទៅលើការទាមទារវិកយប័ត្រពីថ្នាក់លើ ព្រោះវាមិនមានភាពស៊ីចង្វាក់គ្នា​ជាមួយ​ថ្នាក់​ឃុំ​សង្កាត់។ លោកលើកជាឧទាហរណ៍ថា ពេលប្រជុំជាមួយពលរដ្ឋ តម្រូវការទិញចេកចៀន ប៉ុន្តែអ្នកលក់ចេកចៀនមិនមានវិក្កយបត្រទេ ដូច្នេះត្រូវទិញនំធុងវិញ។

លោកបន្តទៀតថា ហេតុអ្វីខាងរតនាគារមិនយកការបញ្ជាក់ចំណាយពីខាងឃុំសង្កាត់ថា​ពិត​ជា​បានទិញចេកចៀន ព្រោះមានត្រាបញ្ជាក់ពីខាងសង្កាត់ និងមានលេខទូរសព្ទ​អ្នកលក់​ស្រាប់។ ការធ្វើដូច្នេះ វាកាន់តែបង្កភាពស្មុគស្មាញមួយកម្រិតទៀត ព្រោះទាមទារតែវិក្កយបត្រ។

លោកថ្លែងថា៖ «បើអ្នកណាលក់អីឃុំបោះត្រាលេខទូរសព្ទអ្នកលក់ចេកចៀន ដើម្បីឱ្យស្រួល អង្គការគេធ្វើអ៊ីងចឹង អំណាចអ្នកគេចង់បានពិត បើដាក់នំធុងមិនកុហក?​ ប្រជាពលរដ្ឋ​ចង់​ហូបអានេះ ទៅធ្វើអានោះ»។ លោកបន្តថា៖ «ពាក្យថាលុយរដ្ឋពិបាកចាយណាស់ ការងារគឺ​វាពិបាកណាស់ ចាយទាល់តែមានកម្រិត មានគម្រោង មានឯកសារច្បាស់លាស់»។

លោក ឈឿក បន្ថែមថា ក្នុងរយៈពេល៣ខែ ខាងរតនាគារនឹងបើកប្រាក់ឱ្យម្ដង ចំពោះការ​ចំនាយ​នានានៅក្នុងឃុំសង្កាត់ និងទៅតាមតម្រូវការជាក់ស្ដែងដោយផ្អែកលើវិក្កយបត្រ ដែល​គេហៅថាបុរេប្រទាន។

លោកប្រាប់យ៉ាងដូច្នេះថា ប្រភពថវិកាដែលបានគឺមាន២ ទីមួយលុយមូលនិធិ និងទីពីរ លុយ​ការងារសង្គម។ លោកអះអាងថា ចំពោះលុយមូលនិធិ ខាងឃុំសង្កាត់លោក ទទួលបានតែ​តួរលេខ​ប៉ុណ្ណោះ ហើយលោកស្នើសុំឱ្យឃុំសង្កាត់លោក ជាអ្នកកាន់កាប់លុយនេះ​ដោយខ្លួន​ឯង ដើម្បីយកលុយនោះមកដោះស្រាយបញ្ហាបន្ទាន់ចំពោះមុខណាមួយ។

លោកមានប្រសាសន៍ថា៖​ «ជាគោលការណ៍របស់យើងចង់ឱ្យមានការកែសម្រួលខ្លះ កិច្ច​ការងារ​ខ្លះ​បើមានលុយក្នុងដៃរបស់យើង យើងធ្វើការបានល្អហើយបានច្រើន ជាងគម្រោង​ដែលដាក់ទៅ»។

លោកចៅសង្កាត់បន្តទៀតថា មានមេភូមិខ្លះខ្ជិលដកប្រាក់យកមកអភិវឌ្ឍភូមិឃុំ ក៏ដោយសារ​តែដំណើរការយកថវិការដ្ឋមកប្រើបាស់មានភាពស្មុគស្មាញពេក។ ​ហើយក្នុងករណីថវិកា​ទាំង​នោះមិនបានចាយគឺត្រូវលុបចោល ស្មើនឹងសូន្យ ខុសស្រឡះពីថវិកាមូលនិធិផ្សេងៗ ប្រសិន​បើប្រើមិនអស់គឺត្រូវទុកបន្តនៅឆ្នាំក្រោយទៀត។

ជាការសំណូមពរ លោក ឈឿក ស្នើថា ការប្រើប្រាស់ថវិកានៅតាមឃុំសង្កាត់គួរតែ​ប្រគល់​ឱ្យសង្កាត់ជាអ្នកគ្រប់គ្រង ហើយថ្នាក់ខេត្តជាអ្នកត្រួតពិនិត្យរាល់ចំណាយផ្សេងៗ​ក្នុងការ​យក​មកអភិវឌ្ឍមូលដ្ឋាន ដើម្បីជាការងាយស្រួយ និងមានប្រសិទ្ធភាព។

លោកមានប្រសាសន៍ថា៖«ចង់បានឱ្យបន្ធូរបន្ថយរាល់កិច្ចការងារទាំងអស់ហ្នឹង ដើម្បីទូទាត់​លុយហ្នឹងឱ្យវាត្រូវ វិក្កយបត្រខ្លះមេឃុំត្រូវបញ្ជាក់ៗខ្លះទៅ»។ លោកបន្តថា៖ «បើលុយនៅនឹង​ដៃយើង យើងធ្វើកើតតែលុយហ្នឹងប្រើអត់កើត លុយហ្នឹងនៅមានភាពតឹងតែង នៅតែពាក់ព័ន្ធ​នឹងបច្ចេកទេស»។

សាលាសង្កាត់វត្តគរ ស្ថិតក្នុងក្រុងបាត់ដំបង ខេត្តបាត់ដំបង។ រូបថតថ្ងៃទី១២ ខែឧសភា ឆ្នាំ២០២២។ ខេមបូចា/​ សុវណ្ណ ស្រីពេជ្រ

ចំណែកលោក សុខ លូ អភិបាលខេត្តបាត់ដំបងដែលទើបតែផ្លាស់មកថ្មី បានឆ្លើយតបថា បញ្ហាកញ្ចប់ថវិកាសម្រាប់ការចំណាយនៅតាមភូមិសង្កាត់ គឺត្រូវមានភាពច្បាស់លាស់ដូច្នេះ និងមិនអាចគ្រប់គ្រងដោយសង្កាត់ផ្ទាល់បានទេ ព្រោះជាថវិការដ្ឋ។ ម្យ៉ាង លោកយល់ថា ការទាមទារវិក្កយបត្រមិនបានរាំងស្ទះដល់ការអភិវឌ្ឍឃុំសង្កាត់ឡើយ។

លោកមានប្រសាសន៍ថា៖ «រតនាគារគេមាននីតិវិធីរបស់គេ បើថវិកាយើងប្រើប្រាស់​ដោយគ្មាន​ការគ្រប់គ្រង មិនបានទេ ព្រោះលុយរដ្ឋមិនអាចធ្វើចឹងបានទេ»

ជុំវិញករណីនេះ លោក សក់ សេដ្ឋា រដ្ឋលេខាធិការប្រចាំការនៃក្រសួងមហាផ្ទៃ បានមាន​ប្រសាសន៍ថា ការចំណាយនានារបស់ឃុំសង្កាត់គឺតម្រូវឱ្យមានភាពច្បាស់លាស់ មានឯកសារ​ត្រឹមត្រូវ ដើម្បីរតនាគារត្រួតពិនិត្យ មិនអាចយកមកគ្រប់គ្រងដោយខ្លួនឯង​ស្រេចចិត្តនោះទេ ពោលគឺគោរពទៅតាមក្រិតក្រមនៃនីតិវិធីដែលបានចែង។

លោកមានប្រសាសន៍ថា៖ «ជាគោលការណ៍ការចាយវាយលុយត្រូវតែមាននីតិវិធីច្បាស់លាស់ បើមិនដូច្នេះទេវារបូតចុះរបូតឡើងទៅ យើងគ្មានអីត្រួតពិនិត្យទេ»។

លោក សេដ្ឋា បានថ្លែងទៀតថា ការចំណាយក្នុងមួយឃុំៗទូទាំងប្រទេសគឺមានច្រើនមុខ ដូច្នេះ​ខាងរតនាគារគេមានខ្ទង់ថវិកាសម្រាប់ការចំណាយទាំងនោះ ឱ្យតែខាងឃុំសង្កាត់​មាន​ឯកសារត្រឹមត្រូវ ខាងរតនាគារនឹងប្រគល់ថវិកាទៅតាមជាក់ស្ដែង។

លោក សេដ្ឋា ឆ្លើយតបថា៖ «ការចាយវាយថវិការដ្ឋអាចមានការលំបាក ប៉ុន្តែយ៉ាងណា​យើង​ពិនិត្យមើលករណីហ្នឹង គាត់អ្នកចាយចេះតែចង់បានស្រួល តែរដ្ឋអ្នកគ្រប់គ្រងលុយ​ត្រូវ​មាន​ភាពហ្មត់ចត់»។

លោក សេដ្ឋា បន្ថែមថា លោកនឹងពិនិត្យមើលករណីនេះ ពីព្រោះថាការយកថវិការដ្ឋ គឺតម្រូវឱ្យមានតម្លាភាព បើមិនដូច្នេះទេនឹងពិបាកគ្រប់គ្រង ខណៈក្នុងមួយឃុំសង្កាត់ទទួល​បាន​ទឹកប្រាក់ជាង១២ម៉ឺនដុល្លារសម្រាប់ប្រើប្រាស់ក្នុងការអភិវឌ្ឍ។

ដោយឡែក លោក សន ជ័យ ជាប្រធានអង្គការសម័្ពន្ធគណនេយ្យភាពសង្គមកម្ពុជា បានលើក​ឡើងថា មិនមែនជាការងាយស្រួលប៉ុន្មានទេក្នុងការប្រើប្រាស់ថវិការដ្ឋ ពីព្រោះថាឃុំសង្កាត់ ដែលជាថ្នាក់ក្រោមជាតិត្រូវតែគោរពតាមនីតិវិធីដែលបានកំណត់ជារួម។

លោកបញ្ជាក់ថា៖ «នៅតាមឃុំសង្កាត់ ជាជម្រើសខ្ញុំគិតថា ការចាយវាយទៅតាម​គោលការណ៍​ដែលមាននៅក្នុងច្បាប់ ហើយនឹងសមត្ថភាពរបស់អ្នកប្រើប្រាស់ថវិកា​ដូចជានៅមាន​គម្លាត​គ្នា»។

លោកអះអាងថា  ចំពោះគោលការណ៍ និងនីតិវិធីផ្សេងៗមិនទាន់មានភាពយល់ច្បាស់ និង​អនុវត្តបានល្អនៅឡើយ។ ជាជម្រើស គួរតែមានការដោះស្រាយជាប្រព័ន្ធចំពោះបញ្ហានេះ ហើយនៅតាមឃុំសង្កាត់គួរតែមានមន្រ្តីជំនាញក្នុងការគ្រប់គ្រងថវិកានេះ ដើម្បីធានាថា​ការ​ចាយវាយថវិកាត្រឹមត្រូវតាមគោលការណ៍កំណត់។

លោកមានប្រសាសន៍ថា៖ «ឃុំសង្កាត់គួរតែលើកយកបញ្ហាដែលប្រឈមជជែកគ្នាជាមួយ​ស្ថាប័ន​ថ្នាក់លើរបស់ខ្លួន ដើម្បីរកដំណោះស្រាយ។ ថាតើភាពយឺតយ៉ាវ ឬនីតិវិធីស្មុគស្មាញ​បណ្ដាលមកពីអ្វី?»។

រតនាគារ​ ខេត្តបាត់ដំបង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ រូបថតថ្ងៃទី១២ ខែឧសភា ឆ្នាំ២០២២។ ខេមបូចា/ សុវណ្ណ ស្រីពេជ្រ

ថ្វីបើយ៉ាងនេះក្ដី ចៅសង្កាត់វត្តគ  យល់ឃើញថា ប្រសិនបើឃុំសង្កាត់គង់តែទទួល​កញ្ចប់ថវិកា​ដែលជារបស់ខ្លួនម្ដង៣ខែដដែល ហេតុអ្វីមិនបង្កើតគណនី​របស់សង្កាត់មួយដោយឡែកទៅ ដើម្បីងាយស្រួលគ្រប់គ្រងចំណាយ។ ហើយក្នុងករណីមិនទុកចិត្តចំពោះការចំណាយ ថ្នាក់​ខេត្ត​ឬក្រុង អាចធ្វើការត្រួតពិនិត្យរាល់ការចំណាយនោះបានដើម្បីឱ្យមានតម្លាភាព ព្រោះការ​ធ្វើដូច្នេះគឺងាយស្រួល និងចំណេញពេលវេលា។

លោកចៅសង្កាត់ បានមានប្រសាសន៍ថា៖ «រាល់ថវិកាទាំងអស់គឺចាំបាច់ តែដល់តែពិបាកពេក អាការចាំបាច់ខ្ជិល»

សូមរម្លឹកដែរថា យោងតាមសន្និសីទ​សារព័ត៌មាន​ស្តីពី​ «​វឌ្ឍនភាព​នៃ​ដំណើរការ​​អនុវត្ត​កម្មវិធី​អភិវឌ្ឍន៍​តាមបែប​ប្រជាធិបតេយ្យ​សម្រាប់​ថ្នាក់ក្រោម​ជាតិ​» កាលពីខែមករា​ កន្លងទៅ រាជរដ្ឋាភិបាល​តាមរយៈ​ការ​អនុវត្ដ​កម្មវិធី​ជាតិ​ដំណាក់កាល​ទី​២ សម្រាប់ឆ្នាំ២០២២ ដល់ឆ្នាំ​២០៣០ បាន​បង្កើន​ការបែងចែក​ថវិកា​ដល់​រដ្ឋបាល​ថ្នាក់ក្រោម​ជាតិ​ដល់​ជាង​១​ពាន់​លាន​ដុល្លារ​អាមេរិក។ ចំពោះ​រដ្ឋបាល​ក្រុង​-​ស្រុកនីមួយៗ​ទទួលថវិកា​ជា​មធ្យមប្រមាណ​៥៧ម៉ឺន​ដុល្លារក្នុង​មួយ​ឆ្នាំ និងឃុំ​-​សង្កាត់​តូចឬធំ ​ទទួលបានថវិកាជិត១៣ម៉ឺន​ដុល្លារ​ក្នុងមួយឆ្នាំ​៕​

410 views

ព័ត៌មានថ្មីៗ

អត្ថបទពេញនិយម